မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့နယ်အနေဖြင့် ၂၀၂၆ ခုနှစ်၊ မေလ ကုန် ဇွန်လဆန်းပိုင်း၌ မိုးရွာသွန်းမှုဖြစ်ပေါ်ခဲ့သဖြင့် တောင်သူများမှာ မြေပဲစိုက်ပျိုးရန် သင့်တင့်မျှတသော မိုးရေချိန်ရရှိခဲ့ပြီး မြေပဲများကို စတင်စိုက်ပျိုးနေကြပါသည်။ ဒေသတွင်း စားသုံးဆီဖူလုံစေရေးအတွက် တစ်မြို့နယ်လုံး မြေပဲ စိုက်ဧက(၅၂၀၀၀)ကျော်ရှိသည်ဟု စိုက်ပျိုးရေးဦးစီးဌာနမှ သိရှိရပါသည်။ အထွက်နှုန်းအနေဖြင့် ယခင်နှစ်က တင်း(၄၀)သာ ထွက်ရှိခဲ့သော်လည်း ယခုနှစ်တွင် တစ်ဧကကို တင်း(၅၀)နီးပါး ထွက်မည်ဟု မျှော်မှန်းထားကြောင်းသိရပါသည်။ ယခင်နှစ်က ထွက်ရှိလာသောသီးနှံကို မိမိကိုယ်တိုင်ဆီကြိတ်၍ ရောင်းချပြီး ဆီကြိတ်ရန် မြေပဲအခွံချွတ်ခမှာ (၁)တင်းလျှင် ကျပ်(၂၀၀၀)ပေးရ ကြောင်း၊ ဆုံကြိတ်လျှင် တစ်ဆုံကို မြေပဲ(၅)ပြည် ကြိတ်ခွဲ၍ ဆီ(၂) ပိဿာထွက်ရှိပြီး မြေပဲဆုံဆီတစ်ပိဿာလျှင် ကျပ်(၃၅၀၀၀)ထိ ပေါက်မြို့နယ်တွင် ဈေးပေါက်နေကြောင်း သိရှိရပါသည်။
ယခင်နှစ်က တောင်သူအကျိုးအမြတ်အနေဖြင့် ရင်းနှီးမြုပ်နှံငွေ ကုန်ကျစရိတ်မှာ တစ်ဧက ကျပ်(၁၅)သိန်း ဝန်းကျင်ထိရှိပြီး တစ်ဧကဝင်ငွေမှာ ကျပ်(၃၅)သိန်းရရှိကြောင်း၊ ကုန်ကျစရိတ်ကို နှုတ်ယူပါက တောင်သူတစ်ဦး၏ တစ်ဧကအကျိုးအမြတ်မှာ ကျပ်(၂၀)သိန်းထိကျန်ရှိကြောင်း မြေပဲစိုက် တောင်သူ၏ ပြောပြချက်အရ သိရှိရပါသည်။
DOCA(မကွေး)