မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးဒေသတစ်ခုဖြစ်သည့် အလျှောက် သီးနှံမျိုးစုံ စိုက်ပျိုးဖြစ်ထွန်းလျက်ရှိပြီး အဓိကအသက်သွေးကြောဖြစ်သော စပါးသီးနှံ ကိုလည်းစိုက်ပျိုးလျက်ရှိပါသည်။ မတ်လကုန် ဧပြီလဆန်းမှစတင်၍ နွေစပါးများစတင်စိုက်ပျိုးလျက် ရှိပါသည်။ ကျောက်ဆည်ခရိုင်အတွင်းတွင် နွေစပါး စိုက်ပျိုးမှုအနေဖြင့် ၂၀၂၆-၂၀၂၇ ဘဏ္ဍာနှစ်တွင် ကျောက်ဆည်မြို့နယ်တွင် (၃၅၅၉)ဧက ၊ စဉ့်ကိုင်မြို့နယ်တွင်(၇၁၈)ဧက ၊ မြစ်သားမြို့နယ်တွင် (၂၀၁၁၀) ၊ စုစုပေါင်း(၂၄၃၈၇)ဧက စိုက်ပျိုးထားကြောင်း သက်ဆိုင်ရာဌာန၏ စာရင်းများအရ သိရှိရပါသည် ။ နွေစပါးသည်မိုးစပါးထက် သက်တမ်းပိုရှည်ကြောင်း ၊ နွေစပါးစိုက်ပျိုးမှုအနေဖြင့် ပတ်ကြဲ စိုက်ပျိုးမှုများရှိသလို ပျိုးနှုတ်၍ စိုက်ပျိုးကြသူများလည်းရှိကြောင်း ၊ အများဆုံးစိုက်ပျိုးမှုမှာ ပျိုးထောင် ၊ ပျိုးနှုတ်စိုက်ပျိုးခြင်းဖြစ်ကြောင်း၊ နွေစပါး စိုက်ပျိုးမှု(၁)ဧက ကုန်ကျစရိတ်အနေဖြင့် မျိုး၊ သွင်းအားစု ၊ လုပ်သားခအပါအဝင် စုစုပေါင်း (၈၀၀၀၀၀/-)ကျပ်ခန့် ကုန်ကျကြောင်း ၊ နွေစပါး စိုက်ပျိုးထွက်ရှိမှုအနေဖြင့် ဇူလိုင်လတွင် စတင်ထွက်ရှိမှာဖြစ်ပြီး ယခုအချိန်တွင် မိုးရွာသွန်းမှု ကောင်းသောကြောင့် နွေစပါးများ ကောင်းမွန်စွာအောင်မြင်ဖြစ်ထွန်းလျက်ရှိကြောင်း ၊ အများဆုံး စိုက်ပျိုးသောမျိုးမှာ မနောသုခမျိုးဖြစ်ကြောင်း ၊ ယခုလက်ရှိ စပါးပေါက်ဈေးအနေဖြင့် ဧရာပဒေသာ တစ်တင်းလျှင်(၃၀၀၀၀/၃၂၀၀၀)ကျပ်၊နောသုခတစ်တင်းလျှင်(၁၈၀၀၀/၁၉၀၀၀)ကျပ်၊ ဧရာပဒေသာ ဆန်တစ်အိတ်လျှင် (၁၃၀၀၀၀/၁၄၀၀၀၀) ကျပ် ၊ နောသုခဆန် တစ်အိတ်လျှင်(၆၅၀၀၀-၇၅၀၀၀) ကျပ်စျေးနှုန်းများဖြင့် ရောင်းဝယ်လျက်ရှိကြောင်း၊ ဈေးကွက်အနေဖြင့် ပွဲစားများမှ စပါးစိုက်ပျိုးသည့် ကျေးရွာများသို့ တိုက်ရိုက်လာရောက်ဝယ်ယူကြကြောင်း ၊ နွေစပါးထွက်ပေါ်ချိန်တွင် ဈေးနှုန်းများ ကောင်းမွန်ပါက တောင်သူများ အကျိုးအမြတ် ဖြစ်ထွန်းနိုင်ကြောင်း နွေစပါးစိုက်ပျိုးသော တောင်သူတစ်ဦး၏ ပြောကြားချက် အရသိရှိရသည်။
DOCA(မန္တလေး)