မန္တလေးတိုင်းဒေသကြီး၊ကျောက်ဆည်မြို့နယ်တွင် ဆန်စပါးကိုအဓိက စိုက်ပျိုးကြပြီး၊ ပင်တလည်ကျေးရွာရှိဥယျာဉ်ခြံမြေများပေါ်တွင် နေ့စဉ်ဝင်ငွေရရှိရန်အတွက် ကာလတိုသီးနှံများ ဖြစ်သည့် မုံညင်း၊ဆလပ်၊ခရမ်းသီး၊ရုံးပတီသီးနှင့် ပန်းအမျိုးမျိုးကိုလည်း စိုက်ပျိုးလျှက်ရှိပါသည်။ ဇွန်ပန်းများ သည် တစ်နှစ်ပတ်လုံးဖူးပွင့်သည်ဆိုသော်လည်း နယုန်လမှ တန်ဆောင်မုန်းလ အထိ(၆)လခန့်တွင် အဖူးများလှိုင်လှိုင်ဖူးသဖြင့် ဇွန်ပန်းရာသီဖြစ်ကြောင်း၊ ဇွန်ပန်းများသည် ကျေးလက်နေ အမျိုးသမီးများအတွက် အလုပ်အကိုင်ပေးနေသော ပန်းဟုလည်းဆိုရပေမည်။ တစ်ဧကလျင် ဇွန်ပန်းရုံ(၁၅၀)ရုံခန့် စိုက်ပျိုးနိုင်ကြောင်း၊ ဇွန်ပန်းရုံတစ်ရုံလျင် ပန်းဖူးနို့ဆီဗူး(၂-၃) ဗူးခန့်ထွက်ရှိကြောင်း၊ ဇွန်ပန်းတစ်ဗူးလျင်(၁၂၀၀)ကျပ်ခန့် ရောင်းချရကြောင်း၊ ဇွန်ပန်းရုံ (၅၀)ရုံခန့် စိုက်ပျိုးထားပါက တစ်ရက်လျင်(၁၈၀၀၀၀)ကျပ်ခန့် ဝင်ငွေရရှိကြောင်း၊ တဆင့်ရောင်းချသည့် ပန်းသည်များအနေဖြင့် ပန်းတစ်ဗူးလျင်အပွင့်(၃၀)ပါပန်းကုံး (၄၀)ကုံးခန့် ရရှိကြောင်း၊ ပန်းကုံး (၇)ကုံးလျင်(၅၀၀)ကျပ်ဖြင့် တစ်ရက်လျင်နို့ဆီဗူး(၁၆)ဗူးရောင်းချရသဖြင့် တဆင့်ရောင်းချသူများ အတွက် နေ့တွက်မကအမြတ်ကျန်ကြောင်း၊ ဇွန်ပန်းစိုက်တောင်သူများအနေဖြင့် ပန်းဒိုင်များမှ အိမ်အထိလာရောက်ဝယ်ယူသဖြင့် နေ့စဉ်ဝင်ငွေရရှိပြီး အဆင်ပြေလျက်ရှိကြောင်း၊ဇွန်ပန်းစိုက် တောင်သူတစ်ဦးထံမှသိရှိရပါသည်။
DOCA(မန္တလေး)