ဗီယက်နမ်နိုင်ငံမြောက်ပိုင်းရှိ Bac Ninh ပြည်နယ်သည် Samsung Vietnam အားဒေသတွင်း လုပ်ငန်းလည်ပတ်ရာတွင်လွယ်ကူချောမွေ့စေရေး ပံ့ပိုးပေးမည်ဟု ကတိကဝတ်ပြုခဲ့ကြောင်း ပြည်နယ်ပြည်သူ့ကော်မတီ၏ဥက္ကဌ Vuong Quoc Tuan က ပြောကြားခဲ့ပါသည်။ ဇူလိုင်လ ၂၁ ရက်နေ့ကကျင်းပခဲ့သည့် အလုပ်ရုံဆွေးနွေးပွဲတွင် Tuan က ပြည်နယ်၏စီးပွားရေး အရွယ်အစားသည်သိသာစွာတိုးချဲ့လျှက်ရှိပြီး Samsung Vietnam အတွက် ကျယ်ပြန့်ပြီး အားကောင်းသောစီးပွားရေးဂေဟစနစ်ကိုဖန်တီးလျှက်ရှိကြောင်းနှင့် Samsung Vietnam ၏ supplier ၇၀ ရာခိုင်နှုန်းသည် Bac Ninh ပြည်နယ်မှဖြစ်ကြောင်း ပြောကြားခဲ့ပါသည်။ ထို့ပြင် ဝန်ကြီးက Samsung Vietnam အား နည်းပညာလွှဲပြောင်းမှုအရှိန်မြှင့်တင်ရန်၊ ပြည်တွင်းလုပ်ငန်းများက ကမ္ဘာလုံးဆိုင်ရာထောက်ပံ့မှုကွင်းဆက်သို့ဝင်ရောက်ရာတွင် ပံ့ပိုးပေးရန်နှင့် အရည်အသွေးမြင့်လုပ်သားထုလေ့ကျင့်ရေးတွင် ရင်းနှီးမြှုပ်နှံရန်တိုက်တွန်းခဲ့ကြောင်း သိရပါသည်။ Samsung Vietnam ၏ CEO ဖြစ်သူ Na Ki Hong က Samsung သည် Bac Ninh ပြည်နယ်အာဏာပိုင်များထံမှပံ့ပိုးမှုကို အစဉ်အမြဲရရှိခဲ့ကြောင်းနှင့် ၂၀၂၅ ခုနှစ်တွင် များစွာသော စိန်ခေါ်မှုများရှိနေသော်လည်း ပြည်နယ်အုပ်ချုပ်သူများ၏ပံ့ပိုးမှုကြောင့် အခက်အခဲများကို ကျော်လွှားနိုင်ကာ ယခုနှစ်အတွက်ရည်မှန်းချက်ပြည့်မီမည်ဟု ယုံကြည်ကြောင်း ပြောကြားခဲ့ပါသည်။ ၂၀၀၈ ခုနှစ်တွင် ၎င်းတို့၏ပထမဆုံးမိုဘိုင်းဖုန်းစက်ရုံကို ဖွင့်လှစ်ပြီးချိန်မှစ၍ Samsung သည် Bac Ninh ပြည်နယ်တွင် Samsung Display၊ Samsung Electronics နှင့် Samsung SDI စသည့် အဓိကစီမံကိန်း ၃ ခုကို ထပ်မံတိုးချဲ့ခဲ့ကြောင်း သိရှိရပါသည်။
Vietnam Plus
DOCA (ရန်ကုန်)