ဗီယက်နမ်၏ ဆန်ပို့ကုန်ဈေးနှုန်းများ ၅ လအတွင်း သိသာစွာ ကျဆင်းခဲ့

     ၂၀၂၅ ခုနှစ် ပထမ ၅ လတွင် ဗီယက်နမ်၏ ဆန်ပို့ကုန်စျေးနှုန်းသည် ယခင်နှစ် အလားတူ ကာလနှင့် နှိုင်းယှဉ်ပါက ၁၈.၇ ရာခိုင်နှုန်း လျော့နည်းခဲ့ပြီး ပျမ်းမျှအားဖြင့် တစ်တန်လျှင် ၅၁၆.၄ အမေရိကန်ဒေါ်လာနှုန်းသို့ သိသိသာသာ ကျဆင်းသွားကြောင်း ဗီယက်နမ်သတင်းအေဂျင်စီ၏ ထုတ်ပြန်ချက်အရ သိရှိရပါသည်။

    အဆိုပါကာလအတွင်း ဗီယက်နမ်နိုင်ငံအနေဖြင့် တန်ဖိုး အမေရိကန်ဒေါ်လာ ၂.၃၄ ဘီလီယံ ရှိသော ဆန်တန်ချိန် ၄.၅ သန်းကို တင်ပို့ခဲ့ပြီး အရေအတွက်အားဖြင့် ၁၂.၂ ရာခိုင်နှုန်း တိုးတက်ခဲ့ သော်လည်း  တန်ဖိုးအားဖြင့် ၈.၉ ရာခိုင်နှုန်း ကျဆင်းခဲ့ပါသည်။

    ဖိလစ်ပိုင်နိုင်ငံသည် ပို့ကုန်တန်ဖိုး ၂၂ ရာခိုင်နှုန်းနီးပါး ကျဆင်းသွားသော်လည်း စုစုပေါင်း ဆန်တင်ပို့မှုပမာဏတွင် ၄၁.၄ ရာခိုင်နှုန်းပါဝင်လျက် ဗီယက်နမ်၏ အကြီးဆုံးဆန်ဝယ်ယူသူအဖြစ် ဆက်လက် ရပ်တည်နေခဲ့သည်။ သို့သော် အိုင်ဗရီကို့စ်နှင့် တရုတ်နိုင်ငံသို့ ဆန်တင်ပို့မှုသည် ၂.၇ ဆနှင့် ၈၃.၇ ရာခိုင်နှုန်း အသီးသီး မြင့်တက်ခဲ့ကြောင်း သိရှိရပါသည်။ ထူးခြားချက်အနေဖြင့် ဘင်္ဂလားဒေ့ရှ်သို့ ဆန်တင်ပို့မှုသည် ၅၁၅.၆ ဆ မြင့်တက်ခဲ့ပြီး အင်ဒိုနီးရှားသို့ တင်ပို့မှုမှာ ၉၇.၉ ရာခိုင်နှုန်း ကျဆင်းခဲ့ပါသည်။

    ဗီယက်နမ်၏ ပြည်ပသို့တင်ပို့သည့် ဆန်ဈေးနှုန်းများ အနည်းငယ်ကျဆင်းသွားသော်လည်း မဲခေါင်မြစ်ဝကျွန်းပေါ်ဒေသတွင် စပါးနှင့်ဆန်ဈေးနှုန်းများသည် ယခင်ရက်သတ္တပတ်၌ တည်ငြိမ် နေခဲ့ပါသည်။

     စိုက်ပျိုးရေးနှင့် ကျေးလက်ဒေသဖွံ့ဖြိုးတိုးတက်မှုဆိုင်ရာ မူဝါဒနှင့် မဟာဗျူဟာသိပ္ပံဌာန၏ ဖော်ပြချက်အရ ခြောက်သွေ့ပြီးဖြစ်သော IR 50404 စပါး တစ်ကီလိုဂရမ်လျှင် ဗီယက်နမ်ဒေါင်ငွေ ၆၆၀၀ ရှိပြီး Vinh Long နှင့် Tien Giang မြို့များတွင် ယခင်အပတ်ကထက် ဗီယက်နမ်ဒေါင် ၁၀၀ ပိုမိုမြင့်တက်ခဲ့ကြောင်း သိရပါသည်။

    OM18 စပါးကို Can Tho မြို့တွင် တစ်ကီလိုဂရမ်လျှင် ဗီယက်နမ်ဒေါင် ၇၅၀၀ နှုန်း၊ Soc Trang မြို့တွင် ဗီယက်နမ်ဒေါင် ၈၁၀၀ နှုန်းနှင့် Tien Giang မြို့တွင် ဗီယက်နမ်ဒေါင် ၇၀၀၀ နှုန်း တို့ဖြင့် ရောင်းချခဲ့ကြောင်း၊ စံပယ်ဆန်အမျိုးစား စပါး တစ်ကီလိုဂရမ်လျှင် Can Tho မြို့တွင် ဗီယက်နမ် ဒေါင် ၈၄၀၀ နှင့် Tien Giang မြို့၌ ဗီယက်နမ်ဒေါင် ၇၁၀၀ ရရှိခဲ့ကြောင်း၊ Soc Trang မြို့၌ Dai Thom 8 (DT8) စပါး တစ်ကီလိုဂရမ်လျှင် ဒေါင် ၂၀၀ ကျဆင်းသွားသဖြင့် ဈေးနှုန်းအသစ် အနေဖြင့် ဗီယက်နမ်ဒေါင် ၇၇၀၀ သို့ ရောက်ရှိခဲ့ပြီး Can Tho မြို့တွင် ST25 စပါးမှာ တစ်ကီလို ဂရမ်လျှင် ဗီယက်နမ်ဒေါင် ၉၅၀၀ ဖြင့် ဈေးနှုန်းပြောင်းလဲမှုမရှိကြောင်း Saigon Times သတင်း ဌာနက ဖော်ပြထားပါသည်။

Source: Saigon Times, 10 June 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)