မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့နယ်တွင် ကြက်သွန်နီကို အဓိကစိုက်ပျိုးကြသည်။ ယခုအချိန်တွင် ပေါက်မြို့နယ်၊ ရေပြာ၊ အုန်းတောနှင့် အခြားနယ်များတွင် ဆောင်းစိုက် (ပင်စိုက်)များ စတင်စိုက်ပျိုးနေကြောင်း ကြက်သွန်နီစိုက်ပျိုးတောင်သူများထံမှသိရှိရပါသည်။
ပေါက်မြို့နယ်၏ ကြက်သွန်နီစိုက်ဧကမှာ ယခင်နှစ်များတွင် စိုက်ဧက (၂၀၀၀၀)ဧကကျော်ရှိခဲ့ပြီး ယခုနှစ်တွင် (၆၇၀၀)ဧကကျော်သာ စိုက်ဧကရှိကြောင်း၊ ဆောင်းစိုက်(ပင်စိုက်)ကြက်သွန်နီများကို စတင်ပျိုးထောင်နေကြောင်း ကြက်သွန်းနီစိုက်ပျိုးတောင်သူထံမှသိရှိရပါသည်။ ကြက်သွန်နီတစ်ဧကလျှင် မျိုးစေ့(၂)ပြည်ခန့်စိုက်ပျိုးရကြောင်း၊ တစ်ဧကလျှင် လုပ်သားဦးရေအယောက်(၂၀)ခန့်အသုံးပြုရပြီး တစ်ဦးလျှင် ကျပ်(၅၀၀၀)ပေးရကြောင်း၊ တစ်ဧကလျှင် ကျင်း(၄၀)ခန့်စိုက်ပျိုးရကြောင်း၊ တစ်ကျင်းလျှင် (၁၅)ပေပတ်လည်ခန့်ရှိပြီး တစ်နေ့လျှင် လူတစ်ယောက်စိုက်ပျိုးမှုမှာ (၅)ကျင်းပြီးစီးကြောင်း၊ စိုက်ပျိုးသည့်မျိုးစေ့မှာ စကျင်ထိပ်မောက်မျိုးဖြစ်ပြီး စတင်ပျိုးထောင်ချိန်မှာ သီတင်းကျွတ်လပြည့်ကျော်(၁၃/၁၄)ရက်နေ့များတွင် စတင်ပျိုးထောင်ကြောင်းသိရှိရပါသည်။ ပျိုးထောင်ချိန်မှစ၍ ရက်ပေါင်း (၃၀)ရက်ပြည့်လျှင် ကြက်သွန်နီကျင်းများတွင် စတင်စိုက်ပျိုးရကြောင်း၊ စိုက်ပျိုးသည့်နေ့မှစ၍ မြေဩဇာများကိုအသုံးပြုရကြောင်း၊ အသုံးပြုသည့်မြေဩဇာမှာ အာမို၊ သံကွင်း၊ တီစူပါများကိုအသုံးပြုရပြီး တစ်အိတ်လျှင် ကျပ်(၁၈၀၀၀၀မှ ၂၀၀၀၀၀)ဖြင့်ဝယ်ယူရကြောင်း၊ စတင်စိုက်ပျိုးချိန်မှာ နွားချေးများကိုလည်းချရကြောင်း၊ တစ်ဧလျှင် နွားချေးလှည်းစီးရေ (၆၀)ခန့်အသုံးပြုရကြောင်း၊ တစ်ကျင်းလျှင် နွားချေးလှည်း(၃)စီးချရကြောင်း၊ နွားချေးတစ်တင်းလျှင် ကျပ်(၈၀၀)ပေးရကြောင်း၊ မျိုးစေ့တစ်ပြည်လျှင် ကျပ်(၇၈၀၀၀)ဖြင့်ဝယ်ယူရကြောင်း၊ တန်ဆောင်မုန်းလပြည့်ကျော်လျှင် ဆောင်းစိုက် (ပင်စိုက်)များ စတင်စိုက်ပျိုးပါကြောင်း ကြက်သွန်နီစိုက်ပျိုးတောင်သူထံမှသိရှိရပါသည်။
DOCA(မကွေး)