လိမ္မော်သီးသည် အေးမြသောရာသီဥတုတွင် စိုက်ပျိုးဖြစ်ထွန်းသည့်အတွက် ရှမ်းပြည်နယ် (တောင်ပိုင်း)ရှိ ရွာငံ၊ရပ်စောက်၊ပင်းတယနှင့် မိုင်းကိုင်မြို့နယ်များ၌ အများအပြားစိုက်ပျိုးလျက်ရှိသည်ကို တွေ့ရှိရပါသည်။ ရှမ်းပြည်နယ် (တောင်ပိုင်း)တွင် လိမ္မော်သီး (၁၀၉၉၆)ဧကစိုက်ပျိုးပြီး (၂၁၀၇၈၀) တန် စိုက်ပျိုးထွက်ရှိပြီး၊ လိမ္မော်သီးတစ်ပင်လျှင် တစ်နှစ်အသီးထွက်ရှိမှုနှုန်းမှာ (၁၀)ပိဿာမှ (၁၂)ပိဿာခန့်အထိ ထွက်ရှိပြီး ဒေသတွင်းစားသုံးမှုဖူလုံသည့်အပြင် မြန်မာနိုင်ငံအနှံ့အပြားသို့ တောင်ကြီးမြို့နှင့် အောင်ပန်းမြို့တို့ရှိ ပွဲရုံများမှတစ်ဆင့် တင်ပို့ရောင်းချလျက်ရှိကြောင်း သိရှိရပါသည်။
ရှမ်းပြည်နယ်(တောင်ပိုင်း)မှထွက်ရှိသော လိမ္မော်သီးလက်ရှိဈေးနှုန်းမှာ တစ်ပိဿာလျှင် (ပွဲရုံဈေး) (၁၇၀၀)ကျပ်၊ လက်လီဈေးတစ်ပိဿာလျှင် (၂၀၀၀)ကျပ်ဖြင့် ဈေးကွက်၌အရောင်းအဝယ် ပြုလုပ်လျက်ရှိပါသည်။ ယခင်နှစ်က လိမ္မော်သီးတစ်ပိဿာ ကျပ်(၈၀၀-၁၀၀၀)ရရှိရာမှ ယခုနှစ်တွင် တစ်ပိဿာ ကျပ်(၁၇၀၀-၂၀၀၀)ထိ ဈေးကောင်းရရှိခဲ့သဖြင့် တောင်သူများအတွက် အကျိုးအမြတ်ရရှိကြောင်း သိရှိရပါသည်။ လိမ္မော်သီးအရွယ်အစားအလိုက် ဈေးနှုန်းကွာခြားမှုရှိပြီး တစ်ပိဿာလျှင် (၁၉)လုံးမှ (၂၀)လုံးပါအရွယ်အစားရှိ လိမ္မော်သီးဈေးနှုန်းမှာ (၁၄၀၀)ကျပ်၊ (၁၄)လုံးမှ (၁၅)လုံးပါ အရွယ်အစား တစ်ပိဿာလျှင် (၁၇၀၀)ကျပ်နှင့် (၁၂)လုံးမှ (၁၃)လုံးပါ အရွယ်အစားတစ်ပိဿာလျှင် (၂၀၀၀)ကျပ်ဖြင့် အရွယ်အစားအပေါ်မူတည်၍ ဈေးနှုန်းကွာခြားမှုရှိကြောင်း သိရှိရပါသည်။ လိမ္မော်သီးသည် နှစ်စဉ် နိုဝင်ဘာလတွင် စတင်ထွက်ပေါ်ပြီး ဇန်နဝါရီလတွင် ကုန်ဆုံးကြောင်း သိရှိရပါသည်။
စားသုံးသူရေးရာဦးစီးဌာန
ရှမ်းပြည်နယ်