ပြည်တွင်းကုန်သွယ်မှုသတင်း

             သောကြာနေ့တိုင်း တစ်ပတ်တစ်ခါ စက်သုံးဆီဈေးနှုန်းများ ပြောင်းလဲလျက်ရှိရာ ယခု တစ်ပတ်(၁၅.၈.၂၀၂၅) ရက်နေ့တွင် ဒီဇယ်(ရိုးရိုး) (အဆင့်မြင့်)၊ ဓါတ်ဆီ(ရိုးရိုး) (အဆင့်မြင့်) တို့၏ ဈေးနှုန်းပြောင်းလဲ မှုမှာ 95 Octance ဓါတ်ဆီ(အဆင့်မြင့်) ဈေးနှုန်းတစ်လီတာမှာ ၂၉၅၅ ကျပ်၊ 92 Octance ဓါတ်ဆီ (ရိုးရိုး) ဈေးနှုန်းတစ်လီတာမှာ ၂၉၀၀ ကျပ်၊ ဒီဇယ်(ရိုးရိုး) ဈေးနှုန်း တစ်လီတာမှာ ၂၆၁၅ ကျပ်၊ ဒီဇယ် (အဆင့်မြင့်) ဈေးနှုန်းတစ်လီတာမှာ ၃၂၃၅ ကျပ်ဖြစ်ကြောင်း သိရှိရပါသည်။ ယခင်တစ်ပတ် သောကြာနေ့ ဒီဇယ်၊ ဓါတ်ဆီ (ရိုးရိုး) (အဆင့်မြင့်)   တို့၏ ဈေးနှုန်းမှာ 95 Octance ဓါတ်ဆီ (အဆင့်မြင့်) ဈေးနှုန်းတစ်လီတာမှာ ၂၉၉၅ ကျပ်၊ 92 Octance ရိုးရိုး ဓါတ်ဆီဈေးနှုန်း တစ်လီတာမှာ ၂၉၄၀ ကျပ်၊ ဒီဇယ် (ရိုးရိုး) ဈေးနှုန်းတစ်လီတာ မှာ ၂၇၁၅ ကျပ်၊ ဒီဇယ်(အဆင့်မြင့်) ဈေးနှုန်း တစ်လီတာမှာ ၃၃၅၅ ကျပ်ဖြစ်ကြောင်း သိရှိရပါသည်။ ယခု တစ်ပတ်အတွင်း စက်သုံးဆီဈေးနှုန်းများမှာ ယခင်တစ်ပတ်ထက် ယခုတစ်ပတ်တွင် ဒီဇယ် (အဆင့်မြင့်)မှာ ၁၂၀ ကျပ် ဈေးကျပြီး  ဒီဇယ်(ရိုးရိုး) မှာ ၁၀၀ ကျပ်ဈေးကျပြီး ဓါတ်ဆီ (အဆင့်မြင့်)နှင့် ဓါတ်ဆီ(ရိုးရိုး) မှာ ၄၀ ကျပ် ကျဆင်းလျက်ရှိကြောင်း သိရှိရပါသည်။

DOCA(ရန်ကုန်)

   မအူပင်ခရိုင်၊ အရှေ့ဘက်ကမ်းကျေးရွာတွင် ဟင်းသီးဟင်းရွက် အများဆုံးစိုက်ပျိုးသော ကျေးရွာတစ်ခုဖြစ်သည်။ မြစ်နှင့် နီး၍ ဆောင်ရာသီတွင် နှုန်းမြေပေါ်၌ ဆောင်ရာသီ ဟင်းသီးဟင်းရွက် အများဆုံးစိုက်ပျိုးကြသည်။ စိုက်ပျိုးသီးနှံများမှာ ပန်းဂေါ်ဖီ၊ ဂေါ်ဖီပွင်ံံ၊ ပဲသီး၊ စံပယ်ပန်း၊ သင်္ဘောသီး၊ ငရုတ်၊ သခွား၊ ကြက်ဟင်းခါးသီး၊ ဗုံလုံသီး၊ ပြောင်း၊ ကြံ၊ မုန့်လာဥ၊ ချဉ်ပေါင်၊ ရုံပတီသီး၊ အစာရှိသော သီနှံများစွာကို စိုက်ပျိုးကြသည်။

   စိုက်ပျိုးသီးနှံထဲမှ သင်္ဘောသီး ထွက်ရှိနေ၍ စိုက်ပျိုးရောင်းချနေမှုကို လေ့လာရာ အရှေ့ဘက်ကမ်း ဥယျဉ်ခြံ မြေတွင် အပင် ၁၀၀ကို စိုက်ပျိုးထားကြောင်း၊ စိုက်ပျိုးမှု အနေဖြင့် အပင်ပေါက်ကို စိုက်ပျိုးပြီး တစ်ပင်လျှင် ၂၀၀၀ကျပ်ဖြင့် ဝယ်ယူစိုက်ပျိုးရကြောင်း၊ သင်္ဘောပင်စိုက်ပျိုးရာတွင် အပင်သက်တမ်း ခုနစ်လမှစ၍ အသီး စတင်ခူးဆွတ်လေ့ရှိကြောင်း၊ သင်္ဘောပင်၏ သက်တမ်းကို နှစ်နှစ်သားအထိ ထားလေ့ရှိကြောင်း စိုက်ပျိုးသူမှ ရှင်းပြသည်။  ယခုသင်္ဘောပင်ကို ၂၀၂၄ခုနှစ် ၅လပိုင်းမှ စတင်စိုက်ပျိုးခြင်းဖြစ်ကြောင်း၊ ၂၀၂၄ ဒီဇင်ဘာလတွင် အသီးစတင်ထွက်ရှိပြီး ၄လခန့်အကြာ ရောင်းတန်းဝင်အသီးများကို ခူးယူရောင်းချကြောင်းသိရသည်။

  စိုက်ပျိုးမှု မျိုး၊ သွင်းအားစု၊ လုပ်သားခ၊ ကုန်ကျစရိတ်အနေဖြင့်  သိန်း ၄၀ ခန့်ကုန်ကျကြောင်း သိရသည်။ ၂၀၂၅ ခုနှစ် ဧပြီလတွင် သင်္ဘောသီ ခေါင်သီးကောင်းများထွက်ရှိပြီး တစ်လုံးလျှင် လက်လီဈေး ၇၀၀၀ကျပ်ထိ ဈေးကောင်း ရရှိပြီး ယခုဩဂုတ်တွင် သင်္ဘောသီး အကျများသာကျန်ရှိ၍ တစ်လုံးလျှင် အမြင့်ဆုံးဈေးမှာ ၂၀၀၀-၃၀၀၀ကျပ်ဖြင့် ရောင်းချလျက်ရှိကြောင်း၊ စိုက်ပျိုးသူမှ ရှင်းလင်းပြောကြားသည်။

   သင်္ဘောတစ်ပင်မှ အသီး ၄၀ခန့် ထွက်ရှိပြီး ၂၀၂၅ခုနှစ် ဧပြီလမှ ဩဂုတ်လ ၅လအတွင်း ထွက်ရှိရောင်းချနေကြောင်း၊ ထွက်ရှိမှုအနေဖြင့် အသီး ၃၀၀၀ခန့်ရရှိသည်။ လက်ကားဈေးအနေဖြင့် ဈေးကွက်အတွင်း ၆၀၀၀-၂၅၀၀-၁၅၀၀ကျပ်ဖြင့် အရောင်းအဝယ်ဖြစ်လျက်ရှိကြောင်း၊ အကျိုးအမြတ်အနေဖြင့် စိုက်ပျိုးမှုမှ ငွေကျပ် ၆ ၀၀၀ ၀၀၀ကျပ် ကျန်ရှိကြောင်း၊ သင်္သောပင်သည် စီးပွားဖြစ်စိုက်ပျိုးသင့်သော သီးနှံတစ်မျိုးဖြစ်သည်။ အပင် ၁၀၀စိုက်ပျိုး ခြင်းမှ ဒေသတွင်းနှင့် မြို့နယ် နီးစပ်သော ဒေသများသို့ တင်ပို့ရောင်းချကြောင်း၊ ရန်ကုန်သို့ အနည်းငယ်သာ တင်ပို့ကြောင်း သိရသည်။

DOCA(ဧရာဝတီ)

     ဧရာဝတီတိုင်းဒေသကြီးအတွင်း ဟင်္သာတခရိုင်နှင့်မြန်အောင်ခရိုင်တို့သည် လယ်ယာထုတ်ကုန်ကဏ္ဍတွင် ပဲမျိုးစုံ စိုက်ပျိုးထုတ်လုပ်၍ ပြည်တွင်းဈေးကွက်အတွင်း စားသုံးမှုရှိသည့်အပြင် ဈေးကွက်ဝယ်လိုအားရှိသော မတ်ပဲ၊ပဲတီစိမ်းနှင့်အစေ့ ထုတ်ပြောင်း တို့ကိုလည်း နှစ်စဉ်စိုက်ပျိုးလျက်ရှိပြီး ဟင်္သာတကုန်စည်ဒိုင်မှ တစ်ဆင့်လစဉ်ရန်ကုန်မြို့သို့ ရောင်းချလျက်ရှိရာ ရန်ကုန်မြို့မှ တစ်ဆင့် ပြည်ပနိုင်ငံများသို့ တင်ပို့ရောင်းချလျက်ရှိကြောင်း သိရသည်။

     ဟင်္သာတကုန်စည်ဒိုင်မှ ဇူလိုင်လအတွင်း မတ်ပဲတန် ၂၃၂၅ နှင့် အစေ့ထုတ်ပြောင်းတန် ၂၂၀၀ တင့်ပိုရောင်းချခဲ့ပြီး ဩဂုတ်လ ဒုတိယပတ်အတွင်း မတ်ပဲတန် ၁၆၂၅ နှင့်အစေ့ထုတ်ပြောင်း တန် ၁၅၇၅ တင်ပို့နိုင်ခဲ့ပြီး ဧရာဝတီတိုင်းဒေသကြီးအတွင်း ရှိ ပြည်ပပို့ကုန်များတွင် ဆန်၊ဆန်ကွဲ၊ပေါင်းဆန်ပြီးလျှင် ပြည်ပပို့ကုန်အဖြစ် ပဲကိုအများဆုံး တင်ပို့ရောင်းချလျက်ရှိကြောင်း သိရသည်။

(DOCA ဧရာဝတီ)              

   ဒေသထွက်ကုန်များထဲမှ ပလောပီနံများကို အိမ်တွင်းစိုက်ပျိုးသီးနှံအဖြစ်အများဆုံးထားရှိပြီး ဒေသတွင်းပြန်လည်ရောင်းချလျက်ရှိသည်။ မြိတ်ခရိုင်၊ ကျေးလက်ဒေသနှင့် ကျေးရွာများတွင် အများဆုံးထွက်ရှိကြသည်။ ကုန်ကျစရိတ်အနည်းငယ်ဖြင့် စိုက်ပျိုးနိုင်ပြီး နှစ်ရှည်ခံ ချုံပုတ်ပင်အမျိုး အစားဖြစ်သည့်အတွက် အပင်တိုးပွားလာနိုင်သည်။ ပုလောပီနံပင်ရှိ အရွက်၊ ဥများကို လူတို့စားသုံး နိုင်သလို တရိစ္ဆာတို့၏အစာအဖြစ်လည်း ထုတ်လုပ်နိုင်သည်။ အချိုမုန့်ထုတ်လုပ်ရာတွင်အမျာဆုံး သုံးစွဲကြကြောင်းသိရှိရပါသည်။ မြိတ်ခရိုင်တွင် ယခင်က ပလောပီနံဥ တစ်ပိဿာလျှင် ၁၅၀၀ကျပ် ရှိရာမှ ၂၀၂၅ခုနှစ်၊ သြဂုတ်လတွင် စျေးနှုန်းစုံစမ်းချက်အရ ၂၀၀၀ကျပ်ဖြစ်နေကြောင်း သိရှိရပါ သည်။

DOCA(တနင်္သာရီ)

                 ဝါးတန်းဆန်စပါးကုန်စည်ဒိုင်သို့ (၈.၈.၂၀၂၅) မှ (၁၃.၈.၂၀၂၅) နေ့ထိ ဆန်ဝင်ရောက် မှုစာရင်းများမှာ ဧရာဝတီတိုင်းဒေသကြီး ဖျာပုံ၊ မြောင်းမြ၊ ဘိုကလေး၊ လပွတ္တာ၊ မော်ကျွန်း၊ ကျိုက်လတ်၊ ဟင်္သာတ၊ ဓနုဖြူ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ကြားပျံ (၁၂၃၃၀) အိတ်၊ ပေါ်ဆန်းမွှေး (၂၁၂၆၅) အိတ်၊ ပေါ်ကျွဲ (၆၂၂၀) အိတ်၊ ဧည့်မထ (၉၀၁၃၅) အိတ်၊ ဆန်ကွဲ (၁၆၃၆၉) အိတ်ဝင်ရောက်ခဲ့ပြီး ပဲခူးတိုင်း (အရှေ့) ကျောက်တံခါး၊ ညောင်လေးပင်၊ ဖြူးမြို့နယ်များမှ ဧည့်မထ (၅၆၉၆) အိတ် နှင့် ပဲခူးတိုင်း (အနောက်) မြို့နယ်များဖြစ်သော သာယာဝတီ၊ သုံးဆယ်၊ လက်ပံတန်း၊ ကြို့ပင်ကောက်မြို့နယ်များမှ ဧည့်မထ (၂၂၉၁၆) အိတ်၊ ငစိန် (၁၂၉၅) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ်ကုန်း၊ ပျော်ဘွယ်၊ တိုက်ကြီး၊ ခရမ်း၊ သုံးခွ၊ ဥက္ကံ မြို့နယ်များမှ ဧည့်မထ (၁၈၇၉၉) အိတ်တို့ဝင်ရောက်မှုရှိကြောင်း ဝါးတန်း ဆန်စပါးကုန်စည်ဒိုင်၏ ပြောကြားချက်အရ သိရှိရပါသည်။

DOCA(ရန်ကုန်)