HighLight News

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဌာနခွဲစာရေး ဦးအောင်ဝင်း (အုတ်တွင်းမြို့နယ်တာဝန်) သည် အစားအသောက်နှင့်ဆေးဝါးကွပ်ကဲရေးဦးစီးဌာန၊ တောင်ငူခရိုင်ဦးစီးမှူးရုံးမှ ဒုတိယကြီးကြပ်ရေးမှူး ဦးကျော်လင်းထွန်း၊ အုတ်တွင်းမြို့နယ်၊ စည်ပင်သာယာရေးအဖွဲ့မှ ကျွဲပွဲဈေးတာဝန်ခံ ဦးအောင်သူထွန်းတို့ဦးဆောင်သော အဖွဲ့ဝင်များနှင့်အတူ ၂၀၂၃ခုနှစ်၊ ဇူလိုင်လ ၂၁ရက်နေ့၊ နံနက်ပိုင်းအချိန်တွင် အုတ်တွင်းမြို့နယ်၊ ကျွဲပွဲမြို့တွင်ရောင်းချနေသော အလှကုန်ပစ္စည်းများ၊ အစားအသောက်များနှင့်ဆေးဝါးများ၌ စားသုံးသူများအား အန္တရာယ်ဖြစ်စေနိုင်မှုရှိ/မရှိကို ကွင်းဆင်းစစ်ဆေးခဲ့ပါသည်။

 ပူးပေါင်းအဖွဲ့ဝင်များသည် ကျွဲပွဲဈေးနှင့် ကျွဲပွဲမြို့ရှိ ကုန်စုံဆိုင်ကြီးများတွင်ရောင်းချနေသော အလှကုန်ပစ္စည်းများနှင့် အစားအသောက်များ၌ ခွင့်မပြုဓာတုပစ္စည်းများပါဝင်မှုမရှိစေရေးနှင့် သက်တမ်းလွန်ကုန်စည်များမဖြစ်စေရေးကိုလည်းကောင်း၊ ကုန်အညွှန်းအမှတ်အသားများဖော်ပြထားခြင်းများကိုလည်းကောင်း၊ ဆေးဆိုင်များ၌ရောင်းချသော အိမ်သုံးဆေးဝါးများတွင် တရားမဝင်ဆေးဝါးများမဖြစ်စေရေးနှင့် သက်တမ်းလွန်ဆေးဝါးများမဖြစ်စေရေးကိုလည်းကောင်း စစ်ဆေးကြည့်ရှုခဲ့ပြီး အစားအသောက်နှင့်ဆေးဝါးကွပ်ကဲရေးဦးစီးဌာနက ကုန်စည်နမူနာများကိုကောက်ယူခဲ့ပါသည်။

     စားသုံးသူရေးရာဦးစီးဌာနမှ အဖွဲ့ဝင်အဖြစ် လိုက်ပါဆောင်ရွက်သူ ဌာနခွဲစာရေး ဦးအောင်ဝင်းက စားသုံးသူကာကွယ်ရေးဥပဒေတွင် ကုန်စည်များ၌ ကုန်အညွှန်းအမှတ်အသားများဖော်ပြရန် ပြဋ္ဌာန်းထားပါကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ညွှန်ကြားချက်ကို အရောင်းဆိုင်များသို့ ဖြန့်ဝေထားပြီးဖြစ်ပါကြောင်း၊ သို့ဖြစ်ပါ၍ အရောင်းဆိုင်များအနေဖြင့် သတ်မှတ်ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသောကုန်စည်များကို ရောင်းချခြင်းမပြုကြရန် အသိပညာပေးပြောကြားခဲ့ကြောင်းသိရပါသည်။

DOCA(ပဲခူး)

   ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံ ဦးအောင်နိုင်ဦးနှင့်ဝန်ထမ်းများသည် (၂၀-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ရွှေတောင်မြို့နယ်၊ ဝါးလည်ကျေးရွာရှိ အ.မ.ကသို့သွားရောက်၍ စားသုံးသူအသိပညာပေးဟောပြောပွဲဆောင်ရွက်ခဲ့ပါသည်။

  အဆိုပါဟောပြောပွဲတွင် ရွှေတောင်မြို့နယ်ရှိ မြို့နယ်တာဝန်ခံနှင့်ဝန်ထမ်းများသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ တိုင်းရင်းဆေးပညာဦးစီးဌာန၊ အားကစားနှင့်ကာယပညာဦးစီးဌာနတို့နှင့်ပူးပေါင်း၍ ဆောင်ရွက်ခဲ့ကြပါသည်။ ဟောပြောပွဲတွင် ရွှေတောင် မြို့နယ်ရုံးမှ ‌ဒေါ်ယဉ်ယဉ်ဆင့်က စားသုံးသူအခွင့်အရေးများအကြောင်း၊ စားသုံးသူများလိုက်နာရမည့်တာဝန်နှင့်ဝတ္တရားများ၊ ကုန်အညွှန်းအမှတ်အသားပါ စားသုံးသူအခွင့်အရေး (၈) ချက်တို့ကို ကျောင်းသား/ကျောင်းသူ (၄၅) ဦးတို့အား  ဆွေးနွေးဟောပြောခဲ့ကြပါသည်။ ထို့ပြင် အစားအစာများကိုဘေးအန္တရာယ်ကင်းရှင်းစွာဝယ်ယူစားသုံးနိုင်ရန်လည်းပြောကြားခဲ့ကြောင်း သိရှိရပါသည်။

DOCA(ပဲခူး)

  စားသုံးသူရေးရာဦးစီးဌာန၊ တောင်ငူခရိုင်ဦးစီးစီးမှူးရုံးမှ တောင်ငူမြို့နယ်တာဝန်ခံ ဦးမြင့်သူသည် တောင်ငူခရိုင်စီမံအုပ်ချုပ်ရေးအဖွဲ့ဥက္ကဋ္ဌ၊ ဦးနေဝင်းအောင်ဦးဆောင်၍ ခရိုင်/မြို့နယ်အဆင့်ဌာနဆိုင်ရာများမှ တာဝန်ရှိသူများပါဝင်သောအဖွဲ့သည် (၂၄-၇-၂၀၂၃) ရက်နေ့တွင်  တောင်ငူ မြို့နယ်၊ ခပေါင်းတိန်စံပြကျေးရွာရှိ စိုက်ပျိုးမွေးမြူရေးလုပ်ငန်းများသို့သွားရောက်ကြည့်ရှုအားပေးရာတွင် အဖွဲ့ဝင်အဖြစ် လိုက်ပါဆောင်ရွက်ခဲ့ပါသည်။

    ခရိုင်စီမံအုပ်ချုပ်ရေးအဖွဲ့ဥက္ကဋ္ဌသည် Nilar Forzen Foods Co.,Ltd (NFF) နှင့် ခပေါင်းတိန်ကျေးရွာရှိ တောင်သူလယ်သမားများ အကျိုးတူပူးပေါင်းစိုက်ပျိုးသည့်ဂျပန်နိုင်ငံသို့တင်ပို့မည့် ရုံးပတီသီး (၁၆.၇၅) ဧကစိုက်ပျိုးအောင်မြင်ဖြစ်ထွန်းနေမှုများနှင့် ထပ်မံစိုက်ပျိုးမည့်အပင်များပျိုးထောင်ထားရှိမှုများကို ကြည့်ရှုအားပေးခဲ့ပါသည်။ ရုံးပတီသီးကို ဧက၆၀အထိတိုးချဲ့စိုက်ပျိုးရန်လည်း စီစဉ်ဆောင်ရွက်ထားပြီးဖြစ်ပါသည်။

      ခပေါင်းတိန်ကျေးရွာတွင် ‘ဝ’ ဥကိုလည်းစမ်းသပ်စိုက်ပျိုးရာ အောင်မြင်ဖြစ်ထွန်းနေသဖြင့် စီးပွားဖြစ်စိုက်ပျိုးနိုင်ရေးကိုဆောင်ရွက်သွားနိုင်ရန် စီစဉ်ဆောင်ရွက်နေပြီဖြစ်ကြောင်းလည်း သိရပါသည်။

    ထို့တူ ကျေးလက်ဒေသဖွံ့ဖြိုးတိုးတက်ရေးဦးစီးဌာန၏အစီအစဉ်ဖြင့် တစ်အိမ်ထောင်လျှင် ဒေသကြက်မ ၆ကောင်နှုန်းမွေးမြူထားရာ အိမ်ထောင်စု ၁၆၅စုရှိသဖြင့် ဒေသကြက်မကောင်ရေ ၉၉၀ကိုလည်းမွေးမြူထားရှိပါသည်။ မကြာတော့သည့်အချိန်ကာလတွင် ခပေါင်းတိန် ကျေးရွာမှ ဒေသကြက်သားများကိုထုတ်လုပ်နိုင်တော့မည်ဖြစ်ကြောင်း သိရပါသည်။

DOCA(ပဲခူး)

 (၂၄-၇-၂၀၂၃) ရက်နေ့တွင် မော်လမြိုင်ခရိုင်ဦးစီးမှူးသည်  မွန်ပြည်နယ်၊ စားသုံးသူရေးရာဦးစီးဌာန၊ ဦးစီးမှူးရုံးတွင် ငါးရံ့ခြောက်ကင်လုပ်ငန်းလုပ်ကိုင်မည့် စီးပွားရေးလုပ်ငန်းရှင်နှင့်တွေ့ဆုံဆွေးနွေးခဲ့ပါသည်။

     ထိုသို့တွေ့ဆုံဆွေးနွေးရာတွင် မော်လမြိုင်ခရိုင်ဦးစီးမှူး ဒေါ်ဝါဝါမြိုင်က စားသုံးသူကာကွယ်ရေးဥပဒေ ၂၀၁၉ အခန်း (၁၈) တွင်ဖော်ပြထားသော ပြဋ္ဌာန်းချက်အတိုင်း ကုန်အညွှန်းအမှတ်အသားကိုပြည့်စုံစွာဖော်ပြရန်၊ ကုန်စည်အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာ (သို့မဟုတ်) အခြားဘာသာ တစ်ခုဖြင့်ဖြစ်စေဖော်ပြရန်၊ ကုန်အညွှန်းအမှတ်အသားဖော်ပြချက်လျှောက်ထားခြင်းနှင့်ပတ်သက်သည့် အကြောင်းအရာများကို အသိပညာပေးဆွေးနွေးခဲ့ကြောင်းသိရှိရပါသည်။

DOCA(မွန်)

 ဧရာဝတီတိုင်းဒေသကြီး၊ အသေးစားစက်မှုလက်မှုလုပ်ငန်းဦးစီးဌာန၊ တိုင်းဦးစီးမှူးရုံးတွင် တိုင်းဒေသကြီးအတွင်းရှိ အသေးစားကုန်ထုတ်လုပ်ငန်းများဖန်တီးပေးနိုင်ရေးနှင့် မိသားစုဝင်ငွေတိုးရေးဆောင်ရွက်မည့် စီမံကိန်းလုပ်ငန်းအကြောင်းတို့၏ ရှင်းလင်းပွဲအခမ်းအနားကို ၂၀၂၃ခုနှစ်၊ ဇူလိုင်လ (၂၀) ရက်နေ့၊ နံနက် (၁၀:၀၀) နာရီအချိန်တွင်ကျင်းပပြုလုပ်ခဲ့ရာ တိုင်းဒေသကြီးအဆင့် ကြီးကြပ်မှုကော်မတီ၊ အသေးစားစက်မှုလက်မှုလုပ်ငန်း၏ တိုင်းဦးစီးမှူး ဦးအောင်ဖြိုးဦးဆောင်၍ ရသုံးမှန်းခြေငွေစာရင်းဦးစီးဌာန၊ ပြည်တွင်းအခွန်ဦးစီးဌာန၊ စားသုံးသူရေးရာဦးစီးဌာန၊ အသေးစားစက်မှုလက်မှုလုပ်ငန်းဦးစီးဌာနမှဖြစ်သော ခရိုင်ဦးစီးမှူး၊ ဖျာပုံခရိုင်၊ မအူပင်ခရိုင်၊ မြောင်းမြခရိုင်၊ ဟင်္သာတခရိုင်နှင့် သက်ဆိုင်ရာနယ်မြေ‌ဒေသကျေးရွာများ၏ တာဝန်ရှိသူများတက်ရောက်ခဲ့ကြပါသည်။

   အသေးစားစက်မှုလက်မှုလုပ်ငန်းဦးစီးဌာန၊ တိုင်းဦးစီးမှူး ဦးအောင်ဖြိုးက (၂၀၂၃-၂၀၂၄) ဘဏ္ဍာနှစ်၌ ဧရာဝတီတိုင်းဒေသကြီးအတွင်း အကောင်အထည်ဖော်ဆောင်ရွက်မည့် အသေးစားကုန်ထုတ်လုပ်ငန်းများဖန်တီးပေးနိုင်ရေးနှင့် မိသားစုဝင်ငွေတိုးရေးဆောင်ရွက်မည့် စီမံကိန်း လုပ်ငန်း၏ရည်ရွယ်ချက်၊ ရည်မှန်းချက်၊ ကော်မတီဖွဲ့စည်းခြင်းနှင့်လုပ်ငန်းတာဝန်များ၊ ခရိုင်အဆင့် ကြီးကြပ်မှုကော်မတီလုပ်ငန်းတာဝန်များ၊ အသက်မွေးဝမ်းကြောင်းဆိုင်ရာသင်တန်းများ၊ လုပ်ငန်းထူထောင်လိုသူများရွေးချယ်ခြင်းလိုက်နာရမည့်စည်းကမ်းများ၊ ဥပဒေနှင့်အညီ ဆောင်ရွက်ရန်ကိစ္စများ၊ လုပ်ငန်းသုံးပစ္စည်းနှင့် နည်းပညာပံ့ပိုးရန်ကိစ္စရပ်များ၊ စီမံကိန်းဆိုင်ရာငွေကြေးသုံးစွဲမှုနှင့်ပတ်သက်သည့် လိုက်နာရမည့်စည်းကမ်းချက်များ၊ ရရှိမည့်အကျိုးကျေးဇူးများနှင့်ပတ်သက်၍ အသေးစိတ်ရှင်းလင်းပြောကြားခဲ့ကြောင်း သတင်းရရှိပါသည်။

DOCA(မွန်)