စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူး၊ ဒု- ခရိုင်ဦးစီးမှူးနှင့် ဝန်ထမ်း (၂)ဦးတို့သည် ဒီဇင်ဘာလ ၂၃ ရက်နေ့ နံနက် (၁၀း၀၀)နာရီအချိန်တွင် မုံရွာမြို့၊ စက်မှုဇုန်ရပ်ကွက်ရှိ “ငြိမ်းချမ်းရေး” ပဲခွဲစက်လုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေး ဥပဒေ(၂၀၁၉)၊ အခန်း(၁၈) အရ ကုန်အညွှန်း အမှတ်အသားဆိုင်ရာ ပြဋ္ဌာန်းချက်များနှင့်ပတ်သက်၍ စီးပွားရေးလုပ်ငန်းရှင်များ သိရှိလိုက်နာ ဆောင်ရွက်နိုင်စေရန်အတွက် အသိပညာပေးဆွေးနွေးခဲ့ပါသည်။
ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှု ပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏ အမျိုးအမည်၊ အရွယ် အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ ရေးဆိုင်ရာ ဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေး ချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခု ထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးဆွေးနွေးခဲ့ပါသည်။
“ငြိမ်းချမ်းရေး” ပဲခွဲစက်လုပ်ငန်းကို ၁၉၆၂ ခုနှစ် အဘိုးအဘွားများလက်ထက်က စတင်ခဲ့ပြီး ၁၉၉၈ ခုနှစ်တွင် “ ငြိမ်းချမ်းရေး ” အမည်ဖြင့်လုပ်ကိုင်ခဲ့ကြောင်း၊ လက်ရှိရင်းနှီးမြှုပ်နှံမှု တန်ဖိုး အနေ ဖြင့် ကျပ်သိန်း (၄၀၀၀၀)ခန့်ရှိခဲ့ကြောင်း၊ တစ်နှစ်ထုတ်လုပ်နိုင်မှု ပမာဏ(ပစ္စည်းအရေအတွက်၊တန်ဖိုး) ကျပ်သိန်း(၁၂၀၀)ခန့်ရှိခဲ့ပြီး တစ်ရက်လျှင် သိန်း(၄၀၀)ဖိုး ထုတ်လုပ်ရောင်းချနိုင်ခဲ့ကြောင်း၊ ဈေးကွက် ဈေးနှုန်း အနေဖြင့် ကုလားပဲခြမ်း (၁)ပြည်လျှင် (၅၆၀၀)ကျပ်၊ ပဲစိမ်းမှုန့်(၁)ပိဿာလျှင် (၄၇၀၀)ကျပ်၊ ပဲကျက်မှုန့်(၁)ပိဿာလျှင်(၄၈၀၀)ကျပ်ဖြင့်ရောင်းချပြီး အကျိုးအမြတ် အသင့်အတင့်ရှိကြောင်းနှင့် ရန်ကုန်မြို့ရှိ ရွှေပင်ငွေပင်၊ စိမ့်စိမ့်လေးမုန့်လုပ်ငန်းရှင်များ သည်လည်းမိမိ၏ ဖောက်သည်များ ဖြစ်ကြောင်း၊ ပြည်ပပို့ကုန်အနေဖြင့် ပြီးခဲ့သည့်နိုဝင်ဘာလတွင် တူရကီနိုင်ငံသို့ တင်ပို့နိုင်ကြောင်း၊ စက်ပစ္စည်းများကိုလည်း Update ပြုလုပ်၍ လုပ်ငန်းဖြစ်စဉ်တစ်လျှောက်လုံးတွင် ကွန်ပျူတာဖြင့် ထိန်းချုပ်သည့် စနစ်ဖြစ်အောင် ကြိုးစားဆောင်ရွက်နေကြောင်း ဆွေးနွေးပြောကြားခဲ့ကြပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြထားသော လက်ကမ်းစာစောင်များကို ဖြန့်ဝေပေးခဲ့ကြောင်း သတင်းရရှိပါသည်။
DOCA(စစ်ကိုင်း)