၄.၉.၂၀၂၆ ရက်နေ့တွင် မွန်ပြည်နယ်၊ သထုံမြို့နယ်အတွင်း ဆေးဝါးများကို သတ်မှတ်စည်းမျဉ်းစည်းကမ်းများနှင့်အညီ ရောင်းချဖြန့်ဖြူးနေမှု ရှိ/မရှိ စစ်ဆေးနိုင်ရေးနှင့် စားသုံးသူများအနေဖြင့် အရည်အသွေးပြည့်မီသော ဆေးဝါးများကို လုံခြုံစိတ်ချစွာ ဝယ်ယူအသုံးပြုနိုင်ရေးအတွက် ဌာနဆိုင်ရာအဖွဲ့များ ပူးပေါင်း၍ ဆေးဆိုင်များသို့ ကွင်းဆင်း စစ်ဆေးခြင်း ဆောင်ရွက်ခဲ့ကြောင်း သိရသည်။
အဆိုပါ ကွင်းဆင်းစစ်ဆေးမှုတွင် သက်ဆိုင်ရာ ဌာနဆိုင်ရာတာဝန်ရှိသူများ ပါဝင်သည့် ပူးပေါင်းအဖွဲ့က သထုံမြို့နယ်အတွင်းရှိ ဆေးဆိုင်များသို့ သွားရောက်၍ ဆေးဝါးများ ရောင်းချရာတွင် သတ်မှတ်ထားသည့် စည်းမျဉ်းစည်းကမ်းများနှင့်အညီ ဆောင်ရွက်ခြင်း ရှိ/မရှိ ဆေးဝါးများ၏ သက်တမ်းကုန်ဆုံးရက်၊ ထုတ်လုပ်သူနှင့် သက်ဆိုင်သည့် အချက်အလက်များ ပြည့်စုံမှန်ကန်မှု ရှိ/ မရှိတို့ကို စစ်ဆေးခဲ့ကြသည်။
ထို့အပြင် ဆေးဝါးများကို သတ်မှတ်ထားသည့် အခြေအနေများနှင့်အညီ သိုလှောင်ထားရှိမှု၊ သက်ဆိုင်ရာလိုင်စင်နှင့် မှတ်ပုံတင်အထောက်အထားများ ပြည့်စုံမှု ရှိ၊ မရှိတို့ကိုလည်း စစ်ဆေးခဲ့ပြီး လိုအပ်သည့်အချက်များအား ဆေးဆိုင်ပိုင်ရှင်များနှင့် ဝန်ထမ်းများအား အသိပညာပေး ရှင်းလင်းပြောကြားခဲ့ကြောင်း သိရသည်။
DOCA (မွန်)