အီရန်စစ်ပွဲကြောင့် စွမ်းအင်လုံခြုံရေးကို ကာကွယ်ရန် ပြည်တွင်းဝယ်လိုအား ကျဆင်းလာခြင်းနှင့် ပြုပြင်ပြီးသား ရေနံထွက်ပစ္စည်းများ ပြည်ပသို့ တင်ပို့မှုအပေါ် ကန့်သတ်ချက်များကြောင့် ရေနံချက်စက်ရုံများ၏ လည်ပတ်နှုန်းမှာ ဆယ်စုနှစ်တစ်ခုအတွင်း အနိမ့်ဆုံးသို့ ရောက်ရှိသွားခဲ့ပြီး၊ ဇွန်လတွင် တရုတ်နိုင်ငံ၏ ရေနံစိမ်းတင်သွင်းမှုသည် ၄၁.၃ ရာခိုင်နှုန်းအထိ ထိုးဆင်းသွားကာ ဆယ်စုနှစ်တစ်ခုနီးပါးကာလအတွင်း အနိမ့်ဆုံးအဆင့်သို့ ရောက်ရှိသွားခဲ့ကြောင်း သိရပါသည်။
တရုတ်နိုင်ငံသည် ဇွန်လတွင် ရေနံစိမ်း တန်ချိန် ၂၉.၂၇ သန်း (သို့မဟုတ်) တစ်ရက်လျှင် ဆီပေပါ ၇.၁၂ သန်း တင်သွင်းခဲ့ပြီး ၎င်းသည် ၂၀၁၆ ခုနှစ် အောက်တိုဘာလနောက်ပိုင်း အနိမ့်ဆုံးဖြစ်ကြောင်း သိရပါသည်။
မေလတွင် ရေနံတင်သွင်းမှု ရှစ်နှစ်တာကာလအတွင်း အနိမ့်ဆုံးအဆင့်သို့ ရောက်ရှိခဲ့ပြီးနောက်၊ ဇွန်လတွင် တင်သွင်းမှု နောက်ထပ် ၁၂% ထပ်မံကျဆင်းခဲ့သဖြင့် အဆိုပါ ကျဆင်းမှုအခြေအနေသည် မေလမှ ဇွန်လအထိ ဆက်လက်ဖြစ်ပွားခဲ့ခြင်းဖြစ်ကြောင်း သိရပါသည်။
သင်္ဘောလိုင်းများ လေ့လာစောင့်ကြည့်ရေးကုမ္ပဏီ Vortexa ၏ အဆိုအရ ဇွန်လတွင် တရုတ်နိုင်ငံ၏ ပင်လယ်ရေကြောင်းမှ ရေနံစိမ်းတင်သွင်းမှုသည် တစ်ရက်လျှင် ဆီပေပါ ၆ သန်း ခန့်ရှိခဲ့ပြီး အရှေ့အလယ်ပိုင်းမှ တင်သွင်းမှုမှာ ဆယ်နှစ်တာကာလအတွင်း အနိမ့်ဆုံးအဆင့်သို့ ရောက်ရှိသွားကြောင်းနှင့် အီရန်နိုင်ငံမှ ရေနံတင်သွင်းမှုသည်လည်း ယခင်လနှင့်နှိုင်းယှဉ်ပါက ၄၀% ကျဆင်းသွားပြီး တစ်ရက်လျှင် ဆီပေပါ ၈ သိန်းအောက်သို့ ရောက်ရှိသွားကြောင်း သိရပါသည်။
ရေနံဈေးနှုန်းများ မြင့်တက်လာပြီးနောက် စက်သုံးဆီသုံးစွဲမှု သိသိသာသာ ကျဆင်းသွားခြင်းက တရုတ်နိုင်ငံအနေဖြင့် ၎င်း၏ ကြီးမားလှသော လျှပ်စစ်ကား (EV) အုပ်စုကြောင့် ရေနံသုံးစွဲမှု လျော့နည်း၍လည်း ရပ်တည်နိုင်ကြောင်း ပြသနေသဖြင့် စျေးကွက်အတွင်း တရုတ်နိုင်ငံထံမှ ဝယ်လိုအားအပြီးတိုင် ဆုံးရှုံးသွားနိုင်ခြေကိုလည်း တွက်ချက်နေကြကြောင်း သိရပါသည်။ အကောက်ခွန်အချက်အလက်များအရ ဇွန်လတွင် သဘာဝဓာတ်ငွေ့ တင်သွင်းမှုမှာ ယမန်နှစ် အလားတူကာလထက် ၃.၇ ရာခိုင်နှုန်း တိုးတက်လာပြီး တန်ချိန် ၁၀.၉ သန်း ရှိခဲ့ကြောင်း သိရပါသည်။ သို့သော်လည်း ၂၀၂၆ ခုနှစ် ပထမနှစ်ဝက်အတွင်း သဘာဝဓာတ်ငွေ့ တင်သွင်းမှုမှာ ပြီးခဲ့သည့်နှစ် အလားတူကာလထက် ၃.၄ ရာခိုင်နှုန်းခန့် ကျဆင်းခဲ့ပြီး တန်ချိန် ၅၇.၄၅ သန်း ရှိခဲ့ကြောင်း သိရပါသည်။ အဆိုပါ အချက်အလက်များတွင် သဘာဝဓာတ်ငွေ့ရည်နှင့် ကုန်းတွင်းပိုင်းပိုက်လိုင်းမှတစ်ဆင့် တင်သွင်းသော ဓာတ်ငွေ့များကို သီးခြားစီခွဲခြားဖော်ပြထားခြင်းမရှိကြောင်း သိရပါသည်။ ဇွန်လတွင် တရုတ်နိုင်ငံ၏ ရေနံထွက်ပစ္စည်း တင်ပို့မှုမှာ တန်ချိန် ၄.၃၆ သန်းခန့် ရှိခဲ့ကြောင်း သိရပါသည်။
ဇန်နဝါရီလမှ ဇွန်လအတွင်း တရုတ်နိုင်ငံသည် ပြုပြင်ပြီးသား ရေနံထွက်ပစ္စည်း တန်ချိန် ၂၃.၅၉ သန်း တင်ပို့ခဲ့ပြီး အီရန်စစ်ပွဲအတွင်း ပြည်တွင်းထောက်ပံ့မှုကို ကာကွယ်ရန် မတ်လတွင် ချမှတ်ခဲ့သော ပြည်ပတင်ပို့မှု ကန့်သတ်ချက်များကြောင့် ယမန်နှစ် အလားတူကာလထက် ၁၃.၂ရာခိုင်နှုန်း ကျဆင်းသွားခဲ့ခြင်းဖြစ်ကြောင်း သိရှိရပါသည်။
Source: The Edge Malaysia
DOCA (ရန်ကုန်)