ဗီယက်နမ်နိုင်ငံသည် ၂၀၂၆ ခုနှစ် ပထမနှစ်ဝက်အတွင်း စိန်တင်သွင်းမှုအတွက် ဗီယက်နမ် ဒေါင် ၃.၁၆ ထရီလျံ (အမေရိကန်ဒေါ်လာ ၁၂၁.၅ သန်းကျော်) သုံးစွဲခဲ့ပြီး ၎င်းအနက် စုစုပေါင်းတင်သွင်းမှုတန်ဖိုး၏ထက်ဝက်ကျော်ကို အိန္ဒိယနိုင်ငံမှတင်သွင်းခဲ့ကြောင်း သိရပါသည်။
ဘဏ္ဍာရေးဝန်ကြီးဌာန လက်အောက်ရှိ အကောက်ခွန်ဦးစီးဌာန၏ ကနဦးထုတ်ပြန်ချက်အရ ဗီယက်နမ်နိုင်ငံသည် ၂၀၂၆ ခုနှစ် ပထမခြောက်လအတွင်း စိန်တန်ဖိုး အမေရိကန်ဒေါ်လာ ၁၂၁.၅၄ သန်းနီးပါး တင်သွင်းခဲ့ကြောင်း သိရပါသည်။ အိန္ဒိယနိုင်ငံသည် အမေရိကန်ဒေါ်လာ ၆၃.၂ သန်းတန်ဖိုး တင်ပို့ခဲ့ပြီး ဗီယက်နမ်၏ စုစုပေါင်းစိန်တင်သွင်းမှု၏ ၅၂ ရာခိုင်နှုန်းခန့်ကို ရယူထားသဖြင့် အကြီးဆုံးပေးသွင်းသူအဖြစ် ဆက်လက်ရပ်တည်ခဲ့ကြောင်း သိရပါသည်။ နှိုင်းယှဉ်ကြည့်ပါက ၂၀၂၅ ခုနှစ် တစ်နှစ်လုံးတွင် ဗီယက်နမ်က အိန္ဒိယမှ စိန်တန်ဖိုး အမေရိကန်ဒေါ်လာ ၁၀၇.၆ သန်းတန်ဖိုး တင်သွင်းခဲ့ကြောင်း သိရပါသည်။ ဘယ်လ်ဂျီယံနိုင်ငံက အမေရိကန်ဒေါ်လာ ၁၇.၉ သန်းတန်ဖိုး တင်ပို့ခဲ့ပြီး ဒုတိယအများဆုံး ပေးသွင်းသူဖြစ်လာကာ ၂၀၂၅ ခုနှစ် တစ်နှစ်လုံး၌မူ အမေရိကန်ဒေါ်လာ ၅၁.၇ သန်းတန်ဖိုး တင်ပို့ခဲ့ကြောင်း သိရပါသည်။ အစ္စရေးနိုင်ငံသည် အမေရိကန်ဒေါ်လာကိုးသန်းတန်ဖိုးဖြင့် တတိယအများဆုံး ပေးသွင်းသူဖြစ်ခဲ့ပြီး ၎င်း၏နောက်တွင် ဘော့ဆွာနာနိုင်ငံက အမေရိကန်ဒေါ်လာ ၇.၇ သန်းတန်ဖိုးနှင့် ထိုင်းနိုင်ငံက အမေရိကန် ဒေါ်လာ ၅.၁ သန်းတန်ဖိုး အသီးသီးတင်ပို့ခဲ့ကြောင်း သိရပါသည်။ အခြားအရေးပါသော ပေးသွင်း သည့်နိုင်ငံများမှာ အမေရိကန်ပြည်ထောင်စု (အမေရိကန်ဒေါ်လာ ၃.၆ သန်း)၊ ဟောင်ကောင် (တရုတ်) (အမေရိကန်ဒေါ်လာ ၂.၈ သန်း)၊ ဂျပန် (အမေရိကန်ဒေါ်လာ ၂.၇ သန်း) နှင့် တရုတ်နိုင်ငံ (အမေရိကန်ဒေါ်လာ ၂.၂ သန်း) တို့ဖြစ်ကြောင်း သိရပါသည်။ အကောက်ခွန် ဦးစီးဌာန၏ ပြောကြားချက်အရ လက်ရှိစည်းမျဉ်းစည်းကမ်းများအရ စိန်ရိုင်းများကို Kimberley Process Certification Scheme (KPCS) တွင် ပါဝင်သည့်နိုင်ငံများမှသာ တင်သွင်းခွင့်ပြုထားကြောင်း သိရပါသည်။ တင်သွင်းသည့် စိန်များတွင် တင်ပို့သည့်နိုင်ငံ၏ သက်ဆိုင်ရာ အာဏာပိုင်အဖွဲ့က ထုတ်ပေးသော KPCS အသိအမှတ်ပြုလက်မှတ် မှန်ကန်စွာပါရှိရမည်ဖြစ်ပြီး အကောက်ခွန်ဆိုင်ရာ လုပ်ထုံးလုပ်နည်းများနှင့် စာရွက်စာတမ်းလိုအပ်ချက်များကိုလည်း ပြည့်စုံစွာလိုက်နာရမည်ဖြစ်ကြောင်း သိရပါသည်။ အကောက်ခွန်အာဏာပိုင်များသည် စာရွက် စာတမ်းများ စစ်ဆေးခြင်း၊ ကုန်ပစ္စည်းများစစ်ဆေးခြင်း၊ တင်သွင်းလာသောစိန်ရိုင်းများအတွက် အသိအမှတ်ပြုလက်မှတ်ထုတ်ပေးခြင်းနှင့် ဥပဒေအရတင်သွင်းမှုများကို ကြီးကြပ်ဆောင်ရွက်ခြင်းတို့ကို တာဝန်ယူဆောင်ရွက်လျက်ရှိကြောင်း သိရပါသည်။ အကောက်ခွန်ရှင်းလင်းရေးကို တင်သွင်းကြေညာလွှာ၊ KPCS အသိအမှတ်ပြုလက်မှတ်နှင့် အခြားသက်ဆိုင်ရာ စာရွက်စာတမ်းများအပေါ် အခြေခံ၍ဆောင်ရွက်ကြောင်း သိရပါသည်။ ယခုတင်သွင်းမှုစာရင်းအင်းများသည် မကြာသေးမီက Thanh Hoa ပြည်နယ်တွင် ရဲတပ်ဖွဲ့က နယ်စပ်ဖြတ်ကျော် စိန်မှောင်ခိုကွန်ရက်ကြီးတစ်ခုကို ဖော်ထုတ်ဖမ်းဆီးခဲ့ပြီးနောက် အများပြည်သူ၏စိတ်ဝင်စားမှု ပိုမိုမြင့်တက်လာခဲ့ကြောင်း သိရပါသည်။ စုံစမ်းစစ်ဆေးရေးအဖွဲ့က သံသယရှိသူ ၂၂ ဦးကို အမှုဖွင့်တရားစွဲဆိုထားပြီး စိန် ၁,၁၀၀ လုံးကို သိမ်းဆည်းရမိခဲ့ကြောင်း သိရပါသည်။ အဆိုပါကွန်ရက်သည် ၂၀၂၄ ခုနှစ်မှစတင်ကာ မှောင်ခိုသယ်ဆောင်မှု ၁၄၁ ကြိမ် ဆောင်ရွက်ခဲ့ပြီး ဟောင်ကောင်မှ ဗီယက်နမ်သို့ ဗီယက်နမ်ဒေါင် ၂၈၀ ဘီလီယံ တန်ဖိုးရှိသော စိန် ၂၈,၀၀၀ ကျော် တရားမဝင်တင်သွင်းခဲ့ကြောင်း ရဲတပ်ဖွဲ့က ထုတ်ပြန်ခဲ့သည်ဟု သိရှိရပါသည်။
Vietnam Plus
DOCA (ရန်ုကုန်)