မြင်းခြံခရိုင်အတွင်းရှိ မြင်းခြံမြို့နယ်သည် လယ်ယာစိုက်ပျိုးရေး လုပ်ငန်းများလုပ်ကိုင် လျက်ရှိကြောင်း၊ အစေ့ထုတ်ပြောင်းစိုက်ပျိုးသော ကျေးရွာများမှာ ပတ္တာကျေးရွာ၊ အနိမ့်ကျေးရွာ၊ ခေါင်းကွဲကျေးရွာနှင့် ဓါးကျွန်းကျေးရွာများ၌ တောင်သူများသည် စီးပွားဖြစ် စိုက်ပျိုးထားကြောင်း သိရှိရသည်။ စိုက်ပျိုးရာတွင် ရာသီဥတုဒဏ်ခံနိုင်ပြီး အထွက်နှုန်းကောင်းသော 808နှင့် 888 မျိုး များကို စိုက်ပျိုးကြောင်းသိရသည်။ ၂၀၂၆ ခုနှစ်၊ ယခုမတ်လ၌ အစေ့ထုတ်ပြောင်း တစ်တင်းလျှင် (၂၃၄၀၀-၂၄၃၀၀)ကျပ်ခန့် ပေါက်ဈေးများဖြင့် အရောင်းအဝယ် ဖြစ်လျက်ရှိကြောင်း၊ ယခင် ဖေဖော်ဝါရီလ၌ အစေ့ထုတ်ပြောင်းတစ်တင်းလျှင် (၂၄၄၀၀-၂၅၃၀၀) ကျပ်ခန့် ပေါက်ဈေးများဖြင့် အရောင်းအဝယ် ဖြစ်ခဲ့ကြောင်း၊ ယခင်လနှင့် နှိုင်းယှဉ်ပါက ယခုလတွင် အစေ့ထုတ်ပြောင်း တစ်တင်းလျှင် (၁၀၀၀)ကျပ်ခန့် ဈေးနှုန်းကျဆင်းလာကြောင်း၊ ဒေသအတွင်းရှိ ကျေးရွာများမှ ထွက်ရှိသော အစေ့ထုတ်ပြောင်းများအား တောင်သူများက ပွဲရုံများသို့ လာရောက်ရောင်းချကြောင်း၊ ပွဲရုံများ၌ နေ့စဉ် (၃၀၀) အိတ်ခန့် အရောင်းအဝယ်ဖြစ်ကြောင်း၊ အိတ်များအဝင်များလာသောကြောင့် ဈေးနှုန်းအနည်းငယ် ကျဆင်းလာကြောင်း၊ ထိုပွဲရုံများမှတဆင့် ပခုက္ကူမြို့၊ မန္တလေးမြို့နှင့် ရန်ကုန်မြို့သို့ တင်ပို့ရောင်းချကြောင်း ပွဲရုံလုပ်ငန်းရှင်များ ထံမှသိရှိ ရသည်။
DOCA(မန္တလေး)