နေ့စဉ်ပုံမှန် ဝင်ငွေရရှိသည့် ကောက်ရိုးမှိုဈေးကွက် စဉ်ဆက်မပြတ် ကောင်းမွန်နေကြောင်း မှိုဈေးကွက် ကျွမ်းကျင်သူများထံမှ သိရပါသည်။ ယခုကာလတွင် အခြားသီးနှံများ ဈေးကွက်အားနည်းချက် အနည်းနှင့် အများဆိုသလို ရင်ဆိုင်ကြုံတွေ့နေရသော်လည်း ကောက်ရိုးမှို ဈေးနှုန်းများမှာ မြင့်တက်နေပြီး မှိုဈေးကွက် အတက်ဘက်သို့ ဦးတည်နေကြောင်း သိရသည်။ မှိုသည် နေ့စဉ် ဝင်ငွေရတဲ့အတွက် နေ့စဉ်ဝင်ငွေကို တွက်ချက်လို့ရတဲ့သီးနှံလည်းဖြစ်ပါသည်။ ကောက်ရိုးမှို စိုက်ပျိုး ထုတ်လုပ်ရာတွင် (၃) ပေ မှ (၁၀)ပေ အရွယ်အစားရှိ ကောက်ရိုးမှိုဘောင်တစ်ဘောင်လျှင် ပျမ်းမျှစိုက်ပျိုးစရိတ် (၇၀၀၀)ကျပ်မှ (၁၀၀၀၀)ကျပ် ဝန်းကျင် ကုန်ကျနိုင်ကြောင်း သိရသည်။ ဘောင်တစ်ဘောင်ကို ခန့်မှန်းခြေအားဖြင့် ကောက်ရိုးမှို သုံးပိဿာကနေ ငါးပိဿာအတွင်း အထွက်နှုန်းရရှိပါတယ်။မှိုမျိုးထုပ်ကတော့ ဒေသမျိုးက တစ်ထုပ်ကို လေးရာ/ ငါးရာကျပ်၊ ထိုင်းမျိုးကတော့ တစ်ထုပ်ကို ထောင့်နှစ်ရာကျပ်ရှိပါတယ်။ ဒေသမျိုးနဲ့စိုက်မည်ဆိုလျှင် မှိုဘောင်တစ်ဘောင်ကို မျိုးထုပ်လေးထုပ်/ ငါးထုပ်လောက် ထည့်ရပါတယ်။ ထိုင်းမျိုးဆိုရင်တော့ မှိုဘောင်တစ်ဘောင်ကို မျိုးထုပ်နှစ်ထုပ်ထည့်ရပါသည်။ ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့၊ မြို့မဈေးတွင် ရောင်းချနေသော မှိုဈေးနှုန်းများသည် မှို (၁၀)သားကို (၂၀၀၀)ကျပ်၊ မှို (၃၀)သားကို (၅၀၀၀)ကျပ်ဖြင့်ရောင်းချနေကြောင်း သိရှိရပါသည်။
DOCA(ပဲခူး)