ပဲပန်းကို အေးမြသော ဒေသများဖြစ်သည့် ရှမ်းပြည်နယ်(တောင်ပိုင်း) ကလော၊ အောင်ပန်း၊ ပင်းတယဒေသများ၊ ရှမ်းပြည်နယ်(မြောက်ပိုင်း) ပြင်ဦးလွင်ဒေသနှင့် ချင်းတောင်တန်း အချို့နေရာများတွင် စီးပွားဖြစ်စိုက်ပျိုးသော အရေးပါသည့် အဓိက ကုန်သွယ်ရေးပန်းတစ်မျိုးဖြစ် ကြောင်း လေ့လာသိရှိရပါသည်။ ပဲပန်းကို စက်တင်ဘာလနှင့် အောက်တိုဘာလများတွင် စတင်စိုက်ပျိုးပြီး ဇန်နဝါရီလမှ မတ်လအထိ အထွက်လှိုင်၍ ဈေးကွက်အဝင်ကောင်းကာ အရောင်းသွက်နေကြောင်း သိရှိရပါသည်။
ပဲပန်းရောင်စုံအပွင့်များကို စိတ်ကြိုက်စုစည်း၍ ဘုရားပန်းကပ်ခြင်း၊ အခမ်းအနားနှင့် ဧည့်ခန်းများတွင် အလှဆင်ခြင်းတွင် အသုံးပြုကြပြီး ပဲပန်း၏လှပမှုဖြင့် စိတ်ကြည်နူးမှုရရှိနိုင်သော ပန်းတစ်မျိုးဖြစ်ပါသည်။ ပဲပန်းရိုးတံတစ်တံလျှင်လက်လီဈေးနှုန်းမှာ(၅၅၀-၁၀၀၀)ကျပ်နှင့် လက်ကားဈေးနှုန်းမှာ ပဲပန်းရိုးတံတစ်တံလျှင် (၁၅၀၀-၂၀၀၀)ကျပ်ထိ ဈေးရှိနေကြောင်း ဈေးကွက်အတွင်းမှ သိရှိရပါသည်။
ပဲပန်းများကို အစီးလိုက်ထုပ်ပိုးပြီး စက္ကူပုံးများဖြင့်ထည့်၍ ရန်ကုန်၊ မန္တလေးဒေသစုံသို့တင်ပို့ပြီး ဂျပန်၊ စင်္ကာပူ၊ ထိုင်းနှင့် မလေးရှားနိုင်ငံများသို့လည်း လေကြောင်းဖြင့် တင်ပို့ကြပါသည်။
ပဲပန်းစိုက်တောင်သူအစုအဖွဲ့များအနေဖြင့် စီးပွားဖြစ် တွက်ခြေကိုက်သောပန်းဖြစ်ကြောင်း လေ့လာသိရှိရပါသည်။
DOCA(ရှမ်း)