ဖရဲသီးကို ဒေသမရွေးနေရာအနှံ့အပြားတွင် စိုက်ပျိုးကြပါသည်။ ဖရဲပင်သည် နွယ်အမျိုး အစားဖြစ်ပါသည်။ အနွယ်ရောအရွက်ပါ အစိမ်းရောင်ရှိပါသည်။ အရွက်မှာ (၄)လက်မမှ (၆) လက်မ ခန့်ရှည်လျားသည့် လက်ခြားအရွက်များရှိပါသည်။ပင်စည်နှင့် အရွက်များတွင် အမွှေးများ ဖုံးလွှမ်း ထားပါသည်။ အသီးပုံသဏ္ဍာန်မှာ လုံးဝိုင်းပုံ၊ လုံးရှည်ပုံ၊ ဘဲဥပုံ အစရှိသည့် ပုံသဏ္ဍာန် အမျိုးမျိုးရှိကြပါသည်။ စိုက်ပျိုးရန်သင့်လျော်သော မြေအမျိုးအစားမှာ သဲနှုန်းမြေ ဖြစ်ပါသည်။ မိုးရာသီကုန်ဆုံးချိန်တွင် ကျွန်းမြေ၊ လက်ကွက်များတွင် အများအားဖြင့် စိုက်ပျိုးကြပါသည်။
နေရောင်ခြည်ပြည့်ဝစွာရရှိပြီး လေစိုထိုင်းစနည်းသော ဒေသများတွင် ဖရဲစိုက်ပျိုးလျှင် ဖရဲသီး အထွက်နှုန်းကောင်စွာဖြစ်ထွန်းပါသည်။ ဖရဲသီးအား အောက်တိုဘာလမှ ဖေဖေါ်ဝါရီလ များတွင် အများအားဖြင့် စိုက်ပျိုးကြပါသည်။ ဖရဲစိုက်ပျိုးရာတွင် ဖရဲစေ့ကို မြေပြင်တွင် တိုက်ရိုက် စိုက်ပျိုးခြင်း၊ မျိုးစေ့ဖြင့် ပျိုးထောင်စိုက်ပျိုးခြင်းတို့ဖြင့်လည်း စိုက်ပျိုးကြပါသည်။ ဖရဲစိုက်ပျိုးရာ ဒေသများမှာ ပြည်မြို့နယ်ဒေသတစ်ဝိုက်နှင့် ရွှေတောင်မြို့နယ်အတွင်းရှိ ကျေးလက်ဒေသများတွင် တစ်ပိုင်တစ်နိုင်အဖြစ် စိုက်ပျိုးကြပါသည်။
ဖရဲစိုက်ပျိုးပြီးနောက်အလုံးသေးမျိုးတွင် ပန်းပွင့်ပြီး (၂၅)ရက်မှ (၃၀)ရက်အကြာတွင် အသီးများစတင်သီးလာပြီး ခူးဆွတ်နိုင်ပါသည်။ ဖရဲသီးအတွင်းအခွံမှာ အစိမ်းရောင်ဖြစ်ပြီး အတွင်း အသားမှာအနီရောင်၊ အဝါရောင်သားများရှိကြသည်။ အသားမှာ အရည်ရွှမ်းပြီးစားလျှင် အရသာ ချိုမြိန်ပါသည်။အသားကို နွားနို့၊ သကြားနှင့်ရောပြီးဖျော်ရည်အဖြစ်ပြုလုပ်ပြီး သောက်သုံးကြ ပါသည်။
ဖရဲကို ပြည်ပကိုတင်ပို့လျှင် စရိတ်ခကြီးသဖြင့် ဖရဲစိုက်တောင်သူများမှာ ပြည်တွင်းဈေးကွက် တွင် ဈေးကောင်းရရှိရန် မျှော်မှန်းစိုက်ပျိုးကြောင်းသိရပါသည်။
ယခုအခါတွင် ဈေးကွက်အတွင်း ရောင်းချနေသည့် ဖရဲသီးဈေးနှုန်းများမှာ ဖရဲသီးအသေး တစ်လုံးလျှင် (၁၀၀၀)ကျပ်၊ အကြီးတစ်လုံးလျှင် (၃၅၀၀)ကျပ်နှင့် ဖရဲသီးစိတ် တစ်စိတ်လျှင် (၅၀၀) ကျပ်တို့ဖြင့် ဈေးကွက်အတွင်း အရောင်းအဝယ်ဖြစ်နေကြောင်းသိရှိရပါသည်။
DOCA(ပဲခူး)