မိတ္ထီလာဈေးကွက်တွင် ဒီဇင်ဘာလဆန်း၌ ကွမ်းရွက်ဈေးနှုန်း ထပ်မံမြင့်တက်လာကြောင်း သိရသည်။ ဈေးကွက်သို့ ကွမ်းရွက်ကို ကျောက်ဆည်၊ မြင့်ခြံတို့မှ ဝင်ရောက်မှုများပါသည်။ ကွမ်းရွက်မှာ ဆောင်းရာသီကာလတွင် အရွက်/အညွှန့်ထွက်နှုန်းကျသည့်အတွက် ဈေးမြင့်လေ့ရှိပါသည်။ ယခုနှစ် ကွမ်းရွက်ဈေးမှာ မိုးတွင်းကာလ ဇူလိုင်၊ ဩဂုတ်လများက တစ်ပိဿာလျှင် (၄၀၀၀) ကျပ် ဝန်းကျင်ရှိခဲ့ရာမှ နိုဝင်ဘာလဆန်းတွင် (၈၀၀၀) ကျပ်အထိ နှစ်ဆမြင့်တက်ခဲ့ပါသည်။ နိုဝင်ဘာလလယ်မှစ၍ တစ်ပိသာ (၁၆၀၀၀) ကျပ်မှ လကုန်ပိုင်းတွင် (၂၀၀၀၀) ကျပ်ထိမြင့်တက်လာသော ကွမ်းရွက်ဈေးမှာ ယခုဒီဇင်ဘာလဆန်းမှာတော့ (၂၄၀၀၀) ကျပ်အထိ ဈေးမြင့်လာပါသည်။ ဆောင်းရာသီတွင် ဈေးမြင့်လေ့ရှိသော ကွမ်းရွက်ဈေးမှာ ယခင်နှစ်က တစ်ပိဿာ (၃၂၀၀၀) ကျပ်ထိ ဈေးမြင့်ခဲ့ပါသည်။ ကွမ်းယာကြိုက်သည့် စားသုံးသူများ၏ ဝယ်လိုအားခိုင်မာသည့်အတွက် ဈေးမြင့်လာသော်လည်း အရောင်းသွက်ကြောင်း ဈေးကွက်မှ သိရှိရပါသည်။
DOCA(မန္တလေး)