ငါးသလောက်ငါးသည် မြန်မာနိုင်ငံတွင် လူကြိုက်များသော ငါးအမျိုးအစားများ၌ ပါဝင်၍ အရသာမှာလွန်စွာကောင်းလို့ "ငါးမှာငါးသလောက်" လို့ပါ ဆိုရိုးစကားထဲ ဝင်ထားသောငါး ဖြစ် ကြောင်း၊ မြင်းခြံမြို့၊ အေးမြသီတာဈေး၌ ရောင်းချနေသော မြစ်ငါးသလောက်ငါး တစ်ပိဿာ လျှင် (၂၅၀၀၀-၃၀၀၀၀)ကျပ်ခန့်ပေါက်ဈေးများဖြင့် ရောင်းချလျက်ရှိကြောင်း၊ ယခင်လနှင့် နှိုင်းယှဉ်ပါက ယခုလတွင် မြစ်ငါးသလောက်ငါးတစ်ပိဿာလျှင် (၂၀၀၀-၂၅၀၀) ကျပ်ခန့်ဈေးနှုန်းမြင့် တက်ခဲ့ကြောင်း၊ ထိုသို့မြင့်တက်ခဲ့ခြင်းမှာ ပင်လယ်ငါးသလောက်ငါးများဈေးကွက်၌ ထွက်ပေါ်မှု မရှိသေးသဖြင့် ဈေးနှုန်းများမြင့် တက်ခြင်းဖြစ်ကြောင်း၊ စားသုံးမှုများ၍ အရောင်းအဝယ် သွက်လျက်ရှိကြောင်း၊ ငါးအရောင်းဆိုင် ဒိုင်များမှ သိရှိရသည်။ ဒါးကျွန်းကျေးရွာ၊ ဖိုးတုတ်ဖြူကျေးရွာ၊ လေးအိမ်တန်းကျေးရွာနှင့် အနိမ့်ကျေးရွာများသည် ဧရာဝတီ မြစ်ရိုးတစ်လျှောက်တွင် တည်ရှိ၍ ငါးဖမ်းလုပ်ငန်းဖြင့် အသက်မွေးဝမ်းကျောင်းပြုကြကြောင်း၊ မြစ်အတွင်းမှ ဖမ်းယူရရှိသောငါးများကို မြင်းခြံမြို့အတွင်းရှိ ငါးဒိုင်များသို့ ရောင်းချကြကြောင်း၊ ငါးဒိုင်သွင်းဈေးအနေဖြင့် တစ်ပိဿာလျှင် (၂၀၀၀၀-၂၅၀၀၀) ကျပ်ခန့် ဈေးများဖြင့် ဒိုင်မှကောက်ကြောင်း တံငါလုပ်ငန်းလုပ်ကိုင်သူ၏ ပြောပြချက်အရ သိရှိရသည်။
DOCA(မန္တလေး)