တောင်သာမြို့နယ်သည် ဥယျာဉ်ခြံမြေများ၌ စားဖိုဆောင်သီးနှံများ စိုက်ပျိုးလျက်ရှိပြီး ကျောက်ဖူးရွာ၊ ချောင်းဆုံရွာ၊ စံဦးရွာ၊ ဆယ်ရွာနှင့် ဇရပ်ကြီးကျေးရွာများတွင် ပဲတောင့်ရှည် ဟင်းသီးဟင်းရွက်ပင်များကို စီးပွားဖြစ်တစ်နိုင်တစ်ပိုင် စိုက်ပျိုးထားကြောင်းသိရှိရသည်။ ပဲတောင့် ရှည်များစိုက်ပျိုးရာတွင် မျိုးအနေဖြင့် အစိမ်းနု၊ အစိမ်းရင့်၊ ကတ္တီပါအနီရောင် မျိုးများကိုသာစိုက် ပျိုးကြောင်း၊ မြေအမျိုးမျိုးတွင် စိုက်ပျိုး၍ရကြောင်း၊ မြေကောင်းလျှင် အထွက်ပိုကောင်း ကြောင်း၊ စိုက်ပျိုးရာတွင် ရေမဝပ်သောမြေတွင် စိုက်ပျိုးပြီး ထွန်ရေးအသင့်အတင့်ဖြင့် စိုက်ပျိုး နိုင်ကြောင်း သိရှိရသည်။ တိုင်ထောင်ပဲကို တစ်တန်းနှင့် တစ်တန်းသုံးပေခြား၍ တစ်ပင်နှင့်တစ်ပင် (၉-၁၀) လက်မ ခွာ၍စိုက်ပျိုးကြကြောင်း၊ အပင်များရှည်လာသောအခါ အနည်းဆုံး(၇)ပေ ခန့်ရှည်သော ဝါးတိုင် (သို့မဟုတ်) သစ်သားတိုင်များကို အပင်၏တိုင်ခြေတွင် ထောင်ပေးရကြောင်း၊ အပင်ခြေတွင် ရေမဝပ်ရန် သတိပြုရမည်ဖြစ်ကြောင်း၊ စိုက်ပျိုးပြီး (၃၀)ရက် အကြာတွင် ပဲတောင့် ရှည်များကို အစေ့နုသော အချိန်တွင် ခူးဆွတ်ရကြောင်း၊ အထွက်နှုန်းအနေဖြင့် မြေအမျိုးအစား ပေါ်မူတည်ပြီး တစ်ဧကလျှင် အထွက်နှုန်း(၄၀၀)ပိဿာခန့်ထွက်ရှိကြောင်း၊ တစ်ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ ၊မြေပြင်ခ၊ ဝါးဖိုး၊ စိုက်ပျိုးစရိတ်အပါအဝင် (၁,၁၀၀,၀၀၀)ကျပ်ဝန်းကျင် ကုန်ကျကြောင်း၊ စိုက်ခင်းအရောက်ဈေးနှုန်းမှာ တစ်ပိဿာလျှင် (၄,၅၀၀)ကျပ်၊ လက်ကားဈေး တစ်ပိဿာလျှင် (၅၀၀၀)ကျပ်၊ လက်လီတစ်ပိဿာလျှင် (၆,၀၀၀) ကျပ်ခန့် ရရှိကြောင်း၊ တောင်သူ အကျိုးအမြတ်အနေဖြင့် (၇၀၀,၀၀၀)ကျပ်ခန့် ရရှိကြောင်း၊ တောင်သူများအနေဖြင့် ကုန်ကျ စရိတ်နည်းပြီး ကာလတိုအတွင်း စီးပွားဖြစ်ဝင်ငွေရသောသီးနှံဖြစ်ကြောင်း ပဲတောင့်ရှည် စိုက်တောင်သူ တစ်ဦးထံမှသိရှိရသည်။
DOCA(မန္တလေး)