ပဲခူးတိုင်းဒေသကြီး (အနောက်ပိုင်း) ပြည်ခရိုင်၊ ပြည်မြို့ မြို့မစည်ပင်သာယာဈေးကြီးနှင့် အခြား ဈေးများတွင် နိုဝင်ဘာလ ဒုတိယပတ်တွင်လည်း မုန်လာဥဖြူများမှာ အရောင်းအဝယ်ဖြစ်ပြီး ဈေးကောင်းလည်းရရှိကြောင်း သိရှိရပါသည်။ မုန်လာဥဖြူကို တို့စရာအပြင် သုတ်စား၊ အချဉ်ထည့်၊ နေလှန်းအခြောက်ခံ၊ ကြိုက်နှစ်သက်ရာ အသားနှင့်ရော၍ ချတ်ပြုတ်၍လည်းကောင်း၊ ကြော်၍ လည်းကောင်း၊ ဟင်းချိုအဖြစ်လည်း သောက်သုံးကြပါသည်။ မုန်လာဥဖြူသည် အကြောတတ်တတ် သူများအတွက် ဆေးဖက်ဝင်သော အစားအစာတစ်ခုလည်းဖြစ်ပါသည်။ မုန်လာဥဖြူသက်ငယ်မျိုးကို စိုက်ပျိုးပါက စိုက်သက်တမ်း (၃၅) ရက်မှ (၄၀) ရက်သားဝန်းကျင်တွင် နှုတ်ယူနိုင်ပြီး၊ မုန်လာဥဖြူ သက်ကြီးမျိုးကို စိုက်ပျိုးပါက စိုက်သက်တမ်း (၅၅) ရက်သားတွင် နှုတ်ယူရောင်းချနိုင်ကြောင်း သိရှိ ရပါသည်။ မုန်လာဥဖြူကို ဆောင်းတွင်းတွင်သာ ရာသီသီးနှံအဖြစ် စိုက်ပျိုးကြသော်လည်း ရာသီချိန် မဟုတ်သော်လည်း ဝယ်ယူစားသုံးကြသဖြင့် ဟင်းသီးဟင်းရွက်များထဲမှ ရက်တိုသီးနှံ ဖြစ်သောကြောင့် ဝင်ငွေလည်းအရမြန်ပြီး စားဝတ်နေရေးအတွက် အထောက်အကူပြုတဲ့ သီးနှံတစ်ခု ဖြစ်သည့်အတွက် ရာသီချိန်မဟုတ်ဘဲ ရေလောင်း၍ စိုက်ပျိုးလာကြပါသည်။ မုန်လာဥဖြူသည် မြေဆီမြေနှစ်အသင့်အတင့်ရှိသော မြေနှင့်ရေသွင်းရေထုတ် ကောင်းမွန်သော မြေ၊ နေရောင်ခြည် ရရှိမည့် နေရာမျိုးနှင့် ထယ်ရေး ညက်သော မြေအမျိုးအစားကို ကြိုက်နှစ်သက်သော အပင်အမျိုး အစားဖြစ်ပါသည်။ မုန်လာဥဖြူကို မိုး အရမ်းများရင် စိုက်ပျိုးလို့မရပါဘူး။ မုန်လာဥဖြူကို မှော်ဇာ၊ ပုတီးကုန်း၊ အင်းမ၊ သဲကုန်း၊ ဝက်ပုတ်၊ ဆင်မြီးဆွဲကျေးရွာများမှ အများဆုံးစိုက်ပျိုးကြသော်လည်း ယခုထွက်ရှိသော မုန်လာဥဖြူများမှာ မှော်ဇာ၊ ပုတီးကုန်း၊ အင်းမ၊ ရွှေတောင်မြို့နယ်ဘက်မှ ထွက်ရှိသောသီးနှံဖြစ်ပြီး ၎င်းကို ပြည်မြို့ မြို့မဈေးကြီးနှင့် အခြားဈေးများတွင် ရောင်းချနေပြီ ဈေးကောင်းရပြီး အရောင်းအဝယ်ဖြစ်ကြောင်း သိရှိရပါသည်။ မုန်လာဥဖြူအကြီး (၅) လုံးတစ်တွဲလျှင် ကျပ် (၁၂၀၀)နှင့် မုန်လာဥဖြူအလတ် (၅)လုံးတစ်တွဲလျှင် ကျပ် (၈၀၀)၊ မုန်လာဥဖြူအသေး(၅)လုံးတစ်တွဲလျှင် ကျပ် (၅၀၀) ထိရှိ၍ ဈေးကောင်းရပြီး အရောင်း အဝယ်ဖြစ်လျက်ရှိကြောင်း သိရှိရပါသည်။ ဒေသအတွင်း စားသုံးပိုလျှံမှသာ ရန်ကုန် တညင်းကုန်းဈေးနှင့် သီရိမင်္ဂလာဈေးသို့ တင်ပို့ရောင်းချကြ ကြောင်း သိရှိရပါသည်။
DOCA(ပဲခူး)