ထန်းသီးမှထွက်လာသော အစို့ကို ထန်းမြစ် (ထန်းပင်မြစ်) ကို မီးဖုတ်၍လည်းကောင်း၊ ပြုတ်၍ လည်းကောင်း၊ ကြော်၍လည်းကောင်း စားသုံးလေ့ရှိကြပါသည်။ ပြည်မြို့အနီးတစ်ဝိုက်ရှိ ကျေးရွာများ ဖြစ်သော မှော်ဇာ၊ ပုတီးကုန်း၊ ပေါင်းတလည်ကျေးရွာများမှ တစ်ပိုင်တစ်နိုင်စိုက်ပျိုး ကြပြီး ပြည်မြို့ စည်ပင်သာယာဈေးကြီးနှင့် အခြားဈေးများသို့ တင်ပို့ရောင်းချကြောင်း သိရပါသည်။ အဆိုပါ ထန်းမြစ် စိုက်ပျိုးရန်အတွက် ထန်းသီးအစေ့ရင့်များကို ဝါဆိုလနှင့် ဝါခေါင်လတို့တွင် မြေကျင်းများတူး၍ မြှုပ်ပြီး စိုက်ပျိုးကာ တန်ဆောင်မုန်းလဆန်းပိုင်းလောက်တွင် ထန်းပင်မြစ်များ တူးဖော်ရောင်းချကြပါသည်။ ယခုအချိန်တွင် ထန်းပင်မြစ်များ စတင်ထွက်ပေါ်လာပြီ ဖြစ်ပါသည်။ ပေါ်ဦးပေါ်ဖျားဖြစ်၍ ထန်းပင်မြစ် (၁၀) ချောင်းပါတစ်စည်းလျှင် (၂၅၀၀ - ၃၀၀၀) ကျပ်တို့ဖြင့် ဈေးကောင်းရ ရောင်းချနေကြောင်း သိရပါသည်။
DOCA (ပဲခူး)