မန္တလေးတိုင်းဒေသကြီး ၊ ကျောက်ဆည်ခရိုင်တွင် ဆီထွက်သီးနှံမျိုးစုံစိုက်ပျိုးလျက်ရှိရာ ၄င်းသီးနှံများအနက် ဆီထွက်သီးနှံတစ်မျိုးဖြစ်သော နေကြာသီးနှံကိုလည်း တောင်သူများမှ သီးထပ် သီးညှပ်စိုက်ပျိုးသည့်အပြင် သီးသန့်ဧကအလိုက် စိုက်ပျိုးလျက်ရှိပါသည်။နေကြာဆောင်း စိုက်ပျိုးမှု ကုန်ကျစရိတ်အနေဖြင့် မျိုး၊သွင်းအားစု၊လုပ်သားခ အပါအဝင် စုစုပေါင်း(၄၀၀၀၀၀/-)ကျပ်ခန့် ကုန်ကျကြောင်း၊ နေကြာဆောင်းကို အောက်တိုဘာနှင့်နိုဝင်ဘာလများတွင် စတင်စိုက်ပျိုးကြပြီး ဇန်နဝါရီနှင့်ဖေဖော်ဝါရီလများတွင် စတင်ထွက်ရှိမှာဖြစ်ကြောင်း၊နေကြာစိုက်ပျိုးမှု မျိုးအနေဖြင့် ဆင်းရွှေကြာမျိုး-၁၊ ဆင်းရွှေကြာမျိုး-၂ မျိုးများကို အများဆုံစိုက်ပျိုးကြကြောင်း၊နေကြာဆောင်းကို သီးသန့်စိုက်ပျိုးကြသလို သီးထပ်သီးညှပ်အဖြစ်လည်း ရာသီမရွေးစိုက်ပျိုးကြကြောင်း၊ယခင်နှစ် နေကြာဆောင်းထွက်ပေါ်ချိန်တွင်အထွက်နှုန်းအနေဖြင့်(၂၀-၂၅)တင်းအထိထွက်ရှိကြောင်း၊ယခင်နှစ် ပေါက်စျေးအနေဖြင့်(၅၅၀၀၀/-)ကျပ်စျေးနှုန်းများဖြင့်အရောင်းအဝယ်ဖြစ်ခဲ့ပြီး စိုက်ပျိုးစရိတ်နှုတ်ပြီး အကျိုးအမြတ်အနေဖြင့်(၉၇၅၀၀၀/-)ကျပ်မြတ်ခဲ့ကြောင်း၊ ယခုလက်ရှိ စျေးကွက်အတွင်းအရောင်း အဝယ်ဖြစ်နေသောနေကြာစျေးနှုန်းများမှာ တစ်တင်းလျှင်(၆၀၀၀/-)ကျပ်၊နေကြာဆီ(၁)ပိဿာလျှင် (၂၀၀၀၀/-)ကျပ်စျေးနှုန်းများဖြင့် အရောင်းအဝယ်ဖြစ်နေကြောင်း၊နေကြာဆောင်း ထွက်ပေါ်ချိန်တွင် တောင်သူများမှ မြို့ပေါ်ပွဲရုံသို့ ကိုယ်တိုင်ရောင်းချကြောင်း၊ပွဲရုံများမှတဆင့် ရန်ကုန်၊မန္တလေးမြို့များ သို့တင်ပို့ရောင်းချကြကြောင်း၊စိုက်ပျိုးစရိတ်သက်သာပြီး မိသားစု စားသုံးဆီဖူလုံရုံသာမက စီးပွားဖြစ် ဝင်ငွေတိုးသောကြောင့် နေကြာသီးနှံကိုလည်း တိုးချဲ့စိုက်ပျိုးသင့်ပါကြောင်း နေကြာဆောင်း စိုက်ပျိုး သောတောင်သူတစ်ဦး၏ပြောကြားချက်အရသိရှိရပါသည်။
DOCA(မန္တလေး)