ကမ္ဘောဒီးယားနိုင်ငံ၏ စိုက်ပျိုးရေးအလားအလာကို ရှာဖွေရန်နှင့် ဒေသတွင်းစီးပွားရေး လုပ်ငန်းများနှင့် ပိုမိုခိုင်မာသော ကုန်သွယ်မှုပူးပေါင်းဆောင်ရွက်မှုများ ဖန်တီးရန် တရုတ်နိုင်ငံ၊ Guangdong ပြည်နယ်မှ တရုတ်စီးပွားရေးလုပ်ငန်းများကို စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန တိုက်တွန်းခဲ့သည်။ ၂၇-၉-၂၀၂၅ ရက်နေ့၊ နံနက်ပိုင်းတွင် ကမ္ဘောဒီးယားနိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ လက်ထောက် အတွင်းရေးမှူး Svay Nakry သည် Guangdong ပြည်နယ် ကော်မတီ (CCPit Guangdong) ၏ နိုင်ငံတကာ ကုန်သွယ်မှု မြှင့်တင်ရေး တရုတ်ကောင်စီ ဥက္ကဋ္ဌ Chen Xiaofeng ကို လက်ခံတွေ့ဆုံခဲ့စဉ် တိုက်တွန်းခဲ့သည်။ Nakry က ကမ္ဘောဒီးယားနှင့် Guangdong ပြည်နယ်ကြား ကုန်သွယ်မှု ပူးပေါင်းဆောင်ရွက်မှု နက်ရှိုင်းစေမည့် နည်းလမ်းများကို ဆွေးနွေးရန်ရည်ရွယ်ပြီး အဓိက ကဏ္ဍများတွင် ရင်းနှီးမြှုပ်နှံမှု အလားအလာများကို ရှာဖွေခြင်း၊ ကမ္ဘောဒီးယား၏ စိုက်ပျိုးရေးအလားအလာရှိသော ထုတ်ကုန်များကို လေ့လာနားလည်ရန်၊ ရင်းနှီးမြှုပ်နှံမှုနှင့် အကျိုးတူလုပ်ငန်းများကို ပူးတွဲမြှင့်တင်ရန်အတွက် ကမ္ဘောဒီးယားကုမ္ပဏီများနှင့် ကုန်သွယ်မှုဆိုင်ရာ ပူးပေါင်း ဆောင်ရွက်မှုများ ထူထောင်ရန် တရုတ်ရင်းနှီးမြှုပ်နှံသူများအတွက် ခိုင်မာသောပံ့ပိုးကူညီမှုနှင့် အားပေးမှုများကို ပြောကြားခဲ့သည်။ ဒစ်ဂျစ်တယ်ကုန်သွယ်မှုတွင် ပူးပေါင်းဆောင်ရွက်မှု၊ ကမ္ဘာလုံးဆိုင်ရာကုန်သွယ်မှုကို ကွဲပြားစေရန် ထောက်ပံ့ရေးကွင်းဆက်များ အားကောင်း လာစေရန်နှင့် ဒေသနှစ်ခုကြား သွင်းကုန်နှင့်ပို့ကုန်များ တိုးချဲ့ခြင်းအတွက် နယ်ပယ်များကို ဆက်လက်ပြောကြားခဲ့သည်။ ကမ္ဘောဒီးယားနှင့် တရုတ်စီးပွားရေးလုပ်ငန်းများအကြား တိုးမြှင့်ပူးပေါင်းဆောင်ရွက်မှုသည် ဘက်စုံပူးပေါင်းဆောင်ရွက်မှုကို တည်တံ့စေရုံသာမက ကမ္ဘောဒီးယားနှင့်တရုတ်နိုင်ငံအကြား တည်မြဲသော ချစ်ကြည်ရင်းနှီးမှုကိုလည်း ပိုမိုခိုင်မာစေမည်ဖြစ်ကြောင်း Nakry က မှတ်ချက်ပြုခဲ့သည်။
Source: Khmer Times
DOCA( ရန်ကုန်)