ဧရာဝတီတိုင်းဒေသကြီး၊ ပုသိမ်မြို့နယ်အတွင်း ယခုလက်ရှိစိုက်ပျိုးထုတ်လုပ်မှု များပြား လာသည့် မိုးရာသီသီးနှံများထဲမှ သံပုရာသီး၏ ဈေးနှုန်းများ အနည်းငယ် ကျဆင်းလျက်ရှိကြောင်း သိရသည်။ စိုက်ပျိုးရေးသမားများထံမှ ဈေးကွက်သို့ ပို့ဆောင်လာမှု ပိုမိုများပြားလာခြင်းကြောင့် ယခုကဲ့သို့ ဈေးနှုန်း အနည်းငယ် ပြန်လည်ကျဆင်းလာခြင်း ဖြစ်သည်ဟု ဈေးကွက်လုပ်ငန်းရှင်များက ဆိုသည်။ သံပုရာသီးသည် ကျန်းမာရေးအတွက် အကျိုးကျေးဇူးများစွာ ရှိပြီး သွေးတိုးရောဂါ၊ ကင်ဆာရောဂါများ ကာကွယ်ပေးခြင်း၊ ကိုယ်အလေးချိန် ထိန်းညှိပေးခြင်း၊ ကျောက်ကပ် ကျောက်တည် ခြင်းမှ ကာကွယ်ပေးခြင်း အပါအဝင် မောပန်းနွမ်းနယ်မှုကို ပြေလျော့စေသော ဂုဏ်သတ္တိများ ရှိသဖြင့် နေ့စဉ်စားသုံးသင့်သော သီးနှံတစ်မျိုးလည်း ဖြစ်သည်။
လက်ရှိဈေးကွက်အခြေအနေအရ ပုသိမ်မြို့နယ်အတွင်းရှိ သီးနှံကုန်စိမ်းဒိုင်များတွင် သံပုရာသီး (၁)လုံးကို လက်ကားဈေး ကျပ် (၅၀) မှ (၆၀) အထိ အနည်းငယ်ကျဆင်းကာ ရောင်းချနေကြောင်း သိရပြီး၊ မြို့နယ်အတွင်းရှိ ဈေးကြီးများနှင့် ဈေးကွက်များတွင် လက်လီဈေးနှုန်းအနေဖြင့် ကျပ် (၇၅) မှ (၈၀) ကြား ရောင်းချလျက်ရှိကြောင်း သိရှိရသည်။ ယခုကဲ့သို့ ဈေးနှုန်းများ အနည်းငယ်ကျဆင်းလာခြင်း သည် စားသုံးသူများအတွက် ကုန်စုံဈေးထက် သင့်တင့်သောဈေးနှုန်းဖြင့် ဝယ်ယူစားသုံးနိုင်ရန် အခွင့်အရေးကောင်းတစ်ရပ် ဖြစ်လာစေကြောင်း သိရသည်။
DOCA (ဧရာဝတီ)