ဟင်္သာတခရိုင်အတွင်း ယခုနှစ် မိုးရာသီ မြေပဲသီးနှံကို ဧက (၂၅,၀၀၀) ခန့် စိုက်ပျိုးထားရှိပြီး စိုက်ဧက၏ (၂၅) ရာခိုင်နှုန်းခန့် ခူးဆွတ်ပြီးစီးကာ ဈေးကွက်အတွင်းသို့ စတင်ဝင်ရောက်လျက်ရှိကြောင်း ခရိုင်စိုက်ပျိုးရေးဦးစီးဌာနမှ သိရသည်။
ခရိုင်အတွင်းရှိ ဈေးများတွင် စက်တင်ဘာလကုန်ပိုင်းမှစ၍ ဒေသတွင်းထွက် မြေပဲအစို အတောင့် တစ်တင်းလျှင် ကျပ် (၂၅,၀၀၀) ခန့်၊ အခြောက်အတောင့် တစ်တင်းလျှင် ကျပ် (၃၀,၀၀၀) မှ (၃၅,၀၀၀) အတွင်း ရောင်းချလျက်ရှိသည်။ မြေပဲအဆံမှာ တစ်တင်းလျှင် ကျပ် (၁၂၃,၀၀၀) မှ (၁၂၈,၀၀၀) ထိ ရှိပြီး ရန်ကုန်၊ မန္တလေးစသော မြို့ကြီးများသို့ တင်ပို့ရောင်းချမှုများရှိကြောင်း ဒေသခံ ပဲပွဲစားများက ဆိုသည်။
စိုက်ပျိုးရေးဦးစီးဌာနမှ တာဝန်ရှိသူတစ်ဦးက "ယခုနှစ်မှာ မိုးရွာသွန်းမှု မှန်ခဲ့တာကြောင့် မြေပဲအထွက်နှုန်း ကောင်းမယ်လို့ မျှော်မှန်းရပါတယ်။ ဒေသထွက် မြေပဲတွေဟာ အရည်အသွေးလည်းကောင်းမွန်တာကြောင့် ပြည်တွင်းဈေးကွက်မှာ ဝယ်လိုအား ကောင်းမွန်နေပါတယ်" ဟု ရှင်းပြသည်။ ဟင်္သာတခရိုင်ထွက် မြေပဲများသည် အဆီပါဝင်မှုနှုန်း မြင့်မားကာ အရည်အသွေး ကောင်းမွန်သည်ဟု နာမည်ကြီးပြီး ပြည်တွင်းသာမက နိုင်ငံတကာတင်ပို့မှု အတွက်ပါ ဝယ်လိုအားမြင့်မားလျက်ရှိကြောင်း သိရသည်။
DOCA (ဧရာဝတီ)