မိတ္ထီလာခရိုင်၊ မလှိုင်မြို့နယ်ရှိ ကျေးရွာအချို့တွင် ဩဂုတ်လနောက်ဆုံးပတ်၌ ဧကများစတင် နှုတ်သိမ်းနေပြီဖြစ်ကြောင်းသိရသည်။ မိုးနေမြေပဲကို ဇွန်လ၊ ဇူလိုင်လများတွင်စိုက်ပျိုးပြီး စက်တင်ဘာ၊ အောက်တိုဘာလများတွင် နှုတ်သိမ်းလေ့ရှိသော်လည်း ယခုနှစ်မိုးဦးကျစောသည့်အတွက် မေလတွင် စိုက်ပျိုးသောမြေပဲများ နှုတ်သိမ်းခြင်းဖြစ်ပါသည်။ မိုးမြေပဲတစ်ဧကစိုက်ပျိုးရန်မျိုးအနေဖြင့် အတောင့် (၆)တင်း၊အဆံအားဖြင့် (၂.၅)ပိဿာခန့်စိုက်ပျိုးရပြီး စိုက်ပျိုးချိန်ကမျိုးဈေးမှာတစ်ပိဿာ (၁၀၀၀၀) ကျပ်ဖြင့် ဝယ်ယူရကြောင်း၊ မြေပြင်စိုက်ပျိုးခြင်းအတွက် စက်ထယ်၊ မြေခံမြေဩဇာများအပါအဝင် တစ် ဧက(၄၀၀၀၀၀)ကျပ်ခန့်ကုန်ကျခဲ့ကြောင်းသိရသည်။မြေပဲနှုတ်သိမ်းရာတွင် လုပ်သားကိုနေ့စားဖြင့် ခေါ်ယူခြင်းမပြုဘဲ နှုတ်/ဆွတ်ခအနေဖြင့် မြေပဲတောင့် တစ်တင်းလျှင် (၄) ပြည်နှုန်းပေးရကြောင်း၊ ယခုနှစ်မိုးကြောင်းသည့်အတွက် အထွက်နှုန်းကောင်းသည့်အပြင် အဆံအောင်သည့်အတွက် တစ်ဧက တင်း(၄၀)ခန့်ထွက်ရှိကြောင်း၊ယခုအခါ နှုတ်သိမ်းစဖြစ်၍ ဈေးကွက်သို့တင်ပို့ခြင်းမပြုသေးကြောင်း မြေပဲနှုတ်သိမ်းနေသည့် တောင်သူများထံမှသိရသည်။
DOCA (မန္တလေး)