စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူပြည်သူများ ကျောင်းနေအရွယ်ကလေးငယ်များအား အန္တရာယ်ကင်းရှင်းစေရေး၊ လုံခြုံစိတ်ချ ရမှုရှိသော ကုန်စည်များဝယ်ယူသုံးစွဲနိုင်ရေးနှင့် ထိခိုက်နစ်နာမှုများ မဖြစ်စေရေးတို့အတွက် ကျောင်းမုန့်ဈေးတန်းများတွင် ရောင်းချလျှက်ရှိသော အစားအစာများအား စဉ်ဆက်မပြတ် ဈေးကွက်စောင့်ကြည့်စစ်ဆေးလျှက်ရှိရာ ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်၊ လက်ပန်တန်းကျေးရွာ၊ အခြေခံပညာမူလတန်းလွန်ကျောင်းမုန့်ဈေးတန်းတွင် စက်တင်ဘာလ (၃)ရက်နေ့၊ နေ့လည်(၁၁:၀၀)နာရီအချိန်တွင် စားသုံးသူရေးရာဦးစီးဌာန၊ ခရမ်းမြို့နယ် တာဝန်ခံ ဒေါ်ကျော့ကေခိုင်သည် ကျောင်းအုပ်ဆရာမကြီး ဒေါ်မြမျက်ချယ်၊ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန ဦးစီးအရာရှိ ဒေါ်ခင်နှင်းဝေ၊ မြို့နယ်တိုင်းရင်းဆေးမှူး ဒေါ်လှမြတ် ထက်တို့ပူးပေါင်း အဖွဲ့ဖြင့် ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။
ထိုသို့ ဈေးကွက်စောင့်ကြည့်ရာတွင် ကျောင်းမုန့်ဈေးတန်းတွင် ရောင်းချလျှက်ရှိသော အသင့်စားမုန့်များတွင် မြန်မာဘာသာဖြင့် ထည့်သွင်းဖော်ပြရမည့် ကုန်အညွှန်းအမှတ်အသားများ ပြည့်စုံစွာဖော်ပြထားခြင်းရှိ/မရှိ၊ ထုတ်လုပ်ရက်စွဲ၊ ကုန်ဆုံးရက်စွဲများ ဖော်ပြထားခြင်းရှိ/မရှိနှင့် အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်များ ပါဝင်မှုရှိ/မရှိတို့အား ဈေး ကွက်စောင့်ကြည့်စစ်ဆေးခဲ့ကြပြီး စားသုံးသူရေးရာဦးစီးဌာန၊ မြို့နယ်တာဝန်ခံက ဈေးဆိုင်ပိုင်ရှင် များအား ကလေးငယ်များ ဘေးအန္တရာယ်ဖြစ်စေနိုင်သော ကလေးကစားစရာများကို ရောင်းချမှု မပြုလုပ်ကြရန်နှင့် အသီးအနှံနှင့် အသုပ်စုံများ ရောင်းချရာတွင်လည်း ယင်နားမှု မရှိစေရေးအတွက် လုံခြုံစွာ ဖုံးအုပ်ပြီး ရောင်းချကြရန်၊ အမှည့်လွန်နေသော သစ်သီးများအား ရောင်းချမှု မပြုလုပ်ကြရန်တို့အား အသိပညာပေးခဲ့ကြောင်း သိရှိရပါသည်။
DOCA(ရန်ကုန်)