မိတ္ထီလာမြို့နယ်တွင် ဩဂုတ်လ၌ ငရုတ်ဈေးကွက်မှာ ငရုတ်ခြောက်ဈေးငြိမ်နေသော်လည်း ငရုတ်အစိုမှာ ဈေးကွက်သို့အဝင်များ၍ ဈေးနှုန်းအနည်းငယ်ကျဆင်းကြောင်းသိရသည်။ငရုတ်မှာ မိတ္ထီလာခရိုင်အတွင်းစိုက်ပျိုးဆဲကာလဖြစ်ပြီး လက်ရှိအချိန်တွင် ကျောက်ဆည်ခရိုင်ထွက်ငရုတ်များ ဈေးကွက်သို့ ဝင်ရောက်မှုရှိကြောင်းသိရသည်။ မိတ္ထီလာမြို့နယ်တွင်ဖြစ်ပေါ်နေသော ဈေးနှုန်းမှာ ငရုတ်အစိုတစ်ပိဿာလျှင် လက်ကားဈေး(၃၀၀၀-၃၅၀၀)ကျပ် ၊ လက်လီဈေး(၄၀၀၀/)ကျပ်ဈေးဖြင့် အရောင်းအဝယ်ဖြစ်လျှက်ရှိပါသည်။ မိတ္ထီလာခရိုင်မှာ မိုးငရုတ်ကို မေ ၊ ဇွန်လများ၌ စိုက်ပျိုးကာ ဈေး ကွက်သို့ စက်တင်ဘာလမှစ၍ ဒီဇင်ဘာလအထိတင်ပို့နိုင်ကြောင်း နှင့် တင်ပို့ရာတွင်ငရုတ်ခြောက် အနေဖြင့် ရန်ကုန် ၊ တောင်ကြီးမြို့များသို့ တင်ပို့ကာ ဒေသတွင်းသီးနှံထွက်ရှိမှုများပြီး ပြည်ပဝယ်လက် မှ ဈေးကောင်းပေးသည့်နှစ်များတွင် တရုတ်နှင့် ထိုင်းသို့ ငရုတ်အစိုကို အအေးခန်းကားများဖြင့် နယ်စပ် လမ်းကြောင်းမှတင်ပို့နိုင်ကြောင်းငရုတ်ကုန်သည်များထံမှသိရသည်။
DOCA(မန္တလေး)