ကျောက်ဆည်မြို့နယ်တွင် ဒေသမရွေးစိုက်ပျိုးနိုင်သည့် အိုးမုံညင်းများကို စိုက်ပျိုးလျက်ရှိပါသည်။ အိုးမုံညင်းများကို အေးသောရာသီဥတုရှိသည့် ဒေသများတွင် အများဆုံးစိုက်ပျိုးပြီး မုံညင်းပင် ကို ဟင်းသီးဟင်းရွက်အဖြစ် လူသိများကြပြီး ဝါတွင်းကာလများတွင် အသားရှောင် လိုသူများအတွက် အကြိုက်တွေ့စေသည့် ဟင်းရွက်တစ်မျိုးဖြစ်ပါသည်။ မုံညင်းအမျိုးအစားများကို အရွက်၊ အရောင်၊ အကြီး၊ အသေး၊ အချော၊ အကြမ်းပေါ်မူတည်၍ အမျိုးအစားအမျိုးမျိုးကွဲပြားကြပြီး မေလမှ ဒီဇင်ဘာလထိ စိုက်ပျိုးနိုင်ကြောင်း၊ မစိုက်ပျိုးမီ (၃-၄)ပတ်အလိုတွင် မြေပြုပြင်ရန် လိုအပ်ကြောင်း၊ ရေဝပ်သော နေရာဖြစ်ပါက ဘောင်စနစ်ဖြင့် စိုက်ပျိုးရကြောင်း၊ စိုက်ပျိုးရန်အတွက် တစ်ဧကလျှင် မျိုးစေ့ (၆-၇)ပေါင်ခန့် အသုံးပြုရကြောင်း၊ ပျိုးထောင်ပြီး (၅-၆) ရက်ကြာပြီးနောက် စိုက်ခင်း အတွင်းသို့ ပြောင်းရွှေ့၍ တစ်ပင်နှင့်တစ်ပင် တစ်ပေခြား စိုက်ပျိုးရကြောင်း၊ စိုက်ပျိုးနေချိန်တွင် စိုက်ခင်းအတွင်း ရေအလုံအလောက်ရှိရန် လိုအပ်ကြောင်း၊ စတင်စိုက်ပျိုးပြီး ရက်ပေါင်း (၂၅-၃၀) ရက်အကြာတွင် မုံညင်းရွက်များကို စတင်ခူးဆွတ်နိုင်ကြောင်း၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၄၀၀၀၀၀/- မှ ၅၀၀၀၀၀/-)ကျပ်ခန့် ကုန်ကျကြောင်း၊ အိုးမုံညင်း (၅)ပင်ပါ တစ်စီးလျှင် (၂၅၀/-)ကျပ်ဖြင့်လည်းကောင်း၊ တစ်ပိဿာလျှင် (၂၃၀၀/-) ကျပ်ဖြင့်လည်းကောင်း စိုက်ခင်းအတွင်း လာရောက်ဝယ်ယူကြပြီး စားသုံးသူများ ဝယ်ယူရာတွင် အဆင်ပြေစေရန် အနေတော်အစီးလေးများစီး၍ ဈေးကွက်အတွင်းသို့ ပြန်လည်ရောင်းချကြကြောင်း၊ တစ်ဧကလျှင် အိုးမုံညင်း (၈၀၀-၉၀၀)ပိဿာခန့် ထွက်ရှိကြောင်း၊ တစ်ဧက အကျိုးအမြတ်အနေဖြင့် (၁၃၀၀၀၀၀/-)ကျပ်ခန့် အမြတ်ရရှိကြောင်း၊ အိုးမုံညင်းစိုက်ပျိုးခြင်းဖြင့် မိသားစုဝင်ငွေရရှိသည့် အပြင် စီးပွားဖြစ်စိုက်ပျိုးသူများ အဆင်ပြေလျက်ရှိကြောင်း သိရှိရပါသည်။
DOCA(မန္တလေး)