မကွေးတိုင်းဒေသကြီး၊ မကွေးမြို့နယ်၊ ကံလှကျေးရွာရှိ Good Brothers Company အစည်း အဝေးခန်းမ၌ (၈.၇.၂၀၂၅)ရက်နေ့၊ နံနက်(၀၉:၀၀)နာရီအချိန်တွင် ၂၀၂၄-၂၀၂၅ခုနှစ်၊ GAP စနစ်ဖြင့် စိုက်ပျိုးထုတ်လုပ်သော နှမ်းသီးနှံအား Export တိုက်ရိုက်ရောင်းချတင်ပို့ခြင်း အခမ်းအနားကျင်းပ ပြုလုပ်ခဲ့ရာ စားသုံးသူရေးရာဦးစီးဌာန၊ စိုက်ပျိုးရေးဦးစီးဌာန၊ ရင်းနှီးမြှုပ်နှံမှုနှင့် ကုမ္ပဏီများညွှန်ကြား မှုဦးစီးဌာန၊ မကွေးကုန်စည်ဒိုင်မှ ဥက္ကဋ္ဌ၊ မကွေးတိုင်း တိုင်းတောင်သူအကျိုးဆောင်များ၊ Good Brothers ကုမ္ပဏီမှတာဝန်ရှိသူများနှင့် တောင်သူစုစုပေါင်းလူဦးရေ(၁၀၀)ဦးခန့် တက်ရောက်ခဲ့ကြောင်း သိရသည်။
တက်ရောက်လာသော တောင်သူများမှ ရှင်းလင်းပြောကြားရာတွင် GAP စနစ်ဖြင့် စိုက်ပျိုးခဲ့ရာ (၅)နှစ်ကျော် (၆)နှစ်ထဲ ရောက်ရှိနေပြီဖြစ်ပါကြောင်း၊ တစ်နှစ်ထက်တစ်နှစ် နည်းပညာ တိုးတက်လာ၍ နှမ်းအထွက်များလည်း ပိုမိုထွက်ရှိလာပါကြောင်း၊ မိမိတို့တောင်သူများမှာ ယခုလို စုပေါင်းရောင်းချရ၍ ဈေးနှိမ်မခံရခြင်း၊ ဈေးကွက်ဈေးနှုန်းလည်း မိမိတို့နှမ်းအရည်အသွေးပေါ်လိုက်၍ ဈေးနှုန်းရရှိပါကြောင်း၊ ကုမ္ပဏီမှလည်း ယနေ့တွင်ပင် ကွန်တိန်နာ(၅)လုံးဖြင့် နိုင်ငံခြားသို့ Export တင်ပို့မှာဖြစ်ကြောင်း ပြောကြားခဲ့ပြီး တက်ရောက်လာသောဌာနဆိုင်ရာတာဝန်ရှိသူများက တောင်သူများ၏ မေးမြန်းချက် များကို အသီးသီး ရှင်းလင်းပြောကြားခဲ့ပြီး အခမ်းအနားကို နံနက်(၁၁:၃၀)အချိန်တွင် ရုတ်သိမ်းခဲ့ကြောင်း သိရပါသည်။
DOCA(မကွေး)