ယခုနှစ် မိုးသီးနှံများစိုက်ပျိုးရန် ရာသီကာလတွင် မိုးရွာသွန်းမှုများမှန်ကန်ခဲ့သည့်အတွက် တောင်သူများ မိုးသီးနှံများအနက်မှ တစ်ခုဖြစ်သည့် နှမ်းကို ဧပြီလခန့်မှစ၍ စိုက်ပျိုးနိုင်ခဲ့ပြီး၊ စိုက်ပျိုး ပြီးချိန် နောက်ပိုင်းကာလများတွင်လည်း တောင်သူများအကြိုက်မိုးရွာခဲ့မှုများကြောင့် မန္တလေးတိုင်းဒေသကြီး၊ ညောင်ဦးမြို့နယ်တွင် မိုးနှမ်းများအောင်မြင်ဖြစ်ထွန်းလျက်ရှိရာ တောင်သူများနှမ်းရရန် သေချာသလောက်ရှိ နေပြီဖြစ်ကြောင်း နှမ်းစိုက်တောင်သူများထံမှသိရပါသည်။
ညောင်ဦးမြို့နယ်အနေဖြင့် ယခုနှစ်မိုးနှမ်းစိုက်ပျိုးရန်လျာထားမှုအနေဖြင့် (၁၈၁၃၇)ဧက လျာထားခဲ့ပြီး၊ ဇွန်လ ပထမပတ်ထိ စိုက်ပျိုးပြီးစီးမှုအနေဖြင့်(၃၁၇၄)ဧက စိုက်ပျိုးပြီးဖြစ်ပါသည်။ စိုက်ပျိုးပြီးမိုးနှမ်းများမှာ အောင်မြင်ဖြစ်ထွန်း၍ အပွင့်အဖူးများစတင်ထွက်ပေါ်ဝေဆာနေပြီဖြစ်ရာ ယခုနှစ်တွင် မိုးလေဝသမှန်ကန်မှုရှိ၍ နှမ်းစိုက်ခင်းများတပြေးညီသန်မာကောင်းမွန်ခြင်းကြောင့် နှမ်းအထွက်နှုန်းများပိုလာနိုင်ကြောင်း၊ ညောင်ဦးမြို့နယ်အတွင်းရှိ နှမ်းစိုက်တောင်သူများအနေဖြင့် အသုံးပြုစိုက်ပျိုးသော နှမ်းမျိုးများမှာ ဆင်းရတနာ-၃ ၊ မယ်သီလ၊ နှမ်းနီ ၂၅/၁၆၀ ဖြစ်ပြီး အထွက်နှုန်းများကောင်းနိုင်ကြောင်း၊ သီးနှံအမျိုးအစားအလိုက် အထွက်နှုန်းများကောင်းမွန်စေရန်အတွက် မျိုးကောင်းမျိုးသန့်များ ရွေးချယ်စိုက်ပျိုးနိုင်ရေး၊ စိုက်ပျိုးနည်းစနစ်များ မှန်ကန်မှုရှိစေရေး၊ သွင်းအားစုများကို စနစ်တကျ သုံးစွဲမှုရှိစေရေးတို့ကိုလည်း သက်ဆိုင်ရာဌာနများမှ အသိပညာပေး ဆွေးနွေးမှုများ ကွင်းဆင်းဆောင်ရွက်ပေးလျက်ရှိပါကြောင်း၊ လက်ရှိနှမ်းစိုက်ခင်းများ ကောင်းမွန်မှုအခြေအနေများအရ ညောင်ဦးမြို့နယ်အတွင်းရှိ မိုးနှမ်းစိုက်တောင်သူများအနေမှာ ယခုနှစ်တွင် မိုးနှမ်းများရရှိရန် သေချာနေပြီဖြစ်ကြောင်းနှင့်ဆက်လက်၍လည်း စိုက်ပျိုးလျက်ရှိပါကြောင်း ဖွားစောကျေးရွာရှိတောင်သူများထံမှ သိရှိရပါသည်။
DOCA(မန္တလေး)