ပန်းမန်စိုက်ပျိုး၊ ထုတ်လုပ်၊ တင်ပို့ရောင်းချသူများအစုအဖွဲ့ (ကလောဇုန်)နှင့် Y AGRO ကုမ္ပဏီ၏ စိုက်ပျိုးရေးပညာရှင်များ ပူးပေါင်း၍ ပန်းစိုက်တောင်သူများ အလုပ်ရုံဆွေးနွေးပွဲနှင့် စိုက်ပျိုးရေးနည်းပညာပေးဆွေးနွေး အခမ်းအနား ကို ၂၀၂၅ခုနှစ်၊ ဇွန်လ ၆ ရက်နေ့ နံနက်(၀၉း၀၀)နာရီ အချိန်တွင် ဟဲဟိုးမြို့၊ ပြည်ထောင်စုလမ်းမကြီးနှင့် အင်းခေါင်းဆည်လမ်းခွဲထောင့်(အင်းခေါင်း)ရှိ ပန်းမန်စိုက်ပျိုး၊ ထုတ်လုပ်၊ တင်ပို့၊ ရောင်းချသူများအစုအဖွဲ့ (ကလောဇုန်)ရုံး၌ ကျင်းပပြုလုပ်ခဲ့ပါသည်။
အခမ်းအနားသို့ စားသုံးသူရေးရာဦးစီးဌာနမှ ပြည်နယ်ဦးစီးမှူး၊ ကုန်သွယ်မှုမြှင့်တင်ရေးအဖွဲ့ မှ ပြည်နယ်ဦးစီးမှူး၊ စိုက်ပျိုးရေးဦးစီးဌာနမှ တာဝန်ရှိသူများ၊ စိုက်ပျိုးရေးပညာရှင်များ၊ ကလော ပန်းမန်စိုက်ပျိုး၊ ထုတ်လုပ်၊ တင်ပို့ရောင်းချသူများအစုအဖွဲ့ ဥက္ကဌနှင့် အစုအဖွဲ့ဝင်များ၊ Y AGRO ကုမ္ပဏီမှ တာဝန်ရှိသူများ၊ ပန်းစိုက်တောင်သူများ စုစုပေါင်းအင်အား (၁၀၀)ခန့် တက်ရောက် ခဲ့ကြောင်း သိရှိရပါသည်။
အဆိုပါ အမ်းအနားတွင် ပြည်နယ်ဦးစီးမှူးမှ ဟဲဟိုးဒေသသည် စိုက်ပျိုးရေးကို အခြေခံ၍ အသက်မွေးဝမ်းကျောင်းပြုကြသော ဒေသဖြစ်သည့်အားလျော်စွာ အာလူး၊ ဂေါ်ဖီထုပ်၊ ပန်းဂေါ်ဖီ၊ ပန်းနှမ်း၊ စပါး၊ ကြက်သွန်ဖြူ၊ မုံညှင်းနှင့် အခြားဟင်းသီးဟင်းရွက်များ စိုက်ပျိုးခြင်းတို့အပြင် ဂန္ဓမာပန်း ကိုလည်း စိုက်ပျိုးလုပ်ကိုင်ရာဒေသတစ်ခုဖြစ်ကြောင်း၊ ပန်းမန်စိုက်ပျိုး၊ ထုတ်လုပ်၊ တင်ပို့ရောင်းချသူများ အစုအဖွဲ့ (ကလောဇုန်)ကို ၂၀၀၉ခုနှစ်မှစတင်ပြီး ဟဲဟိုးဒေသတစ်ဝိုက်မှာ ဂန္ဓမာပန်းများ စိုက်ပျိုးထုတ်လုပ်မှုများပြားလာပြီး စိုက်ပျိုးထုတ်လုပ်မှုများ တိုးတက်လာခြင်းတို့ကြောင်း ပန်းမန် အများဆုံးစိုက်ပျိုးသည့် ဟဲဟိုးဒေသမှ တောင်သူများကိုစုစည်းပြီး စိုက်ပျိုးရေး၊ သယ်ယူရေး၊ ရောင်းဝယ်ဖောက်ကားရေးအပိုင်းတို့တွင် ကြုံတွေ့နေရသည့် အခက်အခဲများအား တောင်သူတစ်ဦးချင်း ဖြေရှင်းဆောင်ရွက်နေရသည့်အတွက် အခက်အခဲများကို ဖြေရှင်းနိုင်ရန်အတွက် စီးပွားရေးနှင့် ကူးသန်း ရောင်းဝယ်ရေး ဝန်ကြီးဌာန၏ ပြည်ထောင်စုဝန်ကြီး၏လမ်းညွှန်မှုဖြင့် ပန်းမန်အသင်းအဖွဲ့ကို ရည်ရွယ်ချက်(၃)ရပ်ဖြင့် ဖွဲ့စည်းခဲ့ပြီး ယနေ့အချိန်ထိ အသင်းအနေဖြင့် အောင်မြင်မှုရရှိနေကြောင်း၊ ရှမ်းပြည်နယ်ရဲ့ ပန်းစိုက်ပျိုးထုတ်လုပ်မှုကဏ္ဍမှ ပြည်တွင်းသာမက ပြည်ပဈေးကွက်အထိ တင်ပို့နိုင်ရေးကို အသင်းရဲ့ဦးဆောင်မှုဖြင့် ကြိုးပမ်းဆောင်ရွက်စေလိုကြောင်း စသည်တို့ကို ဆွေးနွေးခဲ့ကြောင်း သတင်းရရှိပါသည်။
DOCA(ရှမ်း)