စစ်ကိုင်းတိုင်းဒေသကြီး၊ ကသာခရိုင်တွင် ဆောင်းမြေပဲနုတ်သိမ်းချိန် မေလမှစ၍ ပုရစ်များလှိုင်လှိုင်ပေါပြီး ဒေသတွင်းနှင့် မြို့နယ်အသီးသီးရှိ ဈေးကွက်များသို့ တင်ပို့ရောင်းချလျက်ရှိကြောင်းသိရသည်။ ပုရစ်အင်းဆက်ကောင်များသည် တစ်နှစ်လျှင် (၂)ကြိမ် ဈေးကွက်အတွင်း အရောင်းအဝယ်ဖြစ်ပြီး ဆောင်းရာသီ နိုဝင်ဘာလနှင့် ဒီဇင်ဘာလများတွင် ပေါ်သောပုရစ်များကို ဆောင်းပုရစ်ဟုခေါ်၍ ယခုကဲ့သို့သော နွေရာသီ မေလတွင်ပေါ်သော ပုရစ်များကို နွေပုရစ်၊ ပဲပုရစ်ဟုခေါ်ကြသည်။
မေလဆန်းပိုင်းတွင် မိုးစတင်ရွာပြီး မိုးရွာသွန်းမှုများသည့်အလျောက် ဧရာဝတီမြစ်ရေမြင့်တက်လာသဖြင့် မြစ်ကမ်းဘေးများတွင် စိုက်ပျိုးထားသော ဆောင်းမြေပဲခင်းများရှိ တွင်းအောင်းပုရစ်များ ရေပေါ်သို့တက်လာကြသည်။ ထိုပုရစ်များအား ဖမ်းယူကာ ဈေးကွက်အတွင်း ရောင်းချကြခြင်းဖြစ်သည်။ ပုရစ်ပေါ်စ မေလဆန်းပိုင်းတွင် အကောင် (အကြီး) တစ်ရာလျှင် (၈၀၀၀)ကျပ်ရှိပြီး အရောင်းအဝယ်ကောင်းကြောင်းသိရသည်။ ကသာခရိုင်ထွက် ပုရစ်များများမှာ နာမည်ကြီးလူကြိုက်များကြပြီး ပုရစ်ပေါ်ချိန်များတွင် ပုရစ်များအား အကောင်းအစိမ်းသော်လည်းကောင်း၊ ကြော်၍ ပလတ်စတစ်အိတ်/ ဘူးများဖြင့် ထည့်သွင်း၍သော်လည်းကောင်း ဒေသတွင်းနှင့် နီးစပ်ရာမြို့နယ်များ၊ မန္တလေး၊ ရန်ကုန်၊ မြစ်ကြီးနား စသည့်ဈေးကွက်များသို့ တင်ပို့ရောင်းချကြကြောင်းသိရှိရပါသည်။
DOCA(စစ်ကိုင်း)