မန္တလေးတိုင်းဒေသကြီး ၊ ကျောက်ဆည်ခရိုင်သည် လယ်တွင်းကိုးခရိုင်တွင် တစ်ခုပါဝင်ပြီး ဆည်ရေသောက်စနစ်ဖြင့် ရှေးယခင်ကတဲက စပါး၊ ပဲ၊ ပြောင်းနှင့် ဟင်းသီးဟင်းရွက်သစ်သီးဝလံနှင့် ပန်းမာလ်များအား စိုက်ပျိုးခဲ့ကြပါသည် ။ ၄င်းသီးနှံများအနက်မှ ရာသီမရွေးစိုက်ပျိုးနိုင်ပြီး နေ့စဉ် မိသားစု အပိုဝင်ငွေများရရှိနိုင်သော စျေးကွက်ဝယ်လိုအားရှိသည့် အောင်သပြေပန်း ငုတ်များကို ကျောက်ဆည်မြို့နယ်၊ သံရွာကျေးရွာအုပ်စု၊ ညွန့်ပင်ကျေးရွာတွင်သာစိုက်ပျိုးခဲ့ပြီး ယခုအချိန်တွင် ကျောက်ဆည်မြို့နယ်တွင်သာမက မြစ်သားမြို့နယ်ရှိ ကျေးရွာများတွင်လည်း အောင်သပြေပန်းငုတ် များ စိုက်ပျိုးရောင်းချလျက်ရှိပါသည်။ သပြေပန်းစိုက်ပျိုးရန်အတွက် မျိုးစေ့ကို တွံတေး၊ခရမ်းနှင့် မြို့နယ်အတွင်း သပြေပင်စိုက်တောင်သူများအချင်းချင်းမှ မှာယူစိုက်ပျိုးကြကြောင်း၊ မျိုးစေ့(၁)ပြည် စျေးနှုန်းမှာ(၉၀၀-၁၀၀၀)ကျပ်ခန့်ရှိပြီး မျိုးစေ့တစ်ပြည်တွင် အစေ့သန်ပါက အစေ့ပေါင်း(၂၀၀၀) အထိပါရှိပြီး အစေ့သေးပါက(၂၀၀၀)အထက်ပါရှိကြောင်း ၊ တစ်ဧကစိုက်ပျိုးမှုအတွက် မျိုးစေ့ပြည် (၈၀)ခန့်ကုန်ကျပြီး ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင်(၂၅)သိန်းကျော် ကုန်ကျကြောင်း ၊ စိုက်ပျိုးရာတွင် ဘောင်စိုက်စနစ်ဖြင့်စိုက်ပျိုးပြီး တစ်ဧက အပင်ပေါင်း (၁)သိန်းခွဲ အထိရှင်သန်ကြောင်း ၊ မြေပြုပြင်မှု နှင့် ရေ၊မြေ အပြုအစုကောင်းပါက စိုက်ပျိုးပြီး(၂)လခွဲသား ဝန်းကျင်တွင် အပင်များကို ဖြတ်တောတ်ပြီး ငုတ်ချန်ပေးရကြောင်း၊ ငုတ်ချန်ပြီး တစ်နှစ်ကြာလျှင် ရောင်းတန်းဝင် ပန်းများရရှိပါသည်။ သပြေပန်းများ ပိုးမကိုက် ၊ အညွန့်များလှအောင် ၊ အရွက်မာအောင်၊ မရောင်းခင်တစ်လအလိုတွင် ဆေးဖြန်းပေးရကြောင်း၊ (၁)နှစ်သား အောင်သပြေငုတ် တစ်ငုတ်လျှင် အရွယ်အစားပေါ်မူတည်၍ တစ်ပင်စျေးနှုန်း(၅၀၀/-)ကျပ်မှ(၁၅၀၀/-)ကျပ်အထိ ရောင်းချရကြောင်း ၊ (၂)နှစ်သားတစ်ပင်လျှင် အရွယ်အစားပေါ်မူတည်၍ တစ်ပင်စျေးနှုန်း(၃၀၀၀/-)ကျပ်မှ (၅၀၀၀/-)ကျပ် အထိ ရောင်းချရကြောင်း ၊ လက်ကားစျေးနှုန်းအနေဖြင့် ၂၀ ရာခိုင်နှုန်းလျော့၍ ရောင်းချပေးကြောင်း သိရှိရပါသည်။ အောင်သပြေငုတ်များ စိုက်ပျိုးရာတွင် အပင်သက်တမ်း(၃)နှစ်အထက်ထိ ရောင်းချပေးနိုင်ကြောင်း ၊ ပန်းများကို အနီးပတ်ဝန်းကျင်ရှိ ကျေးရွာများမှ လာရောက်ဝယ်ယူသူများရှိသလို နယ်ဝေးမှမှာယူပါကလည်း သေချာစွာထုတ်ပိုး၍ ကားဂိတ်အရောက်တင်ပို့ရောင်းချလျှက်ရှိကြောင်း၊ အောင်သပြေငုတ် စိုက်ပျိုးမှုတွင် ငွေအလုံးအရင်းမရရှိသော်လည်း နေ့စဉ်အပိုဝင်ငွေများရရှိကာ မိသားစုစားဝတ်နေရေးပြေလည်ကြောင်း၊ရေရှည်အနေဖြင့် စိုက်ပျိုးသင့်သော အောင်သပြေပန်းငုတ်များကို စိုက်ပျိုးရောင်းချသင့်ကြောင်း ရေးသားတင်ပြအပ်ပါသည်။
DOCA(မန္တလေး)