မွန်ပြည်နယ်သည် လယ်ယာသီးနှံ ဥယျာဉ်ခြံများနှင့် ရော်ဘာစိုက်ပျိုးထုတ်လုပ်မှုကောင်းမွန်သည့်ပြည်နယ်ဖြစ်ရာ ကာလရှည်သီးနှံတစ်မျိုးဖြစ်သည့်ရာသီပေါ် ဒူးရင်းသီးများ စတင်ထွက်ရှိချိန် လူကြိုက်များသည့် သီးနှံတစ်မျိုးဖြစ်သောကြောင့် ဈေးကောင်းရရှိ၍ စိုက်ပျိုးသူများ အဆင်ပြေလျက်ရှိသည်။
မုဒုံမြို့တွင်ဒူးရင်းပင်အမျိုးအစားပေါင်း (၂၀)ခန့်စိုက်ပျိုးကြရာ မွန်ထောင်း၊ ချန်းနီ၊ မလေးမျိုး (မူဆန်ကင်း)၊ ယိုးဒယားမျိုးတို့ကို ပျိုးပင်များနှင့်ကိုင်းဆက်၊ကိုင်းကူးနည်းတို့ဖြင့်အဓိကထား အများအပြား စိုက်ပျိုးကြပြီး ဒူးရင်းပင်ကိုင်းဆက်မျိုးများကို စိုက်ပျိုးပြီး(၃)နှစ်ခန့်အကြာတွင်အသီးများစတင်ထွက်ရှိကြောင်း၊ ဒူးရင်းပင်တစ်ဧကလျှင်အပင်တန်းကြား(၃၀)ပေ ပတ်လည်စိုက်ပျိုးမည်ဆိုပါက ၄၈ ပင်၊ (၂၅)ပေ ပတ်လည်စိုက်ပျိုးမည်ဆိုပါက အပင်ရေ (၇၀)ခန့်အထိ စိုက်ပျိုးနိုင်ကြောင်း၊ အပင်များပိုးမကျ စေရန်ပြုလုပ်ခြင်း နှင့် သဘာဝဓာတ်မြေဩဇာများ ထည့်သွင်းခြင်း လုပ်ငန်းကို စနစ်တကျ ပြုလုပ်ရန်လိုအပ်ကြောင်း၊ ဒူးရင်းမျိုးကောင်း တစ်ဧက စိုက်ပျိုးခြင်းဖြင့် တစ်နှစ်လျှင်ဝင်ငွေ ကျပ်သိန်း(၁၀၀)ကျော်ရရှိနိုင်ကြောင်း၊ ယခုအခါ ဒူးရင်းသီးများ စတင်ထွက်ရှိချိန် ဒူးရင်းအမျိုးအစားပေါ် မူတည်၍ တစ်ကီလိုလျှင်ငွေကျပ်(၁၅၀၀၀)အထက်ရရှိနေကြောင်းကို မုဒုံမြို့နယ်ဘဲရမ်းကျေးရွာမှ ဒူးရင်းသီးစိုက်ပျိုးတောင်သူတစ်ဦးကပြောသည်။
မုဒုံမြို့နယ်ဒေသထွက်ဒူးရင်းမျိုးကောင်း၊ မျိုးသန့်များကို ပြည်တွင်း၊ပြည်ပ တင်ပို့နိုင်ရန်ဒူးရင်းမျိုးများ သုတေသနပြုစိုက်ပျိုးထားရှိခြင်း၊ သစ်သီးဝလံသုတေသန စိုက်ပျိုးရေး နည်းပညာများကိုတောင်သူများထံသို့ ဖြန့်ဝေပေးခြင်း၊ သီးနှံကဏ္ဍဖွံ့ဖြိုးတိုးတက်ရေးအတွက်တောင်သူများနှင့် ပူးပေါင်းပြီး စိုက်ပျိုးရေးဦးစီးဌာနနှင့်တာဝန်ရှိသူများမှ ကြိုးပမ်းဆောင်ရွက်လျက်ရှိကြောင်း သိရှိရသည်။
DOCA(မွန်)