စားသုံးသူရေးရာဦးစီးဌာန၏ မျှော်မှန်းချက်ဖြစ်သော ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေး ဖွံ့ဖြိုးတိုးတက်စေရန် ရည်ရွယ်၍ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး၊ ဒု-ခရိုင်ဦးစီးမှူးနှင့် ဝန်ထမ်း (၃)ဦး တို့သည် ဖေဖော်ဝါရီလ ၁၃ ရက်နေ့က စစ်ကိုင်းမြို့ လေးကျွန်းမြေရပ်ကွက်ရှိ "သန်းကမ္ဘာ" ငါးခြောက်ကြော်၊ ကြက်သွန်ကြော်လုပ်ငန်းသို့သွားရောက်၍ ပိုင်ရှင် ဒေါ်သန်းသန်းဆင့်နှင့် တွေ့ဆုံခဲ့ပါသည်။
"သန်းကမ္ဘာ" ငါးခြောက်ကြော်၊ ကြက်သွန်ကြော်လုပ်ငန်းကို ၂၀၂၁ ခုနှစ်တွင်စတင်လုပ်ကိုင်ခဲ့ကြောင်း၊ ငါးခြောက်ကြော်ရန်အတွက် ငါးနီတူခြောက်နှင့် ငါးမြီးတံသွယ်ခြောက်ကို ရန်ကုန်မြို့နှင့် မန္တလေးမြို့တို့မှ ဝယ်ယူကြောင်း၊ ငါးနီတူခြောက် တစ်ပိဿာလျှင် ကျပ် (၁၃၀၀၀ မှ ၁၄၀၀၀)၊ ငါးမြီးတံသွယ်ခြောက် တစ်ပိဿာလျှင် ကျပ် (၈၀၀၀ မှ ၁၀၀၀၀) ဖြင့် ဝယ်ယူရကြောင်း၊ တစ်လလျှင် ငါးခြောက်နှစ်မျိုးပေါင်း အချိန် ၃၀ ပိဿာခန့်ကိုအသုံးပြုပြီး ကုန်ကြမ်းများဖြစ်သော ငရုတ်သီး၊ ငရုတ်သီးခွဲခြမ်းကြော်၊ ကြက်သွန်ကြော်များဖြင့် သမအောင်မွှေပြီး အထုပ်ကလေးများ ပြုလုပ်၍ ရောင်းချကြောင်း၊ ကြော်ပါက ကုန်ကြမ်း ဈေးအတက်အကျပေါ် မူတည်၍ ကျပ် (၂၀၀/၃၀၀) တန်အထုပ် (၈၀ မှ ၁၀၀) ထုပ်ကြား အထုပ်များ ထုပ်၍ ဖောက်သည်များသို့ လက်လီ/လက်ကား ရောင်းချကြောင်း၊ ဝယ်သူများက တောင်းဆိုပါက ဘူးများဖြင့် ထည့်၍ ရောင်းချပါကြောင်း၊ ငါးခြောက်ကြော်များကို ဒေသတွင်းနှင့် အမှာစာရှိသည့် မြို့များသို့ တင်ပို့ရောင်းချကြောင်း၊ ကုန်ကြမ်းငါးခြောက်၊ ငရုတ်သီး၊ ကြက်သွန်ဈေးများပေါ် မူတည်ပြီး အထုပ်တွင်ထည့်သည့် ငါးခြောက်ကြော်အလေးချိန် အနည်း၊အများ ထည့်၍ ထုပ်ပိုးပါကြောင်း၊လုပ်သားဦးရေ ကျား (၂)ဦး နှင့် မ (၃)ဦးအား အလုပ်အကိုင် အခွင့်အလမ်းများ ပေးထားနိုင်ပြီး ကျားတစ်ဦးလျှင် တစ်နေ့ လုပ်အားခ ကျပ်( ၆၀၀၀ မှ ၇၀၀၀) ၊ မတစ်ဦးလျှင် တစ်နေ့လုပ်အားခ ကျပ် (၅၀၀၀ မှ ၆၀၀၀) ပေးချေရကြောင်း၊ အကျိုးအမြတ်နေဖြင့် ၁၀% ခန့်ရရှိကြောင်း၊ အသင့်စားများဖြစ်၍ အလွယ်တကူစားသုံးနိုင်ပြီး ဈေးကွက်ဝေစုများ ကျယ်ကျယ် ပြန့်ပြန့် ရရှိလိုပါကြောင်း သန်းကမ္ဘာ ငါးခြောက်ကြော်၊ ကြက်သွန်ကြော်လုပ်ငန်းရှင်ထံမှ သိရှိရပြီး စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်သန်းသန်းတင်က စားသုံးသူကာကွယ်ရေး ဥပဒေအခန်း (၁၈) ပါ ကုန်အညွှန်း အမှတ်အသား ဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြရမည့်အချက်များကို ရှင်းလင်း ဆွေးနွေးခြင်းနှင့် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာ တစ်ခု သိုမဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည့်အချက်များကို အသိပညာပေး ဟောပြောခဲ့ကြောင်း သတင်းရရှိပါသည်။
DOCA(စစ်ကိုင်း)