မကြာသေးမီကာလ၌ ထိုင်းပေါင်းဆန်နှင့်အိန္ဒိယပေါင်းဆန်တို့အကြား ဈေးနှုန်းကွာဟချက် သည် သိသာစွာကျဆင်းလာခဲ့ရာ အာဖရိကအနောက်ပိုင်းဒေသဈေးကွက်တွင် ထိုင်းပေါင်းဆန်များ အပေါ် ဝယ်လိုအားမှာ မြင့်မားလာခဲ့သည်ဟု S&P Global ဈေးကွက်သုတေသနလုပ်ငန်းက ဖော်ပြ ပါသည်။
S&P Global လက်အောက်ရှိ Platts ကုန်စည်ဈေးကွက်ဌာနခွဲ၏ လေ့လာဆန်းစစ်မှုအရ ဇူလိုင် ၇ ရက်နေ့တွင် ၁၀၀ ရာခိုင်နှုန်းပြည့် ထိုင်းပေါင်းဆန် တစ်တန်၏ သင်္ဘောပေါ်အရောက် FOB ဈေးနှုန်းသည် ၃၇၅ ဒေါ်လာနှုန်း ရှိနေချိန်၌ ဆန်ကွဲပါဝင်မှု ၅ ရာခိုင်နှုန်းရှိသော အိန္ဒိယ ပေါင်းဆန် တစ်တန်၏ FOB ဈေးနှုန်းမှာ ၃၈၁ ဒေါ်လာရှိကြောင်း၊ အာဖရိကအနောက်ပိုင်းဒေသ၊ ဘီနင်နိုင်ငံရှိ Cotonou ဆိပ်ကမ်းတွင် ဇူလိုင် ၄ ရက်နေ့၌ ဆန်ကွဲပါဝင်မှု ၅ ရာခိုင်နှုန်းရှိသော အိန္ဒိယပေါင်းဆန်တစ်တန်၏ သင်္ဘောတင်စရိတ်နှင့် သယ်ယူပို့ဆောင်စရိတ်တို့ ပါဝင်ပြီးဖြစ်သော ဆိပ်ကမ်းအရောက် CFR ဈေးနှုန်းသည် ၄၄၅ ဒေါ်လာနှုန်းရှိနေပြီး ယခင်တစ်လကထက် တစ်တန် အပေါ် ၂၅ ဒေါ်လာ ဈေးနှုန်းမြင့်တက်ခဲ့ခြင်းဖြစ်ကြောင်း သိရှိရသည်။
ထိုင်းနိုင်ငံအခြေစိုက် ကုန်သည်တစ်ဦးက အီရတ်နိုင်ငံတွင် ထိုင်းဆန်ဖြူအပေါ် ဝယ်လိုအား တိုးတက်လျက်ရှိကြောင်း၊ သို့သော် အရှေ့အလယ်ပိုင်းဒေသ၌ မကြာသေးမီက ပေါ်ပေါက်ခဲ့သော နိုင်ငံရေးတင်းမာမှုများကြောင့် ကုန်စည်ထောက်ပံ့ပေးသွင်းမှု ပုံပျက်ယွင်းခဲ့ပြီး ထိုင်းဆန်အပေါ် ဝယ်လိုအား ကျဆင်းမှုကို ဦးတည်စေလျက်ရှိကြောင်း ပြောကြားခဲ့သည်။ ၂၀၁၃ ခုနှစ် ဝန်းကျင်ကာလများ၌ ထိုင်းနိုင်ငံအနေဖြင့် ပေါင်းဆန်ကို အိန္ဒိယထက် နိမ့်ကျသောဈေးနှုန်းဖြင့် ရောင်းချ ပေးနိုင်ခဲ့သည်ဟု အခြားထိုင်းကုန်သည်တစ်ဦးကလည်း ပြောဆိုသည်။
ဘီနင်နိုင်ငံရှိ ဆန်ဝယ်သူတစ်ဦးကမူ ထိုင်းဆန်ဈေးနှုန်းသည် အမှန်တကယ် ဝယ်ယူရန် တတ်နိုင်သော ဈေးနှုန်းဖြစ်ပါက ၎င်း၏ အရည်အသွေး သာလွန်ကောင်းမွန်မှုအရ ရွေးချယ်ဝယ်ယူ ကြလိမ့်မည်ဖြစ်ကြောင်း ပြောဆိုခဲ့သည်။
ထိုင်းပေါင်းဆန်သည် ဆန်လုံးရှည်ပြီး အရည်အသွေး ကောင်းမွန်သဖြင့် ဈေးသက်သာစွာ ရရှိနိုင်ပါက နိုင်ဂျီးရီးယားပြည်သူများက ပိုမိုရွေးချယ်ကြမည်ဖြစ်ကြောင်း၊ ထိုင်းနိုင်ငံမှ တင်သွင်း သော ဆန်တစ်အိတ်သည် နိုင်ရာငွေ ၇၀၀၀၀ မှ ၇၅၀၀၀ (၉၅ ဒေါ်လာ - ၉၇ ဒေါ်လာ) ကုန်ကျမှု ရှိချိန်တွင် အိန္ဒိယမှ တင်သွင်းသော ပေါင်းဆန်တစ်အိတ်လျှင် နိုင်ရာငွေ ၆၀၀၀၀ မှ ၆၂၀၀၀ (၇၈ ဒေါ်လာမှ ၈၀ ဒေါ်လာ) အကြား ဈေးနှုန်းရှိကြောင်း၊ ယင်းသို့ ဈေးနှုန်းကွာဟချက်ရှိနေသော်လည်း စားသုံးသူများသည် ထိုင်းပေါင်းဆန်ကို ပိုမိုလိုလားမှု ရှိနေဆဲဖြစ်ကြောင်း နိုင်ဂျီးရီးယား ဆန်စက် လုပ်ငန်းရှင်တစ်ဦးက ပြောကြားခဲ့သည်။
ဘီနင်နိုင်ငံ Cotonou ဆိပ်ကမ်းနှင့် ထိစပ်နေသော နယ်စပ်ဒေသကို နိုင်ဂျီးရီးယားအစိုးရက ပိတ်ဆို့ထားရှိမှုသည် သွင်းကုန်အခွန် ပေးဆောင်လျက် ဆန်များကို နိုင်ဂျီးရီးယားပြည်တွင်းသို့ တိုက်ရိုက်တင်သွင်းစေရန် တွန်းအားပေးလျက်ရှိသည်ဟု အခြားသော နိုင်ဂျီးရီးယား ဆန်စက် ပိုင်ရှင် တစ်ဦးကလည်း ပြောဆိုခဲ့သည်။
Source: S&P Global, 7 Jul 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)