ကုန်သွယ်မှုသတင်းများ
တောင်ငူမြို့ အနောက်ဖက် တောင်ခြေကျေးရွာများတွင် ရခိုင်ငှက်ပျောပင်များကို စိုက်ပျိုးကြရာ ထွက်ရှိသော ငှက်ပျောသီးများကို တောင်ငူမြို့သို့ လာရောက်ရောင်းချကြပါသည်။ ရခိုင်ငှက်ပျောသီးသည် အလှူမင်္ဂလာပွဲ၊ ရိုးရာပွဲများတွင် ပွဲတင်ငှက်ပျောသီးအဖြစ် အသုံးပြုသကဲ့သို့ ငှက်ပျောသီး မုန့်ဖက်ထုပ်ပြုလုပ်၍လည်း အသုံးပြုသဖြင့် ဈေးကွက်ဝင်ပါသည်။
တောင်ငူမြို့ အနီးဝန်းကျင် ကျေးရွာများတွင် မရမ်းပင်များကို ခြံဝင်းအတွင်း စိုက်ပျိုးကြ ခြင်းဖြင့် မရမ်းသီးပေါ်ချိန်တွင် အပိုဝင်ငွေများရရှိသကဲ့သို့ နွေရာသီတွင် အရိပ်လည်းရပါသည်။ ယခု အခါတွင် မရမ်းသီးများပေါ်နေပြီဖြစ်ရာ တောင်ငူမြို့ ညောင်ပင်ဈေးတွင် ရောင်းချလျှက်ရှိနေပါသည်။ ထို့အတူ တောင်ငူမြို့ အရှေ့ဘက် ကရင်ပြည်နယ် သံတောင်ကြီးမြို့နယ်မှလည်း မရမ်းသီးများ ဝင်ရောက်လာပါသည်။
ပဲခူးတိုင်းဒေသကြီးအစိုးရအဖွဲ့၏ လမ်းညွှန်ချက်ဖြင့် နိုင်ငံ့ဝန်ထမ်းများ ဆန်၊ ဆီ၊ အသား၊ ငါး၊ ကြက်ဥ၊ ဘဲဥနှင့် ဟင်းသီးဟင်းရွက်များကို ဈေးနှုန်းသက်သာစွာဖြင့် ဝယ်ယူနိုင်ရန်အတွက် တောင်ငူမြို့ အမှတ်(၁၈)ရပ်ကွက်၊ ပြည်တော်သာလမ်းရှိ ဝန်ထမ်းအိမ်ရာ၌ ဇန်နဝါရီလ ၉ ရက်နေ့ နံနက်ပိုင်းတွင် ရောင်းချပေးခဲ့ပါသည်။
ကမ္ဘောဒီးယားနိုင်ငံ၏ ၂၀၂၅ ခုနှစ်အတွက် သီဟိုဠ်စေ့ထုတ်လုပ်မှုသည် ရာသီဥတု အခြေ အနေအပေါ် မူတည်၍ တန်ချိန် ၇၀၀၀၀၀ မှ ၉၀၀၀၀၀ အတွင်း ထွက်ရှိမည်ဟု ကမ္ဘောဒီးယား သီဟိုဠ်စေ့အသင်း (CAC) က ခန့်မှန်းထားကြောင်း သိရှိရသည်။
ထိုင်းနိုင်ငံမှ တင်ပို့သော သကာရည်များအား အစားအစာဘေးကင်းလုံခြုံရေး အကြောင်း ပြချက်ဖြင့် တရုတ်နိုင်ငံက လက်ရှိအချိန်တွင် ပိတ်ပင်ထားခြင်းသည် ပြည်တွင်းရှိ သကြားထုတ် လုပ်သူများကို ထိခိုက်စေမည်မဟုတ်ဟု တာဝန်ရှိသူများအနေဖြင့် ယုံကြည်ထားကြောင်း ထိုင်း ကြံနှင့် သကြားဘုတ်အဖွဲ့ရုံး (OCSB) မှ တာဝန်ရှိသူများက ပြောကြားခဲ့ပါသည်။
