ပြည်ပကုန်သွယ်မှုသတင်းများ

   အိန္ဒိယနိုင်ငံတွင် ကြက်သွန်နီထွက်ရှိရာ ဒေသဖြစ်သည့် မဟာရက်ရှ်ထရာပြည်နယ်၌ လာမည့်ရွေးကောက်ပွဲအဆင့်သုံးဆင့် မတိုင်မီတွင် ဗဟိုအစိုးရအနေဖြင့် ၂၀၂၃ ခုနှစ် ဒီဇင်ဘာလတွင် ချမှတ်ထားသော ကြက်သွန်နီတင်ပို့မှု ပိတ်ပင်ထားခြင်းကို ပယ်ဖျက်ရန် ၄-၅-၂၀၂၄ ရက်၊ စနေနေ့၌ ကြေညာခဲ့ကြောင်း သိရှိရသည်။

     ကြက်သွန်နီများကို အနိမ့်ဆုံးပို့ကုန်ဈေးနှုန်း (MEP) တစ်တန်လျှင် အမေရိကန်ဒေါ်လာ ၅၅၀ နှင့် ပို့ကုန်ခွန် ၄၀ ရာခိုင်နှုန်းဖြင့် တင်ပို့ခွင့်ပြုကြောင်း နိုင်ငံခြားကုန်သွယ်မှု ညွှန်ကြားမှုဦးစီးဌာန (DGFT) က စနေနေ့တွင် ကြေညာချက် ထုတ်ပြန်ခဲ့သည်။

    ပြည်ပသို့ ကြက်သွန်နီတင်ပို့မှု ပိတ်ပင်လိုက်ခြင်းသည် နိုင်ငံ၏ ကြက်သွန်နီထွက်ရှိရာဒေသဟု လူသိများသော မဟာရက်ရှ်ထရာပြည်နယ် အနောက်ပိုင်းနှင့် မဟာရက်ရှ်ထရာပြည်နယ်ရှိ ကြက်သွန်စိုက်တောင်သူများကို ထိခိုက်စေခဲ့ကြောင်း၊ အဆိုပါ ဒေသနှစ်ခုတည်းမှ အိန္ဒိယနိုင်ငံ၏ ကြက်သွန်နီ ထုတ်လုပ်မှုစုစုပေါင်း ၄၀ ရာခိုင်နှုန်းကို ထုတ်လုပ်ကြောင်း သိရှိရသည်။

     Economic Times သတင်းဌာန၏ မဟာရက်ရှ်ထရာပြည်နယ် အနောက်ပိုင်းဒေသများသို့ သွားရောက်ခဲ့သော ခရီးစဉ်များအရ ကြက်သွန်နီစိုက် တောင်သူများအနေဖြင့် ကြက်သွန်နီတင်ပို့မှု ပိတ်ပင်ထားခြင်း ဆုံးဖြတ်ချက်အပေါ် မကျေမနပ်ဖြစ်ကာ အိန္ဒိယနိုင်ငံ၏ ဒေသအချို့တွင် ၂၀၂၄ ခုနှစ် ဇန်နဝါရီလကတည်းက ဆန္ဒပြမှုများရှိခဲ့ကြောင်း သိရှိရသည်။

     ဂူဂျာရတ်ပြည်နယ်တွင် ထွက်ရှိသော ကြက်သွန်နီ အလုံးဖြူ တန်ချိန် ၂၀၀၀ အား ပြည်ပသို့ တင်ပို့ရန် အိန္ဒိယအစိုးရက ဧပြီလ၂၅ ရက်နေ့၌ ဖြေလျှော့ပေးပြီးနောက်ပိုင်းတွင် ကြက်သွန်နီ စိုက် ပျိုးသည့် တောင်သူများအနေဖြင့် ပိုမိုအမျက်ထွက်ခဲ့ကြကြောင်း သိရှိရသည်။ ဂူဂျာရတ်ပြည်နယ်သည် ပြည်ပနိုင်ငံများမှ ဝယ်လိုအားများပြားသော ကြက်သွန်နီ အလုံးဖြူကို အဓိကထုတ်လုပ် သည့် ပြည်နယ်တစ်ခု ဖြစ်ကြောင်း၊ ဂူဂျာရတ်ပြည်နယ်၏ ကြက်သွန်နီ ထိပ်တန်းထွက်ရှိသော ခရိုင်များဖြစ်သည့် Bhavnagar နှင့် Amreli တို့၌ ရွေးကောက်ပွဲတတိယအဆင့်တွင် လော့ဆာဘာ ဟုခေါ်တွင်သော အိန္ဒိယအောက်လွှတ်တော်၏ အမတ်နေရာ ၂ နေရာအတွက် မဲပေးရန် စီစဉ်ထားကြောင်း သိရှိရသည်။

      မဟာရက်ရှ်ထရာပြည်နယ်သည် ကြက်သွန်နီ အနီလုံးကို စိုက်ပျိုးထုတ်လုပ်ပြီး အဆိုပါပြည်နယ်မှ တောင်သူများအနေဖြင့် ဂူဂျာရတ်ပြည်နယ်အတွက် ဖြေလျှော့ပေးထားသည့်အတိုင်း ၎င်းတို့အတွက်လည်း အလားတူဖြေလျှော့မှုများရရှိရန် ဆန္ဒပြတောင်းဆိုခဲ့ကြသည်။

     အဆိုပါအချက်သည် လက်ခံကြိုဆိုရမည့် ခြေလှမ်းတစ်ခု ဖြစ်သော်လည်း အတော်နောက်ကျနေပြီဖြစ်ကြောင်း၊ ပထမဦးစွာအနေဖြင့် ပို့ကုန်တင်ပို့မှုအား ပိတ်ပင်ခြင်း မပြုလုပ်သင့်ကြောင်း၊ ပို့ကုန်တားမြစ်ချက်ကို ရုပ်သိမ်းမည်ဆိုပါကလည်း ပြည်နယ်တစ်ခုတည်းအတွက် မဟုတ်ပဲ ပြည်နယ်အားလုံးအတွက် ဖြစ်သင့်ကြောင်း နာရှစ်မြို့၊ Pimpri Sayyad ကျေးရွာမှ ကြက်သွန်နီစိုက်တောင်သူ Abhishek Salunke က Econmic Times သို့ ပြောကြားခဲ့သည်။

     နာရှစ်သည် မဟာရက်ရှ်ထရာပြည်နယ်ရှိ ကြက်သွန်နီစိုက်တောင်သူများ၏ အချက်အချာ မြို့တစ်ခုဖြစ်ကြောင်း၊ နိုင်ငံ၏အကြီးဆုံး ကြက်သွန်နီဈေးဖြစ်သည့် လာဆယ်ဂွန်သည် နာရှစ် လော့ဆာဘာလွှတ်တော် နယ်မြေအောက်၌ရှိကြောင်း၊ ယခင်ကျင်းပပြီးစီးခဲ့သည့် ရွေးကောက်ပွဲ ၂ ကြိမ်တွင် Shiv Sena ပါတီခေါင်းဆောင် Hemant Godse သည် လက်ရှိ ဗဟိုအစိုးရအဖွဲ့အဖြစ် ဖွဲ့စည်းအုပ်ချုပ်လျက်ရှိသည့် အမျိုးသား ဒီမိုကရက်တစ် မဟာမိတ် (National Democratic Alliance-NDA) အဖွဲ့၏ တစ်စိတ်တစ်ပိုင်းအဖြစ် နာရှစ် လော့ဆာဘာလွှတ်တော်အမတ်နေရာကို အနိုင်ရရှိခဲ့ကြောင်း သိရှိရသည်။

    ၂၀၁၉ ခုနှစ်တွင် မဟာရက်ရှ်ထရာပြည်နယ်၏ လော့ဆာဘာလွှတ်တော်အမတ်နေရာ ၈ နေရာအနက် BJP ပါတီမှ ၄ နေရာအနိုင်ရရှိခဲ့ပြီး Shiv Sena ပါတီမှ ၃ နေရာနှင့် Aurangabad မြို့ မှ အမတ်နေရာအတွက် AIMIM ပါတီမှ ၁ နေရာ အနိုင်ရရှိခဲ့ကြောင်း သိရှိရသည်။ Maratha ဒေသ၌ အမတ်နေရာခွဲတမ်းသတ်မှတ်ရေး လှုပ်ရှားတောင်းဆိုမှုများကြောင့် ဂယက်ရိုက်မှုများနှင့်အတူ ကြက်သွန်နီစိုက်တောင်သူများ၏ ဆန္ဒပြမှုသည် NDA မဟာမိတ်အဖွဲ့၏ ရွေးကောက်ပွဲရလဒ် အပေါ် သက်ရောက်မှု ရှိနိုင်ကြောင်း သိရှိရသည်။

    ကြက်သွန်နီပို့ကုန်တင်ပို့မှု ပိတ်ပင်ထားခြင်းကို ရုတ်သိမ်းပေးခြင်းဖြင့် တောင်သူများအား သက်သာရာရစေရန် အစိုးရက ကြိုးပမ်းခဲ့ကြောင်း၊ အစိုးရ၏ အဆိုပါဆုံးဖြတ်ချက်နှင့် ပတ်သက်၍ သက်ရောက်မှုရလဒ်ကို လာမည့်အထွေထွေရွေးကောက်ပွဲ အဆင့် ၃ ဆင့်တွင် မဲပေးပြီးချိန်၌ မြင်တွေ့ရမည် ဖြစ်ကြောင်း သိရှိရသည်။

Source: Economic Times, 5 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ပြည်တွင်းဈေးကွက်၌ ပဲမျိုးစုံဈေးနှုန်းများ ကျဆင်းမည့် လက္ခဏာမရှိသည့် အခြေအနေတွင် အိန္ဒိယအစိုးရသည် ရောင်းလိုအားမြှင့်တင်ရေး ဆောင်ရွက်ချက်အဖြစ် ကုလားပဲတင်သွင်းမှုအပေါ် အခွန်ကောက်ခံခြင်းကို ဖယ်ရှားခဲ့သည့်အပြင် စားတော်ပဲများအား တင်သွင်းခွင့်ပြုသည့် ကာလကိုလည်း ၂၀၂၄ ခုနှစ် အောက်တိုဘာလ ၃၁ ရက်နေ့အထိ ထပ်မံတိုးမြှင့်ပေးခဲ့ကြောင်း သိရှိရသည်။

    အိန္ဒိယနိုင်ငံတွင် ကုလားပဲတင်သွင်းမှုအပေါ် စည်းကြပ်သတ်မှတ်ထားသည့် ပုံမှန်အခွန်နှုန်းထားမှာ ၆၆ ရာခိုင်နှုန်းဖြစ်သည်။ ၃-၅-၂၀၂၄ ရက်နေ့၊ သောကြာနေ့ညပိုင်း၌ အိန္ဒိယဘဏ္ဍာရေး ဝန်ကြီးဌာနက နိုင်ငံတော်ပြန်တမ်းမှတစ်ဆင့် ထုတ်ပြန်ခဲ့သည့် အမိန့်ကြော်ငြာစာတွင် ကုလားပဲ တင်သွင်းမှုအပေါ် ကောက်ခံသည့် သွင်းကုန်အခွန်အား သုညရာခိုင်နှုန်းအထိ လျော့ချမှုသည် ၄-၅-၂၀၂၄ နေ့မှစတင် အကျိုး သက်ရောက်မည်ဖြစ်ကြောင်း ဖော်ပြထားသည်။

    အိန္ဒိယအစိုးရသည် ဧပြီလ အစောပိုင်းတွင် ကုလားပဲ၏နေရာ၌ အစားထိုးသုံးစွဲနိုင်သည့် စားတော်ပဲများအား အကောက်ခွန်လွတ် တင်သွင်းခွင့်ကို ၂ လ တိုးမြှင့်လျက် ၂၀၂၄ ခုနှစ် ဇွန်လ ၃၀ ရက်နေ့အထိ သက်တမ်းတိုးထားခဲ့သည်။ ပြည်တွင်းထုတ်လုပ်မှုမှ အထွက်လျော့နည်းနိုင်ခြေ ရှိသည့်အလျောက် အစိုးရသည် ၂၀၂၃ ခုနှစ် ဒီဇင်ဘာလ၌ ကုလားပဲများ အကောက်ခွန်လွတ် တင်သွင်းခွင့်ကို ၃၁-၃-၂၀၂၄ နေ့အထိ ခွင့်ပြုခဲ့ပြီး ထိုသို့ တင်သွင်းခွင့်ကာလကို ဧပြီလ ၃၀ ရက်နေ့အထိ ဆက်လက်သက်တမ်းတိုးပေးခဲ့သည်။

   ကုလားပဲ စိုက်ဧက လျော့ကျမှုအရ ထုတ်လုပ်မှုပမာဏသည်လည်း လိုက်ပါကျဆင်းသဖြင့် အိန္ဒိယနိုင်ငံ အလယ်ပိုင်းရှိ အဓိကစိုက်ပျိုးသော နယ်မြေဒေသများတွင် ကုလားပဲ လက်ကားဈေး နှုန်းများမှာ အစိုးရကသတ်မှတ်သည့် အခြေခံရည်ညွှန်းဈေးနှုန်းဖြစ်သော ၁ ကွင်တယ် (၁၀၀ ကီလို ဂရမ်) လျှင် ရူပီး ၅၄၄၀ နှုန်းကို ၁၀ ရာခိုင်နှုန်းမှ ၁၅ ရာခိုင်နှုန်းအထိ ကျော်လွန်၍ ရောင်းဝယ် လျက်ရှိသည်။ အစိုးရ၏ ဒုတိယအကြိမ် သီးနှံအထွက်ခန့်မှန်းချက်အရ ကုလားပဲစိုက်ပျိုး ထုတ်လုပ် မှုသည် ယခင်နှစ်ထွက်ရှိမှု တန်ချိန် ၁၂၂.၆၇ သိန်းမှ အနည်းငယ်လျော့ကျလျက် ၂၀၂၃-၂၄ ခုနှစ် သီးနှံရာသီတွင် တန်ချိန် ၁၂၁.၆၁ သိန်းခန့် ထွက်ရှိနိုင်မည်ဖြစ်သည်။

     ကုလားပဲ၏ ဈေးနှုန်းများ မြင့်တက်သည့်လမ်းကြောင်းသို့ ရောက်ရှိမှုသည် အစိုးရ‌အေဂျင်စီ များအတွက် အခြေခံရည်ညွှန်းဈေးနှုန်းဖြင့် အရန်သိုလှောင်ထားရှိရန် ဝယ်ယူရေးဆောင်ရွက်ရာ၌ အခက်အခဲဖြစ်ပေါ်စေလျက်ရှိသည်။ အမျိုးသား လယ်ယာထွက်ကုန်ဈေးကွက်မြှင့်တင်ရေး သမဝါ ယမအသင်းချုပ် လီမိတက် (NAFED) ၏ အချက်အလက်စင်္ကြန်တွင် ဖော်ပြချက်အရ လက်ရှိရာသီ ၌ အရန်ရိက္ခာ ကုလားပဲဝယ်ယူနိုင်မှုမှာ တန်ချိန် ၇၆၅ တန်သာရှိကြောင်း သိရှိရသည်။

    ယခုနောက်ဆုံး မူဝါဒပြောင်းလဲမှုသည် ကောင်းမွန်သော လုပ်ဆောင်ချက်မဖြစ်နိုင်ပဲ ရုရှား၊ ကနေဒါနှင့် ဩစတေးလျ နိုင်ငံများရှိ တောင်သူများနှင့် ပို့ကုန်လုပ်ငန်းရှင်များကိုသာ အထောက်အပံ့ပြုမည်ဖြစ်ကြောင်း၊ ဈေးနှုန်းသက်သာသောကုန်များ တင်သွင်းမှုသည် အိန္ဒိယလယ်သမားများ၏ အကျိုးစီးပွားနှင့် အနာဂတ် သီးနှံစိုက်ပျိုးမှုတို့ကို ထိခိုက်လိမ့်မည်ဖြစ်ကြောင်း၊ ကုန်တင်သွင်းမှု မှာ ပြဿနာမဟုတ်သော်လည်း အစိုးရအနေဖြင့် စားတော်ပဲတင်သွင်းမှုအပေါ် အခွန်စည်းကြပ် သင့်ကြောင်း၊ သို့မှသာ ၎င်း၏ ဆိပ်ကမ်းအရောက် ကုန်ကျမှုစရိတ်သည် ကုလားပဲအတွက် သတ်မှတ်ထားသော အခြေခံရည်ညွှန်းဈေးနှုန်းနှင့် နီးကပ်မှုရှိမည်ဖြစ်ကြောင်းဖြင့် အိန္ဒိယပဲမျိုးစုံနှင့် ကောက်ပဲသီးနှံအသင်း၏ ဥက္ကဋ္ဌ Bimal Kothari က ပြောကြားခဲ့သည်။

    Mr. Kothari ၏ ပြောဆိုမှုအရ ရုရှား၊ ကနေဒါနှင့် အချို့သောဥရောပနိုင်ငံများ၌ စားတော်ပဲ စိုက်ပျိုးထုတ်လုပ်မှုသည် ရှေ့လာမည့် ဇူလိုင်လမှစတင် ရိတ်သိမ်းထွက်ပေါ်မည်ဖြစ်ပြီး စုစုပေါင်း တန်ချိန် ၉ သန်းခန့် ထုတ်လုပ်နိုင်ဖွယ်ရှိကြောင်း၊ ဇွန်လကုန်အထိ စားတော်ပဲ တန်ချိန် ၁.၈ သန်း ခန့် တင်သွင်းမှုရှိမည်ဟု အိန္ဒိယပဲမျိုးစုံနှင့် ကောက်ပဲသီးနှံအသင်းက ခန့်မှန်းထားပြီး သီးနှံရာသီအသစ်မှ ထွက်ပေါ်သော ကုန်စည်များကို ပိုမိုတင်သွင်းဖွယ်ရှိနိုင်ကြောင်း သိရှိရသည်။

    သွင်းကုန်အပေါ် အခွန်စည်းကြပ်မှုကို အစိုးရက ဖြေလျော့ခဲ့အပြီးတွင် ဩစတေးလျမှ အိန္ဒိယသို့ ကုလားပဲတင်ပို့မှုမှာ တန်ချိန် ၁.၅ သိန်းမှ ၂ သိန်းခန့်ရှိလာနိုင်ကြောင်း၊ ဩစတေးလျ၌ ကုလားပဲ သီးနှံအသစ်သည် နိုဝင်ဘာလတွင် ထွက်ပေါ်မည်ဖြစ်ပြီး အိန္ဒိယပြည်တွင်း၌ ကုလားပဲ စတင်စိုက်ပျိုးမည့်ကာလနှင့် တိုက်ဆိုင်နေသဖြင့် အိန္ဒိယတောင်သူများ၏ စိုက်ပျိုးလုပ်ကိုင်လိုမှု အပေါ် သက်ရောက်မှုရှိနိုင်ကြောင်း Mr. Kothari က ပြောကြားခဲ့သည်။ Igrain India ကုမ္ပဏီမှ လုပ်ငန်းရှင် Rahul Chauhan ကလည်း ကုလားပဲတင်သွင်းမှုအပေါ် အခွန်လျှော့ချခြင်းမှာ ကြိုဆို ရမည့် အချက်ဖြစ်သော်လည်း ကာလကြာရှည်စွာ ဈေးကောင်းရရှိနေခဲ့သော တောင်သူများ၏ အမြင်တွင် ကောင်းမွန်မှုမရှိကြောင်း၊ ပြည်တွင်း၌ ကုလားပဲစိုက်ပျိုးထုတ်လုပ်မှု၏ ၇၀ ရာခိုင်နှုန်း ခန့်သည် ဈေးကွက်အတွင်းသို့ ရောက်ရှိပြီးဖြစ်ရာ ကျန်ရှိသောပမာဏကို သိုလှောင်ထားရှိသူများ အပေါ်တွင်သာ သက်ရောက်မှုရှိမည်ဖြစ်ကြောင်း ပြောဆိုခဲ့သည်။

   အိန္ဒိယနိုင်ငံသည် တန်ဇန်နီးယားကဲ့သို့သော ဖွံ့ဖြိုးမှုနည်းပါးသည့် နိုင်ငံများထံမှ ကုလားပဲများကို အခွန်နှုန်းထား သုညရာခိုင်နှုန်းအထိ လျှော့ချ၍ တင်သွင်းခဲ့ချိန်၌ ဩစတေးလျကဲ့သို့ ကုလားပဲ အဓိက စိုက်ပျိုးထုတ်လုပ်သူများသည် အိန္ဒိယဈေးကွက်သို့ တင်ပို့နိုင်စွမ်း ကင်းမဲ့နေခဲ့ရသည်။ အိန္ဒိယ၏ ကုလားပဲတင်သွင်းမှုမှာ ၂၀၂၂-၂၃ ခုနှစ်၌ တင်သွင်းခဲ့သော တန်ချိန် ၅၉၂၅၅ တန်ထက် နှစ်ဆကျော်ပိုမိုလျက် ၂၀၂၃-၂၄ ခုနှစ်တွင် တန်ချိန် ၁.၄၉ သိန်းခန့်ရှိခဲ့ကြောင်း သိရှိရသည်။

Source: The Hindu Business Line, 4 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

       ကမ္ဘာ့အကြီးမားဆုံး သစ်ကြမ်းပိုးခေါက်တင်ပို့သည့် နိုင်ငံအဖြစ် ဗီယက်နမ်နိုင်ငံ ဆက်လက်ရပ်တည်နိုင်ရန်အတွက် ၂၀၂၁ခုနှစ်တွင် ထုတ်ပြန်ထားခဲ့သည့် မဟာဗျူဟာကို ပြုပြင်ထုတ်ပြန်ရန် လိုအပ်ကြောင်းသိရပါသည်။ ဗီယက်နမ်နိုင်ငံသည် လွန်ခဲ့သည့်နှစ်တွင် သစ်ကြမ်းပိုးခေါက်တန်ချိန်(၉၀၀၀၀)နီးပါးဖြင့် အမေရိကန်ဒေါ်လာသန်း၂၆၀ကျော်တင်ပို့ခဲ့ပြီး ၂၀၂၂ခုနှစ်ထက် ပမာဏအားဖြင့် ၁၄.၆ရာခိုင်နှုန်းမြင့်တက်ခဲ့သော်လည်း တန်ဖိုးအားဖြင့် ၁၀.၇ရာခိုင်နှုန်းကျဆင်းခဲ့ကြောင်းသိရပါသည်။ ၂၀၂၃ခုနှစ်တွင် သစ်ကြမ်းပိုးခေါက်တစ်တန်ကို ၂၉၁၈အမေရိကန်‌ဒေါ်လာရှိခဲ့ပြီး ၂၀၂၂ခုနှစ်ထက် ၂၂.၁ရာခိုင်နှုန်းစျေးနှုန်းကျဆင်းခဲ့ကြောင်းသိရပါသည်။ အိန္ဒိယနိုင်ငံသည် တန်ချိန်၃၈၀၀၀ကျော်ပမာဏနှင့် ဗီယက်နမ်သစ်ကြမ်းပိုးခေါက်များကို အဓိကတင်သွင်းသည့်နိုင်ငံဖြစ်ပါသည်။ အိန္ဒိယနောက်တွင် အမေရိကန်နိုင်ငံက တန်ချိန်၁၀၁၀၀ကျော်၊ ဘင်္ဂလားဒေ့ရှ်နိုင်ငံက တန်ချိန်၆၀၀၀တင်သွင်းခဲ့ကြောင်းသိရပါသည်။ ယခုနှစ်၏ ပထမနှစ်လတွင် ဗီယက်နမ်သည် အမေရိကန်ဒေါ်လာသန်း၃၀ပမာဏရှိသည့် သစ်ကြမ်းပိုးခေါက်တန်ချိန်၁၀၅၀၀ကို ပြည်ပသို့တင်ပို့ခဲ့ကြောင်းသိရပါသည်။ ဗီယက်နမ်နိုင်ငံငရုတ်ကောင်းနှင့် ဟင်းခတ်အမွှေးအကြိုင်အသင်းဥက္ကဋ္ဌ Hoang Thi Lien က စိုက်ပျိုးရေးသမားများသည် သစ်ကြမ်းပိုးခေါက်ပင်များ၏ အရည်အသွေးနှင့် ထုတ်လုပ်နိုင်စွမ်းတိုးတက်လာစေရန် စိုက်ပျိုးရေးနည်းစနစ်သစ်များကို ဆက်တိုက်တိုးတက်အောင် ဆောင်ရွက်ခဲ့ကြောင်း ပြောကြားခဲ့ပါသည်။ ဗီယက်နမ်နိုင်ငံသည် စျေးကွက်လိုအပ်ချက်ဖြစ်သည့် ပိုမိုအရည်အသွေးကောင်းမွန်သော သစ်ကြမ်ပိုးခေါက်ထုတ်ကုန်များကိုရရှိရန်အတွက် ခေတ်မီထုတ်လုပ်ရေးလုပ်ငန်းစဥ်များတွင် ရင်းနှီးမြှုပ်နှံရန် ဒါဇင်ပေါင်းများစွာသော ကုမ္ပဏီများကိုပိုင်ဆိုင်ထားကြောင်းသိရပါသည်။ ဥရောပသမ္မဂ္ဂနှင့် ဗီယက်နမ်နိုင်ငံကြားချုပ်ဆိုထားသည့် လွတ်လပ်စွာကုန်သွယ်‌ရေးသဘောတူညီချက်မှာလည်း ဗီယက်နမ်ကို အကောက်ခွန်ကင်းလွတ်ခွင့်ကိစ္စနှင့်ပတ်သတ်၍ အခြားနိုင်ငံများထက် အခွင့်ရေးရရှိရန် ကူညီပေးလျက်ရှိနေပါသည်။ အဆိုပါအချက်သည် ဗီယက်နမ်သစ်ကြမ်းပိုးခေါက်ထုတ်ကုန်များကို နိုင်ငံတကာစျေးကွက်တွင် အလွန်အထောက်အကူပြုပြီး အခွင့်‌အရေးများရရှိစေပါသည်။ လတ်တလောတွင် ဗီယက်နမ်နိုင်ငံသည် သစ်ကြမ်းပိုးခေါက်ကို ကမ္ဘာတစ်ဝန်းရှိ နိုင်ငံပေါင်း ၁၀၀နီးပါးကိုတင်ပို့ခဲ့ပြီးဖြစ်ပြီး အိန္ဒိယနိုင်ငံစျေးကွက်ဝေစု၏ ၉၅ရာခိုင်နှုန်း၊ အမေရိကန်စျေးကွက်ဝေစု၏ ၃၆.၅ရာခိုင်နှုန်း၊ ဥရောပစျေးကွက်၏ ၃၅ရာခိုင်နှုန်းကိုရရှိထားပါသည်။ သို့သော် သစ်ကြမ်းပိုးခေါက်အချောတင်ပို့မှုမှာ စုစုပေါင်းတင်ပို့မှုပမာဏ၏ ၁၈.၆ရာခိုင်နှုန်းရှိခဲ့ပြီး ထိုပမာဏအနက် ၇၀ရာခိုင်နှုန်းကို အမေရိကန်နိုင်ငံနှင့် ၁၂ရာခိုင်နှုန်းကို ဥရောပသို့တင်ပို့ခဲ့ခြင်းဖြစ်ပါသည်။ ထို့ကြောင့် အမေရိကန်နှင့် ဥရောပသို့ သစ်ကြမ်းပိုးခေါက်အချောတင်ပို့မှု ပိုမိုမြင့်တက်လာစေရန်အတွက် ရိတ်သိမ်းကာလပြီးဆုံးချိန်တွင် အချောပြုပြင်ထုတ်လုပ်မှုအရည်အသွေးကဏ္ဍပိုမိုတိုးတက်လာရန်လိုအပ်ပါသည်။ သို့မှသာ ကုန်သွယ်မှုမြှင့်တင်ရေးလှုပ်ရှားခြင်း၊ နိုင်ငံတကာနယ်ပယ်တွင် ကုန်ပစ္စည်းကိုယ်ပိုင်လက္ခဏာ တည်ဆောက်ခြင်း၊ အများနှင့်သက်ဆိုင်သော သီးသန့်ပူးပေါင်းဆောင်ရွက်မှုပုံစံများကို တွန်းအားပေးခြင်း၊ ရေရှည်မဟာဗျူဟာမူဝါဒဆွေးနွေးညှိုနှိုင်းခြင်းနှင့် ထောက်ပံ့မှုအရင်းအမြစ်များရှာဖွေခြင်းတို့ကို မြှင့်တင်နိုင်ကာ ဗီယက်နမ်နိုင်ငံကို ကမ္ဘာ့ထိပ်တန်း သစ်ကြမ်းပိုးခေါက်ထုတ်လုပ်သူအဖြစ် ရပ်တည်နိုင်စေမည်ဖြစ်သည်ဟုသိရှိရပါသည်။

DOCA(ရန်ကုန်)

    ကမ္ဘောဒီးယားနိုင်ငံသည် ၂၀၂၄ ခုနှစ် ပထမသုံးလပတ်တွင် ရော်ဘာအခြောက် တန်ချိန် ၆၉၃၂၂ တန်တင်ပို့ခဲ့ပြီး ၂၀၂၃ ခုနှစ် အလားတူကာလ၌ တင်ပို့ခဲ့မှု ၆၅၉၂၁ တန်အပေါ် ၅.၁%  တိုးတက်လာကြောင်း ကမ္ဘောဒီးယား ရော်ဘာညွှန်ကြားမှုဦးစီးဌာန၏ ၂၃-၄-၂၀၂၄ ရက်နေ့တွင် ထုတ်ပြန်သော အစီရင်ခံစာ၌ ဖော်ပြပါသည်။

      ကမ္ဘောဒီးယားနိုင်ငံသည် ယခုနှစ် ဇန်နဝါရီလမှ မတ်လအတွင်း ရော်ဘာတင်ပို့မှုမှ ဝင်ငွေရရှိမှုမှာ ဒေါ်လာ ၁၀၀.၅ သန်းဖြစ်ပြီး ၂၀၂၃ ခုနှစ် အလားတူကာလတွင် ဒေါ်လာ ၉၂.၉ သန်းသာ ရရှိခဲ့ရာ တန်ဖိုးအားဖြင့် ၈% တိုးတက်လာခြင်းဖြစ်ပါသည်။ ၂၀၂၄ ခုနှစ် ပထမသုံးလပတ်တွင် ရော်ဘာအခြောက်တစ်တန်၏ ပျမ်းမျှဈေးနှုန်းမှာ ဒေါ်လာ ၁၄၅၀ ရှိပြီး ယခင်နှစ်အလားတူ ကာလထက် ၄၁ ဒေါ်လာခန့် ပိုမိုခဲ့ကြောင်း ရော်ဘာညွှန်ကြားမှုဦးစီးဌာနမှ ခေတ္တညွှန်ကြားရေးမှူးချုပ် Mr. Khun Kakada က အစီရင်ခံစာတွင် ဖော်ပြထားပါသည်။

     ကမ္ဘောဒီးယားနိုင်ငံသည် ရော်ဘာပို့ကုန်ပစ္စည်းများကို မလေးရှား၊ ဗီယက်နမ်၊ စင်ကာပူနှင့် တရုတ်နိုင်ငံများသို့ အဓိကတင်ပို့လျက်ရှိကြောင်း၊ ယခုအချိန်အထိ စုစုပေါင်း ရော်ဘာစိုက်ပျိုး ဧရိယာ ၄၀၇၁၇၂ ဟက်တာခန့် စိုက်ပျိုးထားရှိပြီးဖြစ်ကြောင်း၊ အဆိုပါဧရိယာပမာဏအနက်  ဟက်တာပေါင်း ၃၂၀၁၈၄ သို့မဟုတ် ၇၉% ခန့်သည် ရော်ဘာအစေးခြစ် ထုတ်လုပ်နိုင်မှုရှိကြောင်း သတင်းရရှိပါသည်။

Source: Khmer Times, 26 Apr 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     ဖိလစ်ပိုင်နိုင်ငံ၏ ဆန်တင်သွင်းမှုမှာ ယခင်နှစ် ကာလတူ၌ တင်သွင်းခဲ့မှုနှင့် နှိုင်းယှဉ်ပါက ဧပြီလလယ်တွင် စံချိန်တင်မြင့်တက်ခဲ့ကြောင်း ဖိလစ်ပိုင်စိုက်ပျိုးရေးဦးစီးဌာန လက်အောက်ရှိ သီးနှံလုပ်ငန်းဌာန (BPI) ၏ အချက်အလက်များအရ သိရသည်။

    အဆိုပါဌာန၏ နောက်ဆုံးထုတ်ဝေသော အစီရင်ခံစာအရ ယခုနှစ် ဇန်နဝါရီလ ၁ ရက်မှ ဧပြီလ ၁၉ ရက်နေ့အတွင်း ဖိလစ်ပိုင်နိုင်ငံ၏ ဆန်တင်သွင်းမှုသည် ယခင်နှစ် ကာလတူတင်သွင်းမှု ဆန်တန်ချိန် ၁.၃၁ သန်းအပေါ် ၇.၉၅% တိုးတက်လျက် မက်ထရစ်တန် ၁.၄၂ သန်းသို့ မြင့်တက်ခဲ့ ကြောင်း သိရသည်။ သို့သော် ယခုနှစ် ဧပြီလအတွင်း အဆိုပါနေ့ရက်အထိ ဆန်တင်သွင်းမှုမှာ မက်ထရစ်တန် ၂၄၃၇၁၀.၉၂ ရှိပြီး ယင်းသည် ယခင်နှစ်ကာလတူ တင်သွင်းမှု မက်ထရစ်တန်ချိန် ၅၁၆၈၉၅.၁၇ ၏ ထက်ဝက်ခန့် လျော့နည်းမှုရှိကြောင်း သိရှိရပါသည်။

     BPI ဌာနသည် ယခုနှစ် နှစ်စပိုင်းမှ လက်ရှိကာလအထိ ဆန်တင်သွင်းမှုဆိုင်ရာ အပင်ရောဂါပိုးမွှားကင်းရှင်းကြောင်းလက်မှတ် စုစုပေါင်း ၁၉၅၂ စောင်ကို အသိအမှတ်ပြုထားသည့် သွင်းကုန်လုပ်ငန်းရှင်များထံသို့ ထုတ်ပေးထားပြီးဖြစ်သည်။

    အဆိုပါကာလအတွင်း ဆန်တင်သွင်းမှု စုစုပေါင်း၏ ၆၇.၁၄% ရှိသော ဆန် ၉၅၅၈၁၇.၈၇ တန်ကို ဗီယက်နမ်နိုင်ငံထံမှ အဓိကရယူတင်သွင်းခဲ့ခြင်းဖြစ်သည်။ ၎င်း၏နောက်၌ ထိုင်းနိုင်ငံမှ ဆန် ၂၆၅၀၁၉.၆၄ တန်၊ ပါကစ္စတန်နိုင်ငံမှ ၁၃၃၉၈၄.၅၀ တန်နှင့် မြန်မာနိုင်ငံမှ ၅၉၈၈၀ တန် အသီးသီးတင်သွင်းခဲ့သည်။ ကျန်ပမာဏသည် တရုတ်၊ ဂျပန်၊ ကမ္ဘောဒီးယား၊ အိန္ဒိယ၊ အီတလီ နှင့် စပိန်နိုင်ငံတို့မှ ဖြစ်သည်။

     ဖိလစ်ပိုင်နိုင်ငံသည် ယခင်နှစ်တွင် ဆန်တန်ချိန် ၃.၆ သန်း တင်သွင်းခဲ့ရာ ၂၀၂၂ ခုနှစ်၌ တင်သွင်းခဲ့သော တန်ချိန် ၃.၈၂ သန်းအပေါ် ၅.၉% ကျဆင်းခဲ့သည်။ ယခုနှစ်အတွက် ဆန်တင်သွင်းမှုအား ယခင်နှစ်တင်သွင်းသည့် ပမာဏထက် ကျော်လွန်ခြင်းမရှိစေရန် ဖိလစ်ပိုင်စိုက်ပျိုးရေးဦးစီးဌာနက စီမံဆောင်ရွက်လျက်ရှိသည်။

     သို့သော် ပြည်တွင်းဆန်လက်ကျန်မှာ မတ်လ ၁ ရက်နေ့ရှိ စာရင်းများအရ ၃.၀% ကျဆင်း ခဲ့ကြောင်း ဖိလစ်ပိုင် စာရင်းအင်းအာဏာပိုင်အဖွဲ့က ပြောကြားခဲ့သည်။ မတ်လအစတွင် ဆန် သိုလှောင်မှုသည် တန်ချိန် ၁.၃၇ သန်းရှိမည်ဟု ခန့်မှန်းထားပြီး ၂၀၂၃ ခုနှစ် အလားတူကာလတွင် ကျန်ရှိသည့် တန်ချိန် ၁.၄၁ သန်းနှင့် နှိုင်းယှဉ်ပါက နည်းပါးနေခဲ့သည်။ လအလိုက် နှိုင်းယှဉ်ပါက ဖေဖော်ဝါရီ ၁ ရက်နေ့ရှိ ဆန်လက်ကျန်တန်ချိန် ၁.၅၁ သန်းအပေါ် ၉.၆% ကျဆင်းခဲ့သည်။

     ထိုသို့သော အခြေအနေတွင် စိုက်ပျိုးရေးအတွင်းဝန် Francisco Tiu Laurel Jr. က အမျိုးသား စားနပ်ရိက္ခာအာဏာပိုင်အဖွဲ့၏ သိုလှောင်ရုံအများအပြားကို ယာယီပိတ်ထားသော် လည်း အယ်လ်နီညိုကာလတွင် နိုင်ငံအတွင်း ဆန်အလုံအလောက်ရှိကြောင်း အာမခံချက် ပေးခဲ့ သည်။ ယခုနှစ်အတွက် ဖိလစ်ပိုင်နိုင်ငံ၏ ဆန်တင်သွင်းမှုသည် အမေရိကန်စိုက်ပျိုးရေးဌာနက ခန့်မှန်းထားသည့် မက်ထရစ်တန်ချိန် ၄ သန်းသို့ ရောက်နိုင်ဖွယ်မရှိဟု ၎င်းက ပြောကြားခဲ့သည်။

Source: Manila Times, 30 Apr 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)