ပြည်ပကုန်သွယ်မှုသတင်းများ

      အမေရိကန်နိုင်ငံ၌ Trader Joe ကုမ္ပဏီမှ ထုတ်လုပ်ဖြန့်ဖြူးသည့်  ဆားဖြင့်လှော်ထားသော သီဟိုဠ်စေ့ထုပ်များအနက် တစ်ထုပ်တွင် ဆယ်မိုနဲလား ဘက်တီးရီးယား ပါဝင်မှုရှိသည်ကို အစား အသောက်နှင့် ဆေးဝါးကွပ်ကဲရေးအာဏာပိုင်အဖွဲ့က စစ်ဆေးတွေ့ရှိခဲ့အပြီး ဈေးကွက်အတွင်းမှ သီဟိုဠ်စေ့ထုပ်များကို ပြန်လည်သိမ်းဆည်းနေရကြောင်း CBS သတင်းဌာန၏ ၁၉-၃-၂၀၂၄ နေ့ ဖော်ပြချက်အရ သိရှိရပါသည်။

      ယခုလအတွင်း Trader Joe ကုမ္ပဏီ၏ ဈေးကွက်အတွင်းမှ သီဟိုဠ်စေ့ထုပ်များ ပြန်လည်သိမ်းဆည်းမှုမှာ ဒုတိယမြောက်ဖြစ်ပြီး မတ်လ အစောပိုင်းကလည်း အလေးချိန်အားဖြင့် ပေါင် ၆၁ဝဝဝ ကျော်ရှိသော ကြက်သားဖက်ထုပ်ပေါင်း  အထုပ်များတွင် ပလပ်စတစ်အမာစများ ပါဝင်နိုင်သည့်အလား အလာများရှိနေခြင်းကြောင့် အဆိုပါပစ္စည်းများကို ဈေးကွက်အတွင်းမှ ပြန်လည် သိမ်းဆည်းခဲ့ရပါသည်။

    ဈေးကွက်အတွင်းမှ ပြန်လည်သိမ်းဆည်းခဲ့သော သီဟိုဠ်စေ့ထုပ်များကို ကယ်လီဖိုးနီးယား ပြည်နယ်၊ Dublin မြို့အခြေစိုက် Wenders LLC က Trader Joe ကုမ္ပဏီအတွက် သီးသန့်ထုပ်ပိုး၍ ဖြန့်ချီပေးခဲ့ခြင်းဖြစ်ပြီး အမေရိကန်နိုင်ငံအတွင်းရှိ ပြည်နယ်ပေါင်း ၁၆ ခု၌ ရောင်းချခဲ့ခြင်းဖြစ် သည်။ အစားအသောက်နှင့် ဆေးဝါးကွပ်ကဲရေးအာဏာပိုင်အဖွဲ့၏ ကြေညာချက်အရ အဆိုပါ ပြည်နယ်များတွင် သီဟိုဠ်စေ့ကြောင့် နာမကျန်းဖြစ်မှု အစီရင်ခံတင်ပြခြင်းမရှိသေးကြောင်း သိရှိရ ပါသည်။ Trader Joe ကုမ္ပဏီ၏ ဈေးကွက်အတွင်းမှ ပြန်လည်သိမ်းဆည်းသည့် ကြေညာလွှာ တစ်ခုတွင် ဝယ်ယူသူများအနေဖြင့် အိတ်ပေါ်တွင် 37884 SKU နံပါတ်နှင့်အတူ ကုန်ထုတ်လုပ်မှု အမှတ်စဉ်နံပါတ်များ ဖြစ်သည့် T12139 ၊ T12140 ၊ T12141 နှင့် T12142 တို့ပါဝင်ပြီး အိန္ဒိယ သို့မဟုတ် ဗီယက်နမ်နိုင်ငံတို့ကို ပင်ရင်းနိုင်ငံအဖြစ် ဖော်ပြထားသော သီဟိုဠ်စေ့များကို ဝယ်ယူခဲ့ ပါက စွန့်ပစ်ခြင်း သို့မဟုတ် Trader Joe ကုမ္ပဏီ၏ မည်သည့်ရုံးခွဲတွင်မဆို ပြန်လည်ပေးပို့လျက် ပြန်အမ်းငွေ အပြည့်အဝရယူခြင်းတို့ကို ဆောင်ရွက်နိုင်ကြောင်း ဖော်ပြထားပါသည်။

   ဆယ်မိုနဲလားသည် လူနှင့်တိရစ္ဆာန်တို့၏ အူလမ်းကြောင်းကို ဒုက္ခဖြစ်စေသည့် ဘက်တီး ရီးယားပိုးတစ်မျိုးဖြစ်ပြီး ဆယ်မိုနဲလားအဆိပ်သင့်ပါက အသက် (၅) နှစ်အောက် ငယ်ရွယ်သူ ကလေးများ၊ အသက်ကြီးသူများနှင့် ခုခံအားစနစ်နည်းသူများကို ပြင်းထန်စွာနာမကျန်းဖြစ်စေ နိုင်ကြောင်း၊ ဆယ်မိုနဲလားပါဝင်သော အစားအစာကို စားသုံးမိပါက ၁၂ နာရီမှ ၃ ရက်အတွင်း ဝမ်းသွားခြင်း၊ ဖျားနာခြင်းနှင့် ဗိုက်နာဗိုက်အောင့်ခြင်း စသည့် ရောဂါလက္ခဏာများ စတင်ဖြစ်ပေါ် လေ့ရှိကြောင်း သိရှိရပါသည်။

     အမေရိကန်နိုင်ငံ၌ နောက်ဆုံးအကြိမ် ဖြစ်ပွားခဲ့သော ဆယ်မိုနဲလား အဆိပ်သင့်မှုဖြစ်စဉ် တွင် ပြည်နယ် ၂၂ ခု၌ လူဦးရေ ၇၃ ဦးတို့မှာ နာမကျန်းဖြစ်ခဲ့ကြပြီး ၁၅ ဦးမှာ ဆေးရုံတက်ရောက် ကုသခဲ့ရသည်။ ၎င်းဖြစ်စဉ်သည် ကယ်လီဖိုးနီးယားပြည်နယ်ရှိ စားသောက်ကုန်ထုတ်လုပ်ငန်း တစ်ခုမှ ရောင်းချခဲ့သည့် အသင့်သုံးစွဲနိုင်သော လှီးဖြတ်ထုပ်ပိုးပြီး ကြက်သွန်နီများနှင့် ဆက်နွယ် ပေါ်ပေါက်ခဲ့ခြင်းဖြစ်သည်။ ပြီးခဲ့သော ရက်သတ္တပတ်တွင်လည်း ပြည်နယ်ပေါင်း ၃ဝ ၌ Walmart ဆိုင်များနှင့် အွန်လိုင်းတို့မှ တစ်ဆင့်ရောင်းချခဲ့သော သီဟိုဠ်စေ့များ၌ John B Sanfilippo & Son မှထုတ်လုပ်သည့် ဓာတ်မတည့်စေသော အမည်မသိနို့နှင့် အုန်းသီးပါဝင်မှုတို့ကြောင့် ဈေးကွက်အတွင်းမှ  ပြန်လည်သိမ်းဆည်းခဲ့ရကြောင်း သိရှိရပါသည်။

Source: CBS News, 19 March, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ဗီယက်နမ်နိုင်ငံမှ တရုတ်နိုင်ငံသို့ ဒူးရင်းသီး ကုန်တင်ပို့မှု အကြိမ် ၃၀ ခန့်တွင်  လေးလံသော သတ္တု (Heavy Metal) တစ်မျိုးဖြစ်သည့် ကဒ်မီယံ (Cadmium) ပါဝင်မှုသည် သတ်မှတ်ထားသော အစားအသောက် ဘေးကင်းရှင်းရေး ကန့်သတ်ချက်ထက် ကျော်လွန်နေသည့်အပေါ် တရုတ်နိုင်ငံ အကောက်ခွန်ဆိုင်ရာ အထွေထွေအုပ်ချုပ်ရေး အာဏာပိုင်အဖွဲ့ (GACC) မှ သတိပေးချက် ထုတ် ပြန်ခဲ့ကြောင်း ဗီယက်နမ် စိုက်ပျိုးရေးနှင့် ကျေးလက်ဒေသဖွံ့ဖြိုးရေးဝန်ကြီးဌာနအောက်ရှိ အပင်ကာကွယ်ရေး ဦးစီးဌာန၏ အချက်အလက်များအရ သိရသည်။

       အဆိုပါ ဗီယက်နမ်ဒူးရင်း တင်ပို့မှု၏ မူလဇစ်မြစ်ကို ခြေရာခံနိုင်ရန်အတွက် စာရွက်စာတမ်း များအား Tien Giang၊ Lang Son၊ Dong Nai၊ Dak Lak၊ Hanoi နှင့် သက်ဆိုင်ရာ အေဂျင်စီများနှင့် စီးပွားရေးလုပ်ငန်းများထံသို့ ပေးပို့ခဲ့ကြောင်း သိရှိရသည်။

     အပင်ကာကွယ်ရေးဦးစီးဌာနသည် GACC ၏ သတိပေးချက်များကို လက်ခံရရှိပြီးနောက် အစားအသောက် ဘေးကင်းရေး စည်းမျဉ်းများကို ဖောက်ဖျက်သည့် ဗီယက်နမ်ဒူးရင်းသီး တင်ပို့ သော ကုမ္ပဏီများအား အစားအစာဘေးကင်းလုံခြုံရေးကို ခြေရာခံခြင်း၊ ပြန်လည်သိမ်းဆည်း ခြင်းနှင့် ကိုင်တွယ်ဖြေရှင်းခြင်းဆိုင်ရာ စည်းမျဉ်းများကိုလိုက်နာရန် တောင်းဆိုခဲ့ကြောင်း သိရှိရ သည်။

     ကုမ္ပဏီများအနေဖြင့် အစားအသောက် ဘေးကင်းရှင်းရေး စည်းမျဉ်းများကို ဖောက်ဖျက်ရ သည့် အကြောင်းရင်းများကို ရှာဖွေဖော်ထုတ်၍လည်းကောင်း၊ ဒူးရင်းသီးစိုက်ပျိုးထုတ်လုပ်မှုမှ ရိတ်သိမ်းခူးဆွတ် တင်ပို့ရောင်းချသည်အထိ မှတ်တမ်းအားလုံးကို ပြန်လည်သုံးသပ်၍ လည်း ကောင်း၊ ကိုင်တွယ်ဖြေရှင်းဆောင်ရွက်မှု အစီအမံများအား မြှင့်တင်၍လည်းကောင်း ယင်းဆောင် ရွက်ချက်များအား ၂၀၂၄ခုနှစ်၊ ဧပြီလ ၁ ရက်နေ့မတိုင်မီ အပင်ကာကွယ်ရေးဦးစီးဌာနထံ အစီရင်ခံ တင်ပြရမည်ဖြစ်သည်။ လယ်ယာထွက်ကုန်ပစ္စည်းများ တင်ပို့မှုအပေါ် ဆိုးကျိုးသက်ရောက်မှု ရှိနိုင် သည့် အပြီးသတ်သုံးသပ်ချက်များကို တရုတ်နိုင်ငံဘက်မှ ချမှတ်ခြင်းမှ ရှောင်ကြဉ်နိုင်စေရေး အတွက် အဆိုပါတင်ပြချက်အား ဧပြီလ ၃ ရက်နေ့မတိုင်မီ ပဏာမအဖြစ် GACC သို့ တင်ပြရမည် ဖြစ်သည်။ လက်ရှိတွင် တရုတ်နိုင်ငံသည် ဗီယက်နမ်နိုင်ငံ၏ အကြီးဆုံးဒူးရင်းသီး တင်ပို့သည့် ဈေးကွက်ဖြစ်ကြောင်း သိရှိရသည်။

       ၂၀၂၃ ခုနှစ်တွင် တရုတ်နိုင်ငံအနေဖြင့် ဗီယက်နမ်မှ ဒူးရင်းသီးတန်ချိန် ၄၃၉၀၀၀ ကို ဝယ်ယူရန် အမေရိကန်ဒေါ်လာ ၂.၁ဘီလီယံသုံးစွဲခဲ့ပြီး ၂၀၂၂ခုနှစ်နှင့်နှိုင်းယှဉ်ပါက တန်ဖိုးအားဖြင့် ၁၀၃၆ ရာခိုင်နှုန်းနှင့် ပမာဏအားဖြင့် ၁၁၀၇ ရာခိုင်နှုန်း တိုးမြှင့်ခဲ့ကြောင်း သိရှိရသည်။ ၂၀၂၂ ခုနှစ် စက်တင်ဘာလမှစ၍ ဗီယက်နမ်မှ တရားဝင် ဒူးရင်းသီးတင်ပို့မှုအား ခွင့်ပြုကြောင်း တရုတ်နိုင်ငံမှ ဆုံးဖြတ်ချက်ချပြီးနောက်တွင် ဒူးရင်းသီးတင်ပို့မှုသည် မြင့်တက်လာခဲ့သည်။

     တရုတ်နိုင်ငံ၌ ဗီယက်နမ်ဒူးရင်းသီး ဈေးကွက်ဝေစုသည် ၂၀၂၂ ခုနှစ်တွင် ၅ ရာခိုင်နှုန်းမှ ၂၀၂၃ ခုနှစ်တွင် ၃၄.၆ ရာခိုင်နှုန်းအထိ မြင့်တက်လာခဲ့သည်။ တရုတ်နိုင်ငံသို့ ဒူးရင်းသီးတင်ပို့သည့် စျေးနှုန်းမှာ တစ်တန်လျှင် ပျမ်းမျှအားဖြင့် အမေရိကန်ဒေါ်လာ ၄၃၃၂.၂ ဖြစ်ကြောင်း၊  အေးခဲ ဗီယက်နမ် ဒူးရင်းသီးဈေးကွက်အား တရုတ်နိုင်ငံမှ ဖွင့်လှစ်မည်ဆိုပါက ယခုနှစ်တွင် ဒူးရင်းသီး တင်ပို့မှုသည် အမေရိကန်ဒေါ်လာ ၃ ဘီလီယံမှ ၃.၅ ဘီလီယံအထိ ‌ရောက်ရှိလာမည်ဟု မျှော်မှန်း ထားကြောင်း သိရှိရသည်။

Source: Vietnam News, 23 March 2024

    ထိုင်းနိုင်ငံတွင် လယ်ယာစိုက်ပျိုးရေးနှင့် သမဝါယမဝန်ကြီးဌာနသည် ဈေးနှုန်းမတည်ငြိမ်မှု နှင့် ကုန်ကျစရိတ်များ မြင့်တက်လာမှုကြောင့် ဆင်းရဲနွမ်းပါးမှု ကြုံတွေ့နေရသည့် တောင်သူ ၄.၆၈ သန်းအတွက် ဓာတ်မြေသြဇာများ ဝယ်ယူရန် ဘတ်ငွေ ၃၃.၅၃ ဘီလီယံ တောင်းခံသွားမည် ဖြစ်သည်။

    တင်သွင်းလာသော ဓာတုဓာတ်မြေဩဇာနှင့် ပိုးသတ်ဆေးများ၏ ကုန်ကျစရိတ်သည် ဆင်းရဲသည့် တောင်သူများအား ဝန်ထုပ်ဝန်ပိုးဖြစ်စေကြောင်း စိုက်ပျိုးရေးနှင့် သမဝါယမဝန်ကြီး Thamanat Prompow က ၂၅-၃-၂၀၂၄ ရက်၊ တနင်္လာနေ့တွင် ပြောကြားခဲ့သည်။ ရည်ရွယ်ထား သည့် လယ်သမားများအနက် ၄.၄၈ သန်းသည် လယ်ယာလုပ်ငန်းအတွက် စီးပွားဖြစ် စိုက်ပျိုးထုတ် လုပ်မှုနည်းလမ်းများကို အသုံးပြုကြပြီး တောင်သူဦးရေ ၂၀၀,၀၀၀ သည် အော်ဂဲနစ်ဆန်စပါးကို စိုက်ပျိုးကြခြင်းဖြစ်ကြောင်း ဝန်ကြီးဌာန၏ အချက်အလက်များအရ သိရသည်။

    စိုက်ပျိုးစရိတ်လျှော့ချရန်နှင့် သီးနှံအထွက်နှုန်းကို စဉ်ဆက်မပြတ်မြှင့်တင်ရန် ရည်ရွယ် ဆောင်ရွက်သည့် အစီအစဉ်သစ်အရ ဝန်ကြီးဌာနသည် ယခုနှစ်၌ စပါးစိုက်ပျိုးသော အိမ်ထောင်စု တိုင်းအတွက် စိုက်ဧရိယာ ၁ ရိုင် (၀.၃၉၅၄ ဧက) လျှင် မြေသြဇာ ၅၀ ကီလိုဂရမ် နှုန်းဖြင့် အများဆုံး ပမာဏ ရိုင် ၂၀ သို့မဟုတ် ဓာတ်မြေဩဇာ ၁ တန်အထိ ထောက်ပံ့ပေးမည်ဖြစ်ကြောင်း ဝန်ကြီး Thamanat က ပြောကြားခဲ့သည်။

    ဤအစီအစဥ်သည် လယ်သမားများ၏ ဘဏ္ဍာရေး ဝန်ထုပ်ဝန်ပိုးကို လျော့ပါးစေသည့် အပြင် လက်ရှိကာလ၌ လယ်သမားများသို့ စပါးစိုက်ဧရိယာ ၁ ရိုင်လျှင် ဘတ် ၁၀၀၀ နှုန်းဖြင့်  အများဆုံး ရိုင် ၂၀ သို့မဟုတ် ဘတ် ၂၀၀၀၀ အထိ ထောက်ပံ့ပေးမှုအတွက် အစိုးရက ၁ နှစ်လျှင် ဘတ်ငွေ ၅၄.၃၀ ဘီလီယံ သုံးစွဲနေရမှုအပေါ် ဘတ်ငွေ ၂၀.၇၇ ဘီလီယံကို လျှော့ချနိုင်မည်ဖြစ် ကြောင်း၊ အမျိုးသား ဆန်စပါးမူဝါဒနှင့် စီမံခန့်ခွဲရေးကော်မတီမှတစ်ဆင့် အစိုးရအဖွဲ့ထံသို့ အစီ အစဉ် အဆိုပြုလွှာ မတင်ပြမီ ဆန်စပါးဦးစီးဌာနသည်  စာရင်းအင်းအချက်အလက်များကို ပြင်ဆင် ဆောင်ရွက်လျက်ရှိကြောင်း သိရှိရသည်။

Source: Nation Thailand, 25 March 2024

      ဘင်္ဂလားဒေ့ရှ် စားနပ်ရိက္ခာဝန်ကြီးဌာနသည် ပုဂ္ဂလိကကဏ္ဍမှ ဆန်တန်ချိန် ၈၃၀၀၀ ကို တင်သွင်းရန်အတွက် ကုမ္ပဏီ ၃၀ ခုသို့ သွင်းကုန်လိုင်စင်ခွင့်ပြုမည့် အမိန့်ကြော်ငြာစာတစ်စောင် ကို ၂၁-၃-၂၀၂၄ နေ့တွင် ထုတ်ပြန်ခဲ့ကြောင်း သိရှိရပါသည်။

       အဆိုပါ ထုတ်ပြန်ချက်၌ ပေါင်းဆန်တန်ချိန် ၄၉၀၀၀ နှင့် ဘာစမာတီမဟုတ်သော ဆန်ဖြူ တန်ချိန် ၃၄၀၀၀ တို့ကို ဧပြီလ ၂၅ ရက်နေ့ ဘင်္ဂလားဒေ့ရှ် ဆိပ်ကမ်းသို့အရောက် တင်သွင်းခွင့်ပြု မည်ဖြစ်ကြောင်း၊ ဈေးကွက်တွင် ရောင်းချရန်အတွက် အိတ်ဖြင့် အသင့်ထုပ်ပိုးထားပြီးဖြစ်သည့် ဆန်များကိုသာ တင်သွင်းရမည်ဖြစ်ပြီး ပြည်တွင်း၌ ကိုယ်ပိုင်အမည်ဖြင့် ပြန်လည်ထုပ်ပိုး ရောင်းချ ခွင့်မပြုကြောင်း ဖော်ပြထားသည်။

      ကောက်သစ်ရိတ်သိမ်းမှုကာလ ပြီးဆုံးမည့်အချိန်မတိုင်မီ၌ ဆန်စပါးဈေးနှုန်းများ မြင့်တက် လာမှုအရ ပုဂ္ဂလိကကဏ္ဍမှ ဆန်တင်သွင်းမှုအပေါ် ကောက်ခံသည့်အခွန်များကို ဖေဖော်ဝါရီလ ၈ ရက်နေ့တွင် ဘင်္ဂလားဒေ့ရှ်အစိုးရက လျှော့ချပေးခဲ့သည်။ ဆန်တင်သွင်းမှုအပေါ် ကောက်ခံသည့် အကောက်ခွန်ကို ၂၅% မှ သုညရာခိုင်နှုန်းသို့လည်းကောင်း၊ ကြီးကြပ်မှုအခွန်အခကို ၂၅% မှ ၅% သို့လည်းကောင်း အမျိုးသားအခွန်ကြီးကြပ်မှုအဖွဲ့က လျှော့ချခဲ့ခြင်းဖြစ်ပြီး ၂၀၂၄ ခုနှစ် မေလ ၁၅ ရက်နေ့အထိ သက်ရောက်မှုရှိမည်ဖြစ်သည်။ ထိုသို့ အခွန်နှုန်းများ လျှော့ချခဲ့သော်လည်း ဆန်တင် သွင်းသူများအနေဖြင့် အခြားအခကြေးငွေများ အပါအဝင် အခွန်အခ ၁၅% ခန့် ပေးဆောင်ရဦးမည် ဖြစ်သည်။

      ကမ္ဘာ့စားနပ်ရိက္ခာအဖွဲ့ (FAO) ၏ အချက်အလက်များအရ ကမ္ဘာ့ဆန်ဈေးနှုန်းများမှာ ၁၁ နှစ်တာအတွင်း အမြင့်ဆုံးအခြေအနေသို့ ရောက်ရှိနေချိန်၌ ပုဂ္ဂလိကကဏ္ဍမှ ဆန်တင်သွင်းရန် ဘင်္ဂလားဒေ့ရှ်အစိုးရက ခွင့်ပြုခဲ့ခြင်းဖြစ်သည်။

      ဘင်္ဂလားဒေ့ရှ်နိုင်ငံ၏ ဆန်တင်သွင်းမှု အဓိက အရင်းအမြစ်တစ်ခုဖြစ်သော အိမ်နီးချင်း အိန္ဒိယနိုင်ငံ၌ ဘာစမာတီမဟုတ်သောဆန်များ တင်ပို့ခွင့်ကို တားမြစ်ပိတ်ပင်ထားပြီး ပေါင်းဆန် တင်ပို့မှုအပေါ်၌လည်း အခွန် ၂၀% ကောက်ခံလျက်ရှိသည်။ အိန္ဒိယ၏ ဆန်ပို့ကုန်ဆိုင်ရာ တားမြစ် ကန့်သတ်ချက်များက လွန်ခဲ့သော ၁၅ လတာအတွင်း ဆန်ဈေးနှုန်းများကို ၂၂% မှ ၂၅% အကြား မြင့်တက်လာစေကြောင်း၊ လက်ရှိအချိန်၌ အိန္ဒိယနိုင်ငံမှ တင်သွင်းပါက ဆန်ကြမ်း ၁ ကီလိုဂရမ်၏ ဈေးနှုန်းသည် တာကာငွေ ၆၅ နှုန်းအောက် လျော့နည်းမည်မဟုတ်ကြောင်း၊ အကယ်၍ သွင်းကုန် လုပ်ငန်းရှင်များသည် အရည်အသွေးကောင်းမွန်ပြီး ဈေးနှုန်းမြင့်မားသည့် ဆန်အမျိုးအစားများကို တင်သွင်းပါက ပြည်တွင်းဈေးကွက်ကို သက်ရောက်ထိခိုက်မှုရှိလာနိုင်ကြောင်းဖြင့် လယ်ယာစီးပွား ရေးရာ ပါမောက္ခ Dr Rashidul Hasan က The Financial Express သတင်းဌာနသို့  ပြောကြား ခဲ့သည်။

      ဘင်္ဂလားဒေ့ရှ် လယ်ယာစိုက်ပျိုးရေး ဈေးကွက်မြှင့်တင်မှု ဦးစီးဌာန၏ ရပ်ကွက်၊ ကျေးရွာ နှင့် မြို့နယ်များအလိုက် စာရင်းကောက်ယူမှု အချက်အလက်များအရ နိုင်ငံတစ်ဝန်းတွင် အတန်း အစားအလိုက် ဆန် ၁ ကီလိုဂရမ်လျှင် ဆန်ကြမ်းကို တာကာငွေ ၄၄ မှ ၅၅ အကြား၊ အလယ် အလတ်တန်းအဆင့် ဆန်အား တာကာငွေ ၅၅ မှ ၆၅ အကြားနှင့် ဆန်ချောကို တာကာငွေ ၆၅ မှ ၉၅ အကြား နှုန်းထားများဖြင့် လက်လီရောင်းချမှုရှိကြောင်း သိရှိရသည်။

Source: The Financial Express, 21 Mar 2024

     ကမ္ဘာ့စီးပွားရေး ပြန်လည်နာလန်ထူလာနိုင်မှုနှင့် အရည်အသွေး မြင့်မားသော ဆန်များကို ပိုမိုဦးစားပေးလာမှုတို့ကြောင့် ထိုင်းနိုင်ငံသည် ဟောင်ကောင်နှင့် တရုတ်နိုင်ငံသို့ထံ ဆန်တင်ပို့မှု ယခုနှစ်တွင် မြင့်တက်လာနိုင်ရန် မျှော်လင့်လျက်ရှိသည်။ ထို့အပြင် ထိုင်းနိုင်ငံသည် တရုတ်နိုင်ငံ ရှန်ဇန်မြို့တွင် ဆန်ဖြန့်ဖြူးရေးစင်တာ ထူထောင်ရန် အလိုရှိလျက်ရှိပါသည်။ ဟောင်ကောင် ဆန်ကုန်သည်အသင်း ဥက္ကဌ၊ China Mercbents Godown, Wharf & Transportation Company မှ အလုပ်အမှုဆောင်အဖွဲ့ဝင်တို့နှင့် ပြုလုပ်ခဲ့သည့် အစည်းအဝေးအပြီးတွင် ထိုင်းနိုင်ငံ စီးပွားရေးနှင့်ကူးသန်းရောင်းဝယ်ရေးဝန်ကြီးက ထိုင်းနိုင်ငံတွင် ဆန်ဝယ်ယူမည့် ဖောက်သည် အုပ်စုအားလုံးအတွက် ဆန်များ၏ အရည်အသွေးကို ပိုမိုကောင်းမွန်အောင်ဖန်တီးမည့် မူဝါဒရှိနေ ပြီး ထိုင်းဆန်သည် ကမ္ဘာ့ဈေးကွက်တွင် ယှဉ်ပြိုင်နိုင်မည့် ထိန်းသိမ်းနည်းအဆင့်အတန်းလည်း ရှိနေကြောင်း ပြောကြားခဲ့ပါသည်။ ဟောင်ကောင်သည် ယခုနှစ်တွင် ထိုင်းနိုင်ငံမှ စံပါယ်ဆန်မွှေးတန်ချိန် ၁၈၀၀၀၀ ဝယ်ယူရန်စီစဉ်ထားပြီး လွန်ခဲ့သည့် နှစ်ကထက် တန်ချိန် ၃၀၀၀၀ တိုးမြှင့်ဝယ်ယူမည်ဖြစ်ကြောင်းသိရပါသည်။ မတ်လ ၈ ရက်နေ့နှင့် ၉ ရက်နေ့တို့တွင် ထိုင်းနိုင်ငံစီးပွားရေးနှင့်ကူးသန်းရောင်းဝယ်ရေးဝန်ကြီးသည် ထိုင်းစံပါယ်ဆန်မွှေးတင်သွင်းသူများ နှင့် တွေ့ဆုံခဲ့ပြီး ရှန်ဇန်မြို့တွင် ဖြန့်ဖြူးရေးစင်တာ တည်ထောင်ရန် စိတ်ဝင်စားမှု ပြသခဲ့ပါသည်။ ထိုင်းနိုင်ငံစီးပွားရေးနှင့်ကူးသန်းရောင်းဝယ်ရေးဝန်ကြီးဌာနကလည်း စင်တာအတွက် မြေငှားရမ်း ရန်ကိစ္စနှင့် ပတ်သက်ပြီး တရုတ်နိုင်ငံအစိုးရနှင့် ဆွေးနွေးပေးသွားရန် အသင့်ဖြစ်နေပါသည်။

     ဟောင်ကောင်သည် ထိုင်းနိုင်ငံအတွက် အမေရိကန်နှင့် တရုတ်နိုင်ငံပြီးနောက် တတိယမြောက်အကြီးမားဆုံး ထိုင်းစံပါယ်ဆန်မွှေးတင်သွင်းသူဖြစ်ပါသည်။ ထိုင်းနိုင်ငံအစိုးရသည် ၂၀၂၄ ခုနှစ်တွင် ဆန်တန်ချိန် ၇.၅ သန်းတင်ပို့ရန် စီစဉ်လျက်ရှိကြောင်း သိရပါသည်။

Source : Bangkok Post

DOCA(ရန်ကုန်)