ပြည်ပကုန်သွယ်မှုသတင်းများ

     ဖိလစ်ပိုင်နိုင်ငံ၏ ဆန်လက်ကျန်မှာ ယခုနှစ် ဧပြီလ ၁ ရက်နေ့တွင် မက်ထရစ်တန်ချိန် ၁.၆၄ သန်းရှိပြီး ယခင်နှစ် ကာလတူရှိ လက်ကျန်တန်ချိန် ၁.၈၄ သန်းနှင့် နှိုင်းယှဉ်ပါက ၁၀.၉% ကျဆင်းခဲ့ကြောင်း ဖိလစ်ပိုင် စာရင်းအင်းအာဏာပိုင်အဖွဲ့မှ ၈-၅-၂၀၂၄ နေ့ သတင်းထုတ်ပြန်ချက် အရ သိရသည်။ လအလိုက် နှိုင်းယှဉ်ရာတွင်မူ အဆိုပါပမာဏသည် ယခင်လရှိ ဆန်လက်ကျန် တန်ချိန် ၁.၃၇ သန်းထက် ၂၀.၂% မြင့်တက်လာခဲ့သည်။

      အမျိုးသားစားနပ်ရိက္ခာအာဏာပိုင်အဖွဲ့ (NFA) လက်ဝယ်၌ ဆန်တန်ချိန် ၄၁၅၆၀ တန်ရှိရာ ယခင်နှစ် ကာလတူ၌ သိုလှောင်ထားရှိခဲ့သော ဆန်တန်ချိန် ၉၉၀၃၀ တန်အပေါ် ၅၈% ကျဆင်းခဲ့ သည်။ သို့သော်လည်း မတ်လရှိ မက်ထရစ်တန်ချိန်  ၄၁၂၉၀ နှင့် နှိုင်းယှဉ်လျှင် ၀.၇% မြင့်တက် လာခဲ့သည်။

    ကုန်သွယ်ရောင်းဝယ်မှုကဏ္ဍတွင် သိုလှောင်ထားရှိသော ဆန်လက်ကျန်သည် ယခင်နှစ် ကာလတူ၌ ၇၂၈၇၃၀ တန်ရှိရာမှ ယခုနှစ် ဧပြီလတွင် ၆၆၂၆၀၀ တန်သာရှိသဖြင့် ၉.၁% ကျဆင်း ခဲ့ကြောင်း၊ သို့သော် မတ်လရှိလက်ကျန် ၆၃၀၂၉၀ တန်ထက် ၅.၁% တိုးတက်ခဲ့ကြောင်း သိရှိရ သည်။

     အိမ်ထောင်စုများ လက်ဝယ်တွင်လည်း ယခုနှစ် ဧပြီလ၌ ဆန်လက်ကျန် ၉၃၈၀၁၀ တန် ရှိသဖြင့်  ယခင်နှစ် ကာလတူရှိ ဆန်တန်ချိန် ၁.၀၁ သန်းနှင့် နှိုင်းယှဉ်ပါက ၇.၆% လျော့နည်းခဲ့ သည်။

    အယ်လ်နီညိုရာသီဥတု အားပျော့လာခြင်းကြောင့် နောက်လများတွင် ဆန်စပါးထွက်ရှိမှု ပြန်လည်ကောင်းမွန်လာနိုင်ပြီး နိုင်ငံတကာဈေးကွက်၌ စျေးသက်သာသောဆန်များ ဝင်ရောက် လာမှုအရ ဆန်ဈေးနှုန်းများ ကျဆင်းနိုင်သည်ဟု ခန့်မှန်းထားကြောင်း ဖိလစ်ပိုင် စိုက်ပျိုးရေးဦးစီး ဌာနက ပြီးခဲ့သည့် သီတင်းပတ်တွင် ပြောကြားခဲ့သည်။ ထို့အပြင် အမျိုးသား စားနပ်ရိက္ခာ အာဏာ ပိုင်အဖွဲ့သို့ ဆန်တင်သွင်းဖြန့်ဖြူးသည့်လုပ်ငန်း လုပ်ပိုင်ခွင့်ကို ပြန်လည်အပ်နှင်းရန် ဖိလစ်ပိုင် စိုက်ပျိုးရေးဦးစီးဌာနက လွှတ်တော်သို့ တိုက်တွန်းထားသည်။

     စိုက်ပျိုးရေးဦးစီးဌာန၏ အတည်ပြုချက်ဖြင့်သာ ဆန်တင်သွင်းခွင့်ပြုပါက စားနပ်ရိက္ခာ အာဏာပိုင်အဖွဲ့သည် စျေးနှုန်းတည်ငြိမ်မှုကို ထိန်းညှိပေးမည့် အေဂျင်စီတစ်ရပ် ဖြစ်လာမည်ဟု စိုက်ပျိုးရေးအတွင်းဝန် Francisco Tiu Laurel Jr. က ပြောကြားခဲ့သည်။

Source: Manila Times, 11 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     အိန္ဒိယနိုင်ငံတွင် ဆန်ကုန်လက်ကျန် များပြားပိုလျှံမှုရှိပြီး မိုးရွာသွန်းမှု ပုံမှန်ထက်ပိုမိုမည့် မုတ်သုံရာသီဥတု ခန့်မှန်းချက်အရ မိုးသီးနှံရာသီ၌ စပါးစိုက်ပျိုးထုတ်လုပ်မှုကို တိုးတက်စေဖွယ်ရှိ သဖြင့် အစိုးရအနေဖြင့် ယခင်နှစ်၌ ချမှတ်ခဲ့သော ဆန်တင်ပို့မှု ကန့်သတ်ချက်များကို ဖြေလျှော့ ဆောင်ရွက်သွားရန် လိုအပ်မည်ဖြစ်ကြောင်း အရာထမ်းတစ်ဦးက ပြောကြားခဲ့ပါသည်။

   မုတ်သုံမိုးသည် ကီရာလာပြည်နယ် ကမ်းခြေသို့ ရှေ့လာမည့်လတွင် စတင်ဝင်ရောက်မှုနှင့် အတူ စုစုပေါင်းစပါးထွက်ရှိမှု၏ ၈ဝ% ကို စိုက်ပျိုးထုတ်လုပ်သော မိုးစပါးကို ဇွန်လနှင့် ဇူလိုင်လများ တွင် အိန္ဒိယနိုင်ငံတစ်ဝန်း၌ စိုက်ပျိုးသွားမည်ဖြစ်ကြောင်း သိရှိရပါသည်။

    ယခုနှစ် ဇွန်လမှ စက်တင်ဘာလအတွင်း မိုးရွာသွန်းမှုမှာ ပုံမှန်အထက်တွင်ရှိနိုင်ပြီး  မိုးရွာ သွန်းမှု ဖြစ်ပေါ်နိုင်ခြေ၏ ၉ဝ% ခန့်မှာ ပုံမှန်အဆင့်မှ ပိုမိုသည့်အဆင့်တို့ အကြားတွင်ရှိနိုင်ကြောင်း အိန္ဒိယမိုးလေဝသဌာနက ဧပြီလ၌ ခန့်မှန်းထားခဲ့ပါသည်။ ယခင်နှစ်တွင် မိုးရွာသွန်းမှုမှာ နေရာ ကွက်ကျား ရွာသွန်းခဲ့ပြီး ပုံမှန်ထက်လျော့နည်းခဲ့သဖြင့် စပါးထွက်ရှိမှုကို ထိခိုက်ခဲ့ပါသည်။

    မတ်လအတွင်း ဆန်လက်လီဈေးနှုန်းများမှာ နှစ်အလိုက် ၁၂.၆၉% မြင့်တက်ခဲ့သော်လည်း မြင့်မားသည့် အခြေပြုသက်ရောက်ချက်ရှိမှုအရ လာမည့်လအနည်းငယ်အတွင်း ဆန်ဈေးနှုန်းများ ဖောင်းပွမှုမှာ လျော့ပါးသက်သာဖွယ်ရှိပါသည်။ ဆန်ဈေးနှုန်းများ ဖောင်းပွမှုသည် ၂ဝ၂၂ ခုနှစ် အောက်တိုဘာလ ကတည်းမှစတင်၍ ကိန်းဂဏန်း ၂ ခုအဆင့်အထိ ဖြစ်ပေါ်နေခဲ့ပါသည်။

    လက်ရှိအရန်ဆန်ဝယ်ယူရေးကာလ (အောက်တိုဘာလ - စက်တင်ဘာလ) အတွင်း ဝယ်ယူရရှိသော ပမာဏသည် ယခင်နှစ် အလားတူကာလနှင့် နှိုင်းယှဉ်ပါက ၇% လျော့နည်းလျက်ရှိသော်လည်း အိန္ဒိယစားနပ်ရိက္ခာကော်ပိုရေးရှင်းသည် ဇူလိုင်လ ၁ ရက်နေ့အထိ ကာလအတွက် ထားရှိရန် လိုအပ်သောပမာဏ တန်ချိန် ၁၃.၅၄ သန်းထက် ၄ ဆခန့်ပိုမိုလျက် အရန်ဆန်တန်ချိန် ၅၃.၁၉ သန်းကို သိုလှောင်ထားပြီးဖြစ်သည်။ ၎င်းပမာဏအနက် ဆန်တန်ချိန် ၃၁.၈၁ သန်းကို လက်ဝယ် ထားရှိပြီး ကျန်တန်ချိန် ၂၁.၃၈ သန်းကို ဆန်စက်လုပ်ငန်းရှင်များထံမှ ရရှိမည်ဖြစ်ပါသည်။ အိန္ဒိယ စားနပ်ရိက္ခာကော်ပိုရေးရှင်းသည် Bharat ဆန်ကို ရောင်းချရန်အတွက် NAFED ၊ NCCF နှင့် Kendriya Bhandar စသည့် အဖွဲ့အစည်းများထံမှ ဆန်တန်ချိန် ၁.၅ သန်း အတွက် ဝယ်ယူမှု အမှာစာများကို လက်ခံရရှိထားသည်။ အဆိုပါအဖွဲ့အစည်းများသည် ဆန်တန်ချိန် ဝ.၇၁ သန်းကို လက်လီအရောင်းဆိုင်များသို့ ရောင်းချဖြန့်ဖြူးသွားမည်ဖြစ်ပါသည်။ 

     အိန္ဒိယအစိုးရသည် ယခင်နှစ်၌ ဆန်ဖြူတင်ပို့မှုကို တားမြစ်ပိတ်ပင်ခဲ့ပြီး ဆန်ဈေးနှုန်းများ မှာ ဆက်လက်မြင့်မားနေသဖြင့် ပြည်တွင်းရောင်းလိုအားတိုးတက်စေရန် ပေါင်းဆန်တင်ပို့မှု အပေါ် အခွန် ၂ဝ% ကောက်ခံခဲ့ပါသည်။ သို့သော် အိန္ဒိယအစိုးရသည် နိုင်ငံအချို့၏ တောင်းဆိုမှု အရ စားနပ်ရိက္ခာဖူလုံရေးအတွက် လိုအပ်ချက်ပြည့်မီစေရန် ဆန်တင်ပို့မှုကို  အခါအားလျော်စွာ ခွင့်ပြုပေးခဲ့ပါသည်။ ရနံ့မွှေးပျံ့သောဘာစမာတီဆန်၏ လက်ရှိ အနိမ့်ဆုံးပို့ကုန်ဈေးနှုန်း သတ်မှတ် ချက်မှာ ၁ တန်လျှင် ဒေါ်လာ ၉၅ဝ ဖြစ်ပါသည်။ ၂ဝ၂၂-၂၃ ဘဏ္ဍာနှစ်အတွင်း အိန္ဒိယနိုင်ငံသည် နိုင်ငံပေါင်း ၁ဝဝ ကျော်သို့ ဆန်တန်ချိန် ၂၂ သန်းကို စံချိန်တင် တင်ပို့ခဲ့ပြီး ယခင်ဘဏ္ဍာနှစ်တွင် ဆန်တင်ပို့မှုအပေါ် ကန့်သတ်ခဲ့သဖြင့် ဆန်တင်ပို့မှုပမာဏမှာ တန်ချိန် ၁၆ သန်းသို့ လျော့နည်း ကျဆင်းခဲ့ပါသည်။

     အိန္ဒိယနိုင်ငံသည် ၂ဝ၁၂ ခုနှစ်ကတည်းက ကမ္ဘာ့အကြီးမားဆုံး ဆန်တင်ပို့သည့်နိုင်ငံ ဖြစ်ခဲ့ပြီး တန်ချိန် ၅၂ သန်းမှ ၅၄ သန်းအထိရှိသော နှစ်စဉ်ကမ္ဘာ့ဆန်ကုန်သွယ်မှုတွင် ဝေစု ၄ဝ% ကျော် ပါဝင်ခဲ့ပါသည်။ လက်ရှိ ဝယ်ယူရေးရာသီဖြစ်သော ၂ဝ၂၃-၂၄ ခုနှစ် (အောက်တိုဘာ-စက်တင်ဘာ) အတွင်း အစိုးရအေဂျင်စီများ၏ စပါးဝယ်ယူမှုမှာ တန်ချိန် ၆၈.၅၉ သန်း (ညီမျှသည့် ဆန်တန်ချိန် ၄၅.၉၅ သန်း) ရှိပြီး ယခင်ဘဏ္ဍာနှစ် အလားတူကာလထက် ၇% လျော့နည်းခဲ့ပါသည်။

     အစိုးရ၏ ဝယ်ယူရေးအေဂျင်စီများသည် ဆောင်းသီးနှံများအား ဈေးကွက်တင်ရောင်းချသည့် ရာသီကာလအတွင်း ဩဒိသျှ၊ တဲလန်ဂါနာ၊ တမီနာဒူနှင့် အန္တရာပရာဒေ့ရှ် ပြည်နယ်များမှ အရန်ဆန် တန်ချိန် ၁၀ သန်းကို ဝယ်ယူရန် လျာထား ဆောင်ရွက်လျက်ရှိရာ အရန်ဆန်သိုလှောင်မှု လက်ကျန် ပိုမိုများပြားလာမည်ဟု ခန့်မှန်းရပါသည်။ အိန္ဒိယအစိုးရသည် ၂ဝ၂၂-၂၃ ရာသီကာလတွင် ဆန်တန်ချိန် ၅၆.၈၇ သန်းကို ဝယ်ယူခဲ့ပါသည်။ အိန္ဒိယစားနပ်ရိက္ခာကော်ပိုရေးရှင်းအနေဖြင့် ဆန်ထောက်ပံ့မှု အစီအစဉ်အရ  အကျိုးခံစားခွင့်ရှိသည့် လူဦးရေ သန်း ၈၀၀ သို့ ဖြန့်ဝေပေးရန်အတွက်  နှစ်စဉ်ဆန်တန်ချိန် ၄ဝ သန်းကို စုဆောင်းရန် လိုအပ်လျက်ရှိပါသည်။

Source: Financial Express, May 13, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    အိန္ဒိယနိုင်ငံတွင် လာမည့်မိုးသီးနှံရာသီ၌ စိုက်ပျိုးထုတ်လုပ်မှုမှ ထွက်ရှိမည့် ပဲစင်းငုံ၊ မတ်ပဲနှင့် ကြက်သွန်နီတို့ကို အရန်ရိက္ခာထားရှိရေး ဝယ်ယူရန်အတွက် တောင်သူများအနေဖြင့် စားသုံးသူရေးရာဝန်ကြီးဌာန၏ အချက်အလက်စင်္ကြန်တွင် ကြိုတင်မှတ်ပုံရန် အစိုးရဝယ်ယူရေးအေဂျင်စီ များဖြစ်သော အမျိုးသားလယ်ယာထွက်ကုန် သမဝါယမဈေးကွက် အသင်းချုပ် (NAFED) နှင့် အမျိုးသား စားသုံးသူ သမဝါယမအသင်းချုပ် (NCCF) တို့က တွန်းအားပေးဆောင်ရွက်လျက်ရှိ ကြောင်း သိရှိရသည်။

    အစိုးရအရာရှိများ၏ ပြောဆိုချက်အရ တောင်သူများ၏ ကြိုတင်မှတ်ပုံတင် စာရင်းပေးမှုမှတစ်ဆင့် ဝယ်ယူရရှိနိုင်မည့် သီးနှံပမာဏကို အကဲဖြတ်ချင့်ချိန်လျက် ပဲမျိုးစုံနှင့် ကြက်သွန်နီတို့၏ သိုလှောင်မှု၊ ဖြန့်ဖြူးမှု စသည့် ထောက်ပံ့ပို့ဆောင်ရေး အစီအမံများကို အစိုးရ‌အေဂျင်စီများက လုပ်ဆောင်နိုင်မည်ဖြစ်ကြောင်း၊ အစိုးရ၏ အချက်အလက်စင်္ကြန်၌ မှတ်ပုံတင်ထားသော်လည်း အစိုးရက ကမ်းလှမ်းသည့် ဈေးနှုန်းထက် ပုဂ္ဂလိကကုန်သည်များ၏ ဈေးနှုန်းက ပိုမိုမြင့်မားမှုရှိပါက တောင်သူများအနေဖြင့် ၎င်းတို့၏ ထုတ်ကုန်များကို လွတ်လပ်စွာ ရောင်းချနိုင်ခွင့်ရှိမည်ဖြစ် ကြောင်း Financial Express သတင်းဌာနက ဖော်ပြပါသည်။

      ပဲစင်းငုံ ဝယ်ယူရေးကို သမားရိုးကျ ဆောင်ရွက်လေ့မရှိသော ဘီဟာ၊ ဥတာပရာဒေ့ရှ်နှင့် ဂျားခန် ပြည်နယ်များ၌  လာမည့်မိုးသီးနှံ စိုက်ပျိုးထုတ်လုပ်မှုမှ ဝယ်ယူရရှိနိုင်ရေးအတွက် လိုအပ် သော အခြေခံအဆောက်အအုံများကို ထူထောင်ဆောင်ရွက်လျက်ရှိကြောင်း အစိုးရအရာရှိတစ်ဦး က ပြောဆိုခဲ့သည်။ အနိမ့်ဆုံး အခြေခံရည်ညွှန်းဈေးနှုန်းဖြင့် တောင်သူများ၏ ကုန်စည်များအား ရောင်းချနိုင်မှု သေချာခိုင်မာစေရေး ရည်ရွယ်ဆောင်ရွက်သော ဈေးနှုန်းထောက်ပံ့မှု အစီအစဉ် အောက်၌ NAFED နှင့် NCCF တို့သည် ရာဂျပ်စတန်၊ မဒ္ဒရာပရာဒေ့ရှ်၊ ကာနာတကာနှင့် မဟာရဋ္ဌ ပြည်နယ်များရှိ တောင်သူများထံမှသာ ပဲမျိုးစုံဝယ်ယူခြင်းကို အဓိက ဆောင်ရွက်လေ့ရှိသည်။

     အရန်ကြက်သွန်နီ ဝယ်ယူခြင်းကိုမူ မဟာရဋ္ဌပြည်နယ်၌သာ အဓိကထား လုပ်ဆောင်ခြင်း ဖြစ်သည်။ အိန္ဒိယအစိုးရသည် လက်ရှိဘဏ္ဍာနှစ်အတွင်း ကြက်သွန်နီ တန်ချိန် ၅ သိန်း ဝယ်ယူ၍ အရန်ရိက္ခာထားရှိရန် လျာထားပြီး ကြက်သွန်နီ ၁ ကီလိုဂရမ်လျှင် ၁၇ ရူပီးမှ ၂၀ ရူပီးအတွင်းရှိ သောဈေးနှုန်းဖြင့် တောင်သူများထံမှ ဝယ်ယူခြင်းကို NCCF အသင်းချုပ်က လုပ်ကိုင်လျက်ရှိသည်။

Source: Financial Express, 16 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

          ယခုနှစ်၏ ပထမလေးလတာကာလတွင် ကမ္ဘောဒီးယားနိုင်ငံသည် အမေရိကန်ဒေါ်လာသန်း (၁၇၀) ပမာဏရှိသည့် ဆန်တန်ချိန် ၂၄၈၄၉၁တန်ကို ပြည်ပသို့တင်ပို့ခဲ့ကြောင်း ကမ္ဘောဒီးယားနိုင်ငံဆန်စပါးအသင်းအဖွဲ့ချုပ်၏ (၈-၅-၂၀၂၄) ရက်နေ့က ထုတ်ပြန်ခဲ့သည့် အစီရင်ခံစာအရသိရပါသည်။ ကမ္ဘောဒီးယားနိုင်ငံသည် ဧပြီလတစ်လတည်းတွင် ဆန်တန်ချိန် ၈၂၄၉၁တန်တင်ပို့ခဲ့ခြင်းမှ အမေရိကန်ဒေါ်လာ ၄၆.၆သန်းရရှိခဲ့ပါသည်။ တရုတ်နိုင်ငံသည် ကမ္ဘောဒီးယားနိုင်ငံ၏ အကြီးမားဆုံးဆန်တင်သွင်းသည့် နိုင်ငံဖြစ်ပြီး ယခုနှစ်၏ ပထမလေးလတွင် အမေရိကန်ဒေါ်လာ ၄၂.၂၈သန်းတန်ဖိုးရှိသည့် ဆန်တန်ချိန် ၆၇၄၅၇တန်ဝယ်ယူခဲ့ကြောင်းသိရပါသည်။ ထို့ပြင် ကမ္ဘောဒီးယားနိုင်ငံသည် ဆန်တန်ချိန် ၁၀၅၇၉၉တန်ကို ဥရောပရှိ နိုင်ငံ ၂၆နိုင်ငံကိုတင်ပို့ခဲ့ပြီး ၅၇၇၆၆တန်ကို အာဆီယံဒေသရှိနိုင်ငံ ၇နိုင်ငံနှင့် ၂၁၄၆၉တန်ကို အခြားဒေသများသို့ တင်ပို့ခဲ့သည်ဟုသိရပါသည်။ တင်ပို့ခဲ့သည့် ဆန်များထဲတွင် ဆန်မွှေး၊ ဆန်ဖြူ၊ ပေါင်းဆန်နှင့် အော်ဂဲနစ်ဆန်များပါဝင်ပြီး ဆန်မွှေးတင်ပို့မှုမှ စုစုပေါင်းဆန်တင်ပို့မှု၏ ၇၃ရာခိုင်နှုန်းရှိကြောင်းသိရပါသည်။ နှစ်စဉ်နှစ်တိုင်း ကမ္ဘောဒီးယားနိုင်ငံသည် မကြိတ်ခွဲရသေးသည့် ရိတ်သိမ်းပြီးသော စပါးတန်ချိန် ၁၂သန်းနှင့် ကြိတ်ခွဲပြီးသောဆန် ၇သန်းထုတ်လုပ်လျက်ရှိပြီး ပြည်တွင်းလိုအပ်ချက်၏ ၅၀ရာခိုင်နှုန်းပိုမိုကြောင်း ကမ္ဘောဒီးယားနိုင်ငံ၊ စိုက်ပျိုးရေး၊ သစ်တောနှင့် ငါးမွေးမြူရေးဝန်ကြီးဌာန၏ ပြည်ထောင်စုအတွင်းရေးမှူးက ပြောကြားခဲ့ပါသည်။ ထို့ပြင် ကျွန်ုပ်တို့၏ အနာဂတ်ရည်မှန်းချက်မှာ အစားအစာများဖူလုံစိတ်ချရမှုရှိရေးနှင့် လယ်သမားများကို ပံ့ပိုးပေးနိုင်ရန်အပြင် တည်ငြိမ်သေစီးပွားရေးနှင့် ပတ်ဝန်းကျင်ကိုဖန်တီးရန်ဖြစ်ကြောင်း ကမ္ဘောဒီးယားဆန်စပါးကဏ္ဍသည် နိုင်ငံတော်အစားအသောက်လုံခြုံစိတ်ချရမှုရှိစေရေးအတွက် အစားအစာများထုတ်လုပ်ရာတွင် အောင်မြင်မှုရရှိရုံသာမက ကမ္ဘာ့အစားအစာဖူလုံစိတ်ချရမှုရှိစေရေးတွင်လည်း ပူးပေါင်းပါဝင်လျက်ရှိကြောင်း အတွင်းရေးမှူးက ဆက်လက်ပြောကြားခဲ့ပါသည်။ ၂၀၂၄ခုနှစ်၏ ပထမလေးလပတ်ကာလတွင် စပါးနှင့် ကြိတ်ခွဲပြီးသားဆန်များတင်ပို့မှုသည် ၂၀၂၃ခုနှစ်၊ ပထမလေးလပတ်ကာလထက် ၃၀ရာခိုင်နှုန်း တိုးတက်လာကြောင်းသိရပါသည်။

        ၂၀၁၅ခုနှစ်တွင် ကမ္ဘောဒီးယားနိုင်ငံသည် နိုင်ငံတကာဈေးကွက်သို့ ဆန်တန်ချိန် ၁သန်းတင်ပို့နိုင်ရန် ရည်မှန်းချက်ထားခဲ့သော်လည်း ဆယ်စုနှစ် ၁စုနီးပါးကြာသည့်အချိန်ထိ ရည်မှန်းချက်မအောင်မြင်သေးကြောင်းသိရပါသည်။ ကမ္ဘောဒီးယားနိုင်ငံဆန်စပါးအသင်းချုပ်သည် ၂၀၂၅ခုနှစ်တွင် အနည်းဆုံးဆန်တန်ချိန် ၁သန်းတင်ပို့နိုင်ရန် ရည်မှန်းချက်ထားလျက်ရှိပါသည်။ လွန်ခဲ့သည့်လေးနှစ်တွင် ကမ္ဘောဒီးယားနိုင်ငံသည် နိုင်ငံတကာဈေးကွက်သို့ တစ်နှစ်ကို ဆန်တန်ချိန် ၆သောင်းကျော် ပုံမှန်တင်ပို့လျက်ရှိကြောင်းသိရှိရပါသည်။

Source : Khmar Times

DOCA(ရန်ကုန်)

     စားအုန်းဆီဈေးနှုန်းများ ကျဆင်းလာမှုအရ ပြန်လည်သန့်စင်သည့် စက်ရုံများ၏ ဝယ်ယူမှု များပြားလာသဖြင့် အိန္ဒိယနိုင်ငံ၏ ၂၀၂၄ ခုနှစ် ဧပြီလအတွင်း စားအုန်းဆီတင်သွင်းမှုသည် ယခင် လကထက် ၄၁% မြင့်တက်လျက် သုံးလတာကာလ၌ အမြင့်ဆုံးသို့ ရောက်ရှိခဲ့သည်ဟု ကုန်သည် လုပ်ငန်းရှင် ၅ ဦးက ပြောဆိုကြောင်း ရိုက်တာသတင်းဌာနက ဖော်ပြပါသည်။

    ကမ္ဘာ့အကြီးဆုံး စားအုန်းဆီတင်သွင်းသည့် နိုင်ငံဖြစ်သော အိန္ဒိယ၏ ဝယ်ယူမှုမြင့်မားခြင်း က မလေးရှား စားအုန်းဆီကြိုရောင်းဈေးကွက်၌ စံပြုရောင်းဝယ်သည့် FCPOc3 အဆင့် စားအုန်း ဆီကြမ်း၏ ၃ လအတွင်း အနိမ့်ဆုံးဈေးနှုန်းသို့ ရောက်ရှိနေမှုကို တိုးတက်လာစေဖွယ်ရှိသည်။ အဆိုပါ ကုန်သည်များက အိန္ဒိယနိုင်ငံအနေဖြင့် ဧပြီလအတွင်း စားအုန်းဆီ တန်ချိန် ၆၈၂၀၀၀ တန် ခန့် တင်သွင်းခဲ့သည်ဟု ခန့်မှန်းထားကြသည်။

     စားသုံးဆီကုန်သွယ်မှုနှင့် ပွဲစားလုပ်ငန်းတစ်ခုဖြစ်သော GGN Research မှ စီမံခန့်ခွဲရေး မိတ်ဖက်ဆောင်ရွက်သူ Rajesh Patel က မကြာသေးမီကာလ၌ ဈေးနှုန်းများ ပြန်လည်ချိန်ညှိခဲ့မှု အရ စားအုန်းဆီသည် ပဲပုပ်ဆီနှင့် နေကြာဆီတို့ထက် ဝယ်ယူသူများအား ပိုမိုဆွဲဆောင်နိုင်မှု ရှိလာ ကြောင်း ပြောကြားခဲ့သည်။ ကုန်သည်များ၏ ပြောဆိုချက်အရ ဇွန်လတွင် အိန္ဒိယဆိပ်ကမ်း အရောက် တင်ပို့မည့် သင်္ဘောတင်စရိတ်၊ အာမခံကြေးနှင့် သယ်ယူပို့ဆောင်စရိတ်များ ပါဝင်သော CIF ဈေးနှုန်းသည် စားအုန်းဆီကြမ်းအတွက် ၁ တန်လျှင် ၉၂၀ အမေရိကန်ဒေါ်လာ (မလေးရှား ရင်းဂစ် ၄၃၈၄) ခန့်ရှိပြီး ပဲပုပ်ဆီကြမ်းနှင့် နေကြာဆီကြမ်းတို့မှာ ၁ တန်လျှင် ၉၂၀ ဒေါ်လာနှင့် ၉၄၅ ဒေါ်လာခန့် အသီးသီးရှိကြောင်း သိရှိရသည်။ လွန်ခဲ့သော ၁ လခန့်ကမူ စားအုန်းဆီကြမ်း၏ ဈေးနှုန်းသည် အဆိုပါ ပြိုင်ဘက် စားသုံးဆီများထက် ၁ တန်အပေါ်တွင် ဒေါ်လာ ၅၀ ခန့် ပိုမို မြင့်မားနေခဲ့သည်။

     ဝယ်ယူသူများအနေဖြင့် နေကြာဆီတင်သွင်းမှုကို လျှော့ချလျက် စားအုန်းဆီသို့ ပြောင်းလဲ ဝယ်ယူလာကြသဖြင့် အိန္ဒိယ၏ စားအုန်းဆီ တင်သွင်းမှုမှာ မေလတွင် တန်ချိန် ၇ သိန်းခန့်အထိ မြင့်တက်လာနိုင်သည်ဟု Sunvin Group စားသုံးဆီကုမ္ပဏီမှ အမှုဆောင်အရာရှိချုပ် Sandeep Bajoria က ပြောဆိုသည်။

     ဧပြီလအတွင်း အိန္ဒိယ၏ နေကြာဆီတင်သွင်းမှုမှာ တန်ချိန် ၂၃၃၀၀၀ ခန့်ရှိပြီး ယခင်လ ထက် ၄၈% ကျဆင်းခဲ့ကြောင်း၊ ပဲပုပ်ဆီတင်သွင်းမှုမှာမူ တန်ချိန် ၃၉၁၀၀၀ ရှိပြီး ၇၉% တိုးတက် လျက် ၁၀ လအတွင်း အမြင့်ဆုံးရောက်ရှိခဲ့ကြောင်း၊ ပြန်လည်သန့်စင်ထုတ်လုပ်ရာတွင် အမြတ် အစွန်း ပိုမိုရရှိသဖြင့် ထိုကဲ့သို့ တင်သွင်းမှုမြင့်တက်ရခြင်းဖြစ်ကြောင်း၊ စားအုန်းဆီနှင့် ပဲပုပ်ဆီတို့ ကို တင်သွင်းမှုမြင့်မားခြင်းက အိန္ဒိယ၏ ဧပြီအတွက် စားသုံးဆီတင်သွင်းမှုကို ၁၃% တိုးတက် လျက် တန်ချိန် ၁.၃ သန်းအထိ ရောက်ရှိစေခဲ့ကြောင်း ကုန်သည်များက ပြောကြားခဲ့ကြသည်။

Source: The Edge Malaysia, 2 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)