ပြည်တွင်းကုန်သွယ်မှုသတင်း

           ပဲခူးတိုင်းဒေသကြီး၊ သာယာဝတီခရိုင်၊ မင်းလှမြို့နယ်တွင် စပါးဈေးမှာ ၂၀၂၄ခုနှစ် မတ်လ နောက်ဆုံးပတ်တွင် ဆင်းသုခ၊ မနောသုခစပါး၊ (၄၆) ပေါင်တင်း (၁၀၀) လျှင် (၁၈၄၀၀၀၀)ကျပ် ရှိခဲ့ရာမှ သင်္ကြန်ပြီးကာလ နောက်ပိုင်းတွင် (၄၆) ပေါင် တင်း(၁၀၀) လျှင်(၁၉၇၈၀၀၀)ကျပ် ရှိခဲ့၍(၁၃၈၀၀၀) ထိမြင့်တက်လာခဲ့ကြောင်း၊ မိုးစပါးများလည်းကုန်နေပြီဖြစ်၍ အရောင်းအဝယ် အေးနေကြောင်း စပါးကုန်သည် တစ်ဦးထံမှ သိရှိရပါသည်။

           ဆန်ဈေးကွက်အနေဖြင့်မတ်လနောက်ဆုံးပတ်တွင် ဆင်းသုခ၊ မနောသုခဆန် (၁) အိတ်လျှင်(၈၅၀၀၀)ကျပ်ရှိခဲ့ရာမှ သင်္ကြန်ပြီးကာလနောက်ပိုင်းဆန်(၁)အိတ်လျှင် (၈၂၀၀၀)ကျပ် ဖြင့် (၃၀၀၀)ကျပ်ခန့် ဈေးနှုန်းကျဆင်းသွားကြောင်း သိရှိရပါသည်။ မင်းလှမြို့နယ်မှ ရန်ကုန်မြို့သို့ တစ်ရက်ခြား ဆန်ကား(၃)စီးမှ (၄)စီးထိတင်ပို့လျက်ရှိပြီး မင်းလှမြို့နယ်မှ ပြည်မြို့ သို့ တစ်ရက်ခြား ဆန်ကား(၃)စီးခန့် တင်ပို့နေကြောင်း ဆန်ကုန်သည်တစ်ဦးထံမှ သိရှိရပါသည်။

စားသုံးသူရေးရာဦးစီးဌာန

သာယာဝတီခရိုင်

           ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ်တွင် ပရဆေးကုန်ကြမ်းဖြစ်သည့် ငုစေ့များ နွေရာသီ မတ်လ၊ ဧပြီလများတွင် အရောင်းအဝယ် လှိုင်နေကြောင်းနှင့် အိမ်တွင်း ဝင်ငွေရ ရာသီပေါ်လုပ်ငန်းတစ်ခုဖြစ်ပါကြောင်းသိရှိရပါသည်။

          ဒေသအလိုက် ပေါက်နေသော ငုပင်များမှ အသီးများကို မတ်လနှင့် ဧပြီလများတွင် ခူးဆွတ်၍ အသီးများမှ အစေ့များရင့်ခြောက်ပြီး ရရှိလာသည့် အစေ့များအား အခြောက်လှမ်း၍ ရရှိလာသော  ငုစေ့များကို ပရဆေးကုန်းကြမ်းအသုံးပြုရန် ဝယ်ယူမှုများရှိကြောင်း၊ ငုစေ့ခြောက် များရရှိရန် ငုသီးများကို အသီးခွဲ၊ နေလှမ်း၊ အခြောက်ခံခြင်းများ ပြုလုပ်ပေးရကြောင်း၊ ငုစေ့ခြောက် တစ်ပိဿာရရှိရန် လုပ်သားခ (၂၅၀၀)ကျပ်ခန့် ကုန်ကျကြောင်း၊ လုပ်သား တစ်ဦးလျှင် တစ်နေ့ငုစေ့ ၃ပိဿာ ခန့်ရရှိပြီး အိမ်တွင်း၌သာ ကုန်ကြမ်းဖြင့် ပြုလုပ်၍ရသော အပိုဝင်ငွေရရှိနေသည့် လုပ်ငန်းတစ်ခု ဖြစ်ပါသည်။

          ငုစေ့ကုန်ကြမ်းအား ရောင်းဝယ်ရာ၌၂၀၂၄ခုနှစ် ဧပြီလနောက်ဆုံးပတ်တွင် အစေ့ခြောက် တစ်ပိဿာလျှင်(၅၀၀၀)ကျပ်ဖြင့် မြို့နယ်အထိုင်ဈေးဖြင့် ဝယ်ယူပြီး ရရှိလာသော ငုစေ့များအားစုဆောင်းကာ ပြည်၊ မန္တလေးမြို့ရှိ ကုန်သည်များထံသို့ တင်ပို့ရောင်းချလျက် ရှိပါကြောင်းနှင့် ငုသီးခြောက်များစုဆောင်း၍ ငုစေ့များ ဝယ်ယူတင်ပို့ ရောင်းချနေသူ ကုန်သည်တစ်ဦးထံမှ သိရှိရပါသည်။

    စားသုံးသူရေးရာဦးစီးဌာန

    နတ်တလင်းခရိုင်

            ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ်အတွင်းရှိ နေအိမ်တိုင်းနီးပါးတွင် ဒန့်သလွန်ပင်များ စိုက်ပျိုးကြပါသည်။ ဒန့်သလွန်ပင်သည် နှစ်ရှည်ပင်အမျိုးအစားဖြစ်ပြီး အပွင့်၊ အသီး၊ အရွက်များအားလုံးကို စားသောက်ရန်နှင့် ဆေးဝါးအဖြစ်အသုံးပြုကြပါသည်။ ဒန့်သလွန် ပင်အမြင့်မှာ (၁၀)တောင်မှ (၁၆)တောင်အထိမြင့်ပါသည်။ တစ်ပင်လျှင် အသီး အတောင့်အရေ အတွက် (၈၀) မှ (၁၀၀) ကြားထွက်ရှိပါသည်။

             ပေါ်ဦးစ ဒန့်သလွန်သီးတစ်တောင့်လျှင် အတောင့်အရွယ်အစားကိုလိုက်၍ (၂၀၀)ကျပ်မှ (၂၅၀)ကျပ်အထိ ဈေးကောင်းရရှိပြီး ယခု  ၂၀၂၄ခုနှစ် ဧပြီလ စတုတ္တပတ်တွင်မူ ဒန်သလွန်သီး တစ်တောင့် (၅၀)ကျပ်မှ (၁၀၀)ကျပ် ပေါက်ဈေးသာရှိသည်။ ထွက်ရှိလာသော ဒန့်သလွန်သီးများ ကို ဒေသတွင်း ဈေးကွက်နှင့် ရန်ကုန် ကြည့်မြင့်တိုင်ဈေး၊ တညင်းကုန်းဈေးသို့ နေ့စဉ် တင်ပို့ ရောင်းချလျက်ရှိကြောင်းသိရှိရပါသည်။

DOCA(ပဲခူး)

             ပြည်ခရိုင်၏ ၂၀၂၃-၂၀၂၄ ဘဏ္ဍာနှစ် တွင် မိုးနေကြာစိုက်ဧက ၂၈၆ဧက၊ ဆောင်း နေကြာစိုက်ဧက ၂၄၇၅ဧက စုစုပေါင်း စိုက်ဧကမှာ ၂၇၆၁ဧက စိုက်ပျိုးထားရှိပါသည်။ တစ်ဧကလျှင် ကုန်ကျစရိတ်အနေဖြင့် (၄၁၈၇၅၀)ကျပ်ကုန်ကျပြီး တစ်ဧကပျမ်းမျှ အထွက်နှုန်းမှာ ၂၄.၇၅တင်း ထွက်ရှိကြောင်း သိရပါသည်။ နေကြာသီးနှံ၏ ဈေးနှုန်းအနေဖြင့် ဧပြီလ နောက်ဆုံးပတ်တွင် တစ်တင်းလျှင် (၃၅၀၀၀)ကျပ်ဈေးရှိ၍ တစ်ဧကလျှင် (၄၄၇၅၀၀)ကျပ်ခန့် အကျိုးအမြတ်ရရှိပါသည်။ ဒေသပေါက်ဈေးအနေဖြင့် ၃၅၀၀၀ကျပ်ဈေးရှိသော်လည်း အရောင်းအဝယ်မဖြစ်ဘဲ ဒေသတွင်း ဆီစက်များမှသာ စားသုံးရန်အတွက် ဝယ်ယူကြိတ်ခွဲခြင်း မျိုးသာ ရှိပြီး အခြားတိုင်းများသို့ တင်ပို့ရောင်းချမှုမရှိကြောင်း သိရပါသည်။ ပြည်ခရိုင်အတွင်းရှိ ဆီစက်များမှ နေကြာသီးနှံအား နဝလီ ကြိတ်ခွဲလျှင် တစ်တင်းလျှင် ၂၇၀၀ကျပ်နှုန်းဖြင့် ကြိတ်ခွဲ ပေးကြောင်း သိရှိရပါသည်။

စားသုံးသူရေးရာဦစီးဌာန

      ပြည်ခရိုင်

              ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်တွင် သံပုရာစိုက်တောင်သူများ ဈေးကောင်း ရ၍တွက်ခြေကိုက်လျက်ရှိပါသည်။ သံပုရာပင်သည် နှစ်(၄၀)ကျော်ကြာ အပွင့်ပွင့်၍ အသီးသီး နိုင်သော နှစ်ရှည်အပင်မျိုးဖြစ်သော်လည်း (၁၀-၁၅)နှစ်လောက်သာ စိုက်ပျိုးကြောင်း သိရပါသည်။ အပင်စိုက်ပျိုးပြီး ၄-၅နှစ်မှစတင်၍ အသီးသီးပါသည်။ တစ်ဧကလျှင် သံပုရာပင် ၃၀၀ကျော် ခန့်စိုက်ပျိုးနိုင်ပြီး အသီးအားကောင်းသောနှစ်များတွင် တစ်ပင်လျှင် အသီး ၂၀၀-၂၅၀ခန့် သီးနိုင်ကြောင်း သိရပါသည်။

             သံပုရာသီးသည်မိုးရာသီတွင် အသီးနှုန်းအားကောင်း၍ အလုံးချောပြီး ရာသီဥတု ပူပြင်းသော နွေရာသီတွင် အသီးနှုန်းကျဆင်း၍ အသီးမှာလည်း အလုံးသေးသွားကြောင်း သိရပါသည်။ယခု၂၀၂၄ခုနှစ်တွင် သံပုရာစိုက်တောင်သူများအနေဖြင့်အသီးလှိုင်လှိုင်ပေါ်ချိန်တွင် သံပုရာသီး ဈေးကောင်းရခဲ့သလို ဧပြီလနောက်ဆုံးပတ်တွင် ရောင်းချလျက်ရှိသော ဈေးနှုန်းအနေဖြင့် နွေသီးများလည်း အလုံးချောချောတစ်လုံးလျှင် ၃၀၀ကျပ်၊ အသေး တစ်လုံး လျှင် ၂၀၀ကျပ်နှင့် လက်ကားဝယ်ယူသော ဖောက်သည်ဈေးမှာ တစ်လုံးလျှင် ၁၅၀ကျပ်အထိ ဈေးကောင်းရလျက်ရှိပါသည်။ ပြည်မြို့နယ်မှ ထွက်ရှိသော သံပုရာသီးများကို ဒေသတွင်း ဝယ်လက် များနှင့် ရခိုင်ပြည်နယ်ဘက်သို့ပါ တင်ပို့ရောင်းချနေကြောင်း သိရပါသည်။

စားသုံးသူရေးရာဦစီးဌာန

        ပြည်ခရိုင်