ပြည်တွင်းကုန်သွယ်မှုသတင်း

     ပုသိမ်မြို့ပေါ် ပြည်ပပို့ကုန်သီဟိုဠ်ဈေးကွက်မှာ ရာသီသီးနှံအဖြစ် ဖေဖော်ဝါရီလ နောက်ဆုံးပတ်တွင် ဈေးကွက်ဝင်ရောက်လျက် မေလဒုတိယပတ်ရောက်လျှင် သီဟိုဠ်ရာသီပြီးဆုံးသွားကြောင်း သီဟိုဠ်အဝယ်ဒိုင်များမှ သိရသည်၊၊ သီဟိုဠ်ပေါ်ချိန် မြို့ပေါ်တွင် အဝယ်ဒိုင် (၅)ဒိုင်ခန့်မှ သီဟိုဠ်စေ့များကိုဝယ်ယူ၍ ရန်ကုန်မြို့ပေါ်သို့ အဓိကတင်ပို့မှုရှိပြီး ရန်ကုန်စက်မှုဇုန်ရှိ သီဟိုဠ်ခွဲစက်များမှ ကုန်ချောပြုလုပ်ကာ ပြည်တွင်း/ ပြည်ပဈေးကွက်သို့ တင်ပို့ရောင်းချမှုရှိကြောင်း ဈေးကွက်မှသိရသည်၊၊

    သီဟိုဠ်ပေါ်ချိန် ဖေဖော်ဝါရီလနောက်ဆုံးပတ်၌ တစ်ပိဿာလျှင် ၄၈၀၀/၅၀၀၀ ကျပ်ဈေးဖြင့် ဝယ်ယူမှုရှိသော်လည်း သီဟိုဠ်စေ့လှိုင်လှိုင်ပေါ်ချိန် မတ်၊ ဧပြီလများတွင် သီဟိုဠ်ဈေးနှုန်းမှာ နေ့စဉ်တစ်ပိဿာ ၁၀၀/ ၂၀၀ ကျပ် ဈေးနှုန်းကျဆင်းလျက်ရှိကြောင်း ယခုမေလဆန်း ပထမပတ်တွင် သီဟိုဠ်စေ့တစ်ပိဿာကို ၃၅၀၀/၃၆၀၀ဈေးနှင့် အရောင်းအဝယ်ဖြစ်နေကြောင်း ယခင်နှစ်များမှာ ယခုလိုအချိန်မိုးရွာသွန်းပါက သီဟိုဠ်စေ့မှာ မိုးမိသည့်အတွက် အရောင်မှာ မဲသွား၍ အရည်အသွေးကျဆင်းပြီး သီဟိုဠ်တစ်ပိဿာလျှင် ၂၅၀၀ ကျပ်ဈေးအတွင်းသာ ဝယ်ယူမှုရှိကြောင်း ဈေးနှုန်းအနည်းငယ်ကျဆင်းမှုရှိသော်လည်း အထွက်ကောင်းသည့်အတွက် တွက်ခြေကိုက်မှုရှိကြောင်း သီဟိုဠ်စိုက်တောင်သူ/ ကုန်သည်များထံမှ သိရသည်၊၊

DOCA(ဧရာဝတီ)

       မုံရွာခရိုင်အတွင်းရှိ စားသုံးသူပြည်သူများ စားသုံးဆီပြတ်လပ်မှုမရှိစေရေး၊ ဈေးနှုန်းချိုသာ၍ အရေအတွက်၊ အလေးချိန်နှင့် အရည်အသွေးပြည့်ဝမှန်ကန်စွာရရှိနိုင်ရေးအတွက် စားသုံးသူရေးရာဦးစီးဌာန၊ မြန်မာနိုင်ငံဆီကုန်သည်များနှင့်ဆီလုပ်ငန်းရှင်များအသင်း၊  မုံရွာခရိုင်စားသုံးဆီကုန်သည်များနှင့် စားသုံးဆီလုပ်ငန်းရှင်များအသင်းတို့ပူးပေါင်း၍ စားအုန်းဆီများဖြန့်ဖြူးရောင်းချပေးလျက်ရှိကြောင်းသိရှိရပါသည်၊၊

      စားအုန်းဆီများရောင်းချရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက ထုတ်ပြန်ပေးလျက်ရှိသော စားအုန်းဆီတစ်ပိဿာရည်ညွှန်းဈေးအပေါ် အခြေခံ၍ သယ်ယူပို့ဆောင်ခပါ ကုန်ကျစရိတ်တွင် အမြတ် ၂ရာခိုင်နှုန်းတွက်ချက်၍ ရောင်းချပေးခြင်းဖြစ်ပြီး လူတစ်ဦးလျှင် ၁ပိဿာနှုန်းရောင်းချပေးကြောင်းသိရှိရပါသည်၊၊

      မုံရွာခရိုင်အတွင်း (၁-၄-၂၀၂၄) ရက်နေ့မှ (၁၂-၄-၂၀၂၄) ရက်နေ့ထိ စားအုန်းဆီပိဿာချိန် (၂၃၁၀၀) ပိဿာခန့်ကို တစ်ပိဿာလျှင် ၅၈၅၀ကျပ်ဖြင့်လည်းကောင်း၊ (၂၂-၄-၂၀၂၄) ရက်နေ့မှ (၂၆-၄-၂၀၂၄) ရက်နေ့ထိ စားအုန်းဆီပိဿာချိန် (၁၁၅၅၀) ပိဿာခန့်ကို တစ်ပိဿာလျှင် ၆၀၀၀ကျပ်ဖြင့်လည်းကောင်း၊  (၂၉-၄-၂၀၂၄) ရက်နေ့မှ (၃၀-၄-၂၀၂၄) ရက်နေ့အထိ စားအုန်းဆီပိဿာချိန် (၄၆၂၀) ပိဿာခန့်ကို တစ်ပိဿာလျှင် ၅၉၀၀ကျပ်ဖြင့်လည်းကောင်း စုစုပေါင်းပိဿာချိန် (၃၉၂၇၀) ပိဿာခန့်ကို လူစည်ကားရာရပ်ကွက်များ၊ ဈေးအပြင်ဌာနဆိုင်ရာများ၊ တပ်ရင်းတပ်ဖွဲ့များ၊ မြို့စွန်ရပ်ကွက်များသို့ပါ ဈေးကားများဖြင့် လှည့်လည်ရောင်းချလျက်ရှိကြောင်း မုံရွာခရိုင်စားသုံးဆီကုန်သည်များနှင့် စားသုံးဆီလုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)

၅.၅.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

၃.၅.၂၀၂၄ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

    ရန်ကုန်မြို့တော်စည်ပင်သာယာရေးကော်မတီ၏ ကြီးကြပ်မှုအောက်ရှိ ရန်ကုန်အရှေ့ပိုင်း ခရိုင်၊ အထက်ပုဇွန်တောင်လမ်း၊ မင်္ဂလာတောင်ညွှန့်မြို့နယ်ရှိ ကြက်/ဘဲဈေးဒိုင်မှ စားသုံးသူ ပြည်သူများသို့ နေ့စဉ် ကြက်/ဘဲများကို လက်လီ/လက်ကား ရောင်းချပေးလျက်ရှိကြောင်း သိရှိရပါသည်။

      ရန်ကုန်အရှေ့ပိုင်းခရိုင်၊ စားသုံးသူရေးရာဦးစီးမှူးရုံးမှ ဝန်ထမ်းများသည် (၂၉.၄.၂၀၂၄) ရက်နေ့ တွင် မင်္ဂလာတောင်ညွှန့်မြို့နယ်ရှိ ကြက်/ဘဲဈေးဒိုင်သို့သွားရောက်၍ ရောင်းချလျက်ရှိသော ကြက်/ဘဲ ဈေးနှုန်းများအား ဈေးကွက်ဈေးနှုန်းစုံစမ်းခြင်းများပြုလုပ်ခဲ့ရာ ရန်ကုန်တိုင်း ဒေသကြီးအတွင်းရှိ မြို့နယ်များမှ ခြံဖမ်းဈေးစနစ်ဖြင့်လည်းကောင်း၊ အခြားတိုင်းနှင့် ပြည်နယ် များမှ အရောက်ပို့စနစ်ဖြင့်လည်းကောင်း တင်ပို့ရောင်းချလျက်ရှိပါသည်။

    ထိုသို့ ပြန်လည်ရောင်းချလျက်ရှိသော ကြက်/ဘဲဈေးနှုန်းများမှာ အိမ်မွေးကြက် ၁ ပိဿာ လျှင် (၁၃၀၀၀-၁၇၅၀၀)ကျပ်၊  အသားတိုးကြက် ၁ ပိဿာလျှင် (၇၅၀၀-၇၀၀၀) ကျပ်၊ မွေးမြူရေး ကြက် (ထီး/မ) ၁ ပိဿာလျှင် (၈၅၀၀-၁၆၅၀၀) ကျပ်၊ ဘဲ ၁ ပိဿာလျှင် (၆၀၀၀-၉၀၀၀) ကျပ်၊ ချယ်ရီဘယ်ရီ ဘဲ ၁ ပိဿာလျှင် (၉၄၀၀-၉၅၀၀) ကျပ်တို့ဖြင့် ‌တစ်ရက်လျှင် ကုန်ချိန် (၆၄၁၇၀) ပိဿာခန့်ရောင်းချနေကြောင်းနှင့် ယခင်အပတ်နှင့်နှိုင်းယှဉ်ပါက အိမ်မွေးကြက်နှင့် အသားတိုးကြက်မှာ ဈေးအနည်းငယ်တက်လာကြောင်း၊ ကုန်အဝင်များမှာ ပုံမှန်အတိုင်း စီးဆင်းလျက်ရှိကြောင်း သိရှိရပါသည်။

DOCA(ရန်ကုန်)