ပြည်တွင်းကုန်သွယ်မှုသတင်း

           ရန်ကုန်တိုင်းဒေသကြီး၊ လှိုင်မြို့နယ်၊  သီရိမင်္ဂလာဈေးတွင် ၂၀၂၄ခုနှစ်၊ မေလ ( ၈ ) ရက်နေ့မှ မေလ ( ၁၄ ) ရက်နေ့အထိ ဖြစ်ပေါ်ခဲ့သောသစ်သီးဝလံဈေးနှုန်းများမှာ ပြင်ဦးလွင်၊ အောင်ပန်းမှ ထောပတ်သီးအလုံးကြီးတစ်လုံးလျှင် ကျပ် (၁၃၀၀)၊ အလုံးသေးတစ်လုံးလျှင် ကျပ်၈၀၀၊ သီပေါ၊ အောင်ပန်းမှ ပျားလိမ္မော်တစ်ပိဿာလျှင် အလုံးကြီး ကျပ် (၁၄၀၀၀)၊ အလုံးသေး ကျပ် (၇၀၀၀)၊ ကလောမှ ပန်းသီးစက္ကူပုံးတစ်ပုံးလျှင် အလုံးကြီး ကျပ် (၄၅၀၀၀)၊ အလုံးသေး ကျပ် (၃၅၀၀၀)၊ ကသာမှ ဖရဲသီး (855) အလုံးကြီးတစ်လုံးလျှင်  ကျပ်၁၇၀၀၀၊ အလုံးလတ်တစ်လုံးလျှင် ကျပ်၁၀၀၀၀၊ အလုံးသေးတစ်လုံးလျှင် ကျပ်၈၀၀၀၊ ဝမ်းတွင်းမှ ဖရဲသီး(211)အလုံးကြီးတစ်လုံးလျှင် ကျပ်၈၀၀၀၊ အလုံးလတ်တစ်လုံးလျှင် ကျပ် (၇၀၀၀)၊ အလုံးသေးတစ်လုံးလျှင် ကျပ် (၆၀၀၀)၊ မော်လမြိုင်မှ ကျွဲကောသီးအလုံးကြီးတစ်လုံးလျှင် ကျပ် (၅၀၀၀)၊ အလုံးလတ်တစ်လုံးလျှင် ကျပ် (၂၀၀၀)၊ အလုံးသေးတစ်လုံးလျှင် ကျပ် (၁၅၀၀)၊ ပုပ္ပါး၊ တိုက်ကြီးမှ မာလကာသီးအလုံးကြီးတစ်လုံးလျှင် ကျပ် (၆၀၀)၊ အလုံးလတ်တစ်လုံးလျှင် ကျပ် (၄၀၀)၊ အလုံးသေးတစ်လုံးလျှင် ကျပ် (၂၀၀)၊ ပြင်ဦးလွင်မှ ဘောက်သီးတစ်ပိဿာလျှင် အလုံးကြီး ကျပ် (၁၀၀၀၀)၊ အလုံးလတ် ကျပ် (၈၀၀၀)၊ အလုံးသေး ကျပ် (၆၀၀၀)၊ တိုက်ကြီး၊ ကျိုက်ထိုမှ ပိန္နဲသီးတစ်လုံးလျှင် အလုံးကြီး ကျပ် (၂၀၀၀၀)၊ အလုံးလတ် ကျပ် (၁၅၀၀၀)၊ အလုံးသေး ကျပ် (၈၀၀၀)၊ ကျိုက်ကော်မှ နာနတ်သီးတစ်လုံးလျှင် အလုံးကြီး ကျပ် (၂၅၀၀)၊ အလုံးလတ် ကျပ် (၂၀၀၀)၊ အလုံးသေး ကျပ် (၈၀၀)၊ ဧရာဝတီတိုင်းမှ သရက်သီး(စိန်တလုံး) အလုံးကြီးတစ်ခြင်းလျှင် ကျပ် (၄၇၀၀၀)၊ အလုံးလတ်တစ်ခြင်းလျှင် ကျပ် (၄၀၀၀၀)၊ အလုံးသေးတစ်ခြင်းလျှင် ကျပ်၃၅၀၀၀၊ ဧရာဝတီတိုင်းမှ သရက်သီး(ရင်ကွဲ) အလုံးကြီးတစ်ခြင်းလျှင် ကျပ်၂၀၀၀၀၊ အလုံးလတ်တစ်ခြင်းလျှင် ကျပ်၁၄၀၀၀၊ အလုံးသေးတစ်ခြင်းလျှင် ကျပ်၁၀၀၀၀၊ ရေးမှ ဒူးရင်းသီး အလုံးကြီးတစ်လုံးလျှင် ကျပ်၂၀၀၀၀၊ အလုံးလတ်တစ်လုံးလျှင် ကျပ်၁၅၀၀၀၊ အလုံးသေးတစ်လုံးလျှင် ကျပ်၈၀၀၀ ဈေးနှုန်းတို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံပန်းမန်ဟင်းသီးဟင်းရွက်စိုက်ပျိုးထုတ်လုပ်တင်ပို့ရောင်းချသူများအသင်း (MFVP) မှသိရှိရပါသည်။

DOCA(ရန်ကုန်)

 ၁၆.၅.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

      မန္တလေးတိုင်းဒေသကြီး၊ ကျောက်ဆည်ခရိုင်သည် စိုက်ပျိုးရေးနှင့်မွေးမြူရေးကို အဓိကထား လုပ်ကိုင်ကြသော်လည်း ကျေးလက်နေတောင်သူများသည် နှစ်ရှည်သီးနှံဖြစ်သော သရက်သီးနှံကို ယာမြေနှင့်ဥယျာဉ်ခြံမြေများတွင် အများဆုံးစိုက်ပျိုးလျက်ရှိပါသည်။သရက်စိုက်ပျိုးရာတွင် ဒေသနှင့် ကိုက်ညီပြီး အရည်အသွေးကောင်းမွန်သော မျိုးများကိုသာ ရွေးချယ်စိုက်ပျိုးလျက်ရှိပြီး တောင်သူအများစုသည် စိန်တစ်လုံးသရက်နှင့် ရွှေဟင်္သာသရက်မျိုးများကိုသာ အဓိကထားပြီး ကျယ်ကျယ်ပြန့် ပြန့် အများဆုံးစိုက်ပျိုးလာကြသည်။ သရက်စိုက်ပျိုးရာတွင် ယခင်ကအစေ့ပျိုးပင်များကိုသာ စိုက်ပျိုးကြပြီး အစေ့မှစိုက်ပျိုးသည့်အပင်သည် အသီးသီးရန်(၆-၈)နှစ်ခန့်ကြာမြင့်သောကြောင့် ယခုအချိန်တွင် သရက်စိုက်တောင်သူများသည် ခေတ်သစ်နည်းစနစ်ဖြင့် ကိုင်းကူးပျိုးပင်များကိုသာ အများဆုံး စိုက်ပျိုးကြပါသည်။ ၄င်းစိုက်ပျိုးနည်းမှာ (၃)နှစ်ခန့်အကြာတွင် အသီးသီးမြန်ခြင်း ၊ သရက်သီးများ အလုံးလှ၍စျေးကောင်းရရှိခြင်း ၊ အသေပျောက်နည်းပါးပြီး ကုန်ကျစရိတ် သက်သာသောကြောင့် ကိုင်းကူးပျိုးပင်များကိုသာ အဓိကထားစိုက်ပျိုးကြကြောင်း သိရှိရပါသည်။ ကိုင်းကူးပျိုးပင်စျေးနှုန်း အနေဖြင့် (၁)ပေမှ(၂)ပေအမြင့်ရှိသော ပျိုးပင်တစ်ပင်လျှင်(၅၀၀၀/-)ကျပ် နှင့် (၂)ပေ မှ (၃)ပေ အမြင့်ရှိသောပျိုးပင်တစ်ပင်လျှင်(၈၀၀၀/-)ကျပ်စျေးနှုန်းဖြင့် ဝယ်ယူစိုက်ပျိုးရကြောင်း ၊ အထွက်နှုန်းအနေဖြင့် စိုက်ပျိုးပြီး အပင်သက်တမ်းပေါ်မူတည်၍ အပင်သက်တမ်း(၃)နှစ်သားအရွယ် တစ်ပင် လျှင်သရက်သီး အရေအတွက်(၃၀၀)လုံးခန့် ထွက်ရှိကြောင်း ၊ တစ်ဧကကုန်ကျစရိတ်အနေဖြင့် သရက်သီးရာသီချိန်တွင် ဆေးဖြန်းခြင်း၊ မြေသြဇာကျွေးခြင်းနှင့် အိတ်စွပ်ခ၊အသီးခူးဆွတ်ခ စုစုပေါင်း (၇၀၀၀၀၀-၈၀၀၀၀၀)ကျပ်ဝန်းကျင်ခန့် ကုန်ကျကြောင်း ၊ သရက်သီးကို အိတ်စွပ်ခြင်းဖြင့် အရောင် အသွေးကောင်းမွန်ခြင်း၊ ပိုးမွှားအန္တရာယ်ကာကွယ်ခြင်း၊ ရာသီဥတုဒဏ်ခံနိုင်ခြင်းနှင့် စျေးကွက်ကောင်းများရရှိကြောင်း၊ ယခုအချိန်တွင် စိန်တစ်လုံး သရက်သီးများ စတင်ထွင်ရှိနေပြီဖြစ်သော်လည်း ယခင်နှစ်ထက် အထွက်နှုန်းနည်းသည်ဟု သိရှိရကြောင်း၊ သို့သော် စျေးကွက်တွင် စျေးကောင်းရရှိသောကြောင့် သရက်သီး စတင်ထွက်ပေါ်ချိန်တွင် ပြည်ပစျေးကွက်ထက် ပြည်တွင်းစျေးကွက်ကိုသာ ရောင်းချလျက်ရှိကြောင်း၊ စိန်တစ်လုံးသရက်သီး အလုံးကြီး(၄၀)ပါ တစ်ဖာလျှင် (၃၆၀၀၀)ကျပ်၊ အလုံးသေး(၄၀)ပါ တစ်ဖာလျှင် (၃၂၀၀၀)ကျပ်စျေးရရှိပြီး လက်လီစျေးနှုန်းအနေဖြင့် အလုံးကြီး တစ်လုံးလျှင်(၁၀၀၀)ကျပ်၊ အလုံးသေး တစ်လုံးလျှင်(၈၀၀)ကျပ်စျေးအထိ ရောင်းချရပြီး အိတ်စွပ်သီး တစ်လုံးလျှင်(၁၂၀၀)ကျပ် စျေးနှုန်းရရှိကြောင်း သိရှိရပါသည်။“အရွက်မှာ လက်ဖက်၊အသီးမှာသရက်”ဆိုတဲ့ ဆိုရိုးစကားအတိုင်း စိန်တစ်လုံးသရက်သီးကို စားသုံးခြင်းဖြင့် အနံ့အရသာ ချိုမွှေးပြီး အသားနူးညံ့၍ အမျှင်ကင်းပြီး သီးလုံးပြင်ပ အရောင်မှာ ဝင်းဝါတောက်ပပြီး အထားခံခြင်းစသည့် ကောင်းခြင်းလက္ခဏာများရှိခြင်းတို့ကြောင့် ပြည်တွင်းစားသုံးမှုတွင်သာမက ပြည်ပနိုင်ငံများကပါ အကြိုက်များသောကြောင့် စိန်တစ်လုံး သရက်သီးနှံကို  ပိုမိုတွင်တွင်ကျယ်ကျယ် စိုက်ပျိုးသင့်ပါ ကြောင်း ရေးသားတင်ပြလိုက်ရပါသည်။

DOCA(မန္တလေး)

    ကျောက်ဆည်ခရိုင်အတွင်းရှိ မြို့နယ်များတွင် သီးနှံမျိုးစုံစိုက်ပျိုးလျက်ရှိရာ စားဖိုချောင်သီးနှံများအပြင် နှစ်ရှည်သီးနှံပင်များလည်း စိုက်ပျိုးလျက်ရှိပါသည်။ မိသားစုဝင်ငွေမှ စီးပွားဖြစ်စိုက်ပျိုးလာကြသော သီးနှံများမှာ ဂွေးပင် ၊ သရက်ပင် ၊ ကီလိုမာလကာပင်များလည်း စိုက်ပျိုးလာကြပါသည် ။ ၄င်းသီးနှံများမှာ ရာသီမရွေး စိုက်ပျိုးနိုင်ပြီး စျေးကွက်ဝယ်လိုအားရှိသော ကီလိုမာလကာပင်များကို တိုးချဲ့စိုက်ပျိုးလာကြပါသည်။ ကီလိုမာလကာပင်များကို ယာမြေများတွင် စိုက်ပျိုးကြပြီး အများဆုံး စိုက်ပျိုးသောမျိုးများမှာ မြေထုပ်စည်းပျိုးပင်များကို ဝယ်ယူ၍     စိုက်ပျိုးကြပါသည်။စိုက်ပျိုးပြီး(၁-၂)နှစ်တွင် အသီးများစတင် အသီးသီးပါသည် ။ (၁)ဧကလျှင် ကီလိုမာလကာပင်(၃၅၀)ပင် စိုက်ပျိုးကြပြီး (၁)နှစ်ခွဲသားတွင် ရောင်းတန်းဝင် အသီးများ စတင်ခူးဆွတ်ရကြောင်း ၊ စတင်ခူးဆွတ်ချိန်တွင် မာလကာသီးအလုံး(၈၀၀-၉၀၀)အထိ ခူးဆွတ်ရောင်းချရကြောင်း ၊ မိုးဦးကျနှင့်မိုးရာသီတွင် အသီးအမြောက်အများထွက်ရှိသော်လည်း ယခုနှစ် မိုးရွာသွန်းမှု နောက်ကျသောကြောင့် အသီးများ တင်သော်လည်း အလုံးကြီးထွားမှု အားနည်းကြောင်း ၊ကီလိုမာလကာစိုက်ပျိုးသော တောင်သူတစ်ဦး ၏ပြောကြားချက်အရ သိရှိရပါသည်။ယခင်နှစ် ကီလိုမာလကာသီး တစ်လုံးလျှင်(၂၀၀-၃၀၀)ကျပ်သာ ရောင်းချခဲ့ရပြီး ယခုနှစ် ကီလိုမာလကာသီး တစ်လုံးလျှင်(၄၀၀-၅၀၀)ကျပ်အထိ ရောင်းချရကြောင်း၊ ဖောက်သည်စျေးအနေဖြင့် ယခင်နှစ်အလုံးအကြီးအသေးပေါ်မူတည်၍ (၁၅၀-၂၀၀)ကျပ်သာရောင်းချခဲ့ရပြီး ယခုနှစ်ဖောက်သည်စျေးအနေဖြင့် (၂၀၀-၃၀၀)ကျပ်အထိ ရောင်းချရကြောင်း ၊ ကျောင်းဖွင့် ရာသီအချိန်မျိုးတွင် ပိုမိုအရောင်းသွက်ကြောင်း၊ ကီလိုမာလကာသီးကို ရွှေသိမ်တော်ဘုရားပရဝုဏ် အတွင်းရောင်းချသောသူများမှ အများဆုံးလာရောက်ဝယ်ယူကြောင်း၊ ဘုရားဖူးလာဧည့်သည်များမှ အိမ်အပြန်လက်ဆောင်အဖြစ် ဝယ်ယူကြကြောင်း ၊ မာလကာသီးစားသုံးခြင်းဖြင့် ဗီတာမင်စီများစွာ ရရှိသဖြင့် ကျန်းမာရေးနှင့်ညီညွတ်သော ကီလိုမာလကာသီးများကို ဝယ်ယူစားသုံးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

      မန္တလေးတိုင်းဒေသကြီး ၊ ကျောက်ဆည်မြို့နယ်အတွင်းရှိ တောင်သူများသည် စိုက်ပျိုးရေးကို အခြေခံ၍ နွေမိုးဆောင်း ဥတုသုံးပါးနှင့်အညီ ရာသီအလိုက် သီးနှံမျိုးစုံ စိုက်ပျိုးလျက်ရှိရာ ကုန်စိမ်းသီးနှံတစ်မျိုးဖြစ်သော ခရမ်းသီး သီးနှံကိုလည်း တစ်နိုင်တစ်ပိုင် စိုက်ပျိုးလာကြပါသည် ။ ခရမ်းသီး သီးနှံကို ရာသီမရွေး စိုက်ပျိုးနိုင်ပြီး ခရမ်းစိုက်ပျိုးမည်ဆိုလျှင် မျိုးစေ့ကို ပျိုးထောင်ပြီး တစ်လခွဲသား အရွယ်တွင်စိုက်ပျိုးရကြောင်း၊နှစ်လခွဲ၊သုံးလအချိန်တွင်အသီးများစတင်ခူးဆွတ်နိုင်ပြီး လေးရက်ခြား တစ်ကြိမ်ခူးဆွတ်ရကြောင်း ၊ (၁)ကြိမ်ခူးဆွတ်လျှင် အထွက်နှုန်းအနေဖြင့် ပိဿာ(၃၀၀-၄၀၀)အထိ ထွက်ရှိကြောင်း၊ (၁)ဧက ကုန်ကျစရိတ်အနေဖြင့် ပျိုးထောင်ခြင်း၊မြေပြင်ခြင်း၊သွင်းအားစု၊စိုက်ပျိုးစရိတ် ၊ လုပ်သားခအပါအဝင် စုစုပေါင်း(၇၅၀၀၀၀-၈၀၀၀၀၀)ကျပ်ခန့် ကုန်ကျကြောင်း ၊ ဧပြီလ စတုတ္တပတ်တွင် ခရမ်းသီးစျေးနှုန်းအနေဖြင့် (၁)ပိဿာလျှင်(၄၀၀)ကျပ် စျေးနှုန်းများရှိခဲ့ပြီး ယခုအချိန်တွင် ခရမ်းသီး(၁)ပိဿာလျှင် (၈၀၀)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်း ၊ ကုန်စိမ်းသီးနှံဖြစ်သည့်အတွက် တစ်ပတ်နှင့်တစ်ပတ် စျေးနှုန်းမတူညီကြောင်း ၊ ကုန်စိမ်းပွဲစားများမှ စိုက်ခင်းအထိ လာရောက်ဝယ်ယူသည့်အတွက် သယ်ယူစရိတ်သက်သာကြောင်း၊ပွဲစားများမှ မန္တလေး၊ နေပြည်တော်၊ ရန်ကုန်စျေးကွက်များသို့ တင်ပို့ရောင်းချကြောင်း၊ (၁)ဧက အကျိုးအမြတ်အနေဖြင့် (၅၅၀၀၀၀)ကျပ် ဝန်းကျင်ခန့်ရရှိသောကြောင့် တွက်ခြေကိုက်သည့် သီးနှံဖြစ်ပါကြောင်း ခရမ်းသီးစိုက်ပျိုးသူတောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)