ပြည်ပကုန်သွယ်မှုသတင်းများ

    အိန္ဒိယနိုင်ငံတွင် စိုက်ပျိုးထုတ်လုပ်သူများလက်ဝယ်နှင့် ဈေးကွက်အတွင်း ကုန်လက်ကျန် ပြတ်လပ်မှုကြောင့် ကွမ်းသီးဈေးနှုန်းများမှာ မြင့်တက်လျက်ရှိပြီး ကွမ်းသီးလုပ်ငန်းနယ်ပယ်၌ လုပ်ကိုင်နေကြသူများအနေဖြင့် မကြာသေးမီနှစ်များတွင် ရာသီဥတုပြောင်းလဲမှုနှင့် ခြောက်သွေ့မှု တို့မှ ကုန်ထုတ်လုပ်မှုအပေါ် သက်ရောက်ခြင်းကို ကြုံတွေ့နေရကြောင်း သိရှိရသည်။

     ကွမ်းသီးအနီမျိုး၏ ဈေးနှုန်းများမှာ တစ်လတာအတွင်း ၁၀% ခန့် မြင့်တက်လာခဲ့ပြီး ဧပြီလ ၂၉ ရက်နေ့တွင် အဓိကဈေးကွက်များဖြစ်သော Channagiri နှင့် Shivamogga တို့ရှိ ကုန်စည် အဝယ်ဒိုင်များ၌ Rashi ကွမ်းသီးအနီ ၁ ကီလိုဂရမ်၏ ဈေးနှုန်းသည် အမြင့်ဆုံးဈေးအဖြစ် ၅၃၆ ရူပီး နှုန်းဖြင့် ရောင်းဝယ်လျက်ရှိသည်။ မတ်လအတွင်း ၎င်းကွမ်းသီးမျိုး၏ အမြင့်ဆုံးဈေးနှုန်းမှာ ၄၈၈ ရူပီးသာ ရှိခဲ့သည်။

    ကွမ်းသီးစိုက်ပျိုးသူများသည် လွန်ခဲ့သော လအနည်းခန့်ကပင် ၎င်းတို့၏ ထုတ်ကုန်ပမာဏ အများအပြားကို ဈေးကွက်အတွင်းသို့ ရောင်းချခဲ့ကြရာ ကွမ်းသီးအနီ ကုန်လက်ကျန်ပြတ်လပ်မှု ဖြစ်ပေါ်ခဲ့သည်။ လက်ရှိကာလတွင် နယ်မြေဒေသများစွာ၌ ရာသီဥတုခြောက်သွေ့မှုကို ကြုံတွေ့ နေရသဖြင့် လာမည့်နေ့ရက်များတွင် ကွမ်းသီးထုတ်လုပ်မှုအပေါ် သက်ရောက်ထိခိုက်ဖွယ်ရှိသည်။ ကာနာတကာပြည်နယ်အတွင်း ကွမ်းသီးအနီမျိုးကို အဓိကစိုက်ပျိုးထုတ်လုပ်ရာ Davangere ခရိုင်၊ Channagiri မြို့ရှိ Soolekere ရေကန်သည် ယခုနှစ်တွင် ခန်းခြောက်မှုဖြစ်ပေါ်ခဲ့ကြောင်း၊ အဆိုပါ ဒေသ၌ ကွမ်းသီးခြံများစွာသည် စိုက်ပျိုးရေ လိုအပ်ချက်အတွက် ၎င်းရေကန်အပေါ် အမှီပြုနေရ ကြောင်း သိရှိရသည်။

    ကွမ်းသီးအဖြူမျိုး၏ ဈေးနှုန်းများမှာမူ တစ်လတာအတွင်း အနည်းငယ်မြင့်တက်ခဲ့ခြင်းမှ အပ ဈေးနှုန်းတည်ငြိမ်မှုရှိခဲ့သည်။ လက်ရှိကာလ၌ ဈေးကွက်အတွင်း ကွမ်းသီးအဖြူ အသစ်များ အား ၁ ကီလိုဂရမ်လျှင် ရူပီး ၃၆၀ နှုန်းဖြင့် လည်းကောင်း၊ ကွမ်းသီးအဖြူ အဟောင်းများကို ရူပီး ၄၄၀ နှုန်းဖြင့်လည်းကောင်း ရောင်းဝယ်လျက်ရှိသည်။ လွန်ခဲ့သော တစ်လတာကာလ၌ ကွမ်းသီး အဖြူ အသစ်နှင့်အဟောင်း ဈေးနှုန်းများမှာ ၁ ကီလိုဂရမ်လျှင် ၃၄၅ ရူပီးနှင့် ၄၁၅ ရူပီး အသီးသီး ရှိခဲ့သည်။

    ပြည်နယ်များစွာမှ သမဝါယမအသင်းများဖြင့် ဖွဲ့စည်းထားသော ကွမ်းသီးနှင့်ကိုကာ ပြုပြင်ထုတ်လုပ်မှုနှင့် ဈေးကွက်မြှင့်တင်ရေး ဗဟိုသမဝါယမလီမိတက် (Campco) သည် ၎င်း၏လုပ်ငန်းအတွက် လုပ်ငန်းအရင်းအမြစ်စီမံချက်ကို အကောင်အထည်ဖော်ဆောင်ရန်အတွက် မတ်လ ၂၆ ရက်နေ့မှ ဧပြီလ ၆ ရက်နေ့အထိ ကွမ်းသီးဝယ်ယူရေးလုပ်ငန်းများကို ရပ်ဆိုင်းထားခဲ့သည်။

    ကာနာတကာပြည်နယ်၊ Puttur မြို့မှ ကွမ်းသီးတောင်သူတစ်ဦးဖြစ်သူ Venugopal P က ကွမ်းသီးအဖြူ ဈေးနှုန်းများအား ထိန်းကျောင်းရာတွင် အဓိကအခန်းကဏ္ဍမှ ပါဝင်သော Campco သည် ဈေးကွက်အတွင်း ရက်သတ္တနှစ်ပတ်ခန့် ပါဝင်လုပ်ကိုင်ခြင်းမရှိသော်လည်း ကွမ်းသီးအဖြူ ဈေးကွက်မှာ တည်ငြိမ်မှုရှိနေခဲ့ကြောင်း၊ သို့ရာတွင် ဈေးနှုန်းများမှာ ကျဆင်းမှု မရှိကြောင်း ပြောဆို ခဲ့သည်။ ကွမ်းသီးအထွက်ကျဆင်းခြင်းက ဈေးကွက်၌ ကွမ်းသီးအဖြူ၏ဈေးနှုန်းကို အထောက်အပံ့ဖြစ်စေခဲ့သည်။

     မကြာသေးမီနှစ်ကာလများအတွင်း ရာသီဥတုပြောင်းလဲမှုက ကွမ်းသီးစိုက်ပျိုးရာဒေသများ ၌ ကုန်ထုတ်လုပ်မှုအပေါ် သက်ရောက်ခဲ့သည်ဟု အိန္ဒိယနိုင်ငံလုံးဆိုင်ရာ ကွမ်းသီးစိုက်ပျိုးသူများ အသင်း၏ ဥက္ကဋ္ဌ Mahesh Puchhappady က Hindu Business Line သတင်းဌာနသို့ ပြောကြားခဲ့ သည်။ ယခုနှစ် ရာသီဥတုအခြေအနေနှင့် စပ်လျဉ်း၍ လက်ရှိကာလတွင် အချို့သော ကွမ်းသီး စိုက်ပျိုးရာဒေသများ၌ အပူချိန်သည် ၄၀ ဒီကရီဆဲလ်ဆီးယပ်၏ အထက်တွင်ရှိကြောင်း၊ ဤအခြေ အနေသည် အသီးကင်းများကို ကြွေကျမှုဖြစ်ပေါ်စေပြီး စိုက်ပျိုးထုတ်လုပ်မှုအပေါ် ထိခိုက်စေ ကြောင်း၊ ရာသီဥတုပြောင်းလဲမှုကြောင့် ယခင်နှစ်တွင်လည်း ကွမ်းသီးအထွက်ပမာဏ ၃၅% ခန့် ကျဆင်းခဲ့ရကြောင်းဖြင့် ၎င်းက ပြောဆိုခဲ့သည်။

    အထွေထွေရွေးကောက်ပွဲ ကျင်းပစဉ်ကာလအတွင်း တရားမဝင် ကွမ်းသီးတင်သွင်းမှုများကို တင်းကျပ်စွာ ထိန်းကျောင်းဆောင်ရွက်ခြင်းက ဈေးကွက်တည်ငြိမ်မှုကို အကူအညီဖြစ်စေခဲ့ပြီး ပြည်တွင်းဈေးကွက်၌ ကွမ်းသီးဈေးနှုန်းများကို မြင့်တက်စေခဲ့ကြောင်းဖြင့် Campco လီမိတက်၏ ဥက္ကဋ္ဌ A Kishore Kumar Kodgi က ပြောကြားခဲ့သည်။ အဆိုပါ လီမိတက်သည် ယခင်ကတည်း ကပင် တရားမဝင်ကွမ်းသီးတင်သွင်းမှုကို နည်းလမ်းပေါင်းစုံဖြင့် ထိန်းချုပ်ဆောင်ရွက်ရန် အစိုးရထံ ကြိမ်ဖန်များစွာ တင်ပြထားခဲ့သည်။

      အိန္ဒိယနိုင်ငံ၌ ကုန်စည်အား ပြုပြင်ထုတ်လုပ်မှုလုပ်ငန်းစဉ်အပေါ် အခြေခံလျက် ကွမ်းသီးကို အနီနှင့် အဖြူဟူ၍ အတန်းအစားနှစ်မျိုးခွဲခြားထားသည်။ ကွမ်းသီးအဖြူသည် ရင့်မှည့်သော အသီးအား နေလှန်း၍ အခွံချွတ် ပြုပြင်ထားခြင်းဖြစ်ပြီး ဈေးကွက်၌ ကွမ်းသီးအဖြူ အဟောင်းသည် အသစ်ထက် ဈေးနှုန်းပိုမို မြင့်မားလေ့ရှိသည်။ ကွမ်းသီးအနီမှာမူ ကွမ်းသီးအစိမ်းကို အခွံချွတ်ပြီး ပြုတ်၍ အခြောက်လှန်းခြင်းဖြင့် ထုတ်လုပ်ခြင်းဖြစ်သည်။ ကာနာတကာပြည်နယ်ရှိ ကမ်းရိုးတန်း ဒေသများနှင့် ကီရာလာပြည်နယ်ရှိ ဒေသအချို့မှ ကွမ်းသီးအဖြူကို ထုတ်လုပ်မှုရှိပြီး ကာနာတကာ ပြည်နယ်ရှိ Shivamogga, Davangere နှင့် Chitradurga ခရိုင်များတွင် ကွမ်းသီးအနီကို အဓိက ထုတ်လုပ်ခြင်းဖြစ်ကြောင်း သိရှိရသည်။

Source: The Hindu Business Line, 29 Apr 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

            (၃)ပတ်တာကျင်းပခဲ့သည့်ဆွမ်ခရမ်ပွဲတော်ကို နိုင်ငံခြားသားခရီးသွား (၁.၉)သန်း လာရောက် လည်ပတ်ခဲ့ကြပီး ခရီးသွားကဏ္ဍမှဝင်ငွေဘတ်(၁၄၀)ဘီလီယံ ရရှိခဲ့ကြောင်း ထိုင်းနိုင်ငံ ခရီးသွားလာရေးနှင့် အားကစားဝန်ကြီးဌာန အဆိုအရသိရပါသည်။ ဧပရယ်(၁)ရက် နေ့မှ (၂၁) ရက်နေ့ထိ၂၁ရက်ကြာကျင်းပခဲ့သည့်ပွဲတော်မှ  ဘတ်(၁၄၀) ဘီလီယံ ရရှိခဲ့ခြင်း သည်မူလခန့်မှန်းထားသည့် ဘတ်(၁၃၂) ဘီလီယံ ကိုကျော် လွန်ခဲ့ခြင်း ဖြစ်ကြောင်း ခရီးသွား လာရေးနှင့် အားကစားဝန်ကြီး Sudawan Wangsupakitkosol က ၂၄.၄.၂၀၂၄ ကပြောကြား ခဲ့ပါသည်။ တည်းခိုနေထိုင်ခြင်းကဏ္ဍမှ ဘတ်(၄၂.၀၆)ဘီလီယံ၊ အစားအသောက်နှင့် အဖျော် ယမကာမှ ဘတ်(၃၃.၀၆)ဘီလီယံ၊ လူသုံး ကုန်ပစ္စည်းနှင့်အမှတ်တရပစ္စည်း‌ရောင်းချခြင်းမှ ဘတ်(၂၆.၈၃) ဘီလီယံ၊ ခရီးသွားလာခြင်းမှ ဘတ်(၁၅.၅၀)ဘီလီယံ၊ ဖျော်ဖြေရေးမှ ဘတ်(၁၄.၇၅)ဘီလီယံ၊ ခရီးသွားဝန်ဆောင်မှုမှဘတ်(၅.၈၆)ဘီလီယံနှင့် အခြားသုံးစွဲငွေ ဘတ်(၂.၂၃)ဘီလီယံ ရှိကြောင်း သိရှိရပါသည်။ ပွဲတော်ကိုနိုင်ငံခြားသားခရီးသွားများအပြင် ထိုင်းနိုင်ငံသား မြောက်များစွာကလည်း နိုင်ငံအနှံ့ခရီးသွားလာြကကာ ပါဝင်ဆင်နွှဲခဲ့ကြောင်း သိရှိရပါသည်။ နိုင်ငံခြားသားခရီးသွားများလာရောက်လည်ပတ်မှုမြင့်တက်လာစေရန်အတွက် ထိုင်းနိုင်ငံအစိုးရက ဗီဇာကင်းလွတ်ခွင့်များနှင့် ပြည်တွင်းဝင်ရောက်ခွင့်အချက်တစ်ချို့ကို ပယ်ဖျတ်ခြင်းတို့ ပြုလုပ်ခဲ့ပါသည်။ အများဆုံးလာရောက်လည်ပတ်သည့် နိုင်ငံခြားခရီးသွား များမှာ တရုတ်၊ မလေးရှား၊အိန္ဒိယ၊ရုရှား၊တောင်ကိုရီးယား၊လာအို၊ဗြိတိန်၊ထိုင်ဝမ်၊အမေရိကန် နှင့်အင်ဒိုနီးရှားနိုင်ငံတို့မှဖြစ်ကြောင်း သိရပါသည်။ ပွဲတော်ကာလအတွင်း ထိုင်းနိုင်ငံသား (၁၃၈၉၇၉၈၈) ဦး နိုင်ငံအနှံ့ခရီးသွားလာလည်ပတ်ခဲ့ကြပီး ထိုမှတစ်ဆင့် ဘတ်(၅၀.၁၂)  ဘီလီယံ ရရှိခဲ့ပါသည်။ ထိုင်းနိုင်ငံပြည်သူ့ရင်ပြင် Sanam Luang တွင်လည်း မဟာဆွမ်ခရန် ကမ္ဘာ့ရေကစားပွဲတော် ၂၀၂၄ ကိုကျင်းပခဲ့ပြီး လူပေါင်းများစွာ ပါဝင်ဆင်နွှဲခဲ့ ကြကာ အဆိုပါ ပွဲတော်သည် နိုင်ငံခြားသားခရီးသွားများကို အဓိကဆွဲဆောင် စေခဲ့ကြောင်း သိရပါသည်။

Source; Bangkok Post                                                                                                                                                                                                                                                                                                                                                                                             မြသူ(DOCA-YGN)

      ကမ္ဘောဒီးယားနိုင်ငံသည် ၂၀၂၄ ပထမ(၃)လတာ ကာလတွင် ပြည်ပသို့ သီဟိုဠ်စေ့ တင်ပို့မှုမှတစ်ဆင့် အမေရိကန်ဒေါ်လာ(၅၄၃)သန်းရရှိခဲ့ပြီး ယခင်နှစ်ကထက် ၁၃ ရာခိုင်နှုန်း တိုးမြင့်လာကြောင်း ကမ္ဘောဒီးယားနိုင်ငံ သီဟိုဠ်စေ့အသင်း၏ အစီအရင်ခံစာအရသိရပါသည်။ ကမ္ဘောဒီးယားနိုင်ငံသည် သီဟိုဠ်စေ့စုစုပေါင်းထုတ်လုပ်မှုတန်ချိန်(၄၇၄၀၀၀)ထဲမှ တန်ချိန် (၄၂၄၀၀၀)ကို ဗီယက်နမ်နိုင်ငံသို့ တင်ပို့ခဲ့ခြင်းဖြစ်ကြောင်း သိရပါသည်။ သီဟိုဠ်စေ့အသင်း ဥက္ကဋ္ဌ က နိုင်ငံတကာစျေးကွက်တွင် ဝယ်လိုအားမြင့်တက်လာခြင်းကျေးဇူးကြောင့် ယခုကဲ့သို့တင်ပို့မှု တန်ဖိုးမြင့်တက်လာခြင်းဖြစ်ကြောင်း၊ အချို့သီဟိုဠ်စေ့ထုတ်လုပ်သည့် နိုင်ငံများမှာ ရာသီဥတု ဆိုးရွားမှု၏ သက်ရောက်မှုကို ခံခဲ့ရကြောင်း၊ အာရှနှင့်အာဖရိကရှိအချို့ သီဟိုဠ်စေ့ ထုတ်လုပ် သည့်နိုင်ငံများမှာ အယ်နီညိုသက်ရောက်မှုကြောင့် သီဟိုဠ်စေ့စျေးနှုန်း မြင့်တက်နိုင်ကြောင်း ပြောကြားခဲ့ပါသည်။ ကမ္ဘောဒီးယားနိုင်ငံစိုက်ပျိုးရေး၊ သစ်တောနှင့်ငါး လုပ်ငန်းဝန်ကြီးဌာန၏ အဆိုအရနိုင်ငံ၏ စီရင်စုဆယ်စုတွင်သီဟိုဠ်စေ့စိုက်ခင်း(၇၀၀၀၀၀) ဟတ်တာရှိကြောင်း သိရပါ သည်။ ကမ္ဘောဒီးယားနိုင်ငံအစိုးရကလည်း သီဟိုဠ်စေ့စျေးကွက်ကို အာရုံစိုက်ထားပီး နိုင်ငံတော် သီဟိုဠ်စေ့မူဝါဒ(၂၀၂၂-၂၀၂၇)ကိုထုတ်ပြန်ထားပါသည်။ အဆိုပါမူဝါဒသည် ထုတ်လုပ်ခြင်း၊ စျေးကွက်ဝင်ရန် ပြင်ဆင်ခြင်း၊ တင်ပို့ခြင်းစသည့် အဓိကဗျူဟာမြောက်ရည်မှန်းချက် (၃)ခုကို အဆင့်မြှင့်တင်ရန် ပုံစံထုတ်ထားခြင်းဖြစ်ပါသည်။ သီဟိုဠ်စေ့အသင်းဥက္ကဋ္ဌ၏ အဆိုအရ ပြည်တွင်း သီဟိုဠ်စေ့ထုတ်လုပ်မှုမှာအဆိုပါမူဝါဒ ထုတ်ပြန်ပြီးချိန်တွင်  (၅)ရာခိုင်နှုန်းမှ (၁၀) ရာခိုင်နှုန်းထိ တိုးတက်လာကြောင်း သိရပါသည်။

Source;Khmer Times       

DOCA(ရန်ကုန်)

      မလက္ကာရေလက်ကြား၏ အဓိကပင်လယ်လမ်းကြောင်း‌ပေါ်ရှိ မလေးရှားနိုင်ငံ၏ အကြီးဆုံးဆိပ်ကမ်းသည် လာမည့်ဆယ်စုနှစ်များအတွင်း ၎င်းတို့၏စွမ်းရည်ကို နှစ်ဆတိုးမြှင့်ရန်စီစဥ်နေပြီး ကမ္ဘာလုံးဆိုင်ရာ ထောက်ပံ့‌ရေးကွင်းဆက်များပြောင်းလဲလာခြင်း၊ အရှေ့တောင်အာရှ၏ ထောက်ပံ့ပို့ဆောင်ရေးကဏ္ဍတွင် ပြိုင်ဆိုင်မှုများတိုးလာခြင်းတို့ကြောင့် အိမ်နီးချင်းနိုင်ငံဖြစ်သော စင်ကာပူနိုင်ငံကိုလိုက်၍ ၎င်း၏စွမ်းဆောင်ရည်ကို လာမည့်ဆယ်စုနှစ်များအတွင်း နှစ်ဆတိုးရန် စီစဥ်လျက်ရှိသည်။ မလေးရှားနိုင်ငံ၏ ဆိပ်ကမ်းဖြစ်သော Port Klang မှာ ကမ္ဘာ့ (၁၂) ခု‌မြောက် အကြီးဆုံးဆိပ်ကမ်းဖြစ်ပြီး (၂၀၂၁) ခုနှစ်တွင် စွမ်းရည် သတ်မှတ်ချက်အရ အရှေ့တောင်အာရှတွင် စင်ကာပူပြီးလျှင် ဒုတိယမြောက် အကြီးဆုံးဆိပ်ကမ်းဖြစ်သည်။ ၎င်းဆိပ်ကမ်းအား မလေးရှားနိုင်ငံ၏ ထင်ရှားသော ဆိပ်ကမ်းအော်ပ‌ရေတာတစ်ခုဖြစ်‌သည့် West Port Holdings အော်ပရေတာမှ မလေးရှားရင်းဂစ် ၃၉.၆ဘီလီယံ၊ ဒေါ်လာ ၈.၃၄ဘီလီယံရင်းနှီးမြှုပ်နှံထားပြီး ကွန်တိန်နာပေါင်း ၁၄သန်းမှ ၂၇သန်းအထိ တိုးမြှင့်သယ်ဆောင်နိုင်ရန်စီစဥ်ထားသည်။ ထိုကဲ့သို့ စွမ်းဆောင်ရည်မြှင့်တင်ရန်အတွက် နှစ် (၄၀) ကျော်ကြာမည်ဖြစ်ပြီး (၂၀၂၄) ခုနှစ်တွင် စတင်အကောင်အထည်ဖော်မည်ဖြစ်သည်။ မလေးရှားနိုင်ငံ၏ ဖယ်ဒရယ်အစိုးရသည် West Ports ၏ Port Klang ဆိပ်ကမ်းတိုးချဲ့မှုအစီအစဥ်ကို ပြီးခဲ့သည့်သြဂုတ်လတွင် အတည်ပြုခဲ့သည်။ ကွာလာလမ်ပူ၏ အနောက်တောင်ဘက်ရှိ အဆိုပါစီမံကိန်းတွင် လက်ရှိဆိပ်ကမ်း ၉ခုမှ ၁၇ခုအထိ ကွန်တိန်နာဂိတ်အဆောက်အအုံများတိုးမြှင့်ရန်အတွက် ကမ်းရိုးတန်းတစ်လျှောက် မြေယာပြန်လည်ပြင်ဆင်ခြင်းများပါဝင်မည်ကြောင်းသိရှိရပါသည်။

DOCA(ရန်ကုန်)

       အီတလီနိုင်ငံအခြေစိုက် မော်တော်ဆိုင်ကယ်ထုတ်လုပ်သည့် ဒူကာတီမော်တာကုမ္ပဏီသည် အာရှတိုက်တွင် ပထမဆုံးစက်ရုံကို ထိုင်းနိုင်ငံ၌ဖွင့်လှစ်ခဲ့ပြီး ၎င်းတို့၏ တင်ပို့မှုအချက်အချာနေရာအဖြစ် အသုံးပြုသွားရန် ရည်ရွယ်လျက်ရှိပါသည်။ ဘတ်သန်းလေးရာရင်းနှီးမြှုပ်နှံထားသည့် အဆိုပါစက်ရုံသည် တစ်နှစ်လျှင် မော်တော်ဆိုင်ကယ်အစီးရေ ၁၀၀၀၀ထုတ်လုပ်သွားမည်ဖြစ်သည်။ ထိုင်းနိုင်ငံသည် အရည်အသွေးမြင့်မော်တော်ဆိုင်ကယ်များအတွက် အရေးကြီးသောစျေးကွက်ဖြစ်ပြီး ထိုင်းနိုင်ငံကို အာရှပစိဖိတ်‌ဒေသသို့တင်ပို့ရာ အခြေစိုက်နေရာအဖြစ် ပြုလုပ်သွားရန်အလိုရှိကြောင်း ဒူကာတီမော်တာကုမ္ပဏီ၏ အလုပ်အမှု ဆောင်အဖွဲ့အကြီးအကဲ Claudio Domenicali က ပြောကြားခဲ့ပါသည်။ ထို့ပြင် ဒူကာတီ၏ မော်တော်ဆိုင်ကယ်မော်ဒယ်အမျိုးအစားအားလုံးကို ထိုင်းနိုင်ငံ၊ ရ‌ယောင်ရှိစက်ရုံတွင် ထုတ်လုပ်သွားမည်ဖြစ်ပီး အီတလီနိုင်ငံရှိ မိခင်စက်ရုံမှထုတ်လုပ်သည့် အရည်အသွေးနှင့် အဆင့်အတန်းအတိုင်းရရှိရန် သေချာကြောင်း Claudio Domenicali က ဆက်လက်ပြောကြားခဲ့ပါသည်။

      ဒူကာတီ၏ အာရှအပြင်ဘက် အဓိကစျေးကွက်တွင် အီတလီ၊ ဂျာမနီ၊ ဗြိတိန်နှင့် အမေရိကန်တို့ပါဝင်လျက်ရှိကြောင်း သိရှိရပါသည်။ တရုတ်နိုင်ငံသည်အဓိကစျေးကွက်ဖြစ်လာနိုင်သော်လည်း နိုင်ငံ၏ စီးပွားရေးနှေးကွေးလာမှုကြောင့် ဒူကာတီမော်တော်ဆိုင်ကယ်များမှာ ဝယ်လိုအားကျဆင်းနိုင်‌ကြောင်းသိရပါသည်။ ဒူကာတီသည် လွန်ခဲ့သည့်နှစ်တွင် မော်တော်ဆိုင်ကယ်အစီး‌ရေ ၅၈၀၀၀ရောင်းချခဲ့ရပါသည်။ ထိုင်းနိုင်ငံသည် ၂၀၂၃ခုနှစ်တွင် မော်တော်ဆိုင်ကယ်အမျိုးအစားပေါင်းစုံ ၂.၁၂သန်းရောင်းချခဲ့ရပြီး ၂၀၂၂ခုနှစ်ထက် ၅၂ရာခိုင်နှုန်းတိုးတက်လာခဲ့ကြောင်းသိရှိရပါသည်။

DOCA(ရန်ကုန်)