ပဲခူးတိုင်းဒေသကြီး၊ ပြည်ခရိုင်၊ ပြည်မြို့နေတိုင်ကြားသူသည် (၂၃-၁-၂၀၂၄)ရက်နေ့တွင် မော်လမြိုင်မှ ပြည်မြို့သို့ ခရီးဆောင်အိတ်နှင့်အတူ စီးနင်းလိုက်ပါလာပြီး အင်းမမြို့အရောက်တွင် မိမိ၏ခရီးဆောင်အိတ်မရှိတော့ကြောင်းနှင့် လွဲမှားသွားကြောင်းသိခဲ့ရသဖြင့် စပယ်ယာအားမေးမြန်းရာတွင် သုံးဆယ်မြို့တွင် ဆင်းသည့်ခရီးသည်၏အိတ်နှင့် လွဲမှားပါသွားခဲ့ကြောင်းသိရပါသည်။ လွဲမှားသွားသည့်အိတ်ပြန်လည်ရရှိရေး ကားဒရိုင်ဘာ၊ စပယ်ယာတို့နှင့် မိမိဘာသာချိတ်ဆက်ဆောင်ရွက်ခဲ့ရာ ထူးခြားမှုမရှိသည့်အတွက် ဖြေရှင်းဆောင်ရွက်ပေးပါရန် ပြည်ခရိုင် စားသုံးသူရေးရာဦးစီးဌာန၊ CICC သို့ ဆက်သွယ်တိုင်ကြားလာခဲ့ပါသည်။
တိုင်ကြားမှုနှင့်ပတ်သက်၍ ပြည်ခရိုင်ဦးစီးမှူးနှင့် CICC မှ တာဝန်ရှိသူများသည် တိုင်ကြားသူ၊ တိုင်ကြားခံရသူယာဉ်မောင်းနှင့် ယာဉ်နောက်လိုက်တို့အား နှစ်ဦးနှစ်ဖက်ခေါ်ယူတွေ့ဆုံ၍ ညှိနှိုင်းဆောင်ရွက်ပေးခဲ့ရာ တိုင်ကြားသူ၏ ခရီးဆောင်အိတ်နှင့် ခရီးဆောင်အိတ်ထဲရှိ ပစ္စည်းတန်ဖိုးငွေ(၈)သိန်းကျပ်ကို ယာဉ်မောင်းနှင့်ယာဉ်နောက်လိုက်တို့က ပြန်လည်ပေးလျော်ရန်နှင့် တိုင်ကြားသူခရီးသည်၏ ခရီးဆောင်အိတ်အား ယာဉ်မောင်းနှင့်ယာဉ်နောက်လိုက်တို့က မူလအခြေအနေအတိုင်း ပြန်လည်ပေးအပ်နိုင်မည်ဆိုပါက တိုင်ကြားသူသို့ပေးလျော်ခဲ့သည့် ငွေ(၈)သိန်းကျပ်အား တိုင်ကြားသူက ယာဉ်မောင်းနှင့် ယာဉ်နောက်လိုက်တို့အား ပြန်လည်ပေးအပ်သွားရန် သဘောတူညီမှုရရှိခဲ့ကြောင်း သတင်းရရှိပါသည်။
DOCA(ပဲခူး)