သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်မှာကြားချက် အရ မြောက်ပိုင်းခရိုင်အတွင်းရှိ စက်မှုဇုန်များတွင် စီးပွားရေးလုပ်ကိုင်ဆောင်ရွက်နေသော လုပ်ငန်းရှင်များ၏ လုပ်ငန်းဆောင်ရွက်မှုအခက်အခဲများကို သိရှိနိုင်ရန် မြောက်ပိုင်းခရိုင်ဦးစီးမှူးရုံးမှ ခရိုင်ဦးစီးမှူး၊ ဦးအောင်တင်စိုးနှင့်ဝန်ထမ်းများသည် အမှတ်(၁၄၁)၊ ဦးတရုတ်ကြီးလမ်း၊ စက်မှုဇုန်(၃)၊ လှိုင်သာယာမြို့နယ်ရှိ King Metal အလူမီနီယံစက်ရုံသို့ သွားရောက်စစ်ဆေးခဲ့ရာ စက်ရုံပိတ်ထား ကြောင်း၊ စက်ရုံတွင် စက်ယူနစ်များမရှိတော့ဟု သိရှိရပြီး အခြားလုပ်ငန်း လုပ်ကိုင်ခြင်းမရှိဘဲ King Metal စက်ရုံအဖြစ်သာ ဆက်လက်သုံးစွဲထားကြောင်း သိရှိရပါသည်။

DOCA(ရန်ကုန်)

      စားသုံးသူပြည်သူများအတွက် စားသုံးကုန်စည်များ ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသောကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပြဋ္ဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားဖော်ပြထားမှုအခြေအနေတို့နှင့်စပ်လျဉ်း၍ သက်ဆိုင်ရာ မိတ်ဖက်ဌာနများနှင့်ပူးပေါင်းကာ ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်လျက်ရှိရာ ၂၀၂၄ခုနှစ်၊ ဧပြီလ (၁၆)ရက်နေ့မှ (၃၀)ရက်နေ့အတွင်း၌ ပြည်ခရိုင်၊ ပြည်မြို့၊ အောင်မင်္ဂလာဈေးရှိ ကုန်စုံဆိုင်များရှိ စားသုံးဆီအမျိုးမျိုးကိုလည်းကောင်း၊ ရွှေတောင်မြို့၊ ယွန်းတန်းရပ်ကွက်၊ ကုန်စုံဆိုင်များရှိ စားသုံးဆီအမျိုးမျိုးကိုလည်းကောင်း၊ ပေါက်ခေါင်းမြို့၊ မြို့ပေါ်ဆေးဆိုင်များရှိ ဆေးအမျိုးမျိုးကိုလည်းကောင်း ဈေးကွက်စောင့်ကြည့်စစ်ဆေးခြင်းများကို သက်ဆိုင်ရာ မြို့နယ်တာဝန်ခံနှင့် ဝန်ထမ်းများသွားရောက်၍ ကုန်အညွှန်းအမှတ်အသားပါ သတ်မှတ်ချက်များနှင့်ကိုက်ညီမှုရှိသော ကုန်စည်များကို တင်သွင်းရောင်းချခြင်းရှိ/မရှိ၊ သက်ဆိုင်ရာဌာန၏ ထောက်ခံမှုရှိ/ မရှိ ဈေးကွက်စောင့်ကြည့်စစ်ဆေးခဲ့ကြပြီး စောင့်ကြည့်စစ်ဆေးခဲ့သည့် ကုန်စည်များတွင် ကုန်အညွှန်းအမှတ်အသားဖော်ပြချက်များနှင့် ကိုက်ညီမှုရှိကြောင်းသိရှိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် ရပ်ကွက်/ ကျေးရွာနေ စားသုံးသူပြည်သူများအား စားသုံးသူကာကွယ်ရေးဆိုင်ရာအသိပညာများ ကျယ်ကျယ်ပြန့်ပြန့်သိရှိနိုင်စေရေးရည်ရွယ်၍ ခရိုင်အတွင်းမြို့နယ်များရှိ ရပ်ကွက်/ ကျေးရွာများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက်လုပ်ဆောင်လျက်ရှိရာ ပြည်ခရိုင်အတွင်း ၂၀၂၄ခုနှစ်၊ ဧပြီလ(၁၆)ရက်နေ့မှ (၃၀)ရက်နေ့အတွင်း ပြည်မြို့နယ်ရှိ အောင်မင်္ဂလာဈေးသို့လည်းကောင်း၊ ရွှေတောင်မြို့နယ်ရှိ မင်းတဲကျွန်းအုပ်စု၊ မင်းတဲကျွန်းရွာသို့လည်းကောင်း၊ ပန်းတောင်းမြို့နယ်ရှိ ဝန်လိုရပ်ကွက်နှင့် ပေါက်ခေါင်းမြို့နယ်ရှိအမှတ် (၁) ရပ်ကွက်သို့ သက်ဆိုင်ရာမြို့နယ်တာဝန်ခံများနှင့် ဝန်ထမ်းများသည် မြို့နယ်ပူးပေါင်းမိတ်ဖက်ဌာနဆိုင်ရာများနှင့်အတူသွားရောက်၍ စားသုံးသူကာကွယ်ရေးဆိုင်ရာ အသိပညာပေးဟောပြောခြင်းများဆောင်ရွက်ခဲ့ကြပါသည်။

      အဆိုပါအသိပညာပေးဟောပြောခြင်းများဆောင်ရွက်ရာတွင် သက်ဆိုင်ရာမြို့နယ်တာဝန်ခံများက စားသုံးသူအခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖော်ပြခြင်းဆိုင်ရာအချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့်နည်းလမ်းများ၊ တိုင်ကြားနိုင်မည့် ဖုန်းနံပါတ်နှင့်လိပ်စာ၊ စားသုံးသူကာကွယ်ရေးဥပဒေပါ ပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟု တားမြစ်ထုတ်ပြန်ထားသော ကုန်စည်များအား ရွေးချယ်ဝယ်ယူခြင်းမပြုရန်နှင့် ကုန်အညွှန်းအမှတ်အသား ပြည့်စုံစွာပါဝင်သောကုန်စည်များကိုသာ ရွေးချယ်ဝယ်ယူကြရန် အသိပညာပေး ဟောပြောခြင်းများဆောင်ရွက်ခဲ့ပြီး စားသုံးသူအသိပညာပေးဆိုင်ရာ အသိပညာပေးလက်ကမ်းစာစောင်များလည်း ဝေငှပေးခဲ့ကြောင်းသိရှိရပါသည်။

DOCA(ပဲခူး)

   ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ်အတွင်းရှိ တွံတေးစည်ပင်သာယာဈေးအတွင်း စားအုန်းဆီလက်လီ၊ လက်ကားဖြန့်ဖြူးရောင်းချပေးလျက်ရှိသော စားအုန်းဆီ ကိုယ်စားလှယ်ဆိုင်ကြီးများ ဈေးအတွင်း/အပြင် စားအုန်းဆီရောင်းချဖြန့်ဖြူးပေးလျှက်ရှိသော ကုန်ခြောက်ဆိုင်များသို့ ညွှန်ကြားချက်နှင့်အညီ စားသုံးသူများအလွယ်တကူဝယ်ယူရရှိနိုင်ရန်နှင့် ရည်ညွှန်းဈေးအပေါ် သတ်မှတ်ထားသည့် အမြတ်(၂)ရာခိုင်နှုန်း၊ ဖြစ်သင့်ဖြစ်ထိုက်သည့် သယ်ယူပို့ဆောင်မှုစရိတ်များအပြင် အမြတ်ရာခိုင်နှုန်းမြင့်မားမှုဖြင့် ထပ်ဆောင်းရောင်းချမှုများ ရှိ/မရှိ မေလ(၂)ရက်နေ့၊ နေ့လယ်(၁၁:၀၀)နာရီအချိန်တွင် တာဝန်ရှိသူများက ကွင်းဆင်းစစ်ဆေးခဲ့ကြောင်း သိရသည်။

   ထိုသို့ ကွင်းဆင်းစစ်ဆေးခဲ့ရာတွင် မြို့နယ်အထွေထွေအုပ်ချုပ်ရေးဦးစီးဌာနမှ ဒု-ဦးစီးမှူးနှင့်ဝန်ထမ်းများ၊ မြို့နယ်ရဲတပ်ဖွဲ့မှ ရဲတပ်ဖွဲ့ဝင်များ၊ မြို့နယ်စည်ပင်သာယာရေးဦးစီးဌာနမှ ဈေးတာဝန်ခံနှင့်ဝန်ထမ်းများ၊ မြို့နယ်မီးသတ်ရဲတပ်ဖွဲ့မှ တပ်ဖွဲ့ဝင်များနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့က တွံတေးမြို့နယ် စည်ပင်သာယာဈေးအတွင်းရှိ စားအုန်းဆီလက်လီ၊ လက်ကားရောင်းချဖြန့်ဖြူးပေးလျက်ရှိသော ကိုယ်စားလှယ်ဆိုင်ကြီးများနှင့် စားအုန်းဆီ ရောင်းချ နေသည့် ကုန်ခြောက်ဆိုင်များအား စားသုံးသူပြည်သူများအနေဖြင့် ဈေးနှုန်းမှန်ကန်စွာ အခက်အခဲမရှိ ဝယ်ယူသုံးစွဲနိုင်ရေးအတွက် ရည်ညွှန်းဈေးအပေါ် သတ်မှတ်ထားသည့်အမြတ်(၂)ရာခိုင်နှုန်း၊ မိမိဒေသအရောက် သယ်ယူပို့ဆောင်မှုစရိတ်တို့ဖြင့်  ဈေးကွက်အတွင်း အမှန်တကယ်ဖြန့်ဖြူး ရောင်းချနေမှုရှိ/မရှိနှင့် ဝိသမလောဘစောဖြင့် ဈေးနှုန်းမြှင့်တင် ရောင်းချနေခြင်း၊ ဈေးကစားရန် ရည်ရွယ်ချက်ဖြင့် တရားမဝင်သိုလှောင်ထားခြင်းများမပြုလုပ်ကြရန်နှင့် ထိုသို့ပြုလုပ်မှုများ စစ်ဆေးတွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေအရ ထိရောက်စွာအရေးယူ ဆောင်ရွက်သွားမည်ဖြစ်ကြောင်း ဈေးကွက်အတွင်း အသိပညာပေးကွင်းဆင်းစစ်ဆေးခဲ့ကြောင်း သိရသည်။

DOCA(ရန်ကုန်)

          ရန်ကုန်တိုင်းဒေသကြီး၊ တွံတေးခရိုင်၊ ဒလမြို့နယ်အတွင်းရှိ စားအုန်းဆီလက်လီ၊ လက်ကားရောင်းချဖြန့်ဖြူးလျှက်ရှိသော စားအုန်းဆီကိုယ်စားလှယ်ဆိုင်ကြီးများအနေဖြင့် မိမိတို့မြို့နယ်အတွင်းရှိ စားသုံးသူပြည်သူများအတွက် အခက်အခဲမရှိ အလွယ်တကူဝယ်ယူနိုင်စေရန်အတွက် ဈေးအတွင်း/အပြင် ရပ်ကွက်ကျေးရွာများသို့ လက်လီ၊ လက်ကားဖြန့်ဖြူးရောင်းချနေမှုအား မေလ(၃)ရက်နေ့၊ နံနက်(၀၉:၀၀)နာရီအချိန်တွင် ကွင်းဆင်းစစ်ဆေးခဲ့ကြောင်း သိရသည်။

          ထိုသို့ကွင်းဆင်းစစ်ဆေးရာတွင် မြို့နယ်စည်ပင်သာယာရေးဦးစီးဌာနမှ တာဝန်ရှိသူများ နှင့်စားသုံးသူရေးရာဦးစီးဌာနမှ မြို့နယ်တာဝန်ခံတို့သည် ခရေလမ်း၊ အမှတ်(၉၄၃)၊ ကမာကဆစ်ရပ်ကွက် စားအုန်းဆီကိုယ်စားလှယ် ဒေါ်ဇင်ညိုလတ်ဆီဆိုင်တွင် စားအုန်းဆီလက်လီ၊ လက်ကားဖြန့်ဖြူးရောင်းချနေမှုအခြေအနေနှင့် မိမိတို့မြို့နယ်အတွင်းရှိ စားသုံးသူပြည်သူများ အခက်အခဲမရှိ ဝယ်ယူသုံးစွဲနိုင်ရေးအတွက် သတ်မှတ်ခွဲတမ်းများခွဲဝေရရှိပြီးဖြစ်၍ ရရှိသည့် ခွဲတမ်းများအတွက် သတ်မှတ်ထားသည့်အခြေခံရည်ညွှန်းဈေးအပေါ် (၂)ရာခိုင်နှုန်းအမြတ်ထက် မပိုသောဈေးနှုန်းဖြင့် ရောင်းချကြရန် ဖြစ်သင့်ဖြစ်ထိုက်သည့် သယ်ယူပို့ ဆောင်စရိတ်များဖြင့် အမှန်တကယ်ဖြန့်ဖြူးရောင်းချနေမှု ရှိ/မရှိ၊ ဝိသမလောဘဇောဖြင့် ဈေးနှုန်းမြှင့်တင် မရောင်းချရန်၊ ဈေးကစားရန်ရည်ရွယ်ချက်ဖြင့် တရာမဝင်သိုလှောင်ထားခြင်းများ မပြုလုပ်ကြရန်နှင့် ထိုသို့ ပြုလုပ်မှုများအား စစ်ဆေးတွေ့ရှိပါက အရေးကြီးကုန်စည်နှင့်ဝန်ဆောင်မှု ဥပဒေအရ ထိရောက်စွာအရေးယူ ဆောင်ရွက်သွားမည်ဖြစ်ကြောင်းကို အသိပညာပေးကွင်းဆင်း စစ်ဆေးခဲ့ကြောင်း သိရသည်။

DOCA(ရန်ကုန်)