ပြည်ပကုန်သွယ်မှုသတင်းများ

အသေးစားလုပ်ငန်းများအတွက် တရုတ်နိုင်ငံ၏အခွန်သက်သာခွင့်

          တရုတ်နိုင်ငံတွင်  အသေးစားလုပ်ငန်းများ ဖွံ့ဖြိုးတိုးတက်စေရန် လုပ်သာကိုင်သာရှိသည့် စီးပွားရေးပတ်ဝန်းကျင်ကို တက်ကြွစွာ ဖန်တီးဆောင်ရွက်ပေးလျှက်ရှိကြောင်း၊ ထိုသို့ဆောင်ရွက် ရာတွင် အငယ်စားနှင့်အသေးစားလုပ်ငန်းများ၏ ဘဏ္ဍာရေးဝန်ထုပ်ဝန်ပိုးများကို လျော့ပါးသက်သာစေသောဘဏ္ဍာရေး အခက်အခဲများကို ဖြေရှင်းပေးသည့် စီမံဆောင်ရွက်မှုများ ပါဝင်ကြောင်း၊ တရုတ်နိုင်ငံက အသေးစားလုပ်ငန်းများအတွက် အဓိကဆောင်ရွက်ပေးထားသည့် အခွန်သက်သာခွင့်များတွင် အသေးစားနှင့် အမြတ်အစွန်းနည်းပါးသည့် လုပ်ငန်းများအတွက် ကော်ပိုရိတ်ဝင်ငွေခွန် ဖြတ်တောက်ပေးမှု၊ အသေးစားလုပ်ငန်းပိုင်ရှင်များအတွက် တစ်သီးပုဂ္ဂလဝင်ငွေခွန် လျှော့ချပေးမှု၊ အသေးစားအခွန်ဝန်ထမ်းများအတွက်  တန်ဖိုးဖြည့်အခွန်၊ အခြားအခွန်အခနှင့် အခကြေးငွေများ သက်သာခွင့်နှင့် အသေးစားနှင့်အငယ်စားလုပ်ငန်းများ၏ ဘဏ္ဍာရေးကုန်ကျစရိတ်များ ပိုမို သက်သာစေရန် အခွန်စီမံဆောင်ရွက်ပေးမှုများ ပါဝင်ကြောင်း သိရှိရပါသည်။

(ရင်းမြစ်-  နန်နင်းမြို့စီးပွားရေးသံမှူးပေးပို့သည့်သတင်း)

စားအုန်းဆီဈေး ကြီးမြင့်မှုကို ကိုင်တွယ်ဖြေရှင်းမည်

          ယခင်နှစ်က တစ်ပုလင်းလျှင် ဘတ်ငွေ(၅၀-၆၀)သာရှိခဲ့သည့်စားအုန်းဆီဈေးနှုန်းများသည် ယခုကာလ(ဇန်နဝါရီလ)အတွင်း တစ်ပုလင်းလျှင်ဘတ်ငွေ(၇၀)အထိတက်သွားပြီးနောက် စီးပွား ရေးနှင့်ကူးသန်းရောင်းဝယ်ရေးဝန်ကြီးဌာနက အဆိုပါဈေးနှုန်းမြင့်တက်သွားခြင်းကို ကိုင်တွယ် ဆောင်ရွက်မည်ဟုကတိပြုခဲ့ကြောင်း၊ စားအုန်းဆီဈေးနှုန်းများမြင့်တက်ရသည့် အကြောင်းအရင်း မှာ စားအုန်းဆီအစေ့နှင့်စားအုန်းဆီကြမ်းဈေးနှုန်းများမြင့်တက်ခဲ့၍ဖြစ်ရာ ဆီအုန်းစေ့ဈေးနှုန်းများ သည်(၅)နှစ်တာကာလအတွင်း ဘတ်ငွေ(၁၀-၁၁)ထိ မြင့်တက်ခဲ့ရာ ထိုသို့ဈေးနှုန်းမြင့်မားမှုသည် တောင်သူများကို အကျိုးရှိစေမည်ဖြစ်သော်လည်း စားသုံးသူများကိုထိခိုက်စေကြောင်း၊ စိုက်ပျိုးသူ လယ်သမားများ၊ ထုတ်လုပ်သူများနှင့် စားသုံးသူများစသည့် သက်ဆိုင်သူအားလုံးတို့အတွက် ဟန်ချက်ညီမျှတစွာ အကျိုးရှိစေရန်အတွက် ပြည်တွင်းကုန်သွယ်ရေးဉီးစီးဌာနနှင့် လုပ်ငန်းအဖွဲ့ကို

ညွှန်ကြားခဲ့သည်ဟု ပြောကြားခဲ့ကြောင်း၊ မည်သို့ပင်ဆိုစေကာမူ အစိုးရက ဈေးကွက်တွင်ဝင်ရောက် စွက်ဖက်၍ စားအုန်းဆီကို ဈေးနှုန်းထိန်းချုပ်မှုစာရင်းတွင် ထည့်သွင်းရန်မဖြစ်နိုင်ကြောင်း၊ ပြည်တွင်းကုန်သွယ်ရေးဉီးစီးဌာန၊ ညွှန်ကြားရေးမှူးချုပ်၏ အဆိုအရ ကုန်တိုက်များနှင့် လက်လီလက်ကားဆိုင်များတွင် ရောင်းချသော စားအုန်းဆီဗူးများ၏ ဈေးနှုန်းများသည် ၎င်းတို့၏ဈေးနှုန်းများကို ထိန်းသိမ်းပေးရန် ဌာနမှတောင်းဆိုညှိနှိုင်းထားသည့် ဈေးနှုန်းအတိုင်းအတာအတွင်း ထိန်းသိမ်းထားဆဲဖြစ်ကြောင်း၊ ဖေဖော်ဝါရီလ ဆီအုန်းထွက်ရှိချိန်၌ ‌ဈေးနှုန်းအခြေအနေ ပိုမိုကောင်းမွန်လာမည်ဟု ခန့်မှန်းထားကြောင်း၊ ထိုင်းနိုင်ငံတွင် စားအုန်းဆီကြမ်းသိုလှောင်ထားရှိမှုမှာ တန်ချိန် (၁၇၀၀၀၀)သာရှိရာ တိုင်းပြည်လိုအပ်ချက်ဖြစ်သည့် တန်ချိန်(၃၀၀၀၀၀)နှင့်နှိုင်းယှဉ်ပါက သိသာစွာ နည်းပါးလွန်းသည်ဟု ယူဆရကြောင်း၊ စားအုန်းဆီကြမ်းဈေးနှုန်းမှာ တစ်ကီလိုဂရမ်လျှင် (၅၆)ဘတ်ရှိရာ ၎င်းမှာယခင်နှစ်ကာလတူ ဇန်နဝါရီလကရရှိခဲ့သည့်(၃၅)ဘတ်ထက် ပိုမို မြင့်တက်ခဲ့ခြင်းဖြစ်ကြောင်း၊ ပြည်တွင်းစားအုန်းဆီကြမ်းဈေးနှုန်းမှာ ကမ္ဘာ့ဈေးကွက်ပေါက်ဈေးနှုန်းဖြစ်သည့် (၄၄)ဘတ်ထက် တစ်ကီလိုဂရမ်လျှင် (၁၂-၁၃)ဘတ်ခန့် မြင့်တက်နေကြောင်း၊ ယခုနှစ်တွင် ဆီအုန်းစေ့တန်ချိန်(၁၇)သန်းခန့်ထောက်ပံ့ဖြည့်တင်းနိုင် လိမ့်မည်ဟု စိုက်ပျိုးရေးစီးပွားရေးရုံးမှ ခန့်မှန်းထားကြောင်း၊ ပြည်တွင်းဝယ်လိုအားအနေဖြင့် ပြည်တွင်းထောက်ပံ့ဖြည့်ဆည်းမှုနှင့် အနီးစပ်ဆုံးကိုက်ညီမည်ဟု မျှော်မှန်းကြောင်း၊ စုစုပေါင်း ထောက်ပံ့ဖြည့်ဆည်းမှုတွင် တန်ချိန် (၁)သန်းမှာ စားအုန်းဆီထုတ်လုပ်ရန်နှင့် ကျန်ရှိသည် များမှာ ဇီဝဒီဇယ်အတွက်နှင့် သိုလှောင်ထားရန်အတွက်ဖြစ်ကြောင်း သိရှိရပါသည်။

(ရင်းမြစ်-ဘန်ကောက်မြို့စီးပွားရေးသံမှူးပေးပို့သည့်သတင်း)

ခရိုင်တစ်ခု ထုတ်ကုန်တစ်ခု အစီအစဉ် မြှင့်တင်ဆောင်ရွက်

          အိန္ဒိယနိုင်ငံ၌ ပြည်တွင်းကုန်ထုတ်လုပ်မှုကိုမြှင့်တင်၍ပြည်ပသို့တင်ပို့နိုင်ရေး တွန်းအား ပေးဆောင်ရွက်လျှက်ရှိရာ အိန္ဒိယစက်မှုလုပ်ငန်းမြှင့်တင်ရေးနှင့် ပြည်တွင်းကုန်သွယ်မှုဉီးစီးဌာန (DPIIT) သည်ခရိုင်တစ်ခုထုတ်ကုန်တစ်ခု(ODOP Initiative)အကောင်အထည်ဖော်ဆောင်မှု ဆိုင်ရာညီလာခံဆွေးနွေးပွဲကို ဇန်နဝါရီ၊တတိယပတ်တွင် ကျင်းပခဲ့ရာ အဆိုပါဌာနမှ အရန် အတွင်းဝန်၊ပြည်နယ်/ ပြည်ထောင်စုနယ်မြေ အစိုးရအဖွဲ့များမှအတွင်းဝန်များ၊ ပြည်နယ်စက်မှု လုပ်ငန်းမြှင့်တင်ရေးဌာနများမှ တာဝန်ရှိသူများ တက်ရောက်ဆွေးနွေးခဲ့ကြကြောင်း၊ ဂျမူးနှင့် ကက်ရှ်မီးယားပြည်နယ်သည် သစ်ကြားသီးနှင့် ပန်းသီးတို့ကို ခရိုင်တစ်ခုထုတ်ကုန်တစ်ခု(ODOP)လုပ်ငန်းအဖြစ် Dubai Expo 2020 ၌ ပါဝင်ပြသလျက် ရောင်းသူဝယ်သူ ချိတ်ဆက်တွေ့ဆုံပွဲများပြုလုပ်ခြင်းဖြင့် ကုန်သွယ်မှု လွယ်ကူချောမွေ့စေရေး ကို အောင်မြင်စွာလုပ်ဆောင်နိုင်ခဲ့ကြောင်း၊ဥတာပရာဒေ့ရှ်ပြည်နယ်သည် ၎င်း၏ခရိုင်များ အားလုံးမှ လက်မှုအနုပညာရှင်များနှင့် ကုန်ထုတ်လုပ်သူများအတွက် ODOP အကောင်အထည် ဖော်ဆောင်မှုကို စံနမူနာပြလုပ်ဆောင်နိုင်သကဲ့သို့ တြိပူရပြည်နယ်သည်လည်း ပြည်နယ် အစိုးရနှင့် ODOP အဖွဲ့များအကြား ပူးပေါင်းလုပ်ကိုင်မှုကို အောင်မြင်စွာ ဆောင်ရွက်နိုင်သည့် လမ်းပြမြေပုံအားချမှတ်နိုင်ခဲ့ပြီး ခရိုင်(၈)ခုလုံးမှ ထုတ်ကုန်(၁)မျိုးစီအား ပြည်ပတင်ပို့နိုင်ရေး ဆက်လက်ဆောင်ရွက်လျက်ရှိကြောင်း၊ DPIIT ဌာနရှိ အိန္ဒိယရင်းနှီးမြှုပ်နှံမှုအေဂျင်စီသည် ODOP လုပ်ငန်းများအတွက် ထုတ်ကုန်ဖွံ့ဖြိုးတိုးတက်မှု၊ စွမ်း‌ဆောင်ရည်မြှင့်တင်မှုနှင့်ကုန်သွယ်မှု လွယ်ကူစေရေး အစီအမံများကိုဆောင်ရွက်လျှက်ရှိကြောင်း၊ ပြည်နယ်များမှထုတ်ကုန်ရောင်းချ လိုသူများ၏ အချက်အလက်များကိုမျှဝေဖလှယ်၍ ဝယ်လက်များနှင့် ချိတ်ဆက်နိုင်ရေး ODOP လုပ်ငန်းအဖွဲ့များက ဆက်လက်လုပ်ဆောင်မည်ဖြစ်ကြောင်း၊ အနာဂတ်ကာလတွင် ခရိုင်တစ်ခု ထုတ်ကုန်တစ်ခု (ODOP)လုပ်ငန်းများ အောင်မြင်စွာ ဖော်ဆောင်နိုင်ရေးအတွက် ပြည်နယ် တစ်ခုစီတွင် တာဝန်ယူ‌‌ဆောင်ရွက်မည့်အရာရှိများကို ခန့်အပ်မည်ဖြစ်ကြောင်း၊ အိန္ဒိယအစိုးရ သည် ကျေးလက်ဒေသရှိ လက်မှုအနုပညာရှင်များ၏ ခရိုင်တစ်ခုထုတ်ကုန်တစ်ခု ODOP လုပ်ငန်းအစီအစဉ်မှ ထုတ်ကုန်များကို အင်တာနက်ကွန်ယက်စနစ်၌ အခြေပြုရောင်းချနိုင်ရေးအတွက် e-commerce  လုပ်ငန်းဆောင်ရွက်သည့် ကုမ္ပဏီကြီးများနှင့် ဆွေးနွေးဆောင်ရွက်လျက်ရှိကြောင်း၊ DPIIT ဌာနမှ ညွှန်ကြားရေးမှူးက အိန္ဒိယနိုင်ငံ တစ်ဝန်းလုံးတွင်  ODOP Initiative အား ကျယ်ပြန့်အောင်မြင်စွာ အကောင်အထည်ဖော်ရေး ဆောင်ရွက်လျက်ရှိရာ ပြည်နယ်များရှိ စက်မှုလုပ်ငန်းဌာနများအနေဖြင့် တက်ကြွစွာ ပါဝင်ပံ့ပိုးပေးကြရန် တိုက်တွန်းပြောကြားခဲ့ကြောင်း သိရှိရပါသည်။

(ရင်းမြစ်-နယူးဒေလီမြို့ စီးပွားရေးသံမှူးပေးပို့သည့်သတင်း)

ပဲမျိုးစုံနှင့် ဆီထွက်သီးနှံပိုမိုစိုက်ပျိုးရန်အိန္ဒိယအစိုးရလျာထား

          အိန္ဒိယနိုင်ငံ  စိုက်ပျိုးရေးနှင့် တောင်သူလယ်သမားများ ဖူလုံရေးဝန်ကြီးဌာနသည်  ယခု နှစ်အတွက် နွေသီးနှံစိုက်ပျိုးရေးသုံးသပ်မှုဆိုင်ရာ အမျိုးသားအဆင့်ညီလာခံဆွေးနွေးပွဲကို ဇန်နဝါရီနောက်ဆုံးပတ်တွင် Video Conference စနစ်ဖြင့်ကျင်းပခဲ့ရာ လယ်ယာစိုက်ပျိုးရေး ဆိုင်ရာ အဆင့်မြင့်အရာရှိများက နွေသီးနှံတိုးချဲ့စိုက်ပျိုးမည့်အစီအစဉ်များကို ဆွေးနွေးတင်ပြခဲ့ ကြကြောင်း၊ ထိုသို့တိုးချဲ့စိုက်ပျိုးရန် လျာထားသည့်သီးနှံများတွင်  ပဲမျိုးစုံစိုက်ဧက ဟက်တာ (၂၁.၀၅) သိန်း၊ ဆီထွက်သီးနှံဟက်တာ(၁၃.၇၈)သိန်းနှင့် အခြားသီးနှံဟက်တာ (၁၇.၈၉)သိန်း ပါဝင်မည်ဖြစ်ကြောင်း၊နွေစပါးစိုက်ပျိုးမှုမှာ ယခင်နှစ်က ဟက်တာ (၄၀)သိန်းခန့်ရှိပြီး ယခုနှစ်တွင် ဟက်တာ (၃၀-၄၀)ခန့် စိုက်ပျိုးနိုင်ဖွယ်ရှိကြောင်း၊ ပဲမျိုးစုံနှင့် ဆီထွက်သီးနှံအား စပါးစိုက်ပျိုးရန် ရည်မှန်းထားသည့် လှပ်မြေဧရိယာနေရာများ၌ တိုးချဲ့စိုက်ပျိုးမည်ဖြစ်ကြောင်း၊ အိန္ဒိယ၏ နွေသီးနှံပဲမျိုးစုံတွင် ပဲတီစိမ်းသည် အဓိကသီးနှံဖြစ်ရာ ယခင်နှစ်၌ မဒ္ဒရာပရာဒေ့ရှ်ပြည်နယ်များ တွင်  စုစုပေါင်းဟက်တာ(၁၄.၄၅)သိန်းခန့် စိုက်ပျိုးခဲ့ပြီး မတ်ပဲကို ဒုတိယအများဆုံးအဖြစ်  ဟက်တာ(၂.၉၈)သိန်းစိုက်ပျိုးခဲ့ကြောင်း၊ ယခုနှစ် နွေသီးနှံရာသီ၌ ပဲတီစိမ်း ဟက်တာ(၁၇.၅၈)သိန်း၊ မတ်ပဲ ဧရိယာဟက်တာ(၃.၁၃)သိန်းနှင့် အခြားပဲများကို ဟက်တာ(၀.၃၄)သိန်း စိုက်ပျိုးရန် လျာထားကြောင်း၊ နွေရာသီတွင် ဆီထွက်သီးနှံဖြစ်သည့် မြေပဲကို ယခင်နှစ်က စိုက်ဧက ဟက်တာ (၅.၉၅)သာ စိုက်ပျိုးရာမှ ယခုနှစ်တွင် ဟက်တာ(၇.၆၀) သိန်း၊ နှမ်းကို ယခင်နှစ်က စိုက်ဧက ဟက်တာ(၄.၂၇)သာစိုက်ပျိုးရာမှ ယခုနှစ်တွင် ဟက်တာ(၅.၂၅) သိန်းသို့ တိုးမြှင့်စိုက်ပျိုးရန်လျာထားကြောင်း၊ ယခုနှစ် စိုက်ပျိုးရေရရှိနိုင်မှုက နွေသီးနှံတိုးချဲ့စိုက်ပျိုး ရန်ကောင်းမွန်သည့်အခြေအနေကိုဖြစ်ပေါ်စေပြီး ဓါတ်မြေဩဇာသွင်းအားစု လုံလောက်စွာရရှိရေး အိန္ဒိယအစိုးရက စီမံ‌ဆောင်ရွက်လျက်ရှိကြောင်း သိရှိရပါသည်။

(ရင်းမြစ်-နယူးဒေလီမြို့ စီးပွားရေးသံမှူးပေးပို့သည့်သတင်း)

အင်ဒီကာဆန်အပေါ် အီးယူက အခွန်သက်သာခွင့်ပြန်လည်ပေးအပ်မည်

          မြန်မာနှင့်ကမ္ဘောဒီးယားနိုင်ငံတို့သည် အီးယူမှ ဖွံ့ဖြိုးမှုအနည်းဆုံးနိုင်ငံများ(LDCs)အား ပေး အပ်ထားသည့် EBA အကောက်ခွန်သက်သာခွင့်ကို ခံစားခွင့်ရှိကြောင်း၊ ၎င်းနှစ်နိုင်ငံမှ ဆန်လုံးရှည် အမျိုးအစား(အင်ဒီကာဆန်)ကို အီးယူဈေးကွက်သို့ ဈေးနှုန်းယှဉ်ပြိုင်နိုင်စွမ်းဖြင့် တင်သွင်းမှုကြောင့် ထိခိုက်သည့် အီးယူလယ်သမားများအား အကာအကွယ်ပေးနိုင်ရေးအတွက် ၎င်းဆန်တင်သွင်းမှုအပေါ်  အီးယူက ယာယီအနေဖြင့် ၂၀၁၉ ခုနှစ်တွင်  အခွန်ပြန်လည်ကောက်ခံခဲ့ရာ ထိုသို့အခွန်ကောက်ခံမှုသည် လုံးလတ်ဆန်၊ လုံးတိုဆန်၊ ဆန်ကွဲတို့အပေါ် သက်ရောက်မှုမရှိခဲ့ဘဲ ယင်းသို့ အခွန် ပြန်လည်ကောက်ခံမှုကြောင့် ၎င်းနှစ်နိုင်ငံမှဥရောပသို့ဆန်တင်ပို့မှုဈေးကွက်တွင် အပြောင်းအလဲဖြစ်ပေါ်ခဲ့ပြီး ကမ္ဘောဒီးယားဆန်မွှေးသည် ထိုင်းဆန်မွှေးများနှင့် ဈေးကွက်ယှဉ်ပြိုင်ခဲ့ရကြောင်း၊ ကမ္ဘောဒီးယားနိုင်ငံအစိုးရက အီးယူ ၏ဆုံးဖြတ်ချက်ကိုဆန့်ကျင်၍ European Court of Justic သို့ ဉီးတိုက်လျှောက်ထားခဲ့ချိန်တွင် အီးယူ ဘက်၌ မြန်မာနှင့် ကမ္ဘောဒီးယားနှစ်နိုင်ငံစလုံးမှ ၎င်းဆန်များတင်ပို့မှုအပေါ် အမြဲတမ်း အခွန်ကောက်ခံမှု ပုံစံသို့ ပြောင်းလဲခြင်းဖြစ်စေ၊ အခွန်ကောက်ခံမှုကို သက်တမ်းတိုးခြင်းဖြစ်စေဆောင်ရွက်ရန် ဖိအားပေးမှုများ ရှိခဲ့ကြောင်းသိရှိရပါသည်။

          မြန်မာနှင့်ကမ္ဘောဒီးယားနိုင်ငံတို့မှ ဆန်လုံးရှည်အမျိုးအစားအပေါ် အီးယူက ၂၀၁၉ ခုနှစ်စ၍ (၃)နှစ်အခွန် ကောက်ခံခဲ့ရာ မက်ထရစ်တန်(၁)တန်လျှင် ပထမနှစ်၌ ယူရို(၁၇၅)၊ဒုတိယနှစ်၌ ယူရို(၁၅၀)၊တတိယနှစ်၌ ယူရို(၁၂၅)နှုန်းဖြင့်ကောက်ခံခဲ့ကြောင်း၊ ဆန်လုံးရှည်အပေါ်  အီးယူမှ အခွန်ရုပ် သိမ်းခဲ့မှုကြောင့် အီးယူနှင့်မြန်မာ၊ ကမ္ဘောဒီးယားနိုင်ငံတို့အကြား ဆန်ကုန်သွယ်မှုအလားအလာနှင့်ပတ်သက်၍ ယူဆချက်အမျိုးမျိုးရှိသော်လည်း လာမည့်လများအတွင်း  မြန်မာနိုင်ငံမှ အီးယူသို့ ဆန်တင်ပို့မှု မြင့်တက်လာနိုင်သည်ဟု ဆန်ဈေးကွက်အတွင်း ခန့်မှန်းထားမှုများလည်းရှိကြောင်း၊ သွင်းကုန် အခွန်ကြောင့် ဧည့်မထဆန်အမျိုးအစားမှ ကရင်မဆန်အမျိုးအစားသို့ ပြောင်းလဲဝယ်ယူခဲ့ကြရသည့် အီးယူဝယ်လက်များသည်  အခွန်ကင်းလွတ်ခွင့် ပြန်လည်ပေးအပ်မှုကြောင့် ယခင်နည်းတူ မြန်မာ့ ဧည့်မထဆန်ကို ပြန်လည်ဝယ်ယူလာနိုင်သဖြင့် ဝယ်လိုအား တိုးတက်လာဖွယ်ရှိကြောင်း၊ မြန်မာနိုင်ငံမှ ဆန်များ အီးယူဈေးကွက်အတွင်း ပြန်လည်ဝင်‌ရောက်လာမည့် အလားအလာကြောင့် ဆန်ဈေးကွက်အတွင်း ဖိအားပြန်ရှိလာမည်ဟု အီတလီရှိ ဆန်ကုန်သည်တစ်ဉီးက ပြောကြားခဲ့ကြောင်းသိရှိရပါသည်။

          EBA အခွန် သက်သာခွင့်ဖြင့် မြန်မာနှင့် ကမ္ဘောဒီးယားနိုင်ငံတို့မှ အင်ဒီကာဆန်အမျိုးအစားများ တင်သွင်းမှု မြင့်တက်ခဲ့ခြင်းကြောင့် အီးယူရှိ ပြည်တွင်းဆန်လုပ်ငန်းများအပေါ် ထိခိုက်မှုရှိခဲ့သဖြင့် ၂၀၁၉ ခုနှစ်၊ ဇန်နဝါရီလ (၁၈)ရက်နေ့မှစတင်၍  အဆိုပါ ဆန်အမျိုးအစားတင်သွင်းမှုအပေါ် အီးယူက Safeguard Duties အဖြစ် (၃)နှစ်တာ ကာလအတွက် အခွန်ပြန်လည်ကောက်ခံခဲ့ခြင်းဖြစ်ပြီး အီးယူ၏ အခွန်ကောက်ခံမှုကာလသည် ၂၀၂၂ ခုနှစ်၊ ဇန်နဝါရီလ(၁၈)ရက်နေ့တွင် (၃)နှစ်ပြည့်မြောက်ခဲ့ပြီးဖြစ်သဖြင့် သက်တမ်းကုန်ဆုံးခဲ့ခြင်းဖြစ်ကြောင်း၊ အင်ဒီကာဆန်အပေါ် အီးယူက အခွန်ပြဌာန်းပြီးနောက်ပိုင်းတွင် အီးယူသို့မြန်မာနိုင်ငံမှ ဂျာပိုနီကာဆန်အမျိုးအစားတင်သွင်းမှုမြင့်တက်လာကာ ၎င်းဆန်အမျိုးအစား ကိုပါ Safeguard Duties  ကောက်ခံရန် လိုအပ်ခြင်း ရှိ/ မရှိ သုံးသပ်ပေးစေလိုသည်ဟု ၂၀၁၉ ခုနှစ်၊ နိုဝင်ဘာလအတွင်း ကျင်းပခဲ့သည့် အီးယူကောင်စီအစည်းအဝေး၌ အီတလီနိုင်ငံက ဆွေးနွေးခဲ့မှုများ ရှိကြောင်း၊ ယခုအခါ ဆန်လုံးရှည်အပေါ် အီးယူက Safeguard Duties ကောက်ခံသည့်ကာလမှာ သက်တမ်းကုန်ဆုံး၍ အခွန်သုညသို့ ပြန်လည်ရောက်ရှိမည်ဖြစ်ရာ မြန်မာနိုင်ငံမှ ဆန်လုံးရှည် အမျိုးအစားကို အီးယူဘက်မှဝယ်လိုအား တိုးတက်လာနိုင်ဖွယ်ရှိသည်ဟု သုံးသပ်မှုများရှိနေကြောင်း သိရှိရပါသည်။

(ရင်းမြစ်-ဘရပ်ဆဲလ်မြို့စီးပွားရေးသံမှူးပေးပို့သည့်သတင်း)

ဝါဈေးနှုန်းတက်လာသော်လည်းဝယ်လိုအားနည်းနေ

          ၂၀၂၂ ခုနှစ်၊ ဇန်နဝါရီလ (၁၂)ရက်တွင် ဖြစ်ပေါ်ခဲ့သည့် 3128B  ဝါဈေးနှုန်းမှာ တစ်တန်လျှင် ယွမ်ငွေ(၂၂၄၅၅)ဖြစ်ပြီး ယခင်လကထက်(၂.၁၇%) မြင့်တက်လာပြီး  32S  ဝါချည်ခင် ဈေးနှုန်းမှာ တစ်တန်လျှင် ယွမ်ငွေ (၃၀၃၈၃)ဖြစ်ပြီး ယခုလဆန်းပိုင်းထက် (၀.၀၇%) မြင့်တက်လာကြောင်း၊ မကြာသေးမီအချိန်အတွင်း ဝါ ဈေးနှုန်းများ အနည်းငယ်မြင့်တက်လာရာ ကုန်သည်များက ဈေးပို ပေး၍ ဝယ်ယူလိုလာသည်ကိုတွေ့ရသကဲ့သို့ Zheng ဝါအမျိုးအစားမှာ အတက်ဖက်တွင် ရှိနေပြီး နိုင်ငံခြားဝါအမျိုးအစားမှာလည်းဈေးမြင့်တက်လာကြောင်း၊ ဇန်နဝါရီလ(၁၁)ရက်နေ့တွင် ICE ဝါ အရောင်းမှာ တစ်ပေါင်လျှင်(၁၁၆.၀၂)ဆင့်ဖြစ်ပြီး နိုင်ငံတကာ ဝါ ဈေးနှုန်းအညွှန်းကိန်း(M)မှာ တစ်ပေါင်လျှင်(၁၃၁.၄၀)ဆင့်ဖြစ်သဖြင့် ယခင်ရက်သတ္တပတ်ထက် မြင့်တက်လာခြင်းဖြစ်သော် လည်း ဝါချည်ခင်နှင့်ကုန်ချောထုတ်သည့်လုပ်ငန်းများဘက်မှအမြတ်အစွန်းရရှိမှုမှာ ကျဆင်းလာပြီး ကုန်ထုတ်လုပ်ငန်းကွင်းဆက်မှာ အထစ်အငေါ့များဖြစ်နေကြောင်း၊ လက်ရှိအချိန်တွင် ထုတ်လုပ်သူ အများစု၌ အမှာစာများမလုံလောက်ဖြစ်နေပြီး ကျင်းစုနှင့် ကျဲ့ကျန်းပြည်နယ်များမှ ရက်ကန်းစက်ရုံ များ၊ပန်းရိုက်နှင့်ဆိုးဆေးစက်ရုံများမှာ ဇန်နဝါရီလလယ်ခန့်မှစ၍ နွေဉီးရာသီပွဲတော် အားလပ်ရက် သတ်မှတ်ရန်စီစဉ်နေကြခြင်း၊ ကပ်ရောဂါဖြစ်ပွားမှုနှုန်း ပြန်လည်မြင့်တက်လာသဖြင့် အဝတ်အထည်ဝယ်လိုအား နည်းလာခြင်းတို့ကြောင့် ရေတိုကာလတွင် ဝါဈေးကွက်မှာဈေးနှုန်းအမြင့်ပိုင်း၌ပင် အတက်အကျ ဆက်လက်ဖြစ်ပေါ်နေနိုင်ဖွယ်ရှိသော်လည်း ရေရှည်တွင် ပြန်လည်ကျဆင်းနိုင် ဖွယ်ရှိသည်ဟု ခန့်မှန်းထားကြောင်းသိရှိရပါသည်။

(ရင်းမြစ်-နန်နင်းမြို့စီးပွား‌‌ရေးသံမှူးပေးပို့သည့်သတင်း)

ပန်းသီးနှင့်သစ်တော်သီးတင်ပို့မှုမြင့်တက်နိုင်ရန်အလားအလာရှိ

          တောင်အာဖရိကနိုင်ငံ၏ ပန်းသီးနှင့်သစ်တော်သီးများသည်  ယခုနှစ်ရာသီချိန်၌ မှတ်တမ်း တင်ပမာဏများစွာတင်ပို့နိုင်မည့်အခြေအနေရှိပြီး ပန်းသီးတင်ပို့နိုင်မှုအတွက် စက္ကူပုံးပေါင်း ၄၇.၄၇ သန်း(၆%)၊ သစ်တော်သီးတင်ပို့နိုင်မှုအတွက် စက္ကူပုံးပေါင်း ၁၉.၈၃ သန်း (၈%) တိုးမြှင့်တင်ပို့နိုင်ရန် ခန့်မှန်းထားသဖြင့် ၂၀၁၉ ခုနှစ်သီးနှံတင်ပို့မှုထက် ကျော်လွန်တင်ပို့နိုင်ရန် ခန့်မှန်းထားခြင်းဖြစ်ကြောင်း၊ Hortgro လုပ်ငန်းမှ Jacques du Preez က ယခုနှစ်ရာသီအတွက် ပန်းသီးနှင့်သစ်တော်သီးသည် အလားအလာများစွာကောင်းမွန်သောသီးနှံများဖြစ်ရာ ၂၀၂၂ ခုနှစ်အတွက် စိုက်ပျိုးထုတ်လုပ်သူများအနေဖြင့်  များစွာဆွတ်ခူးနိုင်ရန်မျှော်မှန်းထားကြောင်း၊ ယခင်နှစ် မိုးရေနှင့် အစိုဓါတ် လုံလောက်စွာရရှိမှုသည် စိုက်ပျိုးထုတ်လုပ်သူများအတွက်  လုံလောက်သောစိုက်ပျိုးရေ ရရှိခဲ့ခြင်းဖြစ်သဖြင့်  အသီးများစွာသီးနိုင်သည့် အခြေအနေရရှိခဲ့ကြောင်း၊ လက်ရှိရာသီဥတု ကောင်းမွန်နေမှုသည် သီးနှံကောင်းမွန်ပြီး အရည်အသွေးရှိသည့် သစ်သီးများရရှိမည့်အခြေအနေရှိသော်လည်း နွေဉီးရာသီ အအေးဓါတ်ပိုမှုနှင့် နွေရာသီအစောပိုင်း အပူချိန်မြင့်တက်မှုသည် အသီးအရွယ်ပမာဏကို ထိခိုက်နိုင်သည်ဟုပြောကြားထားကြောင်း၊ သီးနှံစိုက်ပျိုးထုတ်လုပ်သူများအနေဖြင့် သစ်သီးအရည် အသွေးကောင်းမွန်နိုင်ရန် အကောင်းမြင်လျက်ရှိကြောင်း၊ ပန်းသီးဆွတ်ခူးသည့် ကုမ္ပဏီအချို့က ပန်းသီး ၆ % -၉ % နှင့် သစ်တော်သီး ၈%-၂၀% တိုးမြှင့်ဆွတ်ခူးနိုင်မည်ဟု ခန့်မှန်းထားကြောင်း၊ တောင်အာဖရိကနိုင်ငံပန်းသီးအတွက် အကြီးဆုံးဈေးကွက်များသည် အရှေ့ပိုင်းဒေသ၊ အရှေ့တောင် အာရှနှင့်အရှေ့အလယ်ပိုင်းဒေသများဖြစ်ပြီး သစ်တော်သီးမှာ အနောက်နိုင်ငံများ၏ ဈေးကွက်အပေါ်များစွာမှီခိုရလျက်ရှိကြောင်း၊ မကြာသေးမီကကြေငြာခဲ့သော တောင်အာဖရိကနိုင်ငံ၏ သစ်တော်သီးများကို တရုတ်နိုင်ငံအတွင်းရောင်းချနိုင်ရေးခွင့်ပြုချက်ရရှိခြင်းသည်အရှေ့ပိုင်းဒေသသို့ ပိုမိုမြှင့်တင် တင်ပို့နိုင်ရန်အတွက် မျှော်မှန်းချက်ထားရှိနိုင်ရေးပင်ဖြစ်ကြောင်းသိရှိရပါသည်။

(ရင်းမြစ်- ပရီတိုးရီးယားမြို့စီးပွားရေးသံမှူးပေးပို့သည့်သတင်း)

တရုတ်နိုင်ငံ

ကောက်ပဲသီးနှံစိုက်ပျိုးထွက်ရှိမှုဆက်လက်မြင့်မား

          တရုတ်နိုင်ငံ၏ ပြည်တွင်းကောက်ပဲသီးနှံ ထုတ်လုပ်ထွက်ရှိမှုသည် တည်ငြိမ်စွာဖြင့် ဆက်လက် တိုးတက်လျက်ရှိရာ ၂၀၂၁ ခုနှစ်အတွင်း စုစုပေါင်းကောက်ပဲသီးနှံထုတ်လုပ်မှုပမာဏမှာ ကီလိုဂရမ် (၆၈၅)ဘီလီယံအထိရရှိခဲ့သဖြင့် (၇)နှစ်ဆက်တိုက် ကီလိုဂရမ်(၆၅၀)ဘီလီယံကျော် ထွက်ရှိခဲ့ကြောင်း၊ ၂၀၂၁ ခုနှစ်အတွင်း၌ နိုင်ငံ၏အနောက်မြောက်ပိုင်းဒေသများတွင်  အချိန်အခါ အလိုက်ခြောက်သွေ့ခြင်း၊ ဟဲနန်ပြည်နယ်အတွင်း မိုးကြီးရေလျှံမှုများဖြစ်ပွားခဲ့ခြင်းစသည့် ရာသီဥတုဒဏ် ဆိုးဝါးစွာရင်ဆိုင်ခဲ့ရသော်လည်း ကောက်ပဲသီးနှံ ထုတ်လုပ်ထွက်ရှိမှုများ ဆက်လက်မြင့်တက်ခဲ့ကြောင်း၊ တရုတ်နိုင်ငံသည် ကောက်ပဲသီးနှံစိုက်ပျိုးဧရိယာအား ပြီးခဲ့သည့်နှစ်ကထက်(၀.၇%) တိုးချဲ့ခဲ့ရာ ရာသီဥတုကောင်းမွန်ခြင်းကြောင့် ကောက်ပဲသီးနှံစိုက်ပျိုးထွက်ရှိမှုနှုန်းသည် (၀.၀၆၇)ဟက်တာလျှင် (၁.၂%) အထိ မြင့်တက်လာခဲ့ပြီး နိုင်ငံတွင်းရှိ ပြည်နယ်(၃၁)ခုအနက်(၂၇)ခုမှ ကောက်ပဲသီးနှံ ထုတ်လုပ်ထွက်ရှိမှု မြင့်မားခဲ့ရာ အထူးသဖြင့်  ရှင်းကျန့်၊အန်းဟွေး၊ဟူနန်၊စီချွမ်နှင့်ရှန်းတုန်းပြည်နယ်များမှ ကောက်ပဲသီးနှံ ထုတ်လုပ် ထွက်ရှိမှုသည်  ကီလိုဂရမ် သန်းပေါင်း(၅၀၀)ကျော်ခဲ့သည်ဟု  တရုတ် အမျိုးသားစာရင်းအင်းဗျူရိုမှ ထုတ်ပြန်ခဲ့သည့်အချက်အလက်များ၌ ဖော်ပြထားကြောင်း၊ ကောက်ပဲသီးနှံ ထုတ်လုပ်ထွက်ရှိမှု တည်ငြိမ်စေရန်အတွက်  လယ်သမားများအနေဖြင့်  ကြုံတွေ့နေရသည့် လယ်ယာစိုက်ပျိုးရေးပစ္စည်းများ ဈေးနှုန်းမြင့်တက်ခြင်းအပါအဝင် သဘာဝဘေးအန္တရာယ်များကြောင့် အခက်အခဲများဖြစ်ပေါ်နေခြင်းအား အဆင်ပြေစေရန် အစိုးရအနေဖြင့် လိုအပ်သည့်အထောက်အပံ့များ‌ ဆောင်ရွက်ပေးခဲ့ကြောင်း၊ ထိုကဲ့သို့ပင် နောင်လာမည့် ၅ နှစ်မှ ၁၅ နှစ်တာကာလအတွင်း‌ဆောင်ရွက်မည့် လူမှုရေး၊ စီးပွားရေး ဖွံ့ဖြိုး တိုးတက်စေရေးဆိုင်ရာထုတ်ပြန်ချက်များ၌ အစားအစာလုံခြုံစိတ်ချရမှုရှိစေရန်နှင့် အ‌ရေးကြီးသည့် လယ်ယာစိုက်ပျိုးရေးပစ္စည်းများ လုံလောက်စွာရရှိနိုင်ရန် အားထုတ်ကြိုးပမ်းဆောင်ရွက်သွားမည်ဟု‌ ဖော်ပြထားကြောင်းသိရှိရပါသည်။

(ရင်းမြစ်-ပေကျင်းမြို့စီးပွားရေးသံမှူးပေးပို့သည့်သတင်း)

အိန္ဒိယနိုင်ငံ

တိုက်ရိုက်ရောင်းချခြင်းနည်းဥပ‌ဒေများထုတ်ပြန်

          အိန္ဒိနိုင်ငံအစိုးရ၊စားသုံးသူရေးရာ၊စားနပ်ရိက္ခာနှင့် ပြည်သူ့ဖြန့်ဖြူးမှုရေးရာဝန်ကြီးဌာနသည်  ၂၈-၁၂- ၂၀၂၁ ရက်နေ့တွင် အမိန့်ကြော်ငြာစာအမှတ် G.S.R 889 (E)ဖြင့်  ၂၀၂၁ ခုနှစ် စားသုံးသူအကာ အကွယ်‌ပေးရေးဆိုင်ရာ တိုက်ရိုက်‌ရောင်းချခြင်းနည်းဥပဒေများကို ထုတ်ပြန်ခဲ့ကြောင်း၊ အဆိုပါ နည်းဥပဒေများ၌ တိုက်ရိုက်ရောင်းချခြင်းလုပ်ကိုင်သည့်ကုမ္ပဏီများနှင့် ၎င်းတို့၏ အရောင်းကိုယ်စားလှယ်များအနေဖြင့်  ပိရမစ်ပုံစံရောင်းချခြင်း (သို့) အဖွဲ့ဝင်သစ် စုဆောင်းမှုဖြင့် ငွေကြေးလည်ပတ်မှု ပြုလုပ်ခြင်းကို လုပ်ကိုင်ဆောင်ရွက်မှုမပြုရန် တားမြစ်ထားကြောင်း၊ တိုက်ရိုက်ရောင်းချမှုလုပ်ကိုင်သူများသည် ပြည်တွင်း၌ အနည်းဆုံးအားဖြင့် တည်နေရာလိပ်စာတစ်ခုတွင်မှတ်ပုံတင်၍ ရုံးခန်းဖွင့်လှစ်ထားရှိရမည် ဖြစ်ပြီး ကုမ္ပဏီများအနေဖြင့် ၎င်းတို့၏ကုန်စည်နှင့်ဝန်ဆောင်မှုများကိုရယူသည့် စားသုံးသူများ၏ နစ်နာမှုနှင့် တိုင်ကြားလာသည့်ကိစ္စရပ်များအပေါ် ကိုင်တွယ်ဖြေရှင်းမည့်စနစ်တစ်ရပ်အား ထူထောင် ထားရှိရမည်ဖြစ်သည့်အပြင် ၎င်းတို့၏အရောင်းကိုယ်စားလှယ်များမှရောင်းချသည့် ကုန်စည်နှင့် ဝန်ဆောင်မှုများမှဖြစ်ပေါ်လာသော စားသုံးသူများ၏နစ်နာမှုကိုလည်း တာဝန်ခံရမည်ဖြစ်ကြောင်း၊ တိုက်ရိုက်ရောင်းချမှုလုပ်ကိုင်သည့် ကုမ္ပဏီများသည် စားသုံးသူများ၏အခွင့်အရေးများ လုံခြုံစိတ်ချရမှု ရှိစေရန်အတွက် ၎င်းတို့ရောင်းချသော ကုန်စည်နှင့်ဝန်ဆောင်မှုများ၏ ဈေးနှုန်းများ၊ ငွေပေးချေရမည့် ကာလ၊ ငွေပေးချေမှုနည်းလမ်းများ၊ ကုန်စည်ပြန်လည်အပ်နှံမှု၊ ကုန်ပစ္စည်းလဲလှယ်မှု၊ ငွေပြန်အမ်းပေးမည့်မူဝါဒ၊ ရောင်းချပြီးနောက်ပိုင်း၌ ဝန်ဆောင်မှုပေးမည့်စနစ် စသည့်အသေးစိတ်အချက်များကို အသိပေးဖော်ပြရမည်ဖြစ်ကြောင်း၊ နိုင်ငံရှိ ပြည်နယ်/ပြည်ထောင်စုနယ်မြေအစိုးရအဖွဲ့များအနေဖြင့် တိုက်ရိုက်                                                                                                                                                                                                                                                                                                                                                                                                                                                                                                                                                                                                        ရောင်းချမှုလုပ်ကိုင်သည့် ကုမ္ပဏီနှင့်လူပုဂ္ဂိုလ်များ၏ လုပ်ငန်း‌ဆောင်ရွက်မှုများကို စောင့်ကြည့်ကြပ်မတ်ရန်အတွက်  ယန္တယားတစ်ရပ်ကို ထူထောင်ထားရှိရမည်ဖြစ်ကြောင်း၊ ပြည်တွင်း၌ တိုက်ရိုက်ရောင်းချခြင်းကို လက်ရှိလုပ်ကိုင်နေသော ကုမ္ပဏီများအနေဖြင့် စားသုံးသူရေးရာဝန်ကြီးဌာန၏ အထက်ပါအမိန့်ကြော်ငြာစာအား အစိုးရ Gazette ၌ ထုတ်ပြန်‌ဖော်ပြသည့်နေ့ရက်မှ ရက်ပေါင်း(၉၀)အတွင်း နည်းဥပဒေများနှင့်လျော်ညီမှုရှိအောင် ပြင်ဆင်‌ဆောင်ရွက်ရမည်ဖြစ်ကြောင်း၊ အိန္ဒိယ တိုက်ရိုက်ရောင်းချသူများအသင်း(IDSA)ဥက္ကဋ္ဌ က ၎င်းတို့အနေဖြင့် တိုက်ရိုက်ရောင်းချမှု လုပ်ထုံးလုပ်နည်းများနှင့်စပ်လျဉ်း၍

လွန်ခဲ့သော ၂ နှစ်ကပင် အစိုးရနှင့်အနီးကပ်ပူးပေါင်းဆောင်ရွက်ခဲ့ပြီး ယခုကဲ့သို့နည်းဥပဒေများအား ထုတ်ပြန်ပြဌာန်းခဲ့မှုမှာ ဈေးကွက်အတွင်း ရှင်းလင်းပြတ်သားမှုကို ဆောင်ကြဉ်းလျက် တိုက်ရိုက် ရောင်းချမှုလုပ်ငန်းနယ်ပယ်အတွက် တွန်းအားပေးမှုကိုဖြစ်ပေါ်စေကြောင်း၊ ကမ္ဘာလုံးဆိုင်ရာ တိုက်ရိုက် ရောင်းချမှုလုပ်ငန်းရှင်များအဖွဲ့ချုပ်၏အချက်အလက်များအရ ၂၀၂၀ ပြည့်နှစ်တွင် အိန္ဒိယနိုင်ငံ၌ တိုက်ရိုက် ရောင်းချမှုလုပ်ငန်းပမာဏသည် တန်ဖိုးအားဖြင့် အမေရိကန်ဒေါ်လာ(၃)ဘီလီယံ (ရူပီးငွေကုဋေ၂၂၅၀၀ခန့်) ရှိပြီး နှစ်စဉ်တိုးတက်မှုနှုန်း ၂၈.၃% ရှိ ကြောင်း၊ အမျိုးသမီးဉီးရေ ၅၀%ကျော်  ပါဝင်သည့် အရောင်းကိုယ်စားလှယ် ၇.၄ သန်းကျော်ရှိသော အိန္ဒိယတိုက်ရိုက်ရောင်းချမှုလုပ်ငန်းနယ်ပယ်သည် ကမ္ဘာပေါ်၌ အလျင်မြန်ဆုံး တိုးတက်လျက်ရှိသော ဈေးကွက်ဖြစ်ကြောင်းသိရှိရပါသည်။

(ရင်းမြစ်-နယူးဒေလီမြို့ စီးပွားရေးသံမှူးပေးပို့သည့်သတင်း)

ဩစတြေးလျနိုင်ငံ

စူပါမားကတ်များတွင် ကုန်စည်ပြတ်လပ်မှုများ ဖြစ်ပေါ်လျှက်ရှိ

          နယူးဆောက်ဝေးပြည်နယ်တွင် ကိုဗစ်ရောဂါဖြစ်ပွားသူအရေအတွက် တိုးလာခြင်းကြောင့် ပြည်နယ်တစ်ဝှမ်းရှိ စူပါမားကတ်များတွင် ကုန်ပစ္စည်းပြတ်လပ်မှုများဖြစ်ပေါ်နေကြောင်း၊ ပြည်နယ် တစ်ဝှမ်းရှိ ဝယ်ယူသူများသည် အဓိက စူပါမားကတ်အချို့တွင် လတ်ဆတ်သော သစ်သီးဝလံများ၊ ဟင်းသီးဟင်းရွက်များနှင့်အသားများ စသည့်ထုတ်ကုန်များပြတ်လပ်မှုကို သတိပြုမိလျက်ရှိကြောင်း၊ Woolworths စူပါမားကတ်မှ တာဝန်ရှိသူက ဆက်လက်ဖြစ်ပွားနေသော ကျန်းမာရေးအကျပ်အတည်းသည် ထောက်ပံ့ပို့ဆောင်ရေးကို ကြီးမားစွာအနှောက်အယှက်ဖြစ်စေရာ အဆိုပါထောက်ပံ့ရေးပစ္စည်းများသည် အဓိကအားဖြင့် ကူးစက်ရောဂါဖြစ်ပွားမှုအရေအတွက်များပြားသော Great Sydney ဧရိယာ တွင်တည်ရှိကြောင်း၊ ယခုပြဿနာမှာ ကုန်စည်ပြတ်လပ်ခြင်းမဟုတ်ဘဲ ကုန်ပစ္စည်းများကို စတိုးဆိုင်များနှင့် စင်များပေါ်အရောက်တင်ရန် ထောက်ပံ့ပို့ဆောင်မှုကို စီမံခန့်ခွဲနိုင်မှု မရှိ၍ဖြစ်ကြောင်း၊ လုပ်သားများ ကူးစက်ခံရမှုကြောင့် လုပ်ငန်းခွင်ဝင်ရောက်နိုင်ခြင်းမရှိသည့်အချိန်တွင် စားသုံးသူများ၏ ကြောက်ရွံ့မှုကြောင့် ဝယ်ယူမှုများများပြားလာခြင်းက ထောက်ပံ့မှုကွင်းဆက်ကို တစ်ဖန်အနှောက်အယှက် ဖြစ်ပေါ် စေကြောင်းသိရှိရပါသည်။

(ရင်းမြစ်-ကင်ဘာရာမြို့စီးပွားရေးသံမှူးပေးပို့သည့်သတင်း)

တရုတ်နိုင်ငံ

ငွေကြေးလဲလှယ်မှုတွင် အချက်အချာကျသည့်ဒေသအဖြစ် ဟောင်ကောင်ဒေသအား ပံ့ပိုးသွားမည်

          တရုတ်နိုင်ငံသည်  နိုင်ငံခြားငွေကြေး အရန်ငွေထားရှိမှု အမျိုးမျိုးခွဲထားနိုင်ရန် လာမည့်  ၂၀၂၂ ခုနှစ်အတွင်း တရုတ်ယွမ်ငွေကြေးလဲလှယ်မှုတွင်  ပြည်ပအချက်အချာကျသည့်ဒေသအဖြစ် ဆောင်ရွက်နိုင်ရန် ပေကျင်းမှ ဟောင်ကောင်ဒေသအား ပံ့ပိုးသွားမည်ဖြစ်ရာ ထိုသို့ပံ့ပိုးပေးရန်မှာ ဗဟိုဘဏ်၏ ၂၀၂၂ ခုနှစ်အတွင်း ဉီးစားပေးအချက်ဖြစ်ကြောင်း၊ ရပ်ဝန်းနှင့်ပိုးလမ်းမတစ်လျှောက်ရှိ နိုင်ငံများတွင် အခြေခံအဆောက်အအုံဆိုင်ရာ ရင်းနှီးမြှုပ်နှံမှုများ မြှင့်တင်သွားမည်ဖြစ်ကြောင်း၊ ဟောင်ကောင်ဒေသသည် ကမ္ဘာလုံးဆိုင်ရာငွေကြေးဗဟိုဌာနအနေဖြင့် အဓိက အချက်အချာကျသည့်‌ ဒေသဖြစ်သည့်အပြင် မဟာပင်လယ်ကွေ့ဒေသ၏ စီမံကိန်းအရ မကာအိုနှင့် တရုတ်ပြည်မကြီးမှ မြို့ကြီးများနှင့် ပူးပေါင်းဆောင်ရွက်သွားမည်ဖြစ်သည်ဟု South China Morning Post သတင်းစာ၌ ဖော်ပြထားကြောင်း၊ ဟောင်ကောင်ဒေသအား ပံ့ပိုးပေးမည့် မူဝါဒနှင့်ပတ်သက်၍ တရုတ်နိုင်ငံဗဟိုဘဏ်မှ ကျယ်ကျယ်ပြန့်ပြန့် အသေးစိတ် ရှင်းလင်းဖော်ပြထားခြင်းမရှိသော်လည်း ယွမ်ငွေကြေး သုံးစွဲမှုများ၊ ကုန်သွယ်ရေးအတွက် ပေးချေမှုနှင့် ဒစ်ဂျစ်တယ်ယွမ်သုံးစွဲမှုတို့အတွက် အလားအလာကောင်းများရှိကြောင်း၊ အမေရိကန်ဒေါ်လာ၏ လွှမ်းမိုးမှုကို ပယ်ဖျက်နိုင်ရန်နှင့် ငွေကြေးစနစ်တွင်  အမေရိကန်ဒေါ်လာ လွှမ်းမိုးမှုအားဝါရှင်တန်မှ တင်းကြပ်မှုများပြုလုပ်မည်ကို ၂၀၁၈ခုနှစ်ကတည်းက စိုးရိမ်မှုများဖြစ်ခဲ့သောကြောင့် ပေကျင်းသည် တရုတ်နိုင်ငံ၏ ယွမ်ငွေကြေးအား နိုင်ငံတကာအသုံး ပြုနိုင်ရေးအစီအစဉ်ကို ၂၀၀၉ ခုနှစ်က စတင်ဆောင်ရွက်ခဲ့ကြောင်း၊ တရုတ်ယွမ်ငွေကြေးအား နိုင်ငံတကာ အသုံးပြုနိုင်ရန်ဆောင်ရွက်မှုမှာ နှေးကွေးလျက်ရှိပြီး နိုင်ငံတကာငွေပေးချေမှု၊ အရန်ငွေကြေး နှင့်နိုင်ငံခြားငွေ လဲလှယ်ရောင်းဝယ်မှုများတွင်  အမေရိကန်ဒေါ်လာ၏ နောက်တွင် ရှိဆဲဖြစ်ကြောင်း၊ ဒစ်ဂျစ်တယ်ငွေကြေးများအား နယ်မြေဖြတ်ကျော် ပေးချေမှုစနစ်များ လေ့လာနိုင်ရန် တရုတ်နိုင်ငံ People’s  Bank of  China သည် ဟောင်ကောင် ငွေကြေးအာဏာပိုင်အဖွဲ့၊ ထိုင်းနိုင်ငံရှိ ဗဟိုဘဏ်၊ ယူအေအီးတို့နှင့်တွဲဖက်ဆောင်ရွက်သွားမည်ဖြစ်ကြောင်း၊ နိုင်ငံတကာလုပ်ငန်းကုမ္ပဏီကြီးများအနေ ဖြင့်  နိုင်ငံခြားငွေလဲလှယ်မှုများ ပိုမိုလွယ်ကူစေရန် ယွမ်ငွေကြေးပမာဏအများအပြား ကိုင်ဆောင် လုပ်ကိုင်နိုင်မည်ဖြစ်ကြောင်း၊ ပုဂ္ဂလိကရှယ်ယာလုပ်ငန်းများ ပြည်ပရင်းနှီးမြှုပ်နှံမှု ဆောင်ရွက်နိုင်ရန် အသေးစားစီမံကိန်း‌ ဆောင်ရွက်ရန် တရုတ်နိုင်ငံအနေဖြင့်ထည့်သွင်းစဉ်းစားမည်ဖြစ်သည်ဟု ရေးသားဖော်ပြထားကြောင်းသိရှိရပါသည်။

(ရင်းမြစ်-ဟောင်ကောင်မြို့ စီးပွားရေးသံမှူး ပေးပို့သည့်သတင်း)

အိန္ဒိယနိုင်ငံ

ပဲပုတ်ဆီကြိတ်ဖတ်အား အရေးကြီးကုန်စည်အဖြစ်သတ်မှတ်၍ သိုလှောင်နိုင်ခွင့်ကန့်သတ်ခြင်း

          အိန္ဒိယနိုင်ငံ စားသုံးသူရေးရာ၊ စားနပ်ရိက္ခာနှင့် ပြည်သူ့ဖြန့်ဖြူးမှုရေးရာဝန်ကြီးဌာနသည် ၁၉၅၅ ခုနှစ် အရေးကြီးကုန်စည်များ အက်ဥ‌ပဒေကိုကျင့်သုံးလျှက်  ကုန်ထုတ်လုပ်မှု၊ သိုလှောင်မှုနှင့် ဖြန့်ဖြူးမှုလုပ်ငန်းများကို ထိန်းသိမ်းကြပ်မတ်နိုင်ရန်အလို့ငှာ ပဲပုတ်ဆီကြိတ်ဖတ်အား ၂၀၂၂ ခုနှစ်၊ ဇွန်လ (၃၀)ရက်နေ့အထိ အရေးကြီးကုန်စည်အဖြစ် သတ်မှတ်လိုက်သည်အမိန့်ကို ၂၃-၁၂-၂၀၂၁ ရက်နေ့တွင်ထုတ်ပြန်ခဲ့ရာ အိန္ဒိယပြည်တွင်းဈေးကွက်တွင် အဓိကတိရစ္ဆာန်မွေးမြူ‌ရေးအစားအစာ ဖြစ်သော ပဲပုတ်ဆီကြိတ်ဖတ်၏ ဈေးနှုန်းများကိုလျှော့ချနိုင်ရန် အရေးကြီးကုန်စည်အဖြစ်သတ်မှတ် ရခြင်းဖြစ်ကြောင်း၊ ယခုဆုံးဖြတ်ချက်သည် ဗဟိုအစိုးရနှင့်ပြည်နယ်/ ပြည်ထောင်စုနယ်မြေ အစိုးရ အဖွဲ့များအား ပဲပုတ်ဆီကြိတ်ဖတ် ထုတ်လုပ်မှုနှင့်ဖြန့်ဖြူးမှုကိုကြပ်မတ်ရန် အခွင့်အာဏာ ရရှိစေမည် ဖြစ်ကြောင်း၊ ဈေးကွက်အတွင်း ကုန်စည်ရရှိနိုင်မှုနှင့် ရောင်းဝယ်ဖောက်ကားမှုတို့ကို လွယ်ကူချောမွေ့ စေမည်ဖြစ်သကဲ့သို့ သင့်တင့်မျှတမှုမရှိသော ဈေးကွက်အလေ့အထများကိုလည်း တားဆီးနိုင်မည် ဖြစ်ကြောင်း၊ ပဲပုတ်ဆီကြိတ်ဖတ်များ လက်ဝယ်သိုလှောင်ထားရှိနိုင်ခွင့်ပမာဏကို ၂၀၂၂ခုနှစ်၊ဇွန်လ (၃၀)ရက်နေ့ထိကန့်သတ်သည့်အမိန့်ကို၂၃-၁၂-၂၀၂၁ရက်နေ့တွင်ထုတ်ပြန်ခဲ့ရာကြိတ်ခွဲထုတ်လုပ်/ ပြုပြင်သူများအနေဖြင့်၎င်းတို့၏(၁)ရက်တာကြိတ်ခွဲထုတ်လုပ်နိုင်မှုစွမ်းအားအပေါ်အခြေပြု၍အများ ဆုံးရက်ပေါင်း(၉၀)အတွက်သုံးစွဲရန်လိုအပ်သော ပဲပုတ်ဆီကြိတ်ဖတ်ပမဏကိုသာ သိုလှောင်ထားရှိ နိုင်မည်ဖြစ်ပြီး အစိုးရဌာနဆိုင်ရာ၌ ကုန်သွယ်မှုလုပ်ငန်း မှတ်ပုံတင်ထားရှိသည့် ကုမ္ပဏီများ၊ ကုန် သည်များအနေဖြင့် အများဆုံးတန်ချိန် (၁၆၀)ထိ သိုလှောင်နိုင်ကြောင်း၊ လုပ်ငန်းရှင်များအနေဖြင့် ပဲပုတ်ဆီကြိတ်ဖတ်များအား မည်သည့်နေရာဒေသတွင်သိုလှောင်ထားရှိသည်ကို ထုတ်ဖော်ကြေညာ ရမည်ဖြစ်ပြီး မိမိလက်ဝယ်၌ ပဲပုတ်ဆီကြိတ်ဖတ်ပမာဏသည် သတ်မှတ်ပြဌာန်းချက်ထက် ပိုမို လျှက်ရှိပါက စားနပ်ရိက္ခာနှင့် ပြည်သူ့ ဖြန့်ဖြူးမှုရေးရာဉီးစီးဌာန၏ အင်တာနက်စင်္ကြန်ဖြစ်သော http://evegoils.nic.in/soya_meal_Stock/login သို့ ထုတ်ဖော်ကြေညာရလျှက် ရက်ပေါင်း(၃၀) အတွင်း ယခုအမိန့်စာပါပမာဏသို့ လျှော့ချသိုလှောင်ရမည်ဖြစ်ကြောင်း၊ထိုသို့အင်တာနက်စင်္ကြန်၌ တင်ပြထားသည့် ပဲပုတ်ဆီကြိတ်ဖတ်သိုလှောင်မှုအချက်အလက်များကို အိန္ဒိယ တိရစ္ဆာန်မွေးမြူရေး နှင့်နို့ထွက်ပစ္စည်းဉီးစီးဌာနကပုံမှန်ကြပ်မတ်စစ်ဆေးလျှက်လိုအပ်သလိုဆောင်ရွက်မည်ဖြစ်ကြောင်း၊

မျိုးရိုးဗီဇပြုပြင်ထားခြင်းမရှိသောအိန္ဒိယပဲပုတ်ဆီကြိတ်ဖတ်များအ‌ပေါ်ပြည်ပမှဝယ်လိုအားများပြား လာမှုနှင့်အတူ ပဲပုတ်စေ့ဈေးနှုန်းများမြင့်တက်လာခြင်းက ပြည်တွင်း၌ ပဲပုတ်ဆီကြိတ်ဖတ် ဈေးနှုန်း များကိုမြင့်တက်လာစေခဲ့ကြောင်း၊အိန္ဒိယ ပဲပုတ်ဆီကြိတ်ခဲထုတ်လုပ်မှုနယ်ပယ်မှ အချက်အလက် များအရ၂၀၂၀-၂၀၂၁ ခုနှစ်၌ ပြည်ပသို့မျိုးရိုးဗီဇပြုပြင်ထားခြင်းမရှိသောပဲပုတ်ဆီကြိတ်ဖတ်တန်ချိန် (၁.၅၆)သန်း တင်ပို့ခဲ့ကြောင်းသိရှိရပါသည်။

(ရင်းမြစ်-နယူးဒေလီမြို့စီးပွားရေးသံမှူးပေးပို့သည့်သတင်း)

          မလေးရှားနိုင်ငံကမ်းရိုးတန်းအရှေ့၊ အနောက်နှင့် တောင်ဘက်ခြမ်း ဒေသများတွင် မှတ်တမ်းဝင် မိုးသည်းထန်စွာရွာသွန်းမှုများကြောင့် ၂၀၂၂ ခုနှစ်၊ ဇန်နဝါရီလတွင် ထွက်ရှိလာမည့် ဆီထွက်သီးနှံများစွာ ပျက်စီးခဲ့ပြီး ၂၀၂၁ခုနှစ်၊ ဒီဇင်ဘာလတွင် ထွက်ရှိရမည့် သီးနှံများစွာ ပျက်စီးခဲ့ရကြောင်း၊ မလေးရှားနိုင်ငံ၏ ၂၀၂၁ခုနှစ်၊ ဇန်နဝါရီလအတွင်း ထုတ်လုပ်မှုမှာ ၂၀၂၁ ဒီဇင်ဘာလအတွင်း မျှော်မှန်းထားသည်ထက် များစွာ လျော့နည်းခဲ့ကြောင်း၊ မိုးသည်းထန်စွာရွာသွန်းမှုကြောင့် ဆီအုန်း စိုက်ပျိုးသည့် ဒေသများတွင် သစ်ပင်များ၊ လမ်းများပျက်စီးခဲ့မှုများသည် ကျေးလက်ဒေသများတွင် ပိုမိုဖြစ်ပွားခဲ့ပြီး သဘာဝပတ်ဝန်းကျင်ဝန်ကြီးဌာန၏ ထုတ်ပြန်မှုအရ မလေးရှားနိုင်ငံ ပဟန်း ဒေသတွင် မြစ်ရေမှာ အမြင့်ပေ ၃၀ မီတာထိ မြင့်တက်ခဲ့ပြီး ကျေးလက် လူနေအိမ်များ အနီးထိ ရောက်ရှိခဲ့ပါကြောင်း၊ ရာသီဥတုအခြေအနေ ပိုမိုဆိုးရွားလာပါက ပင်နီဆူးလာ တောင်ဘက်ရှိ အဓိကဆီအုန်းထုတ်လုပ်ဒေသဖြစ်သည့် ဂျိုဟိုဒေသ ထိရောက်ရှိလာနိုင်ကြောင်းနှင့် ဂျိုဟိုဒေသည် ဆီအုန်း ထုတ်လုပ်သည့် အကြီးဆုံးဒေသ ဖြစ်ကြောင်းသိရှိရပါသည်။

           မလေးရှားနိုင်ငံဆီစက်ပိုင်ရှင်များအသင်း၏ အချက်အလက်များအရ ၂၀၂၁ခုနှစ်၊ ဒီဇင်ဘာလ ထုတ်လုပ်မှုအနေဖြင့် ၈.၅ ရာခိုင်နှုန်း မျှော်မှန်းထားသော်လည်း မျှော်မှန်းထားသည် ထက် ၁၀ ရာခိုင်နှုန်းပိုမိုလျော့ကျလာနိုင်ပြီး ၂၀၂၂ခုနှစ်၊ ဇန်နဝါရီလမှ ၅ရက်နေ့မှ စ၍ ပိုမိုလျော့ကျနိုင်ကြောင်း၊ မလေးရှားနိုင်ငံ ဆီအုန်းအသင်း၏ အချက် အလက်များအရ ပင်နီ ဆူးလားဒေသမှထုတ်လုပ်မှုမှာ ၁၅ ရာခိုင်နှုန်း ထိလျော့ကျပြီး၊ မလေးရှား တစ်နိုင်ငံလုံး အနေဖြင့် ၁၀ ရာနိုင်နှုန်း ထိလျော့ကျနိုင်ကြောင်း သိရှိရပါသည်။

ရင်းမြစ် - PALM OIL ANALYTICS