မိုးရာသီတွင် မိုးရေ၊ ရေကြီးရေလျှံမှုနှင့် ပတ်ဝန်းကျင်ညစ်ညမ်းမှုများကြောင့် အစားအစာနှင့် သောက်သုံးရေများ ညစ်ညမ်းနိုင်သဖြင့် ဝမ်းပျက်ဝမ်းလျှောရောဂါများ ဖြစ်ပွားနိုင်ခြေ ပိုမိုမြင့်မားလာသည်။ ထို့ကြောင့် ပြည်သူများအနေဖြင့် မိမိနှင့် မိသားစုဝင်များ၏ ကျန်းမာရေးအတွက် အစားအစာနှင့် ရေသန့်ရှင်းမှုကို အထူးဂရုပြုရန် လိုအပ်သည်။
အစားအစာများကို လတ်ဆတ်သန့်ရှင်းပြီး ကျက်အောင်ချက်ပြုတ်စားသုံးရန်၊ ချက်ပြုတ်ပြီးအစားအစာများကို ဖုံးအုပ်ထားရန်နှင့် အချိန်ကြာမြင့်စွာ ထားရှိထားသော အစားအစာများကို ရှောင်ကြဉ်ရန် လိုအပ်သည်။ ထို့အပြင် အစားအစာမပြင်ဆင်မီနှင့် အစားအစာမစားမီ **လက်ကို ဆပ်ပြာနှင့်ရေဖြင့် စနစ်တကျဆေးကြောခြင်း**ကို အလေ့အကျင့်ပြုလုပ်သင့်သည်။
သောက်သုံးရေအနေဖြင့် သန့်ရှင်းစိတ်ချရသော ရေကိုသာ အသုံးပြုသင့်ပြီး ရေသန့်ရှင်းမှု မသေချာပါက ကျိုချက်ပြီးမှ သောက်သုံးရန် လိုအပ်သည်။ အစားအစာနှင့် ရေများကို အညစ်အကြေး၊ ယင်ကောင်နှင့် အခြားညစ်ညမ်းစေနိုင်သည့် အရာများမှ ကာကွယ်ထားရှိသင့်သည်။
ဝမ်းပျက်ဝမ်းလျှောဖြစ်ပွားပါက ရေဓာတ်နှင့် ဆားဓာတ်ဆုံးရှုံးမှု မဖြစ်စေရန် အရည်များကို လုံလောက်စွာ သောက်သုံးပြီး ရောဂါလက္ခဏာများ ပြင်းထန်ပါက ကျန်းမာရေးဝန်ထမ်းများထံ အမြန်ဆုံး ဆေးကုသမှုခံယူသင့်သည်။ မိုးရာသီတွင် “သန့်ရှင်းသောရေ၊ သန့်ရှင်းသောအစားအစာနှင့် သန့်ရှင်းသောလက်” တို့ကို အလေးထားခြင်းဖြင့် ဝမ်းပျက်ဝမ်းလျှောရောဂါများ ဖြစ်ပွားနိုင်ခြေကို လျှော့ချနိုင်မည်ဖြစ်ကြောင်း ကျန်းမာရေးဦးစီးဌာနမှ သတိပေးပြောကြား ချက်များကို လိုက်နာဆောင်ရွက်သင့်ကြောင်း ရေးသားတင်ပြအပ်ပါသည်။
DOCA(ဧရာဝတီ)